Lucas 13
13
Ga' siỹaxaua ỹiuen da' ỹaxanéegue ga' loic
1Qana'chisaua jesaa'me noloqo'te, qana'chi huo'oi saua' novi't, qana'chi d'aqtaxáatrapeguem so' Jesús da' jeso' net'a Pilato 'uo so' ỹalaat siỹaxadipi 'me l'acháqa' di' Galilea. Ỹim, qana'chi ỹalectenguet jaso' letauo' jeso'me siỹaxadipi jaso' letauo' jeso'me lalaatacpi síiỹacpi 'me sétaaque da' ỹigóoue da' sétaaque qa'en lachítaqtaxanaqte da' ỹanot ñi' Dios. 2Qana'chi so' Jesús 'enaaco':
—¿'Ami séetapega 'aviñíitapega da' jeso'me siỹaxadipi qoỹ'étec dójo' ỹasouaxat da' ỹapágueegue da' 'itaxalóxoicpi, sa 'ená'am jen' laỹi 'me l'acháqa' di' Galilea? 3'Ai', sa naq'áita. 'Ami nataq'en qomle da' sa 'auaxañiidéegue naua' 'adoicódii', qana'chi nataq'en ỹima da' 'oñíita 'adelivii. 4'Uootaxa jeso'me dieciocho 'me ỹip'áxañi joca'li huáñi laiñi jaso' neuavic 'me ná'ña di' Siloé, ¿séetapega da' 'aviñíitapega da' 'uootaxa so' siỹaxadipi ỹágueegue da' let'ádaic da' loic, sa 'ená'am jen'me laỹi 'me néta'ña di' Jerusalén? 5'Ai', sa naq'áita. 'Ami nataq'en da' sa 'auaxañiidéegue jenaa'me 'adoicódii', nataq'en 'ená'uac da' 'oñíita 'adelivii.
Qodaloqtenaxana jaso' higo lichidic 'me qaga 'te jala
6Qana'chi so' Jesús ỹa'uo so' daloqtenaxana, 'enaaco':
—'Uo jeso' siỹaxaua 'uo jaso' lañiise higo lichidic, jaso'me nolelelégue jeso'me n'aléua. Da' jec da' dec'atenaxana, qaláxasa qaga 'te 'uo jaga' ỹilá'a jala. 7Ỹim, qana'chi qo'enapego' jeso'me siỹaxaua 'me ỹilotalégue jeso'me 'aléua, 'enaaco': “Ma'le ỹivi't naua' tres 'uóidi da' ñ'iỹílaqa'ta jada'me 'epaq da' ñ'iiná'a jaga' jala, qaláxasa taqadíta qaga jaga' selá'a jala. Chan'eesa n'óota da' 'auquesoxoỹi jada'me. ¡Saaquetáxa da' 'chi netalégue di'me 'aléua!” 8Qaláxasa jeso'me ỹilotalégue jeso'me 'aléua 'enaaco': “'Am ỹadípa, 'ónaxaic da' na'chínata jen'me huó'e da' 'amachí'ỹa jada'me, jaỹim ñisetot qomle jada'me, qataxa sasoqot ga' lata'. 9'Uootaxa ỹañoxot da' 'uo jaga' jala jada'me. Qaláxasa qomle 'uootaxa qaga 'te jala, qana'chi n'óota qomle da' qoỹiquesoqot.”
So' Jesús nataden jaso' ỹauo 'me ñ'ítañi so' nolo' mataxaqui
10'Uo jeso' nolo' mataxaqui, qana'chi so' Jesús dapaxaguenataxáatac, huétaaue jaso'me lemáxaqui na' judiopi. 11Huétauo jaso' ỹauo 'me sóxote dieciocho 'uóidi da' sa nó'in. 'Uo jeso'me lé'ec paiỹac 'me ñ'ítañi qa'en, qana'chi jaso'me sa ỹachimaxaséguem. 12Qana'chi so' Jesús joca'li ỹilá'a, qana'chi ỹiỹáxana qo'enapego', 'enaaco':
—'Am ỹauo, naỹi ma'le huesóteegue da' 'adeleuaxa.
13Qana'chi huaselelégue jaso'me, huá'a, qana'chi jaso'me ỹañoxot da' ỹachimaxañi, qana'chi jaso'me ỹi'ỹoxodéetac ñi' Dios. 14Qaláxasa jeso'me ỹilotalégue jeso'me nemáxaqui ỹátaqta dalemata ỹasouaxat so' Jesús da' datadénataxanỹi so' nolo' mataxaqui. Qana'chi qo'enapego' jeso'me siỹaxadipi, 'enaaco':
—Huo'oi maiñaxa naua' seis noloqo'te 'me n'óota da' qod'onataxañiilo. Qana'chinaua toqo' huetoovlo da' 'auanaquíỹi da' qaidi 'ami qonatade'n, 'ena't da' na'chidi di' nolo' mataxaqui.
15Qana'chi so' qadesaliaxanec ỹ'at, 'enaaco':
—'Ami 'me 'oñíỹapeela't 'ami 'eesoda, ¿séetapega qaỹo' da' 'uo ga' 'oonolec da' 'oñíita da' ỹisóiỹi ga' lauégaxanaxala' huaca, 'uootaxa ga' lalo 'ásena, ga' nolo' mataxaqui da' qaidi ỹauegaxasom da' niỹómaxan? 16Qá'a jada'me ỹauo 'me lec'oqte jeso'me qadapéena' Abraham, qana'chi so' paiỹac Satanás necoñáxatet'aguet jada'me da' leleuaxa naỹi ma'le ỹivi't naua' dieciocho 'uóidi, ¿séetapega naỹi sa nó'in da' huesóteegue qoỹin da' leleuaxa jada'me jen' nolo' mataxaqui?
17Qaama'le joca'li 'enaac dójo' so' Jesús, qana'chi ỹima jen'me dep'aguenataxáatac ỹátaqta 'uo da' l'alóxo. Qaláxasa jeso'me siỹaxadipi qaa'le ỹima 'uo da' netónaxac ỹasouaxat jen'me ỹauaachiỹipi ỹí'et so' Jesús, 'me qaỹa ga' 'ená'am da' li'ỹoxodic.
Qodaloqtenaxana jaso' jala jana' mostaza
(Mateo 13.31-32; Marcos 4.30-32)
18Qataxa 'enaaco' so' Jesús:
—¿Nái'cho' jogamaxa 'ená'am qasen da' l'onataxanaxac ñi' Dios 'me ỹimata'a'téna? ¿Jái'chogamaxa saloqtenaxana? 19Jeda'me 'ená'am qasen jaga' jala jan' lenaxat mostaza da' ga' siỹaxaua ỹacona, ỹim, qana'chi ỹaalégue ga' n'aléua, ỹim, qana'chi naséguem, cha ỹivíde'ta da' 'ená'am jaga' 'epaq ỹátaqta lat'édai. Ỹim, qana'chi janac jen'me maỹo'pi, qana'chi ỹí'et na' lepata'j, ỹanaỹilo naua' lepeel.
Qodaloqtenaxana jega'me lale'gue jan' pan
(Mateo 13.33)
20Jeso'me Jesús nataq'en 'enaaco':
—¿Jái'chogamaxa saloqtenaxanem da' l'onataxanaxac ñi' Dios da' ỹimata'a'téna? 21Jeda'me 'ená'am qasen ga' lale'gue jaga' pan 'me ỹacona jaga' ỹauo. Ỹim, qana'chi ỹasaxáaue ga' let'ádaic lonáñiisec 'arína, qana'chi ga'me ỹaseedíỹi qa'en ỹima jega'me nonáñiisec.
Jega'me som 'me sa lecaỹi
(Mateo 7.13-14, 21-23)
22Qana'chi jeso'me Jesús joca'li tat'ague di' Jerusalén, qana'chi talégue jen'me noicpi qataxa jen'me noiqapiolec, qana'chi dapaxaguenataxáatac. 23'Uo so' denataxan, 'enaaco':
—'Am qadesaliaxanec, ¿séetapega sa lamai' qomle gaua' qonec'alaxatréegue?
Qana'chi jeso'me 'enaaco':
24—'An'añaxachiiỹo' qomle da' 'aunoxoñiiuó'o ñi'me som 'me sa lecaỹi, qá'a jaỹim senaac da' ỹátaqta jalcote qomle na' sétaaque da' ỹinoxoneuo, qaláxasa sa ỹañoxot. 25Qá'a jega'me loxot ga' 'emec, da' sóxote ñíseguem, qana'chi ỹapadínỹi ga' nasom ga' l'emec, qana'chi 'ami 'me 'aup'áitaiỹi, qana'chi 'aviỹáxañiitapee'uo jega'me som da' 'oñiit'oi: “'Am qadasoxola', qo'mi 'au'ouáteeta.” Qaláxasa jega'me ỹ'at, 'enaac: “Neegue't, sa saỹáten jega'me 'auachiỹoqoi'ỹague 'ami.” 26Huá'a, qana'chi 'ami qomle 'oñiit'oi: “Qo'mi 'am qadiqui'ỹáxaua qataxa 'am qanỹómaxaua ca'li, qataxa 'auapaxaguenataxáatac ca'li 'ouéta'ña di' sonqáta'ña qad'acháqa'.” 27Qaláxasa jega'me 'ami 'enapegalo, 'eet'oi: “Jaỹim ma'le 'ami senapegalo da' jaỹim sa saỹáten ga' 'auachiỹoqoi'ỹague. Jaỹim 'oquí'ỹai qomle 'ademíiỹa da' 'oñíita, ỹima 'ami 'me 'av'íchiitac da' sa nó'in.” 28Huá'a, qana'chi 'ami 'anoiñíitac qomle qataxa 'auoquiỹa't naua' 'adodaitéldii' ỹasouaxat da' 'adalematáiqui qomle 'aulói'ỹa ga' Abraham, Isaac, Jacob qataxa ỹima jeso'me l'aqtáxanaxanecpi ñi' Dios, qomle qouét'a ga' l'onataxanqa' jiñi'me. Huá'a, qana'chi 'ami qoỹ'odédaiỹi. 29Qá'a janac qomle na' siỹaxadipi 'me chiỹoxogue da' se'u qataxa da' taỹíñi qataxa na' chiỹoxogue da' néte' qataxa da' jávit, da' qaidi ñíiñi da' liqui'ỹáqa' ga'me l'onataxanqa' ñi' Dios. 30Huá'a qomle, qana'chi 'uo qomle naỹi jen'me te'me nec'ataxáatauo, qana'chi naqáina qomle na' 'uáueegue; qataxa 'uo qomle jen'me naỹi 'uáueegue, qana'chi naqáina 'me qoỹip'áxateegue qomle.
Jeso'me Jesús noỹiitapeelégue so' Jerusalén
(Mateo 23.37-39)
31Qana'chiso jeso' nolo', qana'chi nivídedeuo saua' chiỹoqodáaue na' fariseopi. Qana'chi qod'aqtaxanem jeso'me, qoỹinapéga:
—'Ocá'ai qomle jen'me, péga ñi' net'a Herodes sétaaque 'am damaxasoxolégue da' 'am qoỹalaat.
32Qaláxasa jeso'me 'enaaco':
—'Auc'áchiỹa, 'au'aqtaxañiim qomle jiñi'me 'oiquiaxaic, 'oñiit'oi: “Naỹi na' nolo' qataxa qomle ỹ'oxoñi s'odéegue jen'me né'ecpi nataqtáqaicpi qataxa ñataden na' leuaxaicpi, qana'chi jega'me nolo' laqáỹa, qana'chi semat da' ỹ'onataxanaxac.” 33Qaláxasa n'óota da' ỹa cada'acolec da' sec jen' nolo' nataq'en qomle ỹ'oxoñi qataxa ga' laqáỹa nolo', qá'a sa nó'in da' sa huá'ña di' Jerusalén da' ỹileu ga' 'oonolec jen'me l'aqtáxanaxanecpi ñi' Dios.
34¡Jaigamaa 'ami 'me 'oñíita'ña di' Jerusalén 'me 'aualaachii jeso'me l'aqtáxanaxanecpi ñi' Dios, qataxa 'auasaqáitapeec jen' qa' jeso'me lamaxa'spi 'me 'ami namaxalo! ¡Ỹátaqta da' ỹidiáxa naale da' ỹapona't na' 'adec'oqtepi, da' sená'am jaga' 'olégaxa da' naqapaxaalégue ga' lec'oqtepiolec, qalaq'o 'ami sa 'anasiñii! 35Qana'chi toqo' naua' 'ad'achaqchídii' qomle qaa'le ỹátaqta totelóo'te, qana'chi táchii'ña naỹi da' sa jaỹim 'anauañíi'ỹi', qomle qana'chi 'oñiit'oi: “Ỹátaqta 'ónaxaic qomle da' ladíquiaxac jen'me náictapegue' da' lenaxat ñi' qadasoxola' Dios.”
Currently Selected:
Lucas 13: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
