Hechos 23
23
1Chan'eesa so' Pablo ca'li ỹilápegooue so' net'alpi 'me ỹ'étac na' nasoxocpi. Qana'chi 'enaaco':
—'Ami ỹaqáỹa', jaỹim cha ỹivíd'a naỹi da' qaỹa 'te ga' taỹapíỹi ỹiuel, ñi' Dios ỹaỹáten.
2Qaama'le so' Ananías 'me naqaiso so' lasoxola' na' netaxaỹáxanaxanecpi da' qodosápegue' ñi' Dios, jeso'me ỹiladelégue jen'me sa ỹiỹotáaque so' Pablo, da' qaidi ỹi'uaxánooue na' nedégaxat so'me. 3Qaláxasa so' Pablo 'enaaco':
—¡Ñi'me Dios 'am ỹi'uaxan qomle, 'am 'me 'onapeela't 'am 'eesa! 'Am 'ans'oota'ñína da' qaidi jaỹim 'audolégue na' naqátaxacpi da' qaidi jaỹim 'anmit, qaláxasa ¿tá'nooqo'chi 'anpaténeeta naua' naqátaxaco da' jaỹim 'auamaxasoxolégue da' jaỹim qoỹi'uaxan?
4Qana'chi so'me huet'edi 'enapego' so' Pablo, 'enaac:
—¿Tóoqo'chi 'onéta da' 'ausouen ñi'me lasoxola' na' netaxaỹáxanaxanecpi da' qodetaxaỹapégue' ñi' Dios?
5Qana'chi so' Pablo 'enaaco':
—'Ami ỹaqáỹa', jaỹim sa saỹáten ñi'me da' na'chiñi ñi'me lasoxola' na' netaxaỹáxanaxanecpi; qá'a 'enapega't naua' nedétrañi l'aqtaqa ñi' Dios, 'eet'oi: “Sa 'ausouen qomle ga'me let'a na' mai'chi 'adaỹi.”
6Chan'eesa so' Pablo ca'li ỹilá'a da' 'uo na' saduceopi so'me net'alpi 'me ỹ'étac jen' nasoxocpi, qataxa 'uo na' fariseopi. Qana'chi so'me ỹátaqta n'áaloxodenque naua' l'aqtaqa, 'enaac:
—'Ami ỹaqáỹa', jaỹim fariseo lé'ec, qana'chi sachiỹaqaaue na' fariseopi. Qana'chi jaỹim ñaquitét'a qomle ỹitaxa qonec'alaxadiséguem na' napa'lpi, qaama'te naỹi jaỹim qanmichíitac.
7Ca'li 'enaac da'me, qana'chi na' fariseopi qataxa na' saduceopi mai'chi p'aỹa't da' dapeda't. Huá'a, qana'chi jeso'me colaxaỹi. 8Qá'a jen'me saduceopi, jen'me 'éetapega jen' napa'lpi da' sa ỹitaxa da' nec'aliséguem, qataxa qaỹa 'te ga' chiỹaqséguem da' lamaxasec ñi' Dios, qataxa qaỹa jen'me sa di'ỹoq; qaláxasa na' fariseopi ỹ'amaqten da' 'uo ỹima jen'me. 9Qana'chi ỹima jeso'me ỹ'alqátaỹi; 'uo na' nichaachiñi jen'me dapaxaguenataxanapeec na' naqátaxacpi 'me mai'chi laỹi na' fariseopi. Qana'chi jen'me 'enaac:
—Dójo' siỹaxaua, da'me qaỹa 'te ỹacoñíỹi ga' sa ỹiỹamaxañi, qá'a sa qoue da' 'uootaxa jeda'me dosétapegue' jen'me piỹem lé'ecpi, 'uootaxa ga' sa di'ỹoq. Qana'chi n'óota qomle da' 'ená'te 'uootaxa ñicotaqátapegue' ñi' Dios.
10Qana'chi ỹátaqta let'ádaic da' cotaxac. Qana'chi so'me huataxanaq let'a ỹátaqta 'uo da' loqolánaxa da' qonauécapiỹi so' Pablo. Huá'a, qana'chi damaxasóxonee'ga so' nesoxonaqapi da' qaidi qoỹachiỹoxotétooue so'me siỹaxadipi so' Pablo, qana'chi ỹitaxa qoỹauée'uo so' l'acháqa' na' huataxanaq.
11Qana'chi jeso'me pí'ỹaq, qana'chi so' qadasoxola' naloxóna so' Pablo, qana'chi 'enapéga 'enaac:
—'Am Pablo, 'an'añaxat qomle, qá'a da'me 'onét'ec da' jaỹim 'au'axátetac ca'li 'ouét'a na' Jerusalén, nataq'en na'chida qomle da' 'onét'ec da' jaỹim 'au'axat qomle 'ouá'a di' Roma.
Qodosétapiỹi da' qoỹalaat so' Pablo
12So' nolo' laqáỹa, qana'chi 'uo na' judiopi na' dosétapiỹi da' sétaaque da' ỹalaat so' Pablo, qana'chi jeso'me ỹan da' l'aqtac da' 'enaac da' sa dequé'e, qataxa sa niỹom, da' qomle maliaxa sa qoỹalaat so'me. 13Qaa'le napacalégue di' cuarenta so'me siỹaxadipi 'me n'íchiỹi dójo'. 14Qana'chi so'me ỹic'áte'uo so'me lasoxola' na' netaxaỹáxanaxanecpi, qataxa jen'me ỹ'axaicáchiipi jen'me judiopi, qana'chi 'enaaco':
—Qo'mi sanaxáiỹi da' qad'aqtac, da' qaidi sepagaqatelégue da' sa siqui'ỹaq qomle maliaxa sa salaataq so' Pablo. 15Naỹi 'ami qataxa jen'me laỹi net'alpi 'me ỹ'étac na' nasoxocpi, 'aviỹáxañiỹot qomle ñi' huataxanaq let'a, da' qaidi qomle ỹ'oxoñi néte'ta qana'chi navigui't ga' Pablo, 'chi 'aviñiit'oi qomle da' sétaaque da' ỹátaqta 'auc'achiñii jeda'me huasoilégue so'me. Qana'chi qo'mi qomle, qana'chi sóxote ñiỹamaxataqata't, da' qaidi salaataq ga'me qomle cha'li naỹáuo.
16Qaláxasa so'me la'ỹolec so' Pablo dip'iquilégue da'me, qana'chi jeso'me jec ỹic'áte'uo so' l'acháqa' na' huataxanaq, qana'chi d'aqtaxanem so' Pablo. 17Qana'chi so' Pablo ỹiỹáxana so' 'oonolec so'me lecochaxau'pi so' huataxanaq let'a, qana'chi 'enapéga, 'enaac:
—'Auauée'uo qomle da'me nesoq ga' net'a, qá'a da'me 'uo da' l'aqtaxanaxac, qaidi d'aqtaxanem ga'me.
18Qana'chi so'me lecochaxaua so' net'a ỹauée'uo jeso'me so' net'a, qana'chi d'aqtaxanem, 'enaac:
—Ñi'me Pablo 'me necointáisec, jiñi'me jaỹim ỹiỹáxana. Qana'chi jaỹim 'enapéga da' qaidi 'am ñauée'uo da'me nesoq, qá'a 'uo ga'me l'aqtaxanaxac da' 'am ỹ'axátem.
19Qana'chi so' net'a ỹacona na' louaq so' nesoqolec, qana'chi ỹiỹotái'ỹa. Qana'chi ỹinatétac, 'enaac:
—¿Jái'chi ga'me sétaaque jaỹim 'au'axátem?
20Qana'chi so' nesoq 'enaaco':
—Jen'me judiopi sóxote nemá'te' da' l'aqtac da' sétaaque da' 'am qoỹiỹaxanot qomle ỹ'oxoñi, da' qaidi 'auauéga ñi' Pablo na' net'alpi 'me ỹ'étac na' nasoxocpi, 'chi qodoqovinaxalégue da' qoỹíitapega da' ỹátaqta qonimitáaque ga'me lasouaxaset. 21Qaláxasa 'ená'te 'au'amaqten; qá'a napacalégue di' cuarenta na' siỹaxadipi na' nañoxótetapiiñi dauánaxaatac. Jidi'me naỹi sóxote niỹamaxateta't, 'chi qoỹiuatét'a ga' 'ad'aqtac.
22Qana'chi so' net'a nip'iỹí'ne' so' nesoq, qana'chi 'enapéga so'me da' qaidi qaỹa 'te ga' ỹ'axátem dójo'.
Qoỹamaxa so' Pablo so' net'a lenaxat Félix
23Qana'chi so' net'a ỹiỹaxanalo saua' dos 'me ỹilódapegue' na' huataxanaq, qana'chi 'enapegalo da' qaidi ỹaqátaxatra't ga' doscientos huataxanaq na' pétañi, qataxa setenta jen'me pegaq ladi'pi, qataxa doscientos jen'me ỹauót'ai jan' nimiỹoxo, qá'a qomle copat'egue na' pí'ỹaq, qana'chi jeso'me qoỹamaxague da' Cesarea. 24Nataq'en damaxasoxolégue da' qoỹaqátaxata't ga' lenótaxala' pegaq so' Pablo. Qana'chi huaqáta da' qaỹa 'te 'uo qoỹin da' qoỹauéga so' net'a Félix. 25Qana'chi ỹidénaqteneelo saa'me jaso' lidíise 'me huetalégue da' 'enaac:
26“Jaỹim Claudio Lisias, 'am samaxa da' ỹip'iỹénataxanaxac, 'am ñauotaxaua ỹit'a Félix. 27Na' judiopi ca'li ỹaconé'uo na'me siỹaxaua, qana'chi sétaaque da' ỹalaat. Qaláxasa cana'le saỹáten da' romano lé'ec jen'me, qana'chi sa'uo na' ñisoxonaqapi, qana'chi sec'áta da' se'uolégue. 28Ca'li sétaaque da' saỹáten ga'me 'uo 'me qonep'aguéetapega, qana'chi sauéga na' let'alpi na' judiopi. 29Huá'a, qana'chi saỹáten da' 'chi huasoitapeelégue qoỹin na' mai'chi laqátaxacpi jen'me judiopi, qana'chi qaỹa ga'me ỹátaqta huasoilégue na'me da' qaidi qoỹalaat, 'uootaxa da' qoỹicoñideta't. 30Qaláxasa ca'li sanóm'a da' na' judiopi sóxote dosétapiỹi da'me da' sétaaque da' qoỹalaat, qana'chi jena'me 'am samaxa. Nataq'en séetapega jen'me nep'aguéetapega na'me da' qaidi nataq'en 'am dasoỹot, da' qaidi ỹ'axat ga'me huasoitapeelégue qoỹin na'me. Qana'chi na'chi táchi'ndi.”
31Chan'eesa so'me nesoxonaqapi ỹí'et da'me l'aqtac so' net'a. Qana'chi so' pí'ỹaq qana'chi qoỹinótaxaseguem so' Pablo, qoỹauéga di' noic Antípatris. 32So' nolo' laqáỹa, qana'chi n'iỹílaxa so' l'acháqa' so' huataxanaq 'me pétañi, qana'chi nedóteegue so'me huót'ai lalo 'me náictapegue' so' Pablo. 33Ca'li qoỹivíta di' Cesarea, qana'chi qoỹanem so' net'a jaso' nidíise, nataq'en qoỹaneuo so' Pablo. 34Ca'li ỹimat da' ỹitaxaỹaxanaxáatac jaso' nidíise so' net'a, qana'chi ỹinatétac so' Pablo da' ga'me chiỹoqóchii'ña. Joca'li sóxote ỹaỹáten so'me da' chiỹoqot'ague da' Cilicia, 35qana'chi 'enapego', 'enaac:
—Mai'chi 'am ñaquiaxano' qomle nóvi' ga'me 'am nep'aguéetapega.
Ỹim, qana'chi damaxasoxolégue so'me da' qaidi qoỹauéga da' qoỹanáaue so' l'emec josii'cho' so' Herodes. Qana'chi qoỹa'uo so' nouatoqo'tpi.
Currently Selected:
Hechos 23: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
