Hechos 20
20
Da' ladíquiaxac so' Pablo da' taiỹi di' Macedonia qataxa di' Grecia
1Joca'li sóxote ỹim so'me cotaxac, qana'chi so' Pablo ỹiỹáxanooue na' 'amaqténataxanaxaicpi, da' qaidi ỹanem da' l'aqtac. Ỹim, qana'chi nip'iỹíitapegue' jeso'me, naqapáltapegue', qana'chi taiỹi da' Macedonia. 2Qana'chi quetaỹilo ỹiméda saa'me 'ale'u, ỹátaqta jalcote da' l'añaqtaxanaxac da' ỹ'añaqtetétac na' 'amaqténataxanaxaicpi, cha ỹivíde'ta di' Grecia. 3Huá'a di'me, qana'chi ỹivi't tres 'auóxoiqa da' néta'ña. Joca'li sóxote sétaaque da' noqotá'uo jaso' licota da' taiỹi di' Siria, qana'chi so'me p'iquilégue da' na' judiopi sétaaque da' ỹalaat. Qana'chi so'me v'iỹílaxague na' ladic, talégue di' Macedonia. 4Qana'chi náictapee'to saua' Sópater 'me l'acháqa' di' Berea, qataxa so' Aristarco qataxa so' Segundo 'me l'acháqa't di' Tesalónica, qataxa so' Gayo 'me l'acháqa' di' Derbe, qataxa so' Timoteo, nataq'en so' Tíquico qataxa Trófimo 'me chiỹoqoda'ague di' 'aléua Asia. 5Qana'chi saa'me naqáỹa' 'ua'u, qana'chi ca'li ỹivíded'a di' noic Troas, qana'chi qo'mi ỹiuatétapiỹi. 6Qá'a qo'mi cana'le ỹim so' nolo' nemáxaqui 'me huáaue da' qoỹalic jan' pan 'me sa qoỹa'uo jen' lale'gue, qana'chi qadalémaxaỹi, sachíỹoxosoqchii'ña di' Filipos, ñoqotaqá'uo jaso' licota. Ỹivi't saua' cinco noloqo'te, qana'chi sivítaxa di' Troas di'me huétr'a saa'me. Huá'a di'me, qana'chi ỹivi't saua' siete noloqo'te da' souqát'a di'me.
So' Pablo huét'a di' Troas
7So' 'uáuapiiñi nolo' naua' noloqo'te, qana'chi 'uo so' qademáxac, da' qaidi salíinaq jan' pan. Qana'chi so' Pablo ỹapaxaguéetac na' 'amaqténataxanaxaicpi. Qá'a so'me sétaaque da' jec so' nolo' laqáỹa, qana'chi ỹátaqta 'ecot da' l'aqtaxanaxac, cha ỹivíd'a so' pí'ỹaq lauel. 8Qaa'le so'me qademáxac huásee'mec so' p'áseguem 'emec, ỹátaqta jalcote jan' coỹadáxanaqtepi 'edétanỹi. 9Qaa'le 'uo so' nesoqolec, lenaxat Eutico, nes'ootaa'uet jaso' l'aite so' 'emec. Qá'a so' Pablo ỹátaqta jaloc da' letaxaỹaxac, qana'chi so'me 'uo na' l'ochaxa, cha ỹivíd'a da' ỹátaqta 'etét'ec na' l'ochaxa. Qana'chi n'áqañi, chiỹaqsée'mec so' p'áseguem 'emec, qana'chi qoỹacoosop, qá'a ỹátaqta ỹileu. 10Chan'eesa so' Pablo nenóteegue, qana'chi naqpaxaalégue, qana'chi nesoxouo jeso'me nesoq. Qana'chi 'enapego' so' laỹi, 'enaaco':
—'Ená'te 'au'óỹii; jen'me maliaxa nec'alétaiỹi.
11Qana'chi so' Pablo ỹitaxa v'iỹílaxaseguem. Ỹim, qana'chi necolaxachiñi jaso' pan, qana'chi dequé'e. Qataxa 'ecot da' letaxaỹaxac, cha ỹivíd'aguet so' ỹ'oxoñi, qana'chi jec. 12Qana'chi so' nesoqolec qoỹauéga ga' l'acháqa', qá'a nec'aléegue. Qana'chi ỹima jeso'me siỹaxadipi ỹátaqta mátac.
So' Pablo chiỹoqóchii'ña di' Troas da' taiỹi da' Mileto
13Qo'mi ỹitaxa ñoqotaqá'uo jaso' licota se'uáuaqa'ta di' Asón. Huá'a di'me, qana'chi seuataqa'aguet so' Pablo, qá'a qadeenataxac, qá'a so' Pablo mai'chi leenataxac da' pétañi. 14Cana'le ñauanáxai' so'me di' Asón, qana'chi ñoqotaqá'ai jaso' licota, da' saxague da' Mitilene. 15Ỹitaxa sachíỹoxosoqchii'ña di'me da' qótaxa di' Quío, qana'chi souqá'a di' nalótee'ga. So' nolo' laqáỹa, qana'chi sivítaxa di' nadíỹaxasom lenaxat Samos. Qana'chi qanmataqa' di' Trogilio. Qana'chi so' nolo' laqáỹa, qana'chi sivítaxa di' Mileto. 16Qana'chi 'éeta da' qadadíquiaxac, qá'a so' Pablo leenataxac joca'li da' huá'a di' Asia, qana'chi napacalégue di' Efeso. Qá'a so'me sétaaque té'tataxa ỹivíta di' Jerusalén, da' qaidi huá'a di'me ga' nolo' lenaxat Pentecostés, da' 'uootaxa ỹañoxot so'me.
Da' letaxaỹaxac so' Pablo ca'li huét'a di' Efeso
17So' Pablo joca'li huét'a di' Mileto, qana'chi damaxasóxone'uo na' lasoxola'pi na' 'amaqténataxanaxaicpi 'me néta'ña di' Efeso. 18Joca'li sóxote dasot'a't, qana'chi 'enapego', 'enaac:
—'Ami 'auaỹáchiñii da' 'éeta da' ỹasoxoc chiỹoqóchii'ña so' 'uáuapiiñi nolo' ca'li ỹímta da' ñivíta na' Asia. 19Ỹiméda saua' noloqo'te, da' 'ami souetaavlo da' s'onataxaatapecot so' qadasoxola', qataxa sa jaỹim 'te pagaqtenaxaic. Na'chidáta da' ñoinaxac, qataxa jalcote na' ñ'iinaguec 'me jaỹim ỹ'étec na' judiopi. 20Qaláxasa jaỹim sa saxañi da' 'ami s'axátetapeema ỹima jen'me 'ami ỹ'eteque ga' ỹiỹamqáchiiñi, 'ami sapaxagueet'ape da' 'uo na' nemáxac qataxa da' hua'alo naua' 'ad'acháqa'chídii'. 21Ỹima jen'me judiopi qataxa jen'me sa judiopi séetapega da' ỹigue'm naua' loico, qana'chi 'equegue ñi'me Dios, qataxa da' ỹ'amaqten so' qadasoxola' Jesucristo. 22Naỹi jaỹim saiỹi da' Jerusalén, qá'a jaỹim ỹauec so' Espíritu Santo. Sa saỹáten ga'me séeta qom'chi sóvi'. 23Qá'a jaldáta da' 'uo di' sivíta jen' noicpi, qana'chi so' Espíritu Santo jaỹim d'aqtaxáatapeguem da' 'uo qomle ga' ñicointáguec, qataxa ỹátaqta jalcote da' ñi'queténaxac. 24Qaláxasa ỹima jen'me qaỹa 'te soqo'cha, ỹivíd'a da' mai'chi ỹ'óiỹaxac 'ená'am qasen da' qaỹa 'te náaue. Jaldáta da' sétaaque jaỹim mátac qomle semat da' ñamaxaságuec qataxa da' sepaquetelégue da'me ỹ'onataxanaxac 'me jaỹim ỹanem so' qadasoxola' Jesús, da' qaidi s'axat da' 'ónaxaic qadipí'ic 'me ỹ'axat da' lichoxodénataxanaxac ñi' Dios.
25Qana'chi naỹi jaỹim saỹáteeta da' ỹima da' 'oñíita jen'me s'axátetapeguem ca'li da' l'onataxanaxac ñi' Dios da' ỹimata'a'téna, da' naỹi qana'chi sa ỹitaxa jaỹim nauá'ne'. 26Chan'eesa naỹi 'ami s'axatema da' qaỹa 'te ga' ỹasouaqtac da' 'oñíita. 27Qá'a jaỹim ỹátaqta s'axáteta ỹima jen'me 'éetapeecpi ñi'me Dios, qaỹa 'te soxotétapiiñi. 28Chan'eesa ñi' 'oonolec da' 'oñíita ỹátaqta netelela't qomle, qataxa nataq'en 'adichilíiỹa ỹima qomle na' 'amaqténataxanaxaicpi 'me 'ami ỹipataxalóo'te so' Espíritu Santo da' qaidi 'auloilégue. Jen'me mai'chi lalémaxasetpi so' qadasoxola', neuodénaxatpi, laso'vi jaso' letauo' joca'li qoỹalaat. 29Qá'a jaỹim saỹáteeta da' qomle secá'ai jen'me, qana'chi 'uo qomle ga' laqáỹa janac da' sétaaque noláxachiñi na' 'amaqténataxanaxaicpi, 'ená'am ga' síiỹac da' di'quiỹaac da' detoxónỹi jan' n'aanaxatepi. 30Qataxa da' 'oñíita 'uo qomle ga' mai'chi 'ami chiỹoqotoovlo, qana'chi dapaxaguenataxanec na' 'chi nesepegaxanaxac, qana'chi sa ỹ'axat ga' ỹátaqta 'eesa, qá'a sétaaque da' jen' 'amaqténataxanaxaicpi 'equegue ga'me. 31Ma'choqo' qomle, 'anloiséguem, 'aueenachiỹo' qomle saua' tres 'uóidi, da' ỹica'n naua' noloqo'te qataxa naua' pi'ỹáxadi da' 'ami saqátetapegalo, ñoỹiitalégue ñi' 'oonolec da' 'oñíita.
32Naỹi 'ami ỹaqáỹa', 'ami sepotan'aita da' letelaqtaxanaxac ñi' Dios qataxa da'me n'aqtaguec da' lichoxodénataxanaxac 'me ỹátaqta 'uo da' lañoqtaxanaxac, da' qaidi 'ami ỹ'añaqte't, qataxa qaidi 'ami 'auacoñiiỹet ga'me ỹaqátaxatapiiỹe't ñi' Dios da' ỹanem ỹima jen'me lalémaxasetpi. 33Jaỹim sa 'te ñaquitét'a josii'cho' jaga' 'chi nemena 'uootaxa ga' loxot ga' gamachaqaiga siỹaxaua. 34Na'chidáta da' 'auaỹáchiñiita 'ami da' jaỹim ỹátaqta s'onataxáatac, da' qaidi ñaqachiñi ga'me seuéetaaque qataxa naua' ỹiquiáxa'u. 35Na'chi 'eeta't da' 'ami sapaxaguéetapeeque da'me ga' siỹaxaua d'onataxan, qaidi ỹañoxot da' lecochiỹa ga'me 'uo da' leuénaxanaxa. Seenataqá'ta qomle da' l'aqtac joca'li so' qadasoxola' 'me 'enaac: “Ỹátaqta machiỹaa ga' siỹaxaua qomle dachítaqtaxan, sa 'ená'am ga'me 'chi qoỹachítetac.”
36Joca'li ỹim da' letaxaỹaxac so' Pablo, qana'chi ỹisóidiñi naua' liliictel da' netamná'ai ỹima jeso'me 'amaqténataxanaxaicpi. 37Chan'eesa jeso'me ỹima noỹíitaỹi, qana'chi qoqapáltapeec so'me, qataxa qonec'ouóqtac. 38Qataxa ỹátaqta daquicóta so' siỹaxadipi, qá'a so' Pablo 'enaac da' sa ỹitaxa taa'le qonauá'ne'. Ỹim, qana'chi qopiỹai'ỹi, qoỹauéguee'ga jaso' licota.
Currently Selected:
Hechos 20: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
