Gálatas 3
3
Na' naqátaxacpi 'uootaxa da' nip'iỹáxac
1¡Jaigamaa, 'ami Galacia lase', ỹátaqta qaỹo' ga' 'chi 'auaỹáchiñiỹaac! ¿Jái'chogamaxa 'ami ỹida'n, tóoqo'chi sa 'aualáqaiỹet da'me 'eesa n'aqtac? Qá'a so' 'uáichiiñi qad'aqtaxanaxac ỹátaqta naqaiso so' Jesucristo so' 'ami saloxónaxalo so'me qoỹip'eneguet joca'li jaso' 'epaq. 2Ỹa jaỹim 'au'axáchiim naỹi da' 'enaac: ¿Qo'li 'auachiỹoxochiỹaỹi da' 'av'íchiitac na' naqátaxacpi 'me chiỹoqo'ot so' Moisés, da' ma'le 'ami taỹoto so' lepaqal ñi' Dios? 'uootaxa ¿chiỹoqóchiỹi cana'le 'au'amaqchíñii da' 'anaquiáxanaxaquii? 3¿Jái'te 'eeto' 'ami 'chi ỹátaqta qaỹa 'te 'auaỹáchiñiỹaac? ¿'Ami 'aupíchiitapega jodamaxa da' mai'chi 'aumachii da' 'av'íchii da'me dálaxaic 'ad'óiỹaxaquii 'me chiỹoqo'ot so' Dios lepaqal? 4¿Seele qaỹa 'to' ga' náaue ỹima da' 'an'queténaxaquii? ¡'Onaxaico' da' 'uo ga' 'auachiỹoxochiỹaỹi da'me! 5Ñi'me Dios 'me 'ami ỹanema joca'li so' lepaqal, qataxa ỹaloxon jen'me ỹ'aalá'ac da' huáaue qa'en da' 'oñíita, ¿jái'te 'eeto' 'chi ỹí'et? Ñi'me ỹí'et jen'me, qaláxasa sa naqaida da' 'ami 'av'íchiitac na' naqátaxacpi 'me chiỹoqo'ot so' Moisés. Qá'a jaldáta da' 'ami 'au'amaqchíñii joca'li da' 'anaquiáxañiichiỹi n'aqtac.
6So' Abraham 'uo da' lip'iỹáxac ñi'me Dios, qana'chi da'me lip'iỹáxac chiỹoqóchiỹi da' ñi' Dios ỹiỹamaxadéeta so'me. Qana'chi so'me ỹimatá'ac da' 'ónaxaic siỹaxaua. 7Chan'eesa ỹiuen da' 'auaỹáchiñii 'ami na' ỹátaqta 'eesa da' lec'oqtepi so' Abraham, naqáina na' 'uo da' lip'iỹáxac. 8Qá'a naua' nidii's l'aqtaqa ñi' Dios, chi'ena joca'li da' ỹilót'a da' nataq'en jen'me sa judío lé'ecpi, qaláxasa ỹátaqta ỹiỹamaxaden ñi'me Dios jen'me 'uo da' lip'iỹáxac. Qana'chi naua' nidii's d'aqtaxanema so' Abraham da' 'ónaxaic lipí'ic, 'enaac: “Ỹima qomle na' ỹodapecachi siỹaxadipi 'uo da' niỹálaqtaguec 'am chiỹoqóchiỹi.” 9Chan'eesa ga'me d'amaqténataxan, qana'chi 'uo da' niỹálaqtaguec 'ená'am so' Abraham 'me 'amaqténataxanaxaic.
10Chan'eesa jen'me p'étapega jen'me naqátaxacpi 'me chiỹoqo'ot so' Moisés, jen'me huetalégue da' let'ádaic ne'uaxánaguec qomle. Qá'a naua' nidii's n'aqtaqa 'enapega't: “Ỹima jen'me sa 'te ỹipaguelóo'te naa'me 'enapega't ỹima jen'me nedetalégue jan'me lemalate na' naqátaxacpi, qana'chi jen'me huetalégue da' let'ádaic ne'uaxánaguec chiỹoqo'ot ñi' Dios.” 11Chan'eesa ỹataqtegue da' lasoxoc da' sa 'te 'uo ga' ỹiỹamaxaden ñi' Dios da' ỹasouaxat da' ỹ'étetac ga'me damaxasoxolégue na' naqátaxacpi. Qá'a naua' nidii's n'aqtaqa 'enapega't: “Ga'me ỹiỹamaxaden ñi' Dios, ga'me da' l'óiỹaxac ỹachiỹoxotaỹi da' lip'iỹáxac.” 12Qaláxasa jen' naqátaxacpi 'me chiỹoqo'ot so' Moisés sa 'te chiỹaqaỹi da' nip'iỹáxac. Jaldáta da' 'enaac: “Ga'me ỹí'et jen'me naqátaxacpi, ga'me da' l'óiỹaxac chiỹaqaỹi da' ỹí'et na' 'enaac jen'me.”
13So' Cristo qo'mi nec'alaxatee'guesopa da'me let'ádaic qane'uaxánaguec 'me chiỹaqaỹi na' naqátaxacpi, qá'a jeso'me ñaneguet da' let'ádaic ne'uaxánaguec ỹasouaxat da' qo'mi. Qá'a naua' nidii's l'aqtaqa ñi'me Dios 'enapega't: “Ỹátaqta sa 'te lec'óxotolec qomle da' qoỹ'étec ne'uaxánaguec ga' qoỹicoindásee'mec jaga'me 'epaq.” 14Qana'chi qoỹíit'ec da'me, qaidi da' l'ágaxanataxanaxac ñi'me Dios 'me ỹ'axátem joca'li so' Abraham, da'me táchiỹi qoỹin na' sa judiopi da' chiỹoqóchiỹi qoỹin so' Cristo Jesús; qataxa qaidi ỹima qo'mi taỹoto da' chiỹaqaỹi da' qadip'iỹáxac so'me lepaqal ñi'me Dios 'me ỹ'axátetac joca'li ñi'me.
Na' naqátaxacpi sa 'ená'am da' qoỹ'axátet'a
15'Ami ỹaqáỹa', 'uo da' saloqtenaxana, da'me chiỹaqáaue da' mai'chi qansiỹaxauáỹaxac, 'enaac: Ga' siỹaxaua da' 'uootaxa niỹamaxát'e' ga' laqáỹa, 'uootaxa ỹa'uo jaga' lemalate ga' l'aqtac, qana'chi da' ỹim, qana'chi nedelégue. Huá'a, qana'chi qaỹa 'te ỹañoxot taa'le ỹitaxa nesoỹíñi, 'uootaxa da' noqotetenéegue. 16Píiỹa, ñi' Dios 'uo joca'li so' ỹ'axátem so' Abraham, qataxa ga'me lec'óxot. Naa'me nidii's l'aqtaqa ñi'me Dios sa 'te 'eedaac: “ga' lec'óqo'tepi,” da' 'uootaxa 'ená'am da' dosí'ỹa ga' jalcote siỹaxadipi. Qá'a ñi'me 'enaac: “ga' 'ac'óxot.” Qana'chi da'me náaue da' 'oonolec ga' qoỹ'axátet'a siỹaxaua. So'me naqaiso so' Cristo. 17Qá'a da'me senaac 'eet'oi: Joca'li ỹí'et ñi'me Dios da' niỹamaxát'e' so' Abraham. Ca'li ỹim, qana'chi sa 'te 'eneemga. Chan'eesa joca'li ỹivi't naua' cuatrocientos treinta 'uóidi, qana'chi nacot so' naqátaxacpi 'me chiỹoqo'ot so' Moisés. Qaláxasa so'me naqátaxacpi sa ỹañoxot taa'le nesoỹíñi so'me ỹamaxataxac, qataxa da' 'uootaxa qaỹa 'te 'enec qa'en da'me ỹ'axátet'a ñi'me Dios. 18Qá'a ga' ỹan ñi'me Dios da' 'uootaxa chiỹaqaỹi qa'en jen' naqátaxacpi 'me chiỹoqo'ot so' Moisés, qana'chi sa naqaiga ga' ỹ'axátetac. Qaláxasa ñi'me Dios joca'li 'uo da' ỹ'axátem so' Abraham, qaláxasa sa 'te qoneuodéna.
19Qana'chi ¿jái'chogamaxa náaue na' naqátaxacpi 'me chiỹoqo'ot so' Moisés? 'Chi jen'me niỹaqa'aguet qoỹin, da' qaidi ỹaloxon na' lesamaxataxacpi na' siỹaxadipi. Qana'chi jen'me d'onataxan, cha ỹivíde'ta da' nóvi' ga'me nec'óxot 'me taỹá'a ga' ỹaloxóotapega ñi' Dios. Jénjo' naqátaxacpi ca'li qoỹ'axat, qaláxasa qoỹin chiỹaqaỹi so' namaxasecpi 'me piỹem lé'ecpi. Qana'chi so' Moisés 'chi qoỹin netaxaỹáxanaxanec. 20Qaláxasa sa 'te qoỹiuen ga' 'chi netaxaỹáxanaxanec da' 'uo ga' ỹaloxóotac ga' 'oonolec siỹaxaua. Qataxa ñi'me Dios na'chiñíta 'oonolec, qaỹa 'te laqáỹa.
Da' l'onataxanaxac na' naqátaxacpi
21¿Da'me qo'li 'éetapega da' jen' naqátaxacpi 'me chiỹoqo'ot so' Moisés sega'me da' nauté'ne' da'me ỹ'axátetac joca'li ñi' Dios? 'Axai', sa 'te naqaida da' 'éeta. Qá'a taa'le 'uo ga' qoỹan naqátaxac da' dec'alaqtaxan, qana'chi ñi'me Dios 'uo taa'le ga' ỹiỹamaxaden, qá'a ỹí'et na' damaxasoxolégue jega'me naqátaxac. 22Qaláxasa naua' nidii's l'aqtaqa ñi'me Dios ỹ'axa't da' ỹima na' siỹaxadipi lecoñitáisec jen' jaloicpi. Da'me na'chi naq'áita, qaidi ga' d'amaqténataxan, qana'chi taỹot ga'me ỹ'axátetac ñi'me Dios, chiỹoxotaỹi da' ỹ'amaqten so' Jesucristo.
23Ca'li maliaxa sa nóvi' da'me nip'iỹáxac, qana'chi jen' naqátaxacpi sega'me da' qo'mi ỹapadéeta'ualo, ỹiuatét'a da' qoỹ'axáteegue ga' ladic da' qop'iỹá'a so' Jesucristo. 24Qana'chi jen'me naqátaxacpi josii'chi 'chi qo'mi ỹilotalóo'te, 'ená'am da' 'en qo'mi ga' nootolec da' qo'mi ỹapaxagueet'ape, cha ỹivíd'a joca'li nóvi' so' Cristo, qaidi da' s'amaqténaq jeso'me, qana'chi ñi'me Dios qo'mi ỹiỹamaxade'n. 25Naỹi da' sóxote nóvi' da'me nip'iỹáxac, qana'chi sa 'te souqat'ot da' lapaxaguenataxanaxac jen' naqátaxacpi.
26Qá'a da'me nip'iỹáxac naqaida 'me 'en ỹima 'ami lec'óqo'te ñi' Dios, ỹasouaxat da' 'auqochíita'uo so' Cristo Jesús. 27Chan'eesa ỹima da' 'oñíita 'me 'aunoxoñiiuó'o da' 'auqochíita'uo so' Cristo ca'li 'ami qonachiláxa'n. Huá'a, qana'chi 'ami ỹanaỹilo da' lasoxoc so'me, 'ená'am ga' ỹ'oqóchiỹi noxot. 28Chan'eesa naỹi qaỹa 'te ga' ỹaqá'a ga' lasoxoc, temaqaidi da' 'uootaxa 'ami judío lase', 'uootaxa ga' sa 'te judío lé'ec, 'uootaxa ga' nelatac qataxa ga' sa nelatac, lé'em 'uootaxa ỹauo. Qá'a sóxote da' 'auqochíita'uo so' Cristo Jesús, qana'chi ỹima da' 'oñíita 'ená'am da' 'ami 'oonolqat'ape. 29Qá'a da' sóxote 'ami lalémaxase'te so' Cristo, nataq'en 'ami lalémaxase'te lec'óqo'te so' Abraham, nataq'en 'ami 'auacoñiiỹet qomle ga'me ỹ'axátetac jocalia'chi ñi'me Dios.
Currently Selected:
Gálatas 3: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.