Lucas 16
16
Qodaloqtenaxana jeso'me ỹilolégue so' n'acháqa' 'me ỹiuálaxaina't da'me nepé'e
1Jeso' Jesús nataq'en 'enapego' so' lapaxaguenatacpi, 'enaaco':
—'Uo so' siỹaxaua ỹátaqta saliaxanec. Jeso'me 'uo jeso' ỹipataxalégue da' ỹilo'ogue so' l'acháqa'. Qana'chi qod'aqtaxaneuó'o jeso'me saliaxanec da' jeso'me ỹilo'ogue so' l'acháqa' jeso'me 'chi ỹaqtaqtet jeda' lesaliaxa so' saliaxanec. 2Qana'chi so'me ladípa ỹiỹáxanee'ga jeso'me, qana'chi 'enapéga, 'enaac: “¿Jái'teeto' da' 'éeta da' jaỹim qon'aqtaxaneuó'o, ỹasouaxat 'am? Ỹa 'analoqtena't qomle da'me 'ad'onataxanaxac. 'Auenat, qana'chi jaỹim 'andó'uo, qá'a sa taiỹet qomle da' 'oquet'ot da' 'am 'aulotalégue di' ỹ'acháqa'.” 3Qana'chi jeso'me ỹilotalégue so' n'acháqa' 'uo da' leenataxac, 'enaaco': “¿Jái'chogamaxa séeta naỹi? Qá'a ñi' ña'co' sa ỹa'uo ga' ỹ'onatac. Qá'a jaỹim qaỹa ga' ỹ'añaxac da' s'onataxan jen' 'aléua, qataxa ỹátaqta 'uo da' ỹipecóxo da' 'chi sasélaxaatac. 4Já'a, sanata naỹi da' séet'ec, qaidi huo'oi qomle gaua' jaỹim ỹacooteguet qomle sauó'o ga' l'acháqa't, qomle ỹivíta da' qaỹa ga' ỹ'onatac.” 5Qana'chi jeso'me ỹiỹáxanee'ga ñi' 'oonolec jeso'me net'ot jaso' lavíỹaxasete jeso'me ladípa. Qana'chi jeso'me 'uáuteuo ỹinat, 'enaaco': “¿Jái'chi 'éeta jaga' net'ot 'adavíỹaxasete so' ña'co'?” 6Qana'chi jeso'me 'enaaco': “Cien jaso' lai't na' 'acéite jaso' ỹavíỹaxasete.” Qana'chi jeso'me ỹilotalégue so' n'acháqa' 'enaaco': “Jánjo' jan' lemalate jan' 'adavíỹaxasete; naỹi 'auỹalapiỹe't qomle 'ans'óoñi, ỹim, 'anchiỹaxada't, 'audíñi jaga' cincuenta.” 7Ỹim, qataxa ỹinat so' laqáỹa, 'enaaco': “'Am, ¿jái'chi 'éeta jaga'me 'adavíỹaxasete?” Qana'chi jeso'me 'enaaco': “Cien jaso' naloqtenaxaqui na' trigo.” Qana'chi jeso'me ỹilotalégue jeso'me n'acháqa' 'enaaco': “Jánjo' jan' lemalate jan' 'adavíỹaxasete; 'anchiỹaxada't, 'audíñi qomle jaga' ochenta.” 8Huá'a, qana'chi so' nadípa sa ỹoqolguet jeso'me leuatáxanaxanec 'me sa nó'in, jeso'me ỹátaqta sa naqaláataxaic da' 'uo ga' ỹí'et. Qana'chi naqaida da' 'éet'ec jen'me ỹauotec jen'me huetalégue jen' 'aléua siỹaxadipi, jen'me ỹátaqta sa naqaláataxaic da' 'uo ga' ỹ'étec ga' laqáỹa, qaláxasa sa 'ená'am jen'me huétaaue na' ỹ'oqóchiiñi.
9Chan'eesa 'ami saqatalo da' 'au'onataxañíiỹa da'me lesaliaxa na' siỹaxadipi 'me ỹ'étet'ape naua' sa n'oi'n, da' tetoqo' 'uo ga' 'anauotaxauai, qaidi qomle ỹivíta da' ỹiméta da' nesaliaxa, qaidi 'uo ga' 'ami ỹaconeeta jega'me n'acháqa' 'me qaỹa 'te loiquiaqa' huet'ague da' piỹem.
10Jega'me 'ónaxaic da' n'aqtaguec da' ỹilotalégue ga' sa lecolec, qana'chi 'ená'am 'ónaxaic da' n'aqtaguec da' ỹilot'ague ga' jalcote; qaláxasa ga'me sa nó'in da' n'aqtaguec da' ỹilot'ague jega'me sa lecolec, qana'chi 'ená'am sa nó'in da' n'aqtaguec da' ỹilot'ague ga' jalcote. 11Tadeeto' jedójo' lesaliaxa jen'me siỹaxadipi 'me ỹ'étet'ape naua' sa n'oi'n, da' 'uootaxa sa 'te da' 'ónaxaic 'an'aqtaguiquii da' 'auloilégue, qana'chi ¿jái'chogamaxa ỹañoxot da' 'ami p'iỹa'alo da' 'ami ỹipataxalóo'te da' nesaliaxa 'me sa di'ỹoq? 12Qataxa da' 'uootaxa sa nó'in da' 'an'aqtaguiquii da' 'auloilégue jega'me sa 'te 'adalémaxasichii, qana'chi ¿jái'chogamaxa ỹañoxot da' 'ami ỹanema ga'me mai'chi 'adalémaxasichii?
13Qaỹa ga' namaxasec da' ỹañoxot da' d'onataxaalóo'te gaua' dos na'códii', qá'a da' 'uootaxa niquiỹá'a ga' laqáỹa, qataxa ỹauotec ga' laqáỹa; 'uootaxa da' sa ỹaxanéegue ga' 'oonolec, qaláxasa ga' laqáỹa daqaicá'a. Qaa'le sa qoỹañoxot da' qod'onataxanot ñi' qan'étoqo't qataxa da' nesaliaxa.
14Qana'chi demachítapega ỹima dójo' jeso'me fariseopi 'me ỹátaqta loqopitaxat da' nesaliaxa, qana'chi ỹi'uéetac so' Jesús. 15Qana'chi jeso'me Jesús 'enaaco':
—'Ami 'me na'chi'ami 'ónaxaiqa, qaláxasa ñi' qan'étoqo't ỹaateto'n naua' 'adiquidiaqchídii'. Qá'a jega'me 'enapéga jen'me siỹaxadipi da' ỹátaqta ỹ'oxodaq, qana'chiga ga'me ỹátaqta ỹiiméegue ñi' qan'étoqo't.
Jen'me naqátaxacpi qataxa da' l'onataxanaxac ñi' Dios da' ỹimata'a'téna
16Jen' naqátaxacpi 'me chiỹoqo'ot jeso' Moisés qataxa jen'me lapaxaguenataxanaxacpi jeso'me l'aqtáxanaxanecpi ñi' Dios, jen'me maliaxa 'uo, cha ỹivíde'ta joca'li nóvi' so' Juan. Huá'a, qana'chi qoỹí'et da' 'ónaxaic qadipí'ic 'me ỹ'axat da' l'onataxanaxac ñi' Dios da' ỹimata'a'téna, qana'chi ỹima na' siỹaxadipi ỹátaqta n'añaxat da' ỹinoxoneuó'o jeda'me.
17Temaqaidi qomle da' ỹiméta jen' piỹem qataxa jen' 'aléua, qaláxasa sa 'te da' sa ỹipaquíchiỹi da'me ỹ'axat di'me 'oonolec sa lecolec jen'me ledáxatpiolec jen'me naqátaxacpi.
Jeso'me Jesús ỹ'axat da' lasoxoc ga' nañíi'me' jaga' loua
(Mateo 19.1-12; Marcos 10.1-12)
18Ga' siỹaxaua da' 'uootaxa nañíi'me' jaga' loua, ỹim, qataxa 'uoneguet jaga' ỹauo laqáỹa, qana'chi jega'me 'uo ga' lasouaxac. Qataxa jega'me 'uoneguet jaga' ỹauo 'me nañíi'me' ga' loua, nataq'en jega'me 'uo ga' lasouaxac.
Jeso'me siỹaxaua 'me saliaxanec qataxa so' Lázaro
19'Uo so' siỹaxaua ỹátaqta saliaxanec, jeso'me ỹáatrañi saua' 'ónaxaiqa louo, qataxa qaỹa ga' 'ena'ama. Qaláxasa jeso'me ỹ'étetac ỹiméda naua' noloqo'te da' liqui'ỹáxac let'ádaic. 20Nataq'en 'uo so' siỹaxaua ỹátaqta choxodaq, lenaxato' Lázaro. Jeso'me ỹátaqta ỹimootelégue so' ló'oc jen' lí'i na' lisiquiaxa, qana'chi jeso'me netalégue na' 'aléua, néta'uo lai so' nasom jeso'me saliaxanec. 21Jeso'me choxodaq sétaaque da' ỹanotec jen' lesochi jeso' nalic 'me n'áqañi jeso' liqui'ỹáxala' jeso'me saliaxanec. Cha ỹivíd'a da' janac na' pioxodipi da' ỹ'olquétac na' lí'i so' ló'oc jeso'me. 22Ca'li 'uo so' nolo' jeso'me choxodaq ỹileu. Qana'chi janac na' lamaxa'spi piỹem lé'ecpi ñi' Dios da' ỹaueegue da' piỹem jega'me huét'a jeso'me Abraham. Nataq'en jeso'me saliaxanec ỹileu. Ỹim, qana'chi qoỹisiiñi. 23Jeso'me saliaxanec ỹátaqta 'uo da' ne'queténaxac joca'li huéta'ña ga'me lemáqa' na' lepaqalpi so' napa'lpi. Huá'ña, qana'chi ỹiloséguem, qana'chi ỹilásee'ma so' Abraham ỹátaqta qaỹásee'ma, qataxa jeso' Lázaro huaqat'aguet jeso'me. 24Qana'chi ỹ'alaq, 'enaaco': “'Am ỹit'a Abraham, jaỹim 'auchoxoden qomle. Ỹa 'anamaq na' Lázaro, da' ỹipet na' liaxata leséenec ga' noxop, qaidi ỹipet jen' ỹacháxat, péga, ỹágueegue da' ñi'queténaxac da' sonétaaue jénjo' dóle'.” 25Qaláxasa jeso' Abraham 'enapego' jeso'me, 'enaaco': “'Am ỹalec, 'aueenata ca'li 'auaconguet da' 'adiỹamqáchiiñi, qaỹa 'te 'uo da' 'ad'óiỹaxac, qaamaxa ñi' Lázaro ỹátaqta sa nó'in da' ladíquiaxac. Qaláxasa jiñi'me naỹi 'uo da' necochaguec jen'me huét'a, qaamaxa 'am 'uo da' 'an'queténaxac. 26Qaláxasa sa na'chidáta ỹima dójo', qá'a 'uo jen'me ỹátaqta soqoỹoqóchii'nỹi lichíỹic let'ádaic 'me 'ami nequepaxatet'agueta qataxa qo'mi. Qana'chi sa 'te da' 'uo ga' chiỹaqa'ñína da' ta'nỹi da' 'ami ỹic'ádet'alo, qataxa sa 'te da' 'uo ga' 'ami chiỹaqa'ñalo da' qo'mi nec'ádisee'malo.” 27Qana'chi jeso'me saliaxanec 'enaaco': “'Am ỹit'a Abraham, 'am ñachoxodenot naỹi da' 'auamaq ñi' Lázaro da' 'auamaxa di' l'acháqa' ga' ỹit'a, 28di'me nétra'ña gaua' cinco ỹaqáỹa', qaidi d'aqtaxanema, qaidi jegaa'me sa nec'áde'ta nataq'en jénjo' 'queténaqa'.” 29Qaláxasa jeso'me Abraham 'enapego' jeso'me, 'enaaco': “Jegaa'me sóxote da' huet'oto jegaa'me lidíisel so' Moisés qataxa jeso'me l'aqtáxanaxanecpi ñi' Dios: ¡naqainaua qomle 'ónaxaic da' ỹalaxalóo'te!” 30Qana'chi jeso'me saliaxanec ỹ'at, 'enaaco': “Já'a, 'am ỹit'a Abraham, qaláxasa da' 'uo ga' ỹitaxa nec'aléegue jen'me napa'lpi da' ỹic'atalo jegaa'me, qana'chi ỹátaqta ỹaxadéegue qomle naua' loico.” 31Qaláxasa jeso'me Abraham 'enaaco': “Da' sa 'te da' ỹalaxaguet so' Moisés qataxa jeso'me l'aqtáxanaxanecpi ñi' Dios, ¡hua'ague toqo' da' d'amaqtenataxan, temaqaidi da' 'uo ga' ỹitaxa nec'aléegue!”
Currently Selected:
Lucas 16: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
