Romanos 2
2
Ñi' Dios ỹaqadesaỹi da' nimit ga' nasouaxac
1Chan'eesa sa naqaida da' qaỹa ga' 'adasouaxac, 'am 'me 'auáatapiỹi ga' lasouaxac ga' 'adaqáỹa, temaqaidi da' jái'chogamaxa da' 'onéta. Qá'a da' 'am 'auáatapiỹi ga' lasouaxac ga' 'adaqáỹa, qana'chi 'am mai'chi 'oquéta'uo lai da' qoỹa'uo qomle ga' 'ane'uaxánaguec, qá'a 'am nataq'en 'au'étetac jen'me sétaaque da' 'anmit. 2Qá'a qo'mi saỹátenaq ñi'me Dios da' ỹaqadesaỹi da' nimit ga' nasouaxac, qom'chi ỹivíta da' ỹa'uo ga' ne'uaxánaguec jega'me ỹ'étetac jen'me sa nó'in. 3Qana'chi 'am 'me 'auáatapiỹi ga' lasouaxaset ga' 'adaqáỹa, qamaale 'am nataq'en 'au'étetac jen'me sa nó'inpi, ¿'auéetapecogamaxa da' 'am ỹaxan ñi' Dios, qom'chi ỹa'uo ga' ne'uaxánaguec jega'me 'uo ga' huasoilégue? 4'Uootaxa ¿'am 'au'otan séetapega da'me sa ỹiméta lichoxodénataxanaxac qataxa da' neuálaxainaxac ñi' Dios, qaama'le sa 'auanóma dójo' nichoxodénataxanaxac da' 'am ỹauec'aguet da' 'auañoxot da' 'auaxadíñi naua' 'adoico? 5Qaláxasa 'am ỹátaqta sa nedámchiỹi jana' 'adiquidiaqte qataxa sa 'auaxadíñi naua' 'adoico. Chan'eesa 'ená'am da' mai'chi 'alapootapega't da' 'ane'uaxánaguec qom'chi ỹivíta ga' nolo' 'me huétooue da' ỹichoxot ñi' Dios ga' lasouaxac ñi' 'oonolec da' ỹa'uo ga' ne'uaxánaguec. 6Jega'me nolo' qomle jiñi'me ỹa'uo ga' neseeténaguec ñi' 'oonolec ga'me táchiỹi jega'me ỹ'étetac. 7Qana'chi jiñi'me ỹanem ga' l'óiỹaxac 'me qaỹa 'te loiquiaqa' jega'me quet'ot da' ỹ'étetac jega'me ỹiỹamqáchiiñi qataxa nimitétaaque ñi' Dios da' ỹanem ga' li'ỹoxodic, ni'ỹoxodénataguec qataxa jega'me n'óiỹaxac 'me qaỹa 'te loiquiaqa'. 8Qaláxasa ỹidolégue qomle da' lalemataic qomle ỹa'uo ga' ne'uaxánaguec jen'me ỹ'étetac ga' mai'chi 'éetapeec qataxa sa ỹaloxolégue da' 'eesa lasoxoc, na'chínata jen'me sa nó'inpi. 9Ỹátaqta 'uo qomle da' ne'queténaxac qataxa da' naỹaliaxa ỹima jen'me ỹ'étetac da' sa nó'in. Qoỹ'áuaxachiiñi qomle na' judiopi qataxa jen' sa judiopi. 10Qaláxasa jiñi'me Dios ỹanem qomle da' li'ỹoxodic, ni'ỹoxodénataguec qataxa da' n'emáxac ỹima jen'me ỹ'étetac jeda'me 'ónaxaic. Qoỹ'áuaxachiiñi na' judiopi, nataq'en jen'me sa judío lé'ec.
11Qá'a ñi' Dios sa niquiỹátapiỹi jen'me siỹaxadipi. 12Qá'a ỹima jen'me 'uo ga' huasoilégue, da' sa huet'ot jen' naqátaxacpi 'me chiỹoqo'ot so' Moisés, jen'me daqat, temaqaidi da' sa huet'ot dójo' naqátaxac. Qataxa jen'me 'uo ga' huasoilégue, temaqaidi da' 'uootaxa huet'ot jénjo' naqátaxacpi, jen'me qomle qonimit, qoỹidolóo'te nauójo' 'enapegalo jénjo' naqátaxacpi. 13Qá'a sa ỹiỹamaxaden ñi'me Dios ga' nedóteegue qa'en da' naquiáxatapega jen' naqátaxacpi, na'chigáta jega'me ỹátaqta ỹalaq. 14Qaláxasa jen'me sa judiopi 'me sa huet'ot jen' naqátaxacpi da' mai'chi chiỹoxotétooue da' laviliỹáxac da' ỹí'et jega'me damaxasoxolégue jen'me naqátaxacpi, qana'chi jen'me ỹaloxon da' ỹaỹáten jega'me 'ónaxaic da' qoỹiuen da' qoỹí'et. 15Qá'a da' mai'chi lalémaxaset lasoxoc ỹichoxot dójo' naqátaxac da' nedetalégue jañi' liquidiaqte. Qá'a jeda'me laviliỹáxac ỹátaqta 'eesa qa'en dójo', qataxa da' mai'chi laviliỹáxac ỹichoxot da' lasouaxaset, 'uootaxa nequepaxatelégue 16jega'me p'áteegue nolo', qom'chi ỹivíta ñi' Dios ỹachiỹoxotaỹi qa'en so' Jesucristo da' nimit jen'me sa di'ỹoq leenataxacpi ỹima jen' siỹaxadipi. Qana'chi ỹátaqta ỹipaquíchiỹi qomle dójo' s'axátetac n'aqtac 'me chiỹaqaỹi da' nec'alaxa.
Jen' judiopi qataxa jen' naqátaxacpi 'me chiỹoqo'ot so' Moisés
17Qaláxasa 'am 'me 'auenapeela't da' 'am judío lé'ec, qataxa 'auequétapega jen'me naqátaxacpi 'me chiỹoqo'ot so' Moisés, qataxa 'ani'ỹoxodéetapiỹi jiñi'me 'adet'a Dios. 18Qataxa 'auaateton jen'me 'éetapeecpi jiñi'me Dios, qataxa jen'me naqátaxacpi 'am ỹapaxaguenec da' 'oquegue ga' 'ónaxaic. 19Qataxa ỹátaqta 'eesa 'auen da' 'auaỹáten da' 'auauec'aguet jega' sa nauáañi, qataxa da' sega'me 'aucoỹadelégue jen'me huétaaue ga' n'álaxa. 20Qataxa 'auéetapecogamaxa da' 'am 'auaỹáten da' lasoxoc da' 'auapaxaguen jega'me qaỹa 'te ga' ỹaỹátenaac, qataxa jen'me dálaxaicpi, qá'a jen'me naqátaxacpi ỹimatet'a't ỹima jen'me lasoxocpi jeda'me naatetonaxanaxac qataxa jeda'me lasoxoc 'me ỹátaqta 'eesa. 21Qana'chi 'am 'me 'auapaxaguéetac ga' 'adaqáỹa, qalqaiga ¿tóoqo'chi da' sa mai'chi 'anapaxagueela't? Da' 'am mai'chi 'au'axátetac da' qaỹa 'te qodecachíỹa, qalqaiga ¿tóoqo'chi da' 'aucachítac? 22Qataxa 'am 'me 'auéetapega da' sa qoncachítapegue' jaga' sa noua, qalqaiga ¿tóoqo'chi da' 'ancachítapegue' jaga' sa 'adoua? Qataxa 'am 'me 'anquiỹátapega jen' niqui'ipi nadénaqtac, qalqaiga ¿tóoqo'chi da' 'aucachítapega da' lesaliaxa jen' l'emecpi jen' niqui'ipi? 23Qataxa 'am 'me 'ani'ỹoxodéetapiỹi jen' naqátaxacpi, qaláxasa sa 'aualaxalégue jen'me, qana'chi 'am 'auasouaxat da' sa qoỹodiáquen ñi'me Dios. 24Chaqainmaxa naua' nidii's l'aqtaqa ñi' Dios da' 'eet'oi: “Jen'me sa judiopi sa ỹodiáquenaac da' detaxaỹá'a ñi' Dios, ỹasouaxat 'ami.”
25'Eesa da' 'uo ga' náỹi da' 'uootaxa qoỹa'uo ga' n'anaxaset na' 'adó'oc, da' ỹátaqta 'aualaxaguet ga' 'enaac jen' naqátaxacpi 'me chiỹoqo'ot so' Moisés. Qaláxasa da' sa 'aualaxalégue, qana'chi 'ená'am da' sa qoỹa'uo ga' 'an'anaxaset. 26Qataxa jega'me sa qoỹa'uo ga' n'anaxaset jen' ló'oc, da' 'uootaxa ỹí'et ỹima jen'me damaxasoxolégue jen'me naqátaxacpi, qana'chi jega'me ñi' Dios 'ená'am qa'en ga' 'uo ga' n'anaxaset, temaqaidi da' qaỹa ga' n'anaxaset. 27Jega'me sa qoỹa'uo ga' n'anaxaset jen' ló'oc, qaláxasa ỹátaqta ỹaloxoguet jega'me 'enaac jen' naqátaxacpi, qana'chi jega'me ỹí'et qomle da' 'am qoỹa'uo ga' 'ane'uaxánaguec, ỹasouaxat da' sa 'aualaq, qamaale 'am huet'ot jen' naqátaxacpi qataxa da' qoỹa'uo ga' 'an'anaxaset. 28Qá'a da' 'am judío lé'ec, qaa'le sa na'chidáta jeda'me ỹ'oqóchiỹi. Qataxa da' qoỹa'uo ga' 'an'anaxaset, qaláxasa sa na'chináta jena'me ỹ'oqóchiỹi 'adó'oc. 29Qá'a ga' ỹátaqta 'eesa da' judío lé'ec, qaa'le na'chida jeda'me sa di'ỹoq laviliỹáxac. Qataxa jega'me ỹátaqta 'eesa da' qoỹa'uo ga' n'anaxaset, qaa'le na'chañi jañi' liquidiaqte qoỹ'an. Jeda'me sa chiỹaqaỹilo naua' nidii's naqátaxaco, qá'a jeda'me chiỹoqóchiỹi jeda'me sa di'ỹoq naviliỹáxac. Qana'chi jega'me 'éet'ec dójo', qana'chi jega'me ỹátaqta qoỹiỹamaxadéeta, qaláxasa sa 'chi siỹaxaua ga' ỹiỹamaxaden, qá'a na'chiñi ñi'me Dios.
Currently Selected:
Romanos 2: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
