Gálatas 5
5
'Oquiitelégue qomle da' 'ami huesóte'
1So' Cristo qo'mi ỹisodéegue, qaidi qo'mi huesóte'. Chan'eesa 'ami 'ená'te 'axañíỹi qomle da'me dójo' 'ansoxoquii. Qataxa 'ená'te 'av'iỹílqaiỹa qomle da' 'chi 'ami nelatáqa.
2Píiỹa, jaỹim 'anaquiáxañiỹa. Jaỹim Pablo, 'ami senapegalo, qomle 'anañáñiiỹet da' 'uootaxa da' qoỹa'uo ga' n'anaxaset na' ló'oc ñi' 'oonolec da' 'oñíita, qana'chi so' Cristo ỹátaqta qaỹa 'te ga' náaue 'aviñii. 3Chan'eesa ỹitaxa s'iỹílaxalégue da' senaac da' gamachaqaiga siỹaxaua da' ñaneguet da' qoỹa'uo ga' n'anaxaset na' ló'oc, qana'chi ga'me mai'chi ỹí'et ỹima jen'me 'enapéga jen' naqátaxacpi 'me chiỹoqo'ot so' Moisés. 4'Ami 'me 'oñiitapeela't da' 'ami ỹiỹamaxade'n ñi'me Dios, qá'a 'av'íchiitac jen'me naqátaxacpi, qana'chi ỹátaqta 'oquí'ỹai so' Cristo qataxa da' lesóxodic ñi' Dios. 5Qá'a qo'mi sachiỹoxotaqáchiỹi so' Espíritu Santo qataxa da'me qadip'iỹáxac da' qo'mi ỹaueegueta da' qanaquitaxac da' qo'mi ỹiỹamaxade'n ñi' Dios. 6Qataxa da' sóxote soqotaqáta'uo so'me Cristo Jesús, qana'chi ỹátaqta qaỹa 'te ga' náaue da' 'uo ga' n'anaxaset na' ló'oc ga' siỹaxaua, 'uootaxa qaỹa. Jaldáta da' qadip'iỹáxac 'me ỹátaqta 'uo da' náaue. Qá'a da'me qadip'iỹáxac, na'chida 'me qo'mi nichaatoovlo qa'en da' nesóxodic.
7'Ami ỹátaqta 'adiỹamqáichiiñi joca'li. Qalqaiga ¿jái'chogamaxa 'ami ỹidaata'salo da' 'axañíiñi da' 'aualáqaiỹet da'me 'eesa nasoxoc? 8Jeda'me sa naqaiñi taa'le chiỹaqaỹi ñi'me Dios, qá'a jiñi'me 'ami ỹiỹáxanalo. 9'Ená'te 'aupetelaqaiỹet qomle da' “ga' 'chi socholec ga' ỹaseedáxatapiỹi jan' pan, qaláxasa jega'me ỹima quíchiỹi ga' nonáñiisec.” 10Da' ñaquitaxac da' 'oñíita na'chi chiỹoqo'ot so' qadesaliaxanec da' sa 'te ỹoxosá'a ga' 'adeenataxaquii. Qaláxasa ñi'me Dios ỹí'et qomle ga' ne'uaxánaguec gamachaqaiga siỹaxaua 'me sa 'ami ỹalémaxa't.
11Qataxa jaỹim, 'ami ỹaqáỹa', da' 'uootaxa maliaxa saqatetapeelégue da' qoỹa'uo ga' n'anaxaset na' ló'oc ga' siỹaxaua, qana'chi na' judiopi sa 'te taa'le jaỹim ỹicáatac. Qá'a taa'le 'éeta dójo', qana'chi da' n'aqtaguec da' leleuaxa so' Cristo joca'li qoỹip'enaséguem, jeda'me sa 'te 'uootaxa nomeguet jen'me. 12Qaláxasa jen'me siỹaxadipi 'me sa 'ami ỹalémaxa't da' sétaaque da' 'av'íchii ga' 'an'anaxasíchii, ¡n'ooto' jen'me da' maliaxa ỹima da' n'áxat da' ló'oquiaxac!
13Qá'a 'ami ỹaqáỹa', 'ami qoỹiỹáxanalo da' qaidi 'ami huesóte'. Qaláxasa jaldato' qomle da' sa 'auálaxañiỹa't dójo' 'ansoxoquii da' 'uootaxa 'av'íchii ga'me 'éetapeec da'me 'adapáchiỹaxaquii. Jaldato' da' ñi' 'oonolec da' 'oñíita ỹilo'oguet ga' laqáỹa, ỹasouaxat da' 'adesóxodiquii. 14Qá'a ỹima jen' naqátaxacpi 'oonolec da'me lasoxoc 'me ỹimata'a't, 'eet'oi: “'Auchoxoden ga' 'adaqáỹa, 'ená'am 'auen da' mai'chi 'anchoxodeela't.” 15Qaláxasa 'ami da' mai'chi 'anpaxachiitapega't, qataxa ñi' 'oonolec da' mai'chi ỹalíctac ga' laqáỹa, da'me dójo' 'ad'oi'ỹaguet qomle. Píiỹa, qomle sega'me mai'chi 'anoláxachiitapega't.
Da' lamanaxanaxa da' 'chi napáchiỹaxac 'uootaxa da' n'óiỹaxac 'me chiỹoqo'ot so' Espíritu
16Da'me senaac 'eet'oi: Ỹátaqta 'oquiit'egue qomle ga' 'éetapeec so' Espíritu Santo, qaidi sa 'oquíitapegue' ga'me 'éetapeec da' 'adapáchiỹaxaquii. 17Qá'a jen' 'éetapeecpi ga' 'chi siỹaxaua sa neuoté'ne' ga'me 'éetapeec so' lepaqal ñi' Dios. Qataxa so' nepaqal nataq'en sa neuoté'ne' ga'me 'éetapeec ga' 'chi siỹaxaua. Na'chinaua 'me sa neuotena'salo. Chan'eesa sa 'auañoxochii da' 'av'íchii ga'me mai'chi 'oñíitapeec. 18Qaláxasa da' qomle na'chiso so' Espíritu Santo da' 'ami ỹaue'j, qana'chi ma'le sa 'oviit'ot jen' naqátaxacpi.
19Huá'a, qana'chi qaỹa 'te laqalaic da' di'ỹoqóta jen' n'onataguec ga'me quétapegue' da' mai'chi lapáchiỹaxac, 'eet'oi: leuauátac jaga' sa loua, qataxa ỹauapiỹi naua' paanaxadáiqa, qataxa 'uonáxaỹaic, 20qataxa da' qontamenot na' 'chi nadénaqtacpi, qataxa ỹacona ga' laqáỹa, qataxa da' niquiỹáxa, 'oquiáxaic qataxa c'álaxanaxaic, sa ỹoxó'ña, qataxa d'onataxanot da' 'chi naquitaxac, qataxa niỹotapega't qa'en na' siỹaxadipi. 21Nataq'en jen'me quiỹáxanaqtáqaicpi, laataxanaxaicpi, ỹómaxaicpi, qataxa qui'ỹáxaicpi, qataxa 'uo na' lanatecpi 'me ỹ'étetac 'ená'am dójo'. Ỹátaqta sichoxotet'ema, 'ená'am so' ca'li 'ami s'axatema, qomle 'uo ga' ỹ'étetac jen' 'ená'am jénjo', qana'chi jega'me sa ỹaqanatet qomle da' ỹaconeguet ga' l'onataxanaxac ñi' Dios da' ỹilolquéna.
22Qaláxasa da'me jaláỹaxac ga' neta'nỹet so' Espíritu Santo, 'eet'oi: 'Uo da' lesóxodic, lamaic, lelagaxadic, neuálaxainaxac, loqopi'chidíỹaxac, ỹamaqtaxanaxaic, qataxa nepé'et, 23sa jágaqtenaxaic, qataxa netelela't. Ga'me 'ená'am jénjo'pi, qana'chi qaỹa 'te ỹañoxot taa'le ỹicocháxac ga' siỹaxaua. 24Qataxa ga' siỹaxaua 'me sóxote da' lalémaxaset so' Cristo, qana'chi jega'me 'ená'am da' sóxote da' qoỹip'enaséguem da' ló'oquiaxac, cásee'megue ỹima na' loqopi'chidíỹaxac qataxa jen'me lanatecpi. 25Qá'a jeda'me qad'óiỹaxac chiỹoqo'ot so' Espíritu Santo, chan'eesa n'óota qomle semacháq'a naqaiso 'me sasoxolégue ỹima jen'me s'étaqtacpi.
26'Ená'te qo'mi ỹ'oxodénaxaiqa qomle, qataxa ñi' 'oonolec 'ená'te taa'le ỹalemataxanaxáatac ga' laqáỹa, qataxa 'ená'te taa'le ñiquiỹáxasoqot'a't.
Currently Selected:
Gálatas 5: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.