2 Corintios 1
1
So' Pablo dedáxa'na so' 'amaqténataxanaxaicpi 'me néta'ña di' Corinto
1Jaỹim Pablo, da'me ñamaxaságuec chiỹoqo'ot ñi' Dios 'en jaỹim lamaxasec so' Jesucristo. Ñáictapegue' ñi' qadaqáỹa Timoteo. Naỹi 'ami samaxalo jan' ỹidíise, 'ami ỹaqai'ỹolqa 'me 'oquíitapegue' ñi' Dios, 'me 'oñíita'ña na' noic Corinto, qataxa nataq'en ỹima na' lalémaxasetpi ñi' Dios 'me netalégue di' 'aléua Acaya. 2Jaỹim sétaaque da' 'auacoñiiỹet da' nichoxodénataxanaxac qataxa da' n'emáxac 'me chiỹoqo'ot ñi' qadet'a Dios qataxa so' qadesaliaxanec Jesucristo.
Da' ne'queténaxac so' Pablo
3Si'ỹoxodénaq ñi'me netamnaxala' qataxa let'a so' qadesaliaxanec Jesucristo, qá'a naqaiñi ñi' qadet'a 'me qo'mi lichoxodenataqa, qataxa naqaiñi ñi' qantamnaxala' 'me na'chi 'eeta't da' qo'mi ỹ'añaqte't. 4Jiñi'me qo'mi ỹ'añaqte't da' 'uo ga' qan'queténaxac, qaidi qo'mi nataq'en sañoxotaq da' s'añaqtetaq ga' 'uo ga' ne'queténaxac. Qana'chi da'me qad'añaqtaxanaxac, naqaida da' l'añaqtaxanaxac ñi' Dios. 5Qá'a ỹadénaxachichiỹi da' sividaxaguet qo'mi na' sa lec'óxotolec ne'queténaxacpi so' Cristo, qana'chi 'ená'am jeso'me chiỹoqo'ot da' qan'añaqtaguec 'me ỹátaqta sa 'te lec'óxotolec. 6Chan'eesa qomle ñi'queténaqtac qo'mi, qaláxasa náaue da' 'ami qoỹ'añaqte't qataxa 'ami qonec'alaxatréegue. Da' qo'mi ỹ'añaqte't ñi' Dios, qana'chi nataq'en da' 'oñíita 'ami qoỹ'añaqte't, qataxa 'ami qonec'alaxatréegue, qaidi 'adaloi'ỹaguet da' 'anapogáxadiñiiỹet da'me 'queténaxac 'me qo'mi ñi'queténaqtapeeguet. 7Chan'eesa ỹátaqta let'ádaic da' sip'iỹaqtelóo'te que'ami, qá'a saỹátenaqta da' 'ami 'anauañí'ỹi' da'me 'queténaxac, qana'chi nataq'en 'anauañí'ỹi' qomle da' l'añaqtaxanaxac ñi'me Dios.
8'Ami ỹaqáỹa', sétaaque da' 'auaỹáchiñiita da' ỹátaqta sa lec'óxotolec da' qan'queténaxac ca'li souqá'a di' 'aléua Asia. Da'me ỹátaqta let'ádaic, chan'eesa cha ỹivíd'a da' te'me sa qadalo'oguet. Qana'chi sóxote da' sa ñauaqapeela't da' qadec'aléegue. 9Sóxote ma'le senqá'am ga' siỹaxaua 'me let'ádaic ga' lesamaxataxac qana'chi sa qonec'alaxatáiỹi. Qaláxasa da'me ỹ'éte'uo da' qanapaxaguenaguec, da' qaidi sip'iỹáq'a ñi'me Dios 'me n'iỹílaxaseguem qa'en na' napa'lpi, qana'chi sa mai'chi qo'mi. 10Ñi'me 'me naqaiñi ñi' qo'mi nec'alaxatee'guesopa josii'chi da' let'ádaic neleuaxa, maliaxa na'chi 'eeta't da' qo'mi nec'alaxatétrapegueegue. Qataxa ñaquitaqát'a ñi'me da' na'chi 'eeta't da' qo'mi nec'alaxatétrapegueegue, 11lamá'asa qomle 'ami 'alecochiiỹalo, qo'mi 'antamñiitalóo'te. Qana'chi da' jalcote na' siỹaxadipi qo'mi netameetalóo'te, qana'chi 'ená'am jalcote na' ỹaatapecot da' netónaxac ñi'me Dios ỹasouaxat da' lichoxodénataxanaxac 'me qo'mi ỹanema.
Da' 'éeta so' Pablo da' sa ỹiquelól'a da' ỹic'áta di' Corinto
12Qá'a da' ỹí'et da' qadi'ỹoxodénataxanaxac 'enaac: Da' qantouénaxac qo'mi ỹichoxotema da' qadasoxoc ỹátaqta huosóta qataxa qo'mi 'eesoda naỹi da' maliaxa souqátaaue na' siỹaxadipi jen' 'aléua, qataxa lamá'asa da' 'oñíita. Da'me 'ónaxaic qadasoxoc, da'me chiỹoqóchiỹi da' lichoxodénataxanaxac ñi'me Dios, qana'chi sa naqaida da' mai'chi qadaỹátenaxanaxac. 13Qá'a jenaa'me qadedíisel 'me 'ami sedénaqtenaxalo, sa sedaxalégue ga' laqáỹa 'me sa 'auaỹáchiñii da' 'autaxaỹaxañii. Jalgáta ga' 'ami 'auaỹáchiñii. Qana'chi 'uo da' ñaquitaxac da' 'avídi'ỹa da' 'auaỹáchiñii 14da' qomle n'iỹílaq so' qadesaliaxanec Jesús, huá'a, qana'chi qo'mi 'antóñiitapeeque, qataxa 'ená'am ñitónaqtapeeque da' 'ami. Da'me sa 'eesa'me da' ỹima 'auaỹáchiñii.
15Naqaida 'me sep'etelégue ca'li. Chan'eesa 'uo da' ỹiinataxac da' sát'a da' 'ami sec'atalo, da' qaidi 'ami madet'ape da' dos s'iỹílaxalo da' 'ami sesapchiỹalo. 16Tátapiỹi ỹiuel da' 'ami salóo'te ca'li so'me ñanaiỹi jen' Macedonia, qataxa da' s'iỹílaq, qana'chi ỹitaxa salóo'te da' 'ami sesapchiỹalo, qaidi jaỹim 'alcochíiỹa, qomle ỹivíta da' saiỹi da' Judea. 17¿Séele ñiquisisiỹalégue jodamaxa tátapiỹi ỹiuel joca'li? ¿'Ami 'anp'itáxañiitapega jodamaxa da' jaỹim da' 'uo ga' sé'et, qana'chi sená'am da' leenataxac ga' 'chi siỹaxaua da' sa ỹataxalégue da' 'uo ga' 'enaac? 18Qaláxasa ñi'me Dios qo'mi ỹaỹáteete' da' sa 'te da' sa ỹataxalégue ga' senqaac da' 'ami s'aqtaxanaxama. 19Qá'a so' lec'óxot ñi' Dios, lenaxat Cristo Jesús, jeso'me s'axátetac qataxa saua' ỹaqáỹa' Silvano qataxa Timoteo ca'li 'ami souqátaavlo, so'me sa 'te sa ỹataxalégue ga' 'enaac. Da'me n'aqtaxanaxac 'me chiỹoqo'ot so' Cristo ỹátaqta 'eesa, 20qá'a so'me naqaiso so' ỹipaquetelégue qa'en ỹima na' ỹ'axátetacpi ñi' Dios. Chan'eesa da' si'ỹoxodénaq ñi'me Dios, qana'chi chiỹoqóchiỹi so' Cristo Jesús da' senqaac da' qad'ataxac, “Já'a, na'chi 'éeta.” 21Qataxa naqaiñi ñi'me Dios ñi'me qo'mi ỹanema qataxa da' 'oñíita da' sa saxanaxáỹi so' Cristo, qataxa naqaiñi ñi' qo'mi ỹañiilo da' l'onataxanaxanqa. 22Qataxa naqaiñi ñi' qo'mi l'añii's qataxa ỹanoovlo naua' qadiquidiaqtel so' Espíritu Santo, qana'chi naqaiso so'me ỹátaqta ỹ'aiñi qa'en ga'me qo'mi qoỹanema.
23Jaỹim 'uo da' ỹiinataxac da' 'ami sesapchiỹalo. Qaláxasa maliaxa sa 'ami s'iỹílaxalo, ỹasouaxat da' qaidi sa 'te 'ausamaxachiỹa'aguet ga' 'ane'uaxánaguiquii. Da'me ỹaỹáteeta ñi'me Dios. Qaláxasa qomle sa 'éeta da'me, qana'chi temaqaidi da' qoỹacona da' ỹ'óiỹaxac. 24Qá'a qo'mi sa 'te taa'le 'ami ñauánaxagueta ga'me 'ad'amaqténataxanaxaquii, qá'a da' 'adip'iỹáxaquii 'me ỹiỹamqáchiiñi. Jaldáta da' sétaaque da' 'ami ỹicochaxalo, qaidi nichíiseguem da' 'antónaxaquii.
Currently Selected:
2 Corintios 1: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.