Hechos 21
21
Da' leuoxoc so' Pablo ca'li taiỹi da' Jerusalén
1Ca'li ma'le qolqá'ai so' qadaỹi, qana'chi senótaxauo, qana'chi ỹiuótaq'a di' nadíỹaxasom lenaxat Cos. So' nolo' laqáỹa, qana'chi sivítaxa di' Rodas. Huá'a di'me, qana'chi saxa di' Pátara. 2Huá'a di'me, qana'chi sauadaq'aguet jaso' licota 'me taỹa'ague da' Fenicia. Qana'chi ñoqotaqá'uo jaso'me, qana'chi qadalémaxaỹi. 3Cana'le qolqáta, qana'chi 'chi seloqót'ata jañi' nepe di' Chipre p'aỹa'ague jen' qan'emaq, qana'chi cha sivídaq'a di' Siria. Qá'a jaso' licota qoniỹóxoñi na' lé'ec cana'le huá'a di'me nadíỹaxasom Tiro, qana'chi saxauó'o di'me. 4Qana'chi qo'mi ñauanáxai' na' 'amaqténataxanaxaicpi, qana'chi souqátaaue jeso'me saua' siete noloqo'te. Qana'chi so' Espíritu Santo d'aqtaxanem jeso'me 'amaqténataxanaxaicpi, da' qaidi 'enapéga so' Pablo da' qaidi sa taiỹi da' Jerusalén. 5Ca'li ỹinoxodéegue saua' siete noloqo'te, qana'chi ỹitaxa qolaq. Qana'chi ỹima so' 'amaqténataxanaxaicpi ỹiméta na' ỹauodipi qataxa na' lec'oqtepi da' qo'mi ỹicaadai'ỹi da' lai di' noic. Cana'le sivídaqaasó'ma so' loxogue, qana'chi qo'mi sesógaxadiñi naua' qadiliictel, qana'chi ñitamnaqátac. 6Huá'a, qana'chi ñaqapálaqtapegue' jeso'me da' ñip'iỹínaqtapegue', qana'chi sonqánỹi jaso' licota. Qana'chi jeso'me v'iỹílaxa'ualo naua' l'acháqa'te.
7Qana'chi sachíỹoxosoqchii'ña di' Tiro, cha sivídaqat'a di' Tolemaida. Huá'a di'me, qana'chi tá'ña da' qadeuoxoc da' qolqátanỹi na' noxop. Huá'a di'me, qana'chi ñauanáxai' so' qadaỹi, qana'chi 'oonolec so' nolo' da' souqátaaue. 8Qana'chi so' nolo' laqáỹa, qana'chi so' Pablo nataq'en qo'mi ỹitaxa qadalémaxaỹi, qana'chi sivídaq'a da' noic Cesarea. Huá'a di'me, qana'chi qótaxa'ỹa di' l'acháqa' so' Felipe 'me ỹ'axátetac da' l'aqtac ñi'me Dios, so'me 'oonolec saua' siete necochaxau'pi josii'cho'. Qana'chi souqá'a di' l'acháqa'. 9So' Felipe huo'oi saua' cuatro lec'oqotel. Saa'me maliaxa sa 'uo'n, jesaa'me l'aqtáxanaxanal ñi' Dios. 10Cana'le huo'oi saua' noloqo'te da' souqát'a di' l'acháqa', qana'chi nividi't so' letaxaỹáxanaxanec ñi' Dios, lenaxat Agabo, chiỹaqá'a di' Judea. 11So'me qo'mi nesapchiỹalo. Qana'chi so'me ỹacona so' nesáataxaqui so' Pablo, qana'chi mai'chi ỹicoñidiilo naua' lichil qataxa naua' loua'. Qana'chi 'enaac:
—So' Espíritu Santo 'enaac da' l'aqtaxanaxac di'me judiopi 'me l'acháqa' di' Jerusalén naq'áita qomle da' qoỹíit'ec ñi'me loxot jénjo' sáataxaqui da' qoỹicoñi'. Ỹim, qana'chi ỹaneuó'o na' sa judiopi.
12Cana'le semacháxa'ỹi da'me, qana'chi qo'mi qataxa na' qadaỹi 'me néta'ña di' Cesarea, qana'chi ñachoxodénaqtapecot so' Pablo, da' qaidi sa taiỹi da' Jerusalén. 13Qaláxasa so' Pablo 'enaaco':
—¿Tá'nooqo'chi 'anoiñíitac qataxa sétaaque 'te da' jaỹim 'auaquicoqchichii? Jaỹim ỹátaqta qaỹa 'te ga' sega, da' 'uootaxa jaỹim qoỹicoñi', 'uootaxa da' jaỹim qoỹalaat da' souá'a di' Jerusalén, da' sasoilégue so' qadasoxola' Jesús.
14Qá'a sa 'te qo'mi ỹalaxagueta so' Pablo, qana'chi saxanaxañi, qana'chi senqátapega, senqaac:
—N'óota qomle ỹátaqta ỹipaquíchiỹi ga' 'éetapeec ñi' qadasoxola'.
15Ca'li ỹim da'me, qana'chi ñiỹamaxataqátac da' saxague di' Jerusalén. 16Qana'chi huo'oi saua' ñáigaqtapee'to jen'me 'amaqténataxanaxaicpi 'me l'acháqa' di' Cesarea, nataq'en ỹalquétaavlo saa'me so' chiỹaqa'ague di' Chipre, so'me lenaxat Mnasón. So'me sóxote sa lequese'egue da' 'amaqténataxanaxaic. Naqaiso so' 'éetapega da' souqa'asop ga' l'acháqa' da' sivídaxa.
So' Pablo desapchiỹa so' Jacobo
17Ca'li ma'le sivítaxa di' Jerusalén, qana'chi na' qadaỹi ỹátaqta qo'mi netootapeeque. 18So' nolo' laqáỹa, qana'chi so' Pablo qataxa qo'mi c'ótaxa'uo so' Jacobo. Qana'chi so'me net'asop ỹima so' laỹi nasoxola'pi. 19Qana'chi so' Pablo nip'iỹíitapegue' ỹima jeso'me. Ỹim, qana'chi ỹachiỹoxochíchii'ña da' ỹ'axátetac ỹima jen'me ỹí'etpi ñi' Dios 'me ỹachiỹoxotaỹi so'me da' huáaue qa'en jen'me sa judiopi. 20Qaa'le ca'li ỹim da' qonaquiáxana ỹima da'me, qana'chi ỹátaqta qoỹi'ỹoxodéetac ñi'me Dios. Ỹim, qana'chi qoỹíitapega so' Pablo, qoỹinaac:
—Já'a, 'am qadaqáỹa, 'am sóxote 'auaỹáten da' na' judiopi ỹátaqta jalcote na' d'amaqtenataxan. Jen'me ỹátaqta ỹima da' ỹipaquétapegue' da' qodiiỹi jen'me laqátaxacpi so' Moisés. 21Jen'me p'iquitapeelégue da' 'am 'auapaxaguéetapeeco' ỹima jen'me judiopi 'me na'alo naua' 'ale'u ỹoda'alo, da' qaidi sa ỹalaxaguet jen'me laqátaxacpi so' Moisés, qataxa qonetapego' da' qaidi sa ỹa'uo na' n'anaxat na' ló'oc na' lec'óxot, qataxa ỹaxadéegue naua' mai'chi qadasoxoco. 22Qana'chi naỹi ¿jái'te ga' 'éeta? Qá'a na' siỹaxadipi ỹima'a't qomle dip'iquilégue da' 'am sóxote 'anóvi'. 23Chan'eesa 'am n'óota da' 'aué'et qomle ga' qad'aqtac, 'enaac: Huo'oi naua' cuatro siỹaxa'u souqat'aita 'me sóxote ỹivíta ga' lalóqo' ga'me l'aqta'j josii'cho' da' qaidi ỹauóte ga' ỹaatot ñi' Dios. 24Na'chinaua qomle 'anáicapee'to da' 'aniỹóxo'u. Ỹim, qana'chi 'avisiichíñii jaga'me laso'vi da' 'aniỹóxoqui. Qomle ỹim, qana'chi naa'me ỹañoxo't da' nepete'j na' laỹoqo'te. Naqaida qomle da' 'onét'ec, qaidi ỹima qoỹaỹáten da' sa 'eesa da'me 'an'aqtaguec, qá'a na'chidáta da' 'am nataq'en ỹátaqta 'aualaxaguet ỹima 'aupaquetelégue na' naqátaxacpi. 25Qaláxasa jen'me sa judiopi 'me sóxote d'amaqtenataxan, jen'me sóxote sauoqo ca'li jaso' qadidíise da' senaqpéga, da' qaidi sa nedénapee'ualo naua' qadasoxoco. Na'chidáta da' jen'me sa ỹalic qomle jen' lapat jen'me sóxote qoỹanot na' 'chi nadénaqtac, qataxa sa ỹalic jan' netauo' qataxa na' lapat ga' 'chi ỹichigoo'ue na' loqosot, qataxa qaỹa 'te qomle da' 'uo ga' nichíuatetapegue' jaga' sa loua.
Qoỹicoñi' so' Pablo huáaue so' tamnaxaqui di' Jerusalén
26Chan'eesa so' Pablo liquiáxa'u saua' cuatro siỹaxa'u. Qana'chi so' nolo' laqáỹa, qana'chi nataq'en niỹoi' saa'me. Ca'li ỹim, qana'chi ỹic'átre'uo jeso' tamnaxaqui da' ỹichoxo't ga'me nolo' 'me lalóxoqui da' ỹim da' niỹóxo'j, ga'me nolo' 'me huáaue da' ỹaadéuo jaga' lachítaqtaxanaqte'.
27Qaláxasa ca'li ỹinoxótraiỹi saua' siete noloqo'te, qana'chi huo'oi saua' judío lase' 'me chiỹoqoda'ague di' 'aléua Asia. Saa'me ỹilodalégue so' Pablo da' huétaaue jeso' tamnaxaqui. Qana'chi saa'me ỹ'e't da' l'áxa so' siỹaxadipi, ỹátaqta sa nela'a't qa'en. Qana'chi qoỹaconé'uo so' Pablo. 28Qana'chi qoỹ'alqatalégue so'me, qoỹinaac:
—¡'Ami Israel lé'ecpi, ỹa qo'mi 'alcochiiỹalo! Dójo' da'me siỹaxaua 'me ỹátaqta nimíchiseguem qa'en naua' ỹiméda 'ale'u da' ỹapaxaguéetapeec na' siỹaxadipi, da' qaidi nauté'ne' na' qad'acháqadiaxau'pi, qataxa jen' naqátaxacpi 'me chiỹoqo'ot so' Moisés, qataxa jen'me qantamnaxaqui. Qataxa naỹi qataxa ỹinoxonaqtróoue jen' qantamnaxaqui naua' griego lase', ỹisepaxanaqte't jen' tamnaqa' 'me sa qoỹisetaxat.
29Jesaa'me 'enapega'to' da'me, qá'a ỹauáachiỹi joca'li so' Pablo huáaue so' noic da' náictapegue' so' Trófimo, so'me Efeso lé'ec. Qana'chi qonp'itáxatapega da' so' Pablo ỹauégooue jeso' tamnaxaqui so'me.
30Qana'chi ỹima na' siỹaxadipi 'me néta'ña so' noic ỹátaqta sa nela'a't, naqalégoqtaỹi. Qana'chi qoỹaconé'uo so' Pablo, qoỹauécai'ỹa so' lai jeso' tamnaxaqui. Qana'chi sa huaỹáloq da' qoỹapadíñiilo naua' so'mi. 31Qana'chi sétaaque da' qoỹalaat. Qaláxasa ca'li sóxote 'uo da' lipí'ic so' huataxanaq let'a da' ỹima jeso'me noic Jerusalén da' ỹátaqta 'uo da' l'áxa. 32Chan'eesa so' huataxanaq let'a ỹimata'a't so' nesoxonaqapi qataxa so' lecochaxau'pi, qana'chi naqalégoqo'ta so' huét'a so' siỹaxadipi. Qana'chi ca'li qoỹila'aguet so' huataxanaq let'a qataxa so' nesoxonaqapi, qana'chi qoỹaxañi da' qoỹi'uaxáatac so' Pablo. 33Chan'eesa so' huataxanaq let'a nichíi'uo, qana'chi qoỹaconé'uo so' Pablo, qana'chi damaxasoxolégue da' qoỹicoñida't naua' loua' saua' leque'te. Joca'li ỹim, qana'chi dachimaqtaxáatapeelégue so'me qataxa ga'me ỹí'et so'me. 34Qaláxasa so' siỹaxadipi ỹátaqta ỹ'alqátaỹi. Qana'chi so' huataxanaq let'a ỹátaqta sa demachíỹapeguem, qataxa sa ỹaỹáten ga' 'éetac, qá'a ỹasouaxat jen' n'alaxacpi. Qana'chi damaxasoxolégue da' qoỹauéga so' l'acháqa' na' huataxanaq. 35Ca'li qouét'a ga' l'acháqa' na' huataxanaq, qana'chi ỹátaqta qonpiiséguem so' Pablo ỹasouaxat da' ỹi'uaxáatac so' siỹaxadipi. 36Qá'a ỹima jeso'me nec'ataxáatauo, ỹátaqta ỹ'alqátaỹi, 'enaac:
—¡N'óota da' qoỹalaat!
So' Pablo ỹa'uo da' l'aqtac da' dasoỹa'aguet so' siỹaxadipi
37Joca'li ma'le sétaaque da' qoỹip'áxaneuo so' Pablo, qana'chi so'me 'enapego' so' let'a na' huataxanaq, 'enaac:
—¿Qo'li n'óota da' 'uo ga' ỹ'aqtac?
Qana'chi so' net'a 'enaaco':
—¡'As! ¿Qa'chi 'auaỹáte'no' naua' l'aqtaqa na' griegopi? 38Qa'chi ¿sa naq'amo' so'me Egipto lé'ec 'me 'uo so' nolo', qana'chi ỹí'et so' p'aguénaxac, qana'chi ỹauéguee'ga so' totelégue so' cuatro mil siỹaxadipi 'me laataxanaxaicpi?
39Chan'eesa so' Pablo 'enaaco':
—'Axai', jaỹim judío lé'ec, ỹañoqo' di' noic Tarso 'me ỹ'oxodaic, huáaue di' 'aléua lenaxat da' Cilicia. Qaláxasa ỹa jaỹim 'auchoxoden, jaỹim 'auaséet'em da' sa'uo ga' ỹ'aqtac jen'me siỹaxadipi.
40Qana'chi so' huataxanaq let'a ỹaséet'em so' Pablo da' dose. Qana'chi so' Pablo ñíseguem, nichaachiñi, qana'chi nodíseguem na' louaq da' 'enapéga na' siỹaxadipi da' ỹ'imáqta. Joca'li ma'le tóchiiñi, qana'chi so'me dose, ỹaconalo naua' l'aqtaqa na' judiopi. Qana'chi 'enaaco':
Currently Selected:
Hechos 21: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
