Hechos 24
24
Da' losáxac so' Pablo ca'li qoỹasoxonot so' net'a Félix
1Ca'li ỹinoxodéegue saua' cinco noloqo'te, qana'chi nóvi' so' Ananías, so'me lasoxola' na' netaxaỹáxanaxanecpi, chiỹoqot'ague da' Cesarea, náictapegue' so' nasoxonaqapi qataxa so' ló'o na' nesamaxataxac, lenaxat Tértulo. Qana'chi saa'me ỹic'átra'uo so' net'a, da' qaidi qoỹ'axat ga'me huasoilégue so' Pablo. 2Ca'li sóxote qonauée'uo so' Pablo, qana'chi so' Tértulo d'aqtaxanem so' net'a Félix da' ỹ'axat ga'me lasouaxaset so' Pablo, 'enaac:
—Ỹasouaxat da' 'onéta, 'am qadet'a, qo'mi 'uo da' qadamaic, ỹátaqta selagaqátapiiñi, qataxa ỹima da' 'ad'onataxanaxac da' 'am net'a ỹátaqta ỹiỹamqáchiiñi, qá'a 'uo da' 'adaỹátenaxanaxac. 3Qana'chi ỹima jen'me siỹaxadipi 'me na'alo naua' 'ale'u ỹátaqta na'chi 'eeta't da' netóot'ac da'me 'ad'onataxanaxac, 'am qadet'a. 4Qaláxasa jaỹim sétaaque da' sa jaloc ga' ỹosáxac, chan'eesa 'am ñachoxodenot da' qo'mi 'anqouagueque da' cadá'ac da' qo'mi 'anaquiaxanalo. 5Qá'a qo'mi ỹátaqta selaqalégue ñi'me siỹaxaua da' ỹátaqta sa dalemaqtaxan, qataxa ỹiméda naua' 'alé'u laqáỹa' ỹ'étec da' colaxaỹi qa'en na' judiopi, qataxa na'chiñi ñi'me lasoxola' jen'me lasoxoñiisecpi so' qoỹimatá'ac Nazaret lé'ec. 6Jiñi'me nataq'en ỹivíd'a da' sétaaque da' le'uenec jiñi' qantamnaxaqui let'ádaic di' Jerusalén, qana'chi qo'mi saconáxa'uo da' secoindaq, qataxa ñimitaqátac, sedoxolégue na' mai'chi qanaqátaxacpi. 7Qaláxasa so' huataxanaq let'a Lisias qo'mi huañiilo, qana'chi ỹátaqta sa dodínataxanaac da' deuootáxanec. 8Chan'eesa so'me 'enapéga na'me nep'aguéetapega ñi'me da' janac da' 'am nec'áta. Qana'chi naỹi 'am mai'chi 'auachimaxata ñi'me da' 'uootaxa sa 'eesa da'me qad'aqtaxanaxac da' s'axátaqtac 'me ỹima lasouaxaset.
9Qana'chi jen'me judiopi 'me ỹalquétauo ỹima nemáseguem da' 'enapéga ỹátaqta 'eesa da'me. 10Chan'eesa so' net'a ỹatecapéga so' Pablo, da' qaidi dose. Qana'chi so' Pablo 'enaaco':
—Jaỹim ỹátaqta quetelégue ỹiuel da' sa'uo ga' ỹosáxac, da' qaidi jaỹim 'amachíỹa, qá'a jaỹim saỹáten da' 'am 'me na'chi'am 'aué'et na' lasoxocpi da' 'uo ga' gamachaqaiga jen'me qadaỹi, da'me 'ad'onataxanaxac, da'me sóxote qaỹóxode' saua' 'uóidi. 11Naỹi 'am mai'chi 'auachimaqtaxalégue qomle da' ỹ'aqtaxanaxac, qá'a jaỹim ỹímta ma'le ñivíta di' Jerusalén, naỹi maliaxa sa ỹivi't gaua' doce noloqo'te, jaỹim ñanac da' sétaaque da' ñitamenot ñi' Dios. 12Qataxa sa jaỹim 'te qonatenalégue taa'le 'uo ga' ñicotátapegue', 'uootaxa da' s'étec da' sa naỹáten na' siỹaxadipi jiñi' tamnaxaqui, 'uootaxa da' huáaue jiñi' lemáxaqui na' judiopi, 'uootaxa ga'me hua'ague di'me noic. 13Jénjo' siỹaxadipi sa 'eesa qa'en ỹima na'me 'éetapega da' ỹasouaxaset. 14Qaláxasa jaỹim ñ'axátetela't da' jaỹim s'onataxáatapecot ñi'me netamnaxala' so' huá'au ỹit'alpi, qaláxasa sequétapegue' da'me dálaxaic nadíquiaxac 'me jen'me judiopi ỹimatá'ac da' dálaxaic n'amaqtenataxanaxac, qá'a jaỹim s'amaqten ỹima jen'me nedétañi naqátaxacpi 'me chiỹoqo'ot so' Moisés qataxa so'me letaxaỹáxanaxanecpi ñi' Dios. 15Qataxa na'chi sená'am jen'me da'me qanaquitaxac ñi' Dios da' jen' napa'lpi da' ỹitaxa nec'alaxadiséguem, ga'me 'ónaxaicaloic qataxa ga'me qalhuaxaic. 16Chan'eesa jaỹim ỹátaqta 'uo da' ỹitelaxa da' ỹátaqta qaỹa 'te 'uo da' ỹaviliỹáxac, da' qaidi qaỹa 'te ga' huet'ot ỹisamaxataxac ñi' Dios, qataxa ỹima na' siỹaxadipi.
17Qaláxasa ca'li lamai' saua' 'uóidi da' secoléetac, qana'chi jaỹim ñ'iỹílaxa di' ỹ'acháqa' Jerusalén da' ñido't jaso' ỹ'agaxanaqte qataxa da' sanot jaga' ỹachítaqtaxanaqte ñi' Dios. 18Qaa'le ca'li jaỹim s'étetac dójo', qana'chi huo'oi saua' judío lase' 'me chiỹoqoda'ague di' Asia. Saa'me jaỹim ỹic'atéetrac da' souétaaue jiñi' tamnaxaqui let'ádaic, ca'li ma'le semat da' ñiỹóxoc da' s'étetac da' mai'chi qan'onataguec. Qaláxasa sa léca na' siỹaxadipi, qataxa qaỹa 'te ga' cotaxac. 19Naqaigaua toqo' gaua' siỹaxa'u 'me jana'j, da' qaidi ỹ'axa't ga' ỹasouaxaset da' 'uootaxa 'uo ga'me sa ỹiỹamaxade'n da' séeta. 20Qaláxasa na'chi 'ená'am jen'me da' ỹ'axat naỹi da' 'uootaxa 'uo ga' ỹauáachiỹi da' ỹasouaxaset ca'li sasot'aguet jen'me let'alpi na' judiopi so' lemáxac 'me ỹ'étac na' nasoxocpi. 21Qá'a sa qoue da' 'uootaxa na'chida da' sasoilégue da'me ỹ'aqtac joca'li da' sa ñicosaỹáñi da' sose: “Na' nolo' jaỹim 'anmichíitac, ỹasouaxat da' jaỹim s'amaqten da' ỹitaxa qonec'alaxadiséguem qomle na' napa'lpi.”
22Ca'li demachíỹa dójo' so' net'a Félix, qá'a so'me ỹátaqta ỹaỹáteeta da' ladic jen'me ỹ'amaqten so' Jesús, qana'chi so'me ỹicochaxaguet so' nosáxac. Qana'chi 'enaaco':
—Qomle nóvi' ga' huataxanaq let'a Lisias, qana'chi ỹitaxa 'uo qomle ga' saỹáten da'me 'ancotáitapiỹi.
23Chan'eesa so' net'a Félix 'enapéga so'me ỹilápegue' na' huataxanaq da' maliaxa 'eeta't da' qoỹicoñideta't so' Pablo. Qaláxasa qoỹanem da' sa 'eesá'me da' qoỹilolégue, qataxa qoỹaséet'em da' qodesapchiuó'o, qataxa mai'chi qolecochiỹa.
24Saua' noloqo'te laqáỹa', qana'chi ỹitaxa nóvi' so' Félix, náictapegue' jaso' loua Drusila. Jaso'me judío lase. Qana'chi so'me damaxasóxonee'ga so' Pablo, da' qaidi naquiáxata da' ỹ'axat ga' ladic da' qop'iỹá'a so' Jesucristo. 25Qaláxasa so' Pablo ca'li ỹ'axat da' ladic ga' siỹaxaua da' nó'in da' lasoxoc, qataxa da' 'éeta da' mai'chi netelela't, qataxa ga'me p'áteegue nolo' qomle qonimit ỹimaquéna, qana'chi so' Félix ỹátaqta dó'i. Qana'chi 'enaaco':
—'Ausómta qomle, mai'chi qomle ỹitaxa 'uo ga' ỹidáqa', qana'chi ỹitaxa 'am siỹáxanee'ga.
26Nataq'en so' Félix 'uo da' ỹiuatét'a da' 'uootaxa so' Pablo ỹiseeten so'me, qana'chi ỹisóiỹi. Chan'eesa ỹátaqta jalcote da' ỹiỹáxanee'ga so'me da' dosápegue'. 27Qaa'le ỹivi't saua' dos 'uóidi da' 'eeta't so'me. Qana'chi so' Félix joca'li ỹaxañi da' net'a, qana'chi janac so' Porcio Festo da' nalégue da' l'onataxanaxac so'me. Qá'a so' Félix sétaaque da' qaỹa 'te 'uo na' judiopi, qana'chi quet'ot da' qoỹicoñideta't qa'en so' Pablo.
Currently Selected:
Hechos 24: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
