Hechos 28
28
So' Pablo huét'a jadi' nepe lenaxat Malta
1Cana'le sóxote ỹima da' ñic'alaxáiỹi, qana'chi saỹátenaq da' lenaxat jadi'me nepe, lenaxat da' Malta. 2Qaa'le na' l'acháqa' di'me ỹátaqta qo'mi ỹilo'ogueta. Chan'eesa qoỹalóoñi so' dóle' let'ádaic, qá'a ỹasouaxat na' l'ómaxa qataxa so' huétep. Ỹim, qana'chi qo'mi 'enapegalo da' ỹima ñoqochíỹaxa'uo so' dóle', da' qaidi ñitónaq. 3Qana'chi so' Pablo ỹipaltapega't na' 'epaq láso, qana'chi ỹasaqátanỹi so' dóle'. Qana'chi jeso'me nanaic 'me dasói'ỹem na' lauaq so' dóle', qana'chi ỹipaxachiỹi na' louaq, qana'chi nétauo. 4Qana'chi jen'me l'achaq'adi ca'li ỹauáachiỹi so'me nanaic néta'uo na' louaq so' Pablo, qana'chi 'enapega'to' so'me:
—Dójo' siỹaxaua di'ỹoq da' laataxanaxaic, chan'eesa da' ỹaxan na' noxop, qaláxasa ñi'me sa di'ỹoq 'me ỹa'uo ga' ne'uaxánaguec jen' nasouaxasetpi, jiñi'me sa nec'alaxatáiỹi da'me.
5Qaláxasa so' Pablo 'chi ỹichiỹoxoñíỹi so'me so' dóle'. Qana'chi ỹátaqta qaỹa 'te 'uo so'me. 6Qana'chi ỹima jeso'me ỹiuatét'a da' 'uootaxa so'me nalaatéegue na' ló'oc, 'uootaxa n'ochíchiiñi leuótaiỹi da' ỹileu. Qaláxasa cana'le qoniỹáta da' netaguec, qana'chi qoỹilá'a da' qaỹa 'te 'uo so'me, qana'chi jeso'me siỹaxadipi nadálaxat da' leenataxac. Qana'chi ỹitaxa qoỹíitapega da' so' Pablo naqaiso 'me paiỹac.
7Qaa'le so'me qouét'a sa qaỹáaque so' n'aléua so'me lasoxola' na' l'acháqa' jaso' nepe, jeso'me lenaxat da' Publio. Jeso'me qo'mi ỹaconeeta, qana'chi ỹátaqta qo'mi ỹilo'ogueta saua' tres noloqo'te. 8Qaa'le so'me let'a so'me sa ỹiỹamaxañi, huetalégue ga' l'ochaxala', p'étac jen' ló'oc qataxa ỹic'on na' lauel. Qana'chi so' Pablo ỹic'áta desapchiỹa so'me. Joca'li ỹim da' netameelégue jeso'me, qana'chi huaselelégue, qana'chi ỹiméegue qa'en. 9Huá'a, qana'chi janac nataq'en jen'me leuaxaicpi laỹi 'me néta'ña jaso'me nepe, qana'chi ỹima n'óota qoỹin. 10Qana'chi jeso'me l'achaq'adi ỹátaqta jalcote da' li'ỹoxodénataxanaxac da' senqáta. Cana'le ỹim, qana'chi ỹitaxa qolaq, qana'chi jeso'me qo'mi ỹanema ỹima na' seuénaq da'me qadeuoxoc.
So' Pablo ma'le ỹivíta di' Roma
11Ca'li ma'le ỹinoxodéegue saua' tres 'auóxoiqa da' souqát'a jadi'me nepe. Qana'chi ỹitaxa ñoqotaqá'uo jaso' licota 'me chi'ena da' huet'edi, ỹiuatét'a da' ỹinoxonéegue so' naqaviaxa. Jaso'me licota, jaso'me lase di' Alejandría, 'me huetalóo'te saua' dos n'anaqa liquí'il saua' paiỹa'go Cástor qataxa so' Pólux. 12Ca'li sivítaxa di' nadíỹaxasom lenaxat Siracusa, qana'chi tres noloqo'te da' souqát'a. 13Huá'a di'me, qoloqot so' loxogue, cha sivídaq'a di' lenaxat Regio. So' nolo' laqáỹa, qana'chi ỹitaxa janac so' qolauaic. Chan'eesa so' nolo' laqáỹa, qana'chi ỹímta ma'le sivítaxa di' Puteoli. 14Huá'a, qana'chi huo'oi saua' ñauanáxa'to qadaqáỹa', qana'chi jesaa'me qo'mi n'eláxachidiñi 'oonolec so' semana. Ca'li ỹim, qana'chi ỹitaxa qolaq da' saxague da' Roma. 15Qaa'le so' qadaỹi 'me néta'ña di' Roma sóxote da' dip'iquilóo'te da' qo'mi; qana'chi jeso'me qo'mi huaqátet'aita. 'Uo na' naqátetai'ỹa di' nemenaqa' so' Apio, qataxa di'me lenaxat tres mataqa'te. Ca'li ỹiláaue jeso'me qadaỹi so' Pablo, qana'chi ỹanem da' netónaxac ñi' Dios, qana'chi ỹátaqta nomt'eguet da' l'añaxac. 16Ca'li sivídaxa'uo di' Roma, qana'chi so'me huataxanaq let'a ỹaneuó'o na' necointáisecpi so'me ỹilápegue' jaso' cointáxanaxaqui. Qaláxasa so' Pablo niỹaqái'ỹa ga' néta'ña qoỹin, qaláxasa qoỹa'uo so' 'oonolec nouatoqo't huataxanaq lé'ec.
So' Pablo d'aqtaxáatac huét'a di' Roma
17Ca'li ma'le ỹivi't tres noloqo'te da' sivídaq'a di' Roma, qana'chi so' Pablo damaxasóxonee'ga na'me lasoxola'pi na' judiopi 'me néta'ña di'me. Ca'li sóxote da'me huet'a't jeso'me, qana'chi so' Pablo 'enaaco':
—'Ami ỹaqáỹa', jaỹim temaqaidi da'me qaỹa 'te s'étec na' qadaỹi judío lé'ecpi, qataxa sa ñip'aguéna da' n'onataguec so'me huá'au qadet'alpi, qaláxasa taqadíta jen'me jaỹim ỹicoñi' ca'li huá'a di' Jerusalén, qana'chi jaỹim qoỹaneuó'o na' net'alpi romano lé'ecpi. 18Ca'li ỹim da' jaỹim qoỹachimaxatétapega, qana'chi sétaaque da' jaỹim qoỹisóiỹi. Qá'a sa qonata ga' sasoilégue ga'me ỹa'uo da' ñalaataguec. 19Qaláxasa jen'me judiopi sa ỹiỹamaxaden da' jaỹim qoỹisóiỹi. Huá'a, qana'chi jaỹim siỹáxane'uo da' jaỹim nimit ñi'me qadet'a 'me ná'ña na' Roma, temaqaidi da' jaỹim qaỹa 'te sesouenec jen'me mai'chi ỹaỹi. 20Chan'eesa naqaida 'me 'uo da' 'ami siỹaxanee'galo, da' qaidi 'ami ñauaa'to, qataxa 'ami sosápee'to. Qá'a na'chida da'me ỹima qadasoxónataxanaxac qo'mi Israel lase', da'me ỹa'uo da'me ñicoindet'aque naua' ỹique'te.
21Qaama'le qo'enapego' so'me, qoỹinaac:
—Qo'mi qaga 'te jaga' qo'mi nivitalo nidíise da' chiỹaqá'a di' Judea da' 'uootaxa 'am qoỹ'axat, qataxa jen'me nivídetaac qadaỹi qaỹa ga'me 'chi 'am ỹ'axat da' 'uo ga' 'auasoilégue. 22Chan'eesa qo'mi sétaaque da' 'am ñaquiáxanaxa ga' 'éeta ga' 'adeenataxac. Qá'a saỹátenaq da' ỹiméda naua' 'ale'u qonep'aguéna da'me dálaxaic n'amaqténataxanaxac.
23Chan'eesa ca'li qoỹa'uo so' naloqtenec nolo'. Qana'chi joca'li ỹivíta so'me nolo', qana'chi ỹátaqta jalcote na' siỹaxadipi na' nivíta ga' néta'ña so' Pablo. Qana'chi 'ecot so'me néte'ta, cha ỹivid'aguet so' jávit, da' ỹ'axátetapeguem jeso'me da' l'onataxanaxac ñi' Dios da' ỹimata'a'téna, ỹátaqta quétapee'uo jeso'me da' ỹ'amaqten qa'en so' Jesús, qana'chi ỹ'axátetac jen'me naqátaxacpi 'me chiỹoqo'ot so' Moisés qataxa jen'me l'aqtaxanaxac jeso'me letaxaỹáxanaxanecpi ñi' Dios. 24Qana'chi 'uo na' ỹ'amaqten so' l'aqtaxanaxac so' Pablo, qataxa 'uo na' sa ỹ'amaqten. 25Qá'a da'me sa 'ena'a't so'me judiopi, qana'chi 'uo na' jec. Chan'eesa so' Pablo 'enaaco':
—Ỹátaqta táchiỹi da' l'aqtaxanaxac so' Espíritu Santo josii'chi ỹosáxanaxan so' Isaías da' 'enapéga so' huá'au qadapidiipi, 'enaac:
26'Ausómta 'au'aqtaxanem qomle jen'me siỹaxadipi, 'auet'oi:
'Ami di'ỹoq da' 'amachíitac, qaláxasa sa 'auaỹáchiñii ga'me qoỹ'axátetac;
'ami 'anlóitaiỹi, qaláxasa sa 'anauañíiñi.
27Qá'a jan' liquidiaqte jen'me siỹaxadipi v'iỹílaxalégue da' ỹátaqta sa nedámchiỹi,
qataxa sa demachíỹaac,
qataxa naua' l'ai'te d'ochita'salo;
da' qaidi sa dec'atenaxanalo,
qataxa sa demachíỹaac,
qataxa sa daỹátenataxan jaga' liquidiaqte,
qataxa sa jaỹim n'iỹílaxa, da' qaidi ỹiméegue qasen.
28Naỹi 'ami 'auaỹáchiñii, da'me qotat'ague, qana'chi jeda'me nec'alaxa 'me chiỹoqo'ot ñi' Dios, da'me qoỹanem qomle jen'me sa judío lé'ecpi. Qataxa naqáina qomle na' ỹátaqta naquiáxana.
29Qana'chi so' Pablo joca'li 'enaac da'me, qana'chi jen'me judiopi jec, qaláxasa ỹátaqta mai'chi nec'ona't.
30Qana'chi so' Pablo ỹátaqta ỹinoxonaqtétreegue saua' dos 'uóidi da' néta'ña di'me, nétaaue so' 'emec 'me 'chi ỹiseetéetac. Qana'chi ỹátaqta ỹilo'oguet ỹima jen'me nec'áte'uo jeso'me da' nauá'ne'. 31Qana'chi ỹátaqta qaỹa 'te nedáqtaaque da' ỹ'axátetac da' l'onataxanaxac ñi' Dios da' ỹimata'a'téna, qataxa dapaxaguenataxáatapeec so' qadasoxola' Jesucristo. Ỹátaqta qaỹa 'te ga' nauánapeeguet da' l'aqtaxanaxac.
Currently Selected:
Hechos 28: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
