Romanos 1
1
So' Pablo ỹamaxa jaso' lidíise so' 'amaqténataxanaxaicpi 'me Roma lé'ec
1Jaỹim Pablo, ỹadípa so' Jesucristo. Ñi' Dios jaỹim ỹiỹáxana qataxa jaỹim ỹiỹotái'ỹa da' jaỹim lamaxasec, da' qaidi s'axáteegue da' l'aqtac 'me chiỹaqaỹi da' nec'alaxa.
2Ñi' Dios ỹan joca'li dójo' l'aqtac, ỹachiỹoxotaỹi 'en so' l'aqtáxanaxanecpi joca'li ỹidáxanaxanque naua' lalémaxase'te l'aqtaqa jiñi'me. 3Dójo' n'aqtac 'me ỹ'axat da' ladíquiaxac jeso' qadesaliaxanec Jesucristo, jeso'me lec'óxot ñi' Dios. Jeda'me ỹ'oqóchiỹi lañoxoc jeso'me, qaa'le chiỹoxoguet so' net'a David. 4Qaláxasa chiỹoqóchiỹi so' Espíritu Santo joca'li ỹ'axat jeso'me da' lec'óxot ñi' Dios qataxa 'uañaxaic joca'li ñi' Dios nec'alaxadiséguem. 5Qana'chi chiỹoqóchiỹi so' Jesucristo jiñi'me Dios qo'mi ỹichoxode'n da' qo'mi ỹanaỹilo da' qo'mi lamaxa's, qaidi s'onataxanqot jeso'me, qaidi ỹima jen'me ỹodapecachi siỹaxadipi 'uo ga' d'amaqténataxan qataxa ỹalaq. 6Jen'me nataq'en 'aualiquiiỹet da' 'ami ỹiỹaxanalo ñi' Dios, qaidi 'ami lalémaxase'te so' Jesucristo.
7'Ademíỹa 'me 'oñíita'ña na' noic let'ádaic Roma, 'ami samaxalo jan' ỹidíise. 'Ami 'me 'ami lauotaqa'te ñi' Dios qataxa 'ami ỹiỹaxanalo, qaidi 'ami 'anañiiỹot jiñi'me. 'Auacoñiiỹet qomle da' 'anchoxodénataguiquii qataxa da' n'emáxac 'me chiỹoqo'ot ñi' qadet'a Dios qataxa so' qadesaliaxanec Jesucristo.
So' Pablo sétaaque desapchiỹa di' Roma
8Jaỹim se'uáuaxachiiñi da' sachiỹoxotaỹi so' Jesucristo da' sanot da' ñitónaxac ñi' ỹit'a Dios, ỹasouaxat da' 'oñíita, qá'a ỹiméda naua' lail 'ami qon'aqtaxaatapiilo da' 'adip'iỹáxaquii. 9Qataxa jiñi'me Dios, 'me s'onataxaatapecot qataxa sematet'ot jan' ỹiquidiaqte da' s'axat da'me n'aqtaguec so' lec'óxot, jiñi'me jaỹim ỹaỹáteetac da' sa 'ami sepeteláxagueta da' ỹivíta da' ñitaméetac. 10Na'chi 'eeta't da' seỹaxaatapecot ñi'me Dios da' mai'chi chiỹoqo'ot jiñi'me da' jaỹim ỹanem ga' nolo' da' 'ami sesapchiỹalo. 11Qá'a jaỹim sétaaque da' 'ami ñauaa'to, qataxa da' 'ami secochaxanaxanque jega'me chiỹoqo'ot so' Espíritu Santo, qaidi ỹátaqta 'ami 'uañaxaiqa. 12Qaidi ñi' 'oonolec da' qo'mi ỹañoxot da' ỹ'añaqtet ga' laqáỹa da' ỹidolégue dójo' nip'iỹáxac 'me 'ami huet'oto nataq'en jaỹim.
13'Ami ỹaqai'ỹolqa, sétaaque 'ami 'auaỹáchiñiita da' jaỹim ỹátaqta sa lec'óxotolec da' sétaaque da' 'ami sec'atalo, qaidi 'ami ñauaa'to. Qaláxasa cha ỹivíde'ta naỹi da' maliaxa da' sañoxot. Sétaaque naale da' 'ami saỹalo, da' qaidi jalcote ga' ỹauéguec da' 'oñíita da' d'amaqténataxan, 'ená'am da' seet'eque naua' 'ale'u laqáỹa'. 14Qá'a 'uo da' ñ'aqtaguec da' s'aqtaxanem ỹima na' siỹaxadipi, temaqaidi jega'me ỹaỹáten da' niỹamaxataxac, 'uootaxa jega'me sa ỹaqanatet da' niỹamaxataxac, qataxa jen'me ỹaỹáten jan' nede, 'uootaxa ga' sa ỹaỹáten jan' nede. 15Chan'eesa jaỹim ỹátaqta 'uo da' lamaic da' ỹidiáxa da' nataq'en 'ami s'axatema dójo' nec'alaxa ỹima da' 'oñíita 'me 'oñíita'ña na' Roma.
Da' l'añaxac jeda'me 'ónaxaic qadipí'ic
16Qá'a jaỹim sa sepecoxolégue da'me 'ónaxaic qadipí'ic 'me n'aqtaguec so' Jesús, qá'a jeda'me naqaida da' l'añaxac ñi' Dios 'me nec'alaxatéegue ỹima jega'me ỹ'amaqten. 'Uáichiiñi na' judiopi da' qonec'alaxatéegue, ỹim, qataxa na' sa judío lé'ec. 17Qá'a dójo' 'ónaxaic qadipí'ic, jeda'me qo'mi ỹaloxonalo da' lasoxoc ñi' Dios da' qo'mi ỹiỹamaxadéete'. Jeda'me 'eet'oi: na'chigáta jega'me 'uo da' lip'iỹáxac da' ỹ'amaqten ñi' Dios. Naqaida da' 'enaac naua' nidii's l'aqtaqa ñi' Dios, da' 'eet'oi: “Ga' ỹiỹamaxaden ñi' Dios, jega'me da' l'óiỹaxac ỹachiỹoxochíchiỹi da' lip'iỹáxac.”
Da' lasouaxac jen' siỹaxadipi
18Chan'eesa qo'mi selqá'a da' let'ádaic lichic da' lalemataic ñi' Dios, 'me ỹachiỹoxot'ot na' piỹem, da' namaxa ỹima jen' siỹaxadipi 'me cá'ai jiñi'me qataxa 'itaxalóxoicpi, da' ỹa'uo ga' ne'uaxánaguec, ỹasouaxat dójo' ỹ'étetac sa nó'in 'me sa ỹasenem qa'en ga' laqáỹa da' ỹaateton da' 'eesa lasoxoc. 19Jen'me ỹátaqta ỹaỹáteeta da' 'éeta da' lasoxoc da' qoỹaateton ñi' Dios, qá'a jiñi'me ỹátaqta naloxóot'a jen'me. 20Qá'a jeda'me sa di'ỹoq lasoxoc ñi' Dios chiỹoqóchiỹi jen'me l'onatacpi jiñi'me da' qoỹañoxot da' qoỹilá'a. Ỹátaqta qoỹaatetóota da' jiñi'me naqaiñi ñi' ỹimata'a'téna qataxa da' jiñi'me na'chi 'eeta't da' l'añaxac, chiỹoqóchii'ña joca'li jiñi'me ỹ'étetac jen' 'aléua. Chan'eesa jen'me sa 'te qaỹa ga' lasouaxac. 21Qá'a jen'me temaqaidi da' ỹaateton ñi' Dios, qaláxasa sa ỹimatá'ac da' naqaiñi ñi' let'a, qataxa sa ỹanot da' netónaxac. Na'chidáta da' jen'me hueenatétapega jen'me qaỹa 'te náỹi, qataxa jan' liquidiaqte ỹátaqta sega'me huétaỹi jen' l'álaxa. 22Temaqaidi jen'me da' 'enapeela't ỹátenaxanaxaicpi, qamaale qaỹa 'te ga' ỹaỹátenaac. 23Qá'a jen'me ỹaxañi da' netameetapecot ñi' qan'étoqo't 'me sa ỹileu. Na'chidáta da' netamenot jen' liqui'ipi jen' siỹaxadipi 'me 'uo ga' loiquiaqa', qataxa ỹivíd'a jen'me liqui'ipi jen' maỹo'pi, nanaicpi qataxa jen'me síiỹacpi.
24Chan'eesa ñi' Dios ỹaxanéegue jen'me da' mai'chi 'equeelo jenaa'me leenataxaco 'me desepaxanaqtaxa'n. Huá'a, qana'chi jen'me siỹaxadipi ñi' 'oonolec mai'chi ỹ'étec ga' laqáỹa jega'me ỹí'et da' n'alóxo, 25qá'a ỹasouaxat da' sa qoỹ'amaqten jeda'me 'eesa lasoxoc 'me chiỹoqo'ot ñi' Dios, na'chidáta jeda'me noqovínaxanaxac. Huá'a, qana'chi qoỹi'ỹoxoden qataxa qonetamenot jen'me l'onatacpi jiñi'me. Qana'chi sa qonetamenot jiñi'me 'me ỹátaqta taiỹet da' qaỹa 'te loiquiaqa' da' ni'ỹoxodénataguec. Já'a, na'chi naq'áita dójo'.
26Chan'eesa ñi'me Dios demachít'a jen'me da' ỹí'et ga' mai'chi 'éetapeec 'me ỹátaqta qonepecoxolégue. Qá'a na' ỹauodipi, qaa'le ỹivíd'a da' ỹiguem da' mai'chi lasoxoc da' ỹí'et jega'me sa natenguet da' nauoisíỹaxac. 27Qataxa ỹivíd'a nataq'en na' l'imdipi ỹiguem da' lasoxoc da' 'uoneguet jaga' ỹauo, qana'chi ñi' 'oonolec mai'chi ỹip'iỹaqtet ga' n'imiséua. Na' l'imdipi ñi' 'oonolec ỹ'étec ga' laqáỹa jega'me ỹátaqta ỹí'et da' nepecóxo. Qana'chi ỹátaqta ỹi'quemáxam da' mai'chi lalémaxaset ló'oquiaxac, ỹasouaxat da' ỹí'et ga' sa nó'in.
28Qá'a jen'me ma'le ỹaxanéegue da' naatetonaguec ñi'me Dios, tadeno' jiñi'me cá'ai jen'me, da' qaidi ỹ'e't naua' sa n'oi'n leenataxaco, qataxa da' ỹí'et jega'me sa lasoxoc. 29Qana'chi jen'me ỹátaqta saqáchiỹi ỹima na' n'etaxalóxo, nequeséeguetaxa, sa nó'inpi, qataxa da' nimitá'ai jan' laicaua, qataxa jen' sa ỹiỹamaxañi. Jen'me siỹaxadipi quiỹaxanaqtáqaicpi, laataxanaxaicpi, loiquiaxaicpi, qovínaxanaxaicpi, denaxanaxaicpi, qataxa n'aqtaqa ló'opi. 30Qataxa sa ỹiỹamaxataac ga' laqáỹa da' detaxaỹá'a, sa ỹauotec ñi' Dios, c'onaxanaxaicpi, 'amaqtenaxaicpi, ỹ'oxodenaxaicpi. Jen'me chiỹaqpíỹi jen' sa nó'in, sa ỹalaxalóo'te gaua' let'al, 31qaỹa 'te ỹaỹátenaac, sa ỹipaguelóo'te naua' l'aqtaqa, qaỹa 'te ỹauotec, sa ỹaỹáten da' ỹichoxodenalégue ga' lasouaxac ga' laqáỹa, sa nomguet ga' lichoxodénataxanaxac. 32Jen'me ỹaỹáteetac jen'me damaxasoxolégue ñi' Dios, qataxa ỹaỹáteeta da' ga' siỹaxaua 'me ỹ'étetac jen' sa ỹiỹamaxañi, qaa'le jega'me nétaỹi da' qoỹa'uo ga' nalaataguec. Qaláxasa jen'me taqadíta quet'ot da' ỹ'étetac jen'me sa nó'in, qataxa ỹivíd'a da' ỹátaqta ỹiỹamaxadéeta da' ỹilót'a ga' laqáỹa da' ỹ'étetac jen'me.
Currently Selected:
Romanos 1: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
