Lucas 17
17
Da' lichic ga' siỹaxaua da' 'uo ga' lasouaxaset
(Mateo 18.6-7, 21-22; Marcos 9.42)
1Qana'chi so' Jesús 'enapego' so' lapaxaguenatacpi:
—Jaỹim saỹáteeso' da' 'uo qomle ga' ỹa'uo ga' lasouaxaset na' siỹaxadipi, qaláxasa ¡choxodaicolec qomle jega'me siỹaxaua 'me ỹa'uo ga' lasouaxaset ga' laqáỹa! 2Jega'me ỹátaqta 'ónaxaic qomle da' qoỹicoñitec jen' loqosot ga' qa' let'ádaic, ỹim, qana'chi qoỹasaxánỹi jaga' peróna, qá'a sa nó'in da' ỹa'uo ga' lasouaxaset ga' 'oonolec jen'me sa 'amaqtaqolec. 3Ma'chaxa qomle.
Ga' 'adaqáỹa qomle 'uo jega' 'am ỹ'étec sa nó'in, qaláxasa 'ónaxaic da' 'avídaxat'ot jega'me. Qaláxasa da' 'uootaxa ỹaxanéegue ga' n'onataguec, na'chidáta da' 'auchoxoden. 4Temaqaidi da' 'uootaxa ỹóvi' siete da' v'iỹílaxalégue da' 'uo jega'me 'am ỹ'étec ga' 'oonolec nolo', da' ỹaloqchiichiilo da' siete da' 'am ỹic'áte'uo da' 'am 'enapéga, 'enaac: “Naỹi sa ỹitaxa s'iỹílaxalégue da' 'uo ga' 'am s'étec”, qana'chi 'ená'am 'ónaxaic da' 'auchoxoden jega'me.
Da' l'añaxac da' nip'iỹáxac
5Qana'chi saua' lamaxa's 'enapegalo so' Jesús, 'enapega't:
—'Am qadesaliaxanec, 'anchíỹaxadiseguem qomle da' qadip'iỹáxac.
6Qana'chi so' qadesaliaxanec 'enapegalo jesaa'me, 'enaaco':
—'Ami da' 'uo ga' 'adip'iỹáxaquii, temaqaidi da' sega'me lecatamole jaga' jala jana' lenaxat mostaza, qaláxasa 'oñíỹapega jadójo' 'epaq lat'édai, 'aviñiit'oi: “'Ocá'ai jen'me 'onéta'ña, ỹim, qana'chi 'onánỹi jana' peróna”, qaláxasa jadójo' 'epaq ỹátaqta 'ami ỹaloxogueta.
Jeda'me l'onataxanaxac ga' qoỹamaqátac
7Da' 'uo ga' 'oonolec da' 'oñíita da' 'uo ga' lamaxasec, jega'me da' 'uootaxa chiỹaqái'ỹa na' n'ónaxa da' 'uootaxa ma'le ỹimat da' nesóctapiiseguem jega' 'aléua, 'uootaxa da' ỹilotalégue ga' 'atetpi, qaláxasa ¿'am séetapega 'auenapéga da' 'aueet'oi: “'Aỹala, 'oñíiñi, 'auqué'e?” 8'Ai', sa naq'áita, na'chidáta da' 'auenapéga, 'aueet'oi: “Ỹa 'ané'et qomle, jaỹim 'aneuálaxai'ne', 'aué'et ga' janoq. Tetoqo' semat da' ỹiqui'ỹáxac qataxa da' ñiỹómaxac, qana'chi ỹímta da' 'am 'auqué'e qataxa 'anỹom.” 9¿Séetapega ỹátaqta 'auanem da' 'antónaxac jega'me 'adamaxasec qomle ma'le ỹimat jega'me 'auamaxalégue? 'Ai', sa naq'áita. 10Qana'chi 'ená'am nataq'en 'ami, qomle ma'le ỹivíta da' 'auemachii ỹima jen'me 'ami ỹamaxalóo'te ñi' Dios, qana'chi 'oñiit'oi: “Qo'mi 'me 'chi namaxa's, qaỹa ga' qadesáaque, qá'a jen'me s'étaqtac, na'chínata jen' qo'mi qoỹamaxalóo'te.”
So' Jesús nataden jeso' diez siỹaxadipi 'me nichi'ỹa na' ló'oc
11Joca'li ma'le jec so' Jesús da' taiỹi da' Jerusalén, qana'chi taỹalégue jidi'me 'aléua 'me huá'ña di' Samaria qataxa di' Galilea. 12Joca'li ỹivíta jeso'me noicolec, qana'chi huada'aguet so' Jesús jeso'me diez siỹaxadipi 'me nichi'ỹa na' ló'oc, qaláxasa joca'li maliaxa qaỹat'aguet jeso'me, 13qana'chi ỹ'alaq, 'enaaco':
—¡'Am Jesús, 'me 'am paxaguenataxanaxaic, qo'mi 'auchoxode'n qomle!
14Qana'chi so' Jesús joca'li ỹilá'a jeso'me leuaxaicpi, qana'chi 'enapego', 'enaaco':
—'Ausómiita, 'analoxóñii'uo jega'me letaxaỹáxanaxanecpi jena'me siỹaxadipi da' qodetaxaỹapégue' ñi' Dios.
Joca'li quet'ague jeso'me ga' naq'aic, qana'chi mai'chi ỹiméegue. 15Qana'chi jeso'me 'oonolec jeso'me leuaxaicpi joca'li ỹilá'a da' sóxote ỹoqovíta na' ló'oc, qana'chi n'iỹílaq da' ỹi'ỹoxodéetac ñi' Dios, ỹátaqta ỹ'alqata't. 16Qana'chi ỹisocoto naua' liliictel jeso' Jesús, ỹátaqta ỹivídaxat'aguet qa'en na' latap jen' 'aléua, qana'chi ỹaatapecot da' netónaxac jeso'me. Qaláxasa jeso'me siỹaxaua Samaria lé'ec. 17Qana'chi so' Jesús 'enaaco':
—¿Sa dieeso' jeso'me ỹiméegue qoỹin na' ló'oc? ¿Jái'chogamaxa huet'ague ga' laỹi nueve? 18Jidi'me díjo' 'me chiỹoxogue ga' ỹaqá'a 'aléua, ¿séetapega na'chidíta 'oonolec da' n'iỹílaq da' ỹi'ỹoxoden ñi' Dios?
19Qana'chi 'enapéga so' siỹaxaua, 'enaac:
—'Oñíseguem qomle. Ỹim, qana'chi 'oc. Sóxote 'am n'óota, qá'a 'uo da' 'ad'amaqténataxanaxac.
Da' livídaxac da'me l'onataxanaxac ñi' Dios da' ỹimata'a'téna
(Mateo 24.23-28, 36-41)
20Qana'chi jeso'me fariseopi ỹinatétac so' Jesús da' jái'chi 'éeta da' nóvi' ga'me l'onataxanaxac ñi' Dios da' ỹimata'a'téna. Qana'chi jeso'me ỹ'at, 'enaaco':
—Ga' livídaxac ga' l'onataxanaxac ñi' Dios da' ỹimata'a'téna, jega'me sa 'te da' qoỹilá'a. 21Qataxa qaỹa 'te da' qoỹiit'oi: “Jénjo' jen'me,” 'uootaxa da' qoỹiit'oi: “Jeda' chá'a,” qá'a da' l'onataxanaxac ñi' Dios sóxote 'ami huetaavlo.
22Qana'chi 'enapego' jeso' lapaxaguenatacpi, 'enaaco':
—Huo'oi qomle jegaa'me noloqo'te da' 'ami 'uo da' 'adidiáqai da' 'anauañíi'ỹi' jega'me 'oonolec gaua' noloqo'te 'me huetoovlo da' naloxon jen' siỹaxaua lec'óxot, qaláxasa 'ena't qomle da' 'anauañíi'ỹi'. 23Huá'a qomle, qana'chi qoỹiit'oi: “Jéna jen'me, huetai'ñína,” 'uootaxa qoỹiit'oi: “Jeda' chá'a jeda'me.” Qaláxasa 'ena't qomle da' 'oquíỹi, qataxa sa 'te da' 'auc'áchiit'ague. 24Qá'a jega'me 'ená'am na' laqasélgaxa da' 'uootaxa naqasélgaxañi, qana'chi ỹimata ỹima na' piỹem. Jeda qomle da' 'éeta da' livídaxac jen'me siỹaxaua lec'óxot qomle ỹivíta ga' nolo' da' n'iỹílaq. 25Qaláxasa jen'me 'uáiñi qomle da' táaue da' sa lec'óxotolec ne'queténaxac, qataxa sa 'te qomle da' qoỹaconguet, sa ỹaconguet jen'me siỹaxadipi 'me huétaaue naỹi. 26Qana'chi 'ená'am qomle da' 'éete' saua' 'uóidi 'me huetoovlo joca'li jeso' Noé, qana'chi 'ená'am nataq'en ga' nolo' 'me huétooue da' n'iỹílaq jen'me siỹaxaua lec'óxot. 27So' siỹaxadipi de'quétac qataxa niỹómtac, qataxa 'uootapega't qataxa ỹ'onáxan jan' lec'oqte, cha ỹivíde'ta jeso' nolo' joca'li so' Noé huenótooue jaso' licota lat'édai. Qana'chi janac so' huétep, huá'a, qana'chi ỹileu jeso'me siỹaxadipi. 28Qana'chi 'ená'am nataq'en saua' 'uóidi 'me huetoovlo jeso' Lot: jeso'me siỹaxadipi de'quétac qataxa niỹómtac qataxa mai'chi neuodéetapega't, danaxáatac, qataxa ỹ'étet'ape naua' l'emáqa. 29Qaláxasa joca'li cá'ai jeso' Lot so' noic let'ádaic Sodoma, qana'chi qonacot so' dóle' let'ádaic, chiỹoqo'ot di' piỹem, qana'chi ỹalaat ỹima so' siỹaxadipi. 30Naqaida qomle da' 'éeta jen'me siỹaxaua lec'óxot qomle ỹivíta jega'me nolo' da' naloxon.
31Qana'chi jega'me nolo' da' 'uootaxa 'uo ga' p'ásee'ma ga' p'áseguem ga' l'emec, qaláxasa ga' loxot huétaaue ga' lauel ga' l'emec, qana'chi jega'me sa 'te da' huenóteegue da' naqatéegue; qataxa da' 'uootaxa 'uo ga' huétai'ỹa na' n'ónaxa, jega'me sa 'te da' n'iỹílaxa'uo ga' l'emec. 32'Aueenachíiỹa qomle da' 'éeta jaso' loua so' Lot. 33Ga' sétaaque da' na'chi 'eeta't da' nec'alétaiỹi, na'chiga daqat qomle da' l'óiỹaxac; qaláxasa ga'me daqat da' l'óiỹaxac, qana'chiga qomle ga' nec'aléegue.
34Jaỹim senaac jega'me pí'ỹaq huo'oi qomle gaua' dos neuauaỹa't d'ochit'ape, qana'chi 'oonolec qomle ga' qoỹauec jegaa'me, qaláxasa ga' laqáỹa qon'ónaxatañi. 35Qataxa huo'oi qomle gaua' dos ỹauo' desogaxat'ape, dasotra'nỹet jaga' láỹo', qana'chi 'oonole qomle jaga' qoỹauec, qaláxasa jaga' laqáỹa qon'ónaxatañi. 36Qataxa huo'oi qomle gaua' dos siỹaxa'u huetralégue na' n'ónaxa, qana'chi 'oonolec qomle ga' qoỹauec, qaláxasa ga' laqáỹa qon'ónaxatañi.
37Qana'chi joca'li qodemachíỹa dójo', qana'chi qoỹinatétaco' so' Jesús:
—'Am qadesaliaxanec, ¿jái'chogamaxa hua'ague qomle dójo'?
Qana'chi jeso'me 'enaaco':
—Jega'me huet'ague ga' ỹileu, qana'chiga ga' huá'ña da' ỹimata'a't na' poipi.
Currently Selected:
Lucas 17: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
