Lucas 15
15
Qodaloqtenaxana jaso'me n'aanaxate 'me ỹisómaac
(Mateo 18.10-14)
1Joca'li janac da' naquiáxana so' Jesús ỹima jeso'me 'itaxalóxoicpi qataxa jeso'me ỹaconapeeguet jan'me laseete ga' net'a Roma lé'ec. 2Qana'chi jen'me ỹalcapíỹi so' fariseopi qataxa so' dapaxaguenataxanapeec na' naqátaxacpi qana'chi nec'onaxáatapegue' jeso'me, 'enaaco':
—Dójo' siỹaxaua qa'chi ỹaconguet na' 'itaxalóxoicpi qataxa liqui'ỹáxaua jen'me.
3Qana'chi so' Jesús ỹa'uo so' daloqtenaxana, 'enaaco':
4—Da' 'uo ga' 'oonolec da' 'oñíita da' 'uo jaga' cien lalo n'aanaxate, da' ỹisómaac jaga' 'oonole lalo, ¿qo'li sa 'te jodamaxa sa n'ónaxatalégue ga' n'ónaxa jaga' noventa y nueve, ỹim, qana'chi nimitáaque jaso' ỹisómaac, cha ỹivíd'a da' ỹauana? 5Da' 'uootaxa ma'le ỹauana, qana'chi ỹachalóo'te naua' lauáguel, qana'chi ỹátaqta mátac. 6Da' ỹivíde'uo ga' l'acháqa', qana'chi ỹimata'a't jeso'me nauotaxau'pi qataxa jeso' leseecpi. Qana'chi 'enapego', 'enaaco': “Ỹátaqta 'antóñiitapiỹe't qomle jaỹim 'aviñí'ỹam, qá'a sóxote sauana jañi'me ỹilo n'aanaxate 'me ỹisómaac.”
7Qana'chi so' Jesús 'enaaco':
—Jaỹim senaac da' na'chi 'ená'am nataq'en na' huetalégue di' piỹem ỹátaqta 'uo qomle ga' let'ádaic netónaxac, qomle 'uootaxa ỹaxadéegue naua' loico ga' siỹaxaua 'itaxalóxoic, sa 'ená'am ga'me noventa y nueve 'ónaxaic siỹaxadipi 'me sa ỹiuen da' qonadálaxat da' lasoxoc.
Qodaloqtenaxana jaso'tai'me laicaua lai 'me daqat
8Qataxa jaga' ỹauo da' 'uootaxa huet'oto gaua' diez laicaua lail da' 'uootaxa daqat jaga'me 'oonole, ¿qo'li sa ỹitétooue jaga' lecoỹadáxanaqte, ỹim, qana'chi ỹátaqta 'uo da' letelaxa da' ỹipolec ga' l'acháqa', cha ỹivíd'a da' ỹauana? 9Qaama'le joca'li ỹauana, qana'chi jaso'me ỹimata'a't so' nauotaxau'pi 'me nauoiseu'pi qataxa jan' leseecpi. Qana'chi 'enapéga, 'enaaco': “'Antóñiitapiỹe't qomle da' jaỹim 'aviñí'ỹam, qá'a sóxote sauana jan'me ỹimena laqáỹa 'me daqat.”
10Qana'chi so' Jesús 'enaaco':
—Jaỹim senaac nataq'en da' ỹátaqta 'uo da' netónaxac jen'me Dios lamaxa'spi piỹem lé'ecpi, da' 'uootaxa ỹaxadéegue naua' loico ga'me siỹaxaua 'itaxalóxoic.
Qodaloqtenaxana so' nec'óxot 'me ỹaqtaqtet so' lesaliaxa
11So' Jesús nataq'en 'enaaco':
—'Uo so' siỹaxaua huo'oi saua' dos lec'óqo'te. 12Qana'chi jeso' nesoqolec, jeso'me 'enapego' jeso' let'a, 'enaaco': “Taxadéna', jaỹim 'auanem qomle da'me ỹisaliaxa 'me 'auqátaxata't da' jaỹim talégue 'auen.” Qana'chi jeso' let'a ỹicolaxachiỹi da'me lesaliaxa, qana'chi ỹanoovlo jesaa'me lec'óqo'te. 13Qana'chi joca'li maliaxa sa lamai' saua' noloqo'te, jeso'me nec'óxot nootolec ỹimen ỹima jeso'me lalémaxaset n'atetpi. Qana'chi jaso'me laso'vi ỹáchi da' ỹic'áta so' qaỹá'a 'aléua, jeso'me huá'ña joca'li 'chi ỹiué'en jaso'me naicaua, qataxa taỹá'a da' sa nó'in da' ladíquiaxac. 14Joca'li sóxote ỹiméteuo ỹima jaso'me naicaua, qana'chi janac so' noqouáxa let'ádaic jeso'me 'aléua 'me huét'a. Huá'a, qana'chi jeso'me ỹátaqta 'uo da' loqouáxa. 15Qana'chi jec da' nimitáaque ga' l'onatac, ỹic'áta so' siỹaxaua 'me l'acháqa' jeso'me 'aléua. Qana'chi jeso'me siỹaxaua ỹamaxa jeso'me n'aléua da' ỹilolégue qa'en jaso' lalo coochipi. 16Qana'chi jeso'me ỹátaqta 'uo da' lidiáxa da' ỹanotec jeso'me coochi jaloq 'me ỹic'ótac jaso' coochipi, qaláxasa qaỹa ga' ỹanem. 17Huo'o', qana'chi huelnat, 'enaaco': “¡Ỹátaqta ỹima na' lamaxa'spi ga' taxadéna' sa qoue jen'me jaloq di' l'acháqa', qaamachaxa jaỹim na' souét'a ỹátaqta jaỹim seleuapéguem da' ỹoqouáxa! 18Naỹi s'iỹílaxa qomle di' l'acháqa' ga' taxadéna', qaláxasa senapego' qomle, seet'oi: 'Am taxadéna', jaỹim 'uo da' ỹasouaxac huet'ot ñi' qan'étoqo't nataq'en 'am. 19Chan'eesa sa saiỹet naỹi da' jaỹim 'auenapéga da' jaỹim 'ac'óxot, qaláxasa 'ónaxaic da' jaỹim 'auadénaxatet'em qomle ga' 'oonolec na' 'adamaxa'spi.” 20Huá'a, qana'chi jec, v'iỹílaxa di' l'acháqa' jeso' let'a.
Qana'chi joca'li maliaxa qaỹat'aguet, qana'chi so' let'a ỹila'agueto' jeso'me. Qana'chi ỹátaqta jalcote da' lichoxodénataxanaxac. Qana'chi joca'li ỹivid'aguet, qana'chi qapálec qataxa nec'ouoq. 21Qana'chi jeso'me lec'óxot 'enaaco': “'Am taxadéna', jaỹim 'uo da' ỹasouaxac huet'ot ñi' qan'étoqo't, nataq'en 'am. Chan'eesa naỹi sa saiỹet da' jaỹim 'auenapéga da' jaỹim 'ac'óxot.” 22Qaláxasa jeso' let'a 'enapego' jeso' lamaxa'spi, 'enaaco': “Sa 'aviỹáloxodiñii qomle da' 'andóideegue gaua' 'ónaxaiqa nouo. Ỹim, qana'chi 'aviñii ỹaadíñi, qataxa 'auañíỹaỹi nataq'en jaga' chiisáxa qataxa jegaua' lapela'te. 23Qomle, qana'chi 'anavíquiiuo ga' ỹátaqta ỹi'ỹaq huaca lec'óxot, qana'chi 'aualaachii. Ỹim, qana'chi ¡siqui'ỹaq, s'étaq ga' qadeuálaxaỹaxac! 24Qá'a jeda'me ỹalcolec, jeda'me sóxote ỹileu, qaláxasa ỹitaxa nec'aléegue. Jeda'me daqat, qaláxasa ỹitaxa sauanáxa.” Qana'chi qodicot jeso'me neuálaxaỹaxac.
25Qaa'le maliaxa huétai'ỹa na' n'ónaxa jeso'me ỹ'axaic lec'óxot, qana'chi joca'li n'iỹílaxauo, qana'chi joca'li nadíite'uo jeso' l'acháqa', qana'chi demachítapee'uo jaso' niviquipi qataxa so' domítacpi. 26Qana'chi ỹiỹáxana jeso' 'oonolec jeso'me soxodipi, qana'chi ỹinatétaco': “¿Tá'nooqo'chi qoỹí'et da'me dójo'?” 27Qana'chi jeso'me nesoqolec 'enaaco': “'Adanoqolec, jeda'me sóxote nóvi', chan'eesa ñi' 'adet'a damaxasoxolégue da' qoỹalaat di' ỹátaqta ỹi'ỹaq huaca lec'óxot, qá'a nóvi' jiñi'me, ỹátaqta qaỹa 'te 'uo.” 28Qaláxasa jeso'me lachoq'olec dalemata, qana'chi sa ỹic'áteuo. Chan'eesa jeso'me let'a qana'chi ỹic'átee'ga, nachoxodéetapecot da' sétaaque p'áuo. 29Qana'chi ỹ'ategueto' so' let'a, 'enaaco': “'Am 'auaỹáten da' qaỹóxodachi naua' 'uóidi da' 'am s'onataxaatapeelégue, qataxa sa ñauá'ne' da' sa 'am salaxaguet. Qaláxasa ma'chaxa taa'le 'chi 'oonolec ga' jaỹim 'auanem quetaxac'oxotolec, qana'chi sé'et ga' ỹiqui'ỹáxac da' ñiuáat'ai jen'me ñauotaxau'pi. 30Qana'chi naỹi da' nóvi' jeda'me 'ac'óxot 'me 'chi ỹaqtaqtet jaso'me 'anaicaua ỹasouaxat jan' queséeguetaxai, qataxa 'aualaataxalégue, 'aualaat jeso' ỹi'ỹaq huaca lec'óxot.” 31Qana'chi jeso' let'a 'enapego': “'Am ỹalcolec, 'am na'chi 'eeta't da' jaỹim 'onet'asop. Chan'eesa jen'me jaỹim huet'ot ỹima 'adalémaxaset. 32Qaláxasa naỹi 'ónaxaic da' s'étaq ga' qadiqui'ỹáxac da' ñitónaqtapiỹe't. Qá'a jiñi'me 'adanoqolec, jiñi'me sóxote ỹileu, qaláxasa ỹitaxa nec'aléegue; jiñi'me daqat, qaláxasa sóxote ñauanáxai'.”
Currently Selected:
Lucas 15: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
