Romanos 3
3
1Chan'eesa ¿hua'ague toqo' ga' 'éeta ga' lasoxoc da' ñapagaqpeelégue ga' qadaqáỹa da' qo'mi judío lase'? 'uootaxa ¿jái'chogamaxa qoỹachiỹoxotaỹi da' qoỹa'uo ga' n'anaxaset ga' siỹaxaua? 2Qá'a jalcote, qataxa jalcote na' lasoxocpi da' jen'me judiopi napacapeelégue ga' laqáỹa. Qá'a da' 'uáichiiñi 'eet'oi: Ñi'me Dios ỹanem da' ỹilolégue joca'li jen' judiopi da' l'aqtac. 3Qaláxasa ¿hua'ague jogamaxa 'éeta jen'me da' 'uootaxa 'uo na' sa ỹipaguelégue dójo' n'aqtac? ¿Séetapega ñi'me Dios qo'li ỹaxañi da' sa ỹipaguelégue ga' l'aqtac? 4¡'Ai', sa naq'áita! Na'chidáta da' ñi' Dios ỹátaqta 'eesa da' ỹipaquetelóo'te naua' l'aqtaqa, temaqaidi da' ỹima jen' siỹaxadipi qovínaxanaxaicpi. Qá'a 'enapega't naua' nidii's l'aqtaqa, 'eet'oi:
Da' 'autaqa, qana'chi qoỹilá'a da' ỹátaqta 'eesa da' 'auenaac,
qataxa 'anchaatéegue qomle da' qaỹa ga' 'adasouaxaset qomle 'am qonimit.
5Qaláxasa jen'me qad'etaxalóxocpi da' chiỹoqóchiỹi da' ỹ'axat ñi'me Dios ỹí'et ga' 'ónaxaic, qana'chi ¿hua'ague jogamaxa senqáta? ¿Séetapega jiñi'me Dios sa nó'in ga' ỹí'et, da' 'uootaxa qo'mi ỹi'uaxa'n? (Dójo' ỹ'aqtac 'ená'am da' l'aqtac na' 'chi siỹaxaua.) 6¡'Eesa maiñaxa da' sa naq'áita dójo'! Qá'a da' 'uootaxa ñi'me Dios sa nó'in ga' ỹí'et, qana'chi ¿hua'ague toqo' da' ỹañoxot da' nimit ga' lasouaxaset jen' siỹaxadipi?
7Qaláxasa jega'me ỹoqovínaxanaxac da' 'uootaxa chiỹaqaỹi da' nichíisaiỹi da' li'ỹoxodic dójo' 'eesa lasoxoc 'me chiỹoqo'ot ñi' Dios, qana'chi ¿tóoqo'chi da' jaỹim qonimit da' sená'am qoỹin ga' 'uo ga' jaloic? 8Da' na'chi naq'áita dójo', ¿tóoqo'chi da' sa qoỹí'et jega'me sa nó'in, qaidi janac jega'me 'ónaxaic? Naqaida jeda'me 'uo na' 'éetapega da' sapaxaguenataxanqátapeec, qá'a sa nó'in da' leenataxac. Chan'eesa jen'me siỹaxadipi n'óota qomle da' qoỹa'uo ga' ne'uaxánaguec.
Qadema 'uo da' qadoic
9Chan'eesa ¿jái'chogamaxa hua'ague ga' 'éeta? ¿Séetapega da' qo'mi judío lase' sañoxotaq da' ñapagaqalégue jen'me sa judiopi? ¡'Ai', sa sañoxotaq! Qá'a ma'le ỹim da' s'axátetac da' qo'mi judío lase' qataxa jen'me sa judío lé'ecpi da' ỹima souqat'ot da' lamaxasóxonaxac da' n'etaxalóxoc. 10Qá'a naua' nidii's l'aqtaqa jiñi'me Dios 'eet'oi:
Qaỹa 'te da' 'uo ga' 'chi 'oonolec siỹaxaua da' 'ónaxaicaloic;
11qataxa qaỹa 'te 'uo ga' 'chi 'oonolec da' sétaaque da' 'uo' ga' ỹaỹáten,
qaỹa 'te da' 'uo ga' nimitétaaque ñi'me Dios.
12Ỹima jen' siỹaxadipi ỹisómtac, qataxa ỹima daqat.
Qaỹa ga' ỹí'et ga' 'ónaxaic, ỹátaqta ỹima'a't qaỹa.
13Naua' nedégaqa'te qaa'le 'ena'ama jaga' napa'lai't 'me qoỹ'ouateta'nỹet;
naua' l'aqtaqa qaa'le doqovínaxaat'ape,
qataxa 'ená'am jen' le'uenáxanaxat jen' nanaic 'me huetaavlo naua' nedégaqa'te.
14Da' detaqa, qaa'le na'chidáta da' ỹadíit'a da' qoỹa'uo ga' ne'uaxánaguec ga' laqáỹa, qataxa qaỹa ga' lamai'j naua' l'aqtaqa.
15Naua' lichil qaa'le sa ỹilá'uailo da' dalaataxan;
16da' lasoxoc qaa'le noláxachiñi ga' laqáỹa, qataxa ỹachoxoden,
17qataxa sa ỹaateton ga' ladic da' n'emáxac.
18Qataxa qaỹa da' 'chi cada'acolec da' taỹapiỹi lauel da' d'oiỹa ñi'me Dios.
19Qá'a qo'mi saỹátenaq da' ỹima jen'me 'enaac na' naqátaxacpi 'me chiỹoqo'ot josii'chi so' Moisés, ỹilónaxachiỹi da' 'enapéga jen'me huet'ot na' naqátaxacpi, da' qaidi qaỹa ga' 'éetapega qaỹa ga' lasouaxaset, qataxa qaidi ỹima na' siỹaxadipi huo'ot da' 'éeta qomle ñi' Dios nimit ỹima jen'me. 20Qá'a qaỹa ga' ỹañoxot da' ỹiỹamaxaden ñi' Dios ỹasouaxat da' ỹ'étetac jen'me damaxasoxolégue jen' naqátaxacpi, qá'a jen'me naqátaxacpi na'chidáta da' ỹí'et da' qo'mi qoỹaỹátenaxanaxanque da' qo'mi 'uo ga' qadasouaxaset.
Da' nec'alaxa chiỹaqaỹi da' nip'iỹáxac
21Qaláxasa naỹi ñi' Dios ỹañoxot da' qo'mi ỹaỹátenaxanaxanque da' naq'áita da' lasoxoc da' qo'mi ỹiỹamaxadéete' jiñi'me, qaa'le sa chiỹoqóchiỹi qa'en jen' naqátaxacpi. Jeda'me sañoxotaq da' selaqá'a da' qo'mi setaxaỹaxanaqátac jen' nidíisec naqátaxacpi qataxa naua' l'aqtaqa jeso'me Dios letaxaỹáxanaxanecpi. 22Jedójo' 'éet'ec ñi'me Dios ỹañoxot da' qo'mi ỹiỹamaxadéete', jeda'me chiỹoqóchiỹi da' qop'iỹá'a so' Jesucristo, qataxa ỹanem ỹima jen'me d'amaqténataxan. Qaa'le sa ỹañoxot da' leloisec jen' siỹaxadipi, 23qá'a ỹima jen'me siỹaxadipi 'uo da' lasouaxaset, qataxa ỹátaqta soqoỹoqót'a ñi'me Dios 'me ỹañoxot da' dec'alaqtaxan. 24Qaláxasa ñi'me Dios jeda'me lauo'chi ỹ'eteguet jen'me siỹaxadipi da' ỹañoxot da' ỹiỹamaxaden. Qaga jaga' laseete qa'en, qá'a jiñi'me chiỹaqaỹi qa'en so' Jesucristo da' nec'alaxatéegue jen'me siỹaxadipi. 25Ñi'me Dios ỹanéegue so' Cristo, da' qaidi da' leleuaxa chiỹaqaỹi qa'en da' ỹapalaxat jen' janoicpi. Jeda'me chiỹaqaỹi da' qop'iỹá'a jeso'me. Qá'a dójo' 'éeta jiñi'me, sétaaque da' qoỹaỹáten da' ỹañoxot da' ỹí'et ga' 'ónaxaic, qá'a da' neuálaxainaxac jiñi'me ỹátaqta sa ỹañoxot da' ỹiloỹi jeso'me huá'au janoicpi. 26Dójo' 'éeta jiñi'me, sétaaque da' ỹaloxon da' ỹí'et ga' 'ónaxaic. Qataxa maliaxa quéta naỹi da' jiñi'me ỹ'étetac ga' 'ónaxaic, ỹasouaxat da' ỹiỹamaxaden jega'me ỹ'amaqten so' Jesús.
27Qana'chi ¿hua'ague ga' taiỹi ga' n'amaqténaxac jen' siỹaxadipi? Jega'me p'áiỹi qoỹin. ¿Tóoqo'chi da' p'áiỹi qoỹin? Qá'a da' ỹipaquíchiỹi qoỹin na' 'enaac jen' naqátaxacpi, qana'chi ỹí'et da' ỹ'oxodénaxac, jeda'me nip'iỹáxac, qaa'le qaỹa. 28Chan'eesa qo'mi selaqá'a ñi'me Dios ỹañoxot da' ỹiỹamaxaden jega'me siỹaxaua 'me 'uo da' lip'iỹáxac, qana'chi sa ỹilótaỹi jega'me da' 'uootaxa ỹ'étetac jega'me 'enaac jen' naqátaxacpi, 'uootaxa da' sa ỹí'et.
29¿Séetapega na'chínata jen'me judiopi da' let'a ñi' Dios? ¿Séetapega da' nataq'en let'a na' sa judiopi? Já'a, jen'me nataq'en let'a jiñi'me. 30Qá'a qaỹa 'te Dios laqáỹa, na'chiñíta 'oonolec jiñi'me. Jiñi'me Dios 'me ỹañoxot da' ỹiỹamaxaden jega'me 'uo da' lip'iỹáxac, jiñi'me sa ỹiloỹi da' 'uootaxa qoỹa'uo ga' n'anaxaset, 'uootaxa sa qoỹa'uo. 31Qana'chi ¿séetapega chiỹoqóchiỹi da' qadip'iỹáxac da' qaỹa 'te ga' náỹi qasenaq jen' naqátaxacpi? ¡'Ai'! Na'chidáta da' ỹátaqta sauenaq laso'vi jeda'me 'uo da' 'enec jen'me naqátaxacpi.
Currently Selected:
Romanos 3: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
