Gálatas 4
4
1Da'me senaac 'eet'oi: Ga' nec'óxot 'me sétaaque da' talégue jen' n'atet ga' let'a, da' 'uootaxa maliaxa n'asolec, jega'me ỹátaqta 'ená'am ga' 'chi namaxasec, temaqaidi da' naqaiga 'me nadípa. 2Qataxa 'uo jen' siỹaxadipi 'me ỹilolégue jeso'me, qataxa ỹilolégue na' l'onataxanaxacpi, cha ỹivíde'ta ga' nolo' 'me ỹiga so'me let'a. 3Qana'chi naq'áita da' qo'mi. Ca'li maliaxa souqátaaue da' qanenóidisec, qana'chi qo'mi souqat'ot jen'me leenataxac jen'me 'chi qansiỹaxauáỹaxac 'me huetalégue jen' 'aléua. 4Qaláxasa ca'li ỹivíta so' nolo' 'me naloqtenec, qana'chi ñi'me Dios namaq so' lec'óxot, táaue qa'en jen' lauel jaso' ỹauo, da' chiỹaqáaue qa'en na' judiopi 'me huet'ot da' lapaxaguenataxanaxac jen' naqátaxacpi. 5Naqaida da' 'éeta da' livídaxac so'me, qaidi qo'mi ỹisodéegue, qaidi sa 'te da' souqat'ot jénjo' naqátaxacpi, qana'chi ñi'me Dios qo'mi ỹaconeeta da' ỹátaqta qo'mi lec'óqo'te.
6Chan'eesa da'me ỹichoxot da' ỹátaqta 'ami lec'óqo'te ñi'me Dios 'enaac: Ñi'me 'ami namaxalo so' lepaqal so' lec'óxot da' ta'ñiita naua' 'adiquidiaqtéldii'. So'me nepaqal diỹáxan, qana'chi 'enaac: “¡'Am ỹit'a!” 7Chan'eesa naỹi ỹátaqta 'am lec'óxot ñi' Dios, sa 'te 'am 'chi namaxasec. Naỹi da' 'am ỹátaqta 'am lec'óxot, qana'chi ñi'me 'am ỹanem qomle da' lesaliaxa 'me ỹ'axátetac da' ỹan, chiỹaqaỹi qa'en so' Cristo.
So' Pablo ỹátaqta 'uo da' loouoxo ỹasouaxat jen' 'amaqténataxanaxaicpi
8'Ami ca'li maliaxa sa 'auaatetoñii ñi'me Dios, qana'chi 'ami lecoñitai's jen'me sa di'ỹoq qontameetapecot 'me sa 'eesa. 9Qaláxasa naỹi da' 'auaatetoñii ñi'me Dios, 'uootaxa ñi'me 'ami ỹaateto'n, qana'chi ¿tóoqo'chi 'ami da' ỹitaxa 'av'iỹílqaitapega da'me napaxaguenataxanaxac 'me qaỹa 'te ga' l'añaxac qataxa qaỹa 'te ga' náaue da' ỹitaxa 'oviit'ot, da' qaidi 'ami lamaxa's? 10Qá'a 'ami maliaxa huo'oi naua' noloqo'te 'me 'aviỹamaxachiit'ape, 'auóxoiqa, naloqtenaqa, qataxa naua' 'uóidi. 11Chan'eesa jaỹim ỹátaqta let'ádaic da' ỹoqolánaxa da' 'uootaxa qaỹa 'te ga' náaue da' ỹ'onataxanaxac 'me 'ami huaavlo.
12'Ami ỹaqáỹa', 'ami ñachoxodenoovlo da' n'óota da' jaỹim 'auadénaxachii, qá'a jaỹim na'chi'ami sena'ama. Qá'a sa 'te 'ami 'uo ga' jaỹim 'av'íchiic. 13Qá'a ma'le sóxote da' 'ami 'auaỹáchiñii da' 'éeta ca'li ỹímta da' 'ami s'axatema da' n'aqtac 'me nec'alaxaqui. Qana'chi séet'ec ca'li da'me ỹasouaxat so' ỹapite'na. 14Jeso'me ỹapite'na 'me jaỹim lapoqot, so'me 'chi ñ'iinaxat. Qaláxasa taqaiué'te 'ami sa 'te jaỹim 'au'alóxoñii, qataxa sa jaỹim 'au'otáñii. Jaldáta da' jaỹim 'oñíit'em 'aviñii ga' Dios lamaxasec piỹem lé'ec, qataxa 'oñíit'em 'aviñii da' na'chaỹim Jesucristo. 15Qaláxasa ¿Jái'chogamaxa taiỹi ga' 'antónaxaquii 'me 'auanómiit'eguet joca'li? Jaỹim senaac da' 'uo da' 'ónaxaic 'an'aqtaquii, 'enaac: Qá'a taa'le 'auaqánachichii da' 'anaqachii' naua' 'ad'ai'chídii' da' jaỹim 'auañiima da' 'uootaxa qaỹa 'te ga' laqalaic. 16Qana'chi naỹi, ¿qo'li 'ami ñauténaxa'u ỹasouaxat da' jaỹim 'eesa da' 'ami s'axatema?
17Qá'a jénjo' siỹaxadipi ỹátaqta jalcote da' naquitaxac da' 'oñíita, qaláxasa sa nó'in ga' naquitétaaque. Qá'a jen'me 'chi sétaaque da' qo'mi 'oquí'ỹai. Da' ỹim, qana'chi 'ami 'auasoilégue ga' 'éetapeec jen'me. 18'Eesa da' 'ónaxaic da' qonaquitét'a ga' naqáỹa. Qaláxasa da' n'óota ga' qoỹíitapeec, da'me n'óota da' na'chi 'eeta't da' qodictelégue. Qataxa sa 'te jaldáta da' 'ami souetaavlo. 19'Ami ỹalqolqa, naỹi qataxa ỹipaquet'egue da' ỹaỹaliaxa, ỹasouaxat da' 'oñíita, sená'am jaga' ỹauo da' daỹalítac, da' sétaaque da' c'oi. Qana'chi sequet'ot qomle da' ñi'queténaxac, cha ỹivíd'a qomle so' Cristo da' 'ami quichiilo da' lasoxoc. 20¡Quiliisaxa da' na'chi'ami souetaavlo naỹi, da' qaidi dálaxaic qasen ga' ỹosáxac da' 'ami setaxaavlo, qá'a jaỹim ỹátaqta sa saỹáten ga' séeta, ỹasouaxat da' 'oñíita!
Qodaloqtenaxana jaso' Agar qataxa jaso' Sara
21'Ami 'me sétaaque da' 'oviit'ot jen' naqátaxacpi 'me chiỹoqo'ot so' Moisés, jaỹim 'au'axáchiim naỹi da'me 'enaac: ¿qo'li sa 'te 'anaquiáxañiỹapego' naale da' 'enaac jen' naqátaxacpi? 22Qá'a da'me nedétañi 'eet'oi: So' Abraham dos saua' lec'óqo'te. So' 'oonolec lec'óxot, lat'e jaso' nelata. So' laqáỹa qamqaa'me lat'e jaso'me lalémaxasete loua 'me sa nelata. 23So'me lec'óxot 'me lat'e jaso'me nelata, da' lañoxoc na'chida da'me lañoxoc ỹima jen'me ỹ'oqóchiỹi nootolec. Qana'chi so'me lec'óxot jaso'me sa 'te nelata, qamqaa'me da' lañoxoc jeso'me ỹipaquíchiỹi da' ỹ'axátetac joca'li ñi' Dios. 24Da'me 'chi qodaloqtenaxanỹi. Qá'a saa'me dos ỹauo', qana'chi naavlo naua' dos ỹamaxataxaco. So'me 'oonolec naua' ỹamaxataxaco, so'me chiỹoqóchii'ña jeso' qasoxonaxa 'me lenaxat Sinaí. Jeso'me naqaiso so'me náaue jaso' Agar. Chan'eesa jen'me siỹaxadipi 'me huet'ot so'me ỹamaxataxac, jen'me da' lañoxoc 'chi nelatac. 25Qá'a jaso' Agar naqaso jaso' náaue jeso' qasoxonaxa Sinaí 'me huá'ña di' 'aléua Arabia. Jaso'me na'chaso jaso'me náaue di'me naỹi Jerusalén, qá'a náaue di'me noic 'ená'am jaga' 'chi nelata, nataq'en ỹima jen'me lec'oqtepi. 26Qaláxasa di'me noic Jerusalén 'me huet'ague di' piỹem, di'me ỹátaqta huosóta. Qana'chi qo'mi 'me na'chiqo'mi lec'óqo'tepi di'me. 27Qá'a naa'me nidii's l'aqtaqa ñi'me Dios 'eet'oi:
Ỹátaqta 'am mátac qomle, 'am ỹauo 'me quemáloxo, 'am 'me qaỹa 'te ga' 'ac'óqo'tepi;
ỹátaqta 'au'alaq qomle ỹasouaxat da' 'adamaic, 'am 'me sa 'te 'ad'amaxac da' 'adaỹaliaxa da' 'am c'oi.
Qá'a jaga' ỹauo 'me niima ỹátaqta ỹágueegue qomle ga' lec'óqo'tepi,
sa 'te 'ená'am jaga' ỹauo 'me 'uo ga' loua.
28'Ami ỹaqáỹa', qo'mi senqá'am so' Isaac, qana'chi qo'mi lec'óqo'te ñi' Dios 'me qo'mi ỹ'axátet'ape joca'li. 29Qaláxasa da'me 'éeta so'me nec'óxot, 'me chiỹaqaỹi da' lañoxoc jen' 'chi napat, ỹátaqta ỹicáatac joca'li so'me laqáỹa nec'óxot 'me chiỹaqaỹi da' lañoxoc so' Espíritu Santo, qana'chi naq'áita naỹi. 30Qaláxasa ¿jái'te 'éete' naua' nidii's l'aqtaqa ñi' Dios? 'Enapega't: “'Au'odáiỹi qomle jañi' nelata qataxa ñi'me lec'óxot, qá'a ñi'me lec'óxot jañi' nelata sa 'te ỹaqanatet taa'le talégue da' nesaliaxa 'me qoỹaqátaxatapiỹe't da' talégue ñi'me lec'óxot jañi' ỹauo 'me sa 'te nelata.” 31Chan'eesa 'ami ỹaqáỹa', qo'mi sa 'te senqá'am so'me lec'óqo'tepi jaso' nelata. Qá'a qo'mi senqá'am so'me lec'óqo'tepi jaso'me ỹauo 'me sa 'te nelata.
Currently Selected:
Gálatas 4: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.