Lucas 6
6
Saua' lasoxoñii's so' Jesús napoquétra'ña jan' jala so' trigo jeso' nolo' mataxaqui
(Mateo 12.1-8; Marcos 2.23-28)
1'Uo so' nolo' mataxaqui, qana'chi so' Jesús ỹ'axasoxota so' nanqa' na' trigo. Joca'li maliaxa quéta, qana'chi saua' lasoxoñii's napoquétra'ña jan' jala. Ỹim, qana'chi qonaqat jan' jala, qana'chi qoỹalíctac. 2Qana'chi 'uo so' denataxan so'me fariseopi, 'enaaco':
—¿Tá'nooqo'chi 'ami 'av'íchii da'me sa qodasenataxanem da' qoỹí'et di' nolo' mataxaqui?
3Qana'chi so' Jesús 'enaaco':
—¿'Ami séetapega sa 'autaxaỹaxañii náxa da' 'éeta so' net'a David joca'li so'me qataxa saua' liquiáxa'u ỹoqoua't? 4Qana'chi jeso'me ỹinoxonóoue jeso' l'emec ñi' Dios, qana'chi ỹaconalo saua' pan 'me sa qoỹisetaxa't, qana'chi ỹali'j, qataxa nataq'en ỹanoovlo saua' liquiáxa'u, qamaale nedot'a't na' netaxaỹáxanaxanecpi da' qodetaxaỹapégue' ñi' Dios 'me na'chínata qoỹaséet'em da' ỹalic jaso'me pan.
5Nataq'en 'enaaco':
—Jénjo' siỹaxaua lec'óxot, jen'me nataq'en 'uo da' 'enec da' 'uo ga' damaxasoxolégue di' nolo' mataxaqui.
So' siỹaxaua 'me qaqáta so' louaq
(Mateo 12.9-14; Marcos 3.1-6)
6Qana'chi so' nolo' laqáỹa mataxaqui, qana'chi so' Jesús ỹitaxa ỹinoxoneuó'o jeso'me lemáxaqui so' judiopi, qana'chi dapaxaguenataxáatac. Huétauo so' siỹaxaua 'me qaqáta so' louaq 'me jaloic. 7Qana'chi so'me dapaxaguenataxanapeec na' naqátaxacpi qataxa so' fariseopi 'chi nauáatac so'me Jesús da' datadénataxanỹi so' nolo' mataxaqui, sétaaque 'uo ga' qoỹachiỹoxotaỹi ga' lasouaxaset qoỹin. 8Qaláxasa jeso'me sóxote da' ỹaỹáteetac da' leenataxac so' siỹaxadipi. Qana'chi 'enapéga so' siỹaxaua 'me qaqáta so' louaq, 'enaac:
—'Oñíseguem qomle, 'ánỹi na' laiñi.
Qana'chi so' siỹaxaua nichaachiñi, qana'chi tánỹi so' laiñi so' siỹaxadipi. 9Qana'chi so' Jesús 'enapego' so' siỹaxadipi laỹi, 'enaac:
—Jaỹim 'ami sena't naỹi: ¿Jái'chogamaxa qodasenataxát'em da' qoỹí'et di' nolo' mataxaqui, séetapega ga' 'ónaxaic, 'uootaxa ga' sa nó'in? ¿'uootaxa qonaqat ga' n'óiỹaxac, 'uootaxa qonec'alaxatéegue?
10Qana'chi so' Jesús ỹic'atenaxanaxan ỹima so' dasótauo siỹaxadipi. Ỹim, qana'chi 'enapéga so' siỹaxaua, 'enaac:
—Ỹa 'anodéegue na' 'adouaq.
Qana'chi so' siỹaxaua nodéegue so' louaq, qana'chi ỹátaqta n'óota so' louaq. 11Qaláxasa jeso'me siỹaxadipi ỹátaqta dalemata. Qana'chi nenatétapega't da' jái'chogamaxa hua'ague ga' ỹañoxot ga' qoỹíit'ec so' Jesús.
So' Jesús ỹacone'ualo saua' doce lamaxa's
(Mateo 10.1-4; Marcos 3.13-19)
12Qana'chi 'uo so' nolo', qana'chi so' Jesús tasée'mec so' soqoỹoqóchisee'mec 'aléua da' netamen, qana'chi ỹimata so' pí'ỹaq da' netameetapecot ñi'me Dios. 13Joca'li ma'le ỹ'oxoñi, qana'chi ỹiỹáxana so' lapaxaguenatacpi. Ỹim, qana'chi ỹacone'ualo saua' doce jeso' siỹaxadipi, qana'chi ỹanaỹilo da' lamaxa's. 14Jenauójo' naua' lenaqa'te saa'me namaxa's: so' Simón so'me ỹanec da' lenaxat Pedro, qataxa so' Andrés jeso'me lanogaxaua so' Pedro, qataxa so' Jacobo, qataxa so' Juan, so' Felipe, qataxa so' Bartolomé, 15so' Mateo, qataxa so' Tomás, qataxa so' Jacobo jeso'me lec'óxot so' Alfeo, qataxa so' Simón 'me huétaaue na' judiopi 'me sétaaque da' ỹ'odáiỹi so' Roma lé'ecpi, 16qataxa so' Judas 'me laqáỹa so' Jacobo, qataxa so' Judas Iscariote 'me ỹaneuó'o jocalia'cho' so' nep'aguénoqo'tpi so' Jesús.
So' Jesús ỹapaxaguéetac so' jalcote siỹaxadipi
(Mateo 4.23-25)
17Qana'chi so' Jesús huenótee'guesop jeso' qaỹásee'mec 'aléua, liquiáxa'u saa'me. Qana'chi joca'li ỹivída'ña so' nalóchiiñi 'aléua, qana'chi v'iiỹet jeso'me qataxa saua' lapaxaguenataqa. Nataq'en ỹátaqta jalcote so' siỹaxadipi chiỹaqá'ña ỹima di'me 'aléua Judea, qataxa Jerusalén, qataxa di' loxogue di' Tiro qataxa di' Sidón. Jeso' siỹaxadipi janac, sétaaque da' naquiáxana so' Jesús qataxa da' qonataden da' leleuaxa. 18Qana'chi so' siỹaxadipi 'me 'uo na' lé'ec nataqtáqaic nataq'en n'óxota. 19Qana'chi 'ená'uac na' siỹaxadipi sétaaque da' ỹipoteuó'o so' Jesús ỹasouaxat so'me da' natadéetac ỹima na' siỹaxadipi, qaláxasa ỹidolégue da' l'añaxac.
Jen'me mátacpi qataxa jen'me sa qamaac
(Mateo 5.1-12)
20Qana'chi so' Jesús ỹiloỹi so' lapaxaguenatacpi, qana'chi 'enaaco':
—Ỹátaqta 'ami madet'ape, 'ami 'me 'ami choxodáchi, qá'a 'adalémaxasichii da' l'onataxanaxac ñi' Dios.
21Nataq'en ỹátaqta 'ami madet'ape, 'ami 'me 'ovíitaaue naỹi da' 'adoqouáqai, qá'a ỹátaqta 'uo qomle da' 'adanodáqai.
Nataq'en ỹátaqta 'ami madet'ape, 'ami 'me 'anoiñíitac naỹi, qá'a ỹátaqta 'uo qomle da' 'adasáxanaxaquii.
22Nataq'en ỹátaqta 'ami madet'ape qomle 'ami niquiỹa'alo na' siỹaxadipi ỹasouaxat jen'me siỹaxaua lec'óxot, qataxa da' 'uootaxa 'ami qoỹ'odédaiỹi, 'uootaxa 'ami qoỹisoue'n, 'uootaxa qoỹ'otan da' 'adenaxáchii, 'ená'am ga' p'asáiỹi sa nó'in. 23Ỹátaqta 'ami madet'ape qataxa ỹátaqta 'antóñiitapiỹe't qomle ga' nolo', qá'a ỹátaqta let'ádaic qomle ga' 'anseeténataiqui da' piỹem. Qá'a na'chida da' 'éeta joca'li so' huá'au let'alpi na' siỹaxadipi da' sa ỹodiáquenaac so'me huá'au letaxaỹáxanaxanecpi ñi' Dios.
24Qaláxasa 'ami choxodáxasodo' 'me 'ami saliaxanqapi naỹi, qá'a sóxote 'uo da' 'adamáiqui.
25Nataq'en 'ami choxodáxasodo' 'me sa 'adoqouáchi naỹi, qá'a 'uo qomle da' 'adoqouáqai.
Qataxa 'ami choxodaiqolqa, 'ami 'me 'alasáxañiitac naỹi, qá'a ỹátaqta 'anoiñíitapeguem qomle da' 'adaquicoqoi.
26Qataxa 'ami choxodaiqolqa qomle nó'in ỹima da' 'an'aqtaguiquii, qá'a na'chida da' 'éet'ec so'me huá'au let'alpi na' siỹaxadipi, so'me qovínaxanaxaicpi 'me 'enapeela't da' l'aqtáxanaxanec ñi'me Dios.
Da' 'éeta da' qoỹauotec ga' dep'aguenataxáatac
(Mateo 5.38-48; 7.12)
27'Ami 'me jaỹim 'anaquiáxañiitapega, 'ami senapegalo da' ỹátaqta 'auauochíỹic qomle ga' 'ami ỹip'agueet'ape qataxa ỹátaqta 'aviỹamaxachíitac ga' 'ami niquiỹatapegalo, 28qataxa ỹátaqta 'auchoxodíñii ga' sétaaque da' 'ami ỹ'eteque ga' sa nó'in, qataxa 'antamiñiitapeelégue ga' 'ami ỹisoueet'ape. 29Da' 'uootaxa 'uo ga' ỹi'uaxánỹi jan' 'adalínque, qataxa nataq'en 'auanem jan' 'adalínque laqáỹa, qataxa da' 'uootaxa 'uo ga' ỹacona ga' 'adapoto, qaláxasa nataq'en 'amachít'a da' ỹáchi ga' 'ansomaxaqui. 30Qataxa da' 'uo ga' 'am ỹaséla, qaláxasa 'auanem ga' dasélaxanaaque, qataxa da' 'uo ga' deuootáxanec ga' 'adalémaxaset, qaláxasa sa 'aueenatapéga. 31Qaláxasa ga'me nó'in 'me 'ansíitaaque da' 'ami ỹ'eteque jen'me siỹaxadipi, qana'chiga 'av'íchiic qomle jen'me siỹaxadipi.
32Qá'a qomle nedot'a't ga' 'ami ỹauoteque, qana'chiga 'auauochíỹic, qaláxasa ¿jái'chogamaxa ỹiỹamqáchiiñi 'me 'av'íchii? Qá'a ỹivíd'a na' 'itaxalóxoicpi ỹí'et dójo'. 33'Uootaxa da' 'aviñii nedot'a't ga' 'ami ỹ'eteque ga' ỹiỹamqáchiiñi, qana'chiga 'av'íchiic ga' 'ónaxaic, qana'chi ¿jái'chogamaxa ỹiỹamqáchiiñi 'me 'av'íchii? Qá'a na'me 'itaxalóxoicpi nataq'en ỹí'et dójo'. 34'Uootaxa da' 'aviñii nedot'a't da' 'au'áalaxanaxañii ga'me 'chi 'anaquichíit'a, qana'chi ¿jái'chogamaxa ỹiỹamqáchiiñi 'me 'av'íchii? Qá'a nataq'en jen'me 'itaxalóxoicpi ỹ'áalaxanaxan ga' 'ená'am 'itaxalóxoic, ỹim, qana'chi ỹiuatét'a da' nataq'en qoỹ'iỹílaxateguet. 35Qaláxasa 'ami ỹátaqta 'auauochíỹic ga' 'ami ỹip'agueet'ape, qataxa 'aviỹamaxachíita ga' siỹaxaua, qataxa 'au'áalaxanaxañii. Qaláxasa sa 'chi 'uo ga' 'anaquichíitapega. Qaidi tetoqo' ỹátaqta let'ádaic ga' 'anseeténaguiquii, qataxa ỹátaqta 'ami lec'óqo'te ñi'me Dios 'me p'asáiỹi. Qá'a jiñi'me ỹátaqta choxodénataxanaxaic, ỹichoxoden na' huagáqaicpi qataxa jen'me 'itaxalóxoicpi. 36Qaláxasa ỹátaqta 'ami choxodénataxanaxaiqa qomle, qaidi 'oñí'ỹam ñi'me qadet'a Dios ỹátaqta choxodénataxanaxaic.
Sa qonmitáaque ga' lasouaxaset ga' naqáỹa
(Mateo 7.1-5)
37'Ená'te 'anmichiỹáaque ga' lasouaxaset ga' 'adaqaỹai, qaidi ñi' Dios sa 'ami nimi't. Qataxa sa 'aua'uóỹi ga' ne'uaxánaguec ga' 'adaqaỹai, qaidi jiñi'me sa ỹa'uo ga' 'ane'uaxánaguiquii. Na'chidáta da' 'auchoxodénataxañii qomle, qaidi ñi'me Dios 'ami ỹichoxode'n. 38'Auauóỹaaque ga' 'auañimii ga' 'adaqaỹai, qaidi ñi' Dios 'uo ga' 'ami ỹanema. Ga' 'ami ỹanema ỹátaqta 'en saqáchiỹi ga' 'adachoxónaxaquii, qoỹitouoqota't, qataxa qoỹipataqta't, qataxa qoỹin ỹimootelégue. Jiñi'me ỹipagaqchíichiỹi ga' lecáta ga'me 'auanem ga' 'adaqáỹa, qana'chi ỹipagaqchíichiỹi ga'me lecáta ga'me 'am ỹanem.
39Qana'chi so' Jesús ỹa'uo da' daloqtenaxana, 'eet'oi:
—¿Séetapega ỹañoxot jogamaxa qanam da' ỹauec ga' laqáỹa laqanamaxaua? ¿Séetapega jegaa'me da' tadínỹi jaga' límaxañi? 40Qaỹa ga' 'chi napaxaguenatac da' ỹañoxot da' napacapeelégue ga' napaxaguenoqo't. Qaláxasa da' 'uootaxa sóxote ỹinoxonaqtenéegue jen'me qoỹapaxaguenec, qana'chi ỹañoxot da' 'ená'am ga'me napaxaguenoqo't.
41Qaláxasa ¿tá'nooqo'chi da' 'chi 'aulót'a ga' 'auaqapi lesochi 'me nétaỹi jan' l'aite ga' 'adaqáỹa, qaláxasa sa 'auañoxot da' 'aulá'a ga' 'epaq let'ádaic 'me nétaỹi jan' 'ad'aite? 42Qaláxasa da' 'uootaxa sa 'auanóma ga' 'epaq let'ádaic 'me nétaỹi jan' 'ad'aite, qana'chi ¿tóoqo'chi da' sa 'auadenalégue da' 'auenapéga ga' 'adaqáỹa da' 'aueet'oi: “'Am ỹaqáỹa, ỹa jaỹim 'auaséet'em qomle da' ñaqat na' 'auaqapi lesochi 'me nétaỹi jan' 'ad'aite?” ¡'Am 'me qonapeela't da' 'am 'eesa! 'au'áuaxañi da' 'anaqat di' 'epaq let'ádaic 'me nétaỹi jan' 'ad'aite, qaidi 'auañoxot da' ỹátaqta 'anauáachiiñi da' 'anaqat ga' 'auaqapi lesochi 'me nétaỹi jan' l'aite ga' 'adaqáỹa.
Jaga' 'epaq mai'chi qoỹaateton jan' jala
(Mateo 7.17-20; 12.34-35)
43Jan' 'epaqpi qaga jaga' nó'in 'epaq da' 'uootaxa nesetéegue jaga' jala, qana'chi sa nó'in, nataq'en qaga jaga' sa nó'in 'epaq da' 'uootaxa nesetéegue jaga' jala, qana'chi nó'in. 44Qana'chi jañi' 'oonole 'epaq mai'chi qoỹaateton jaga' jala. Qana'chi sa qonapoc jan' jala jaga' higo, qoỹachiỹoxotaỹi jaga' 'epaq 'me 'uo jan' le. Qataxa jan' uva da' qonapoc jan' jala, qaláxasa sa qoỹachiỹoxotaỹi jaga' ỹaxat. 45Qana'chi naq'áita ga'me nó'in siỹaxaua; da' detaqa, qaláxasa 'ónaxaiqa naa'me l'aqtaqa, qá'a 'uo da'me ỹiỹamqáchiiñi huétaỹi jañi' liquidiaqte. Qana'chi 'ená'am ga' sa nó'in siỹaxaua; da' detaqátac, qaláxasa sa n'oi'n naua' l'aqtaqa, qá'a da'me sa nó'in huétanỹi jañi' liquidiaqte. Qá'a jen'me qandégaxat nasaxáiỹi ga'me ỹátaqta saqáchiỹi jañi' qadiquidiaqte.
Saua' dos n'oxonaxala'te ga' qoỹí'et 'emec
(Mateo 7.24-27)
46'Ami naale da' jaỹim 'aviỹáxañiitapega, qaa'le 'oñiit'oi: “'Am 'me 'am qadasoxola',” qaláxasa ¿tóoqo'chi sa 'av'íchii ga'me senaac? 47Naỹi jaỹim 'ami s'axatema ga' 'ená'am ga' siỹaxaua da' 'uootaxa jaỹim nec'áte'uo da' jaỹim naquiáxana qataxa ỹátaqta ỹí'et ga'me senapéga: 48ga'me 'ená'am ga' siỹaxaua 'me ỹí'et ga' l'emec, qana'chi ỹi'uáuaxañi da' desedáxan, ỹátaqta qaỹa'nỹi qa'en jega' lesedec. Ỹim, qana'chi lapaxañi ga' qa' 'me n'oxonaxala' ga'me l'emec. Chan'eesa da' ỹivíta da' náadiseguem so' ñáchi, qana'chi janac na' noxop ỹátaqta sa lec'óxotolec na' lepáxa da' ỹi'uaxánapecot so' 'emec. Qaláxasa sa ỹañoxot da' ỹi'quiaxan, qá'a jeso'me 'emec qoỹ'oxootelégue qoỹin jeso' qa'. 49Qana'chi ga' jaỹim naquiáxatapega, qaláxasa sa ỹí'et ga'me séetapeec, qaláxasa ga'me 'ená'am ga' siỹaxaua da' 'chi 'eneemga ga' l'emec, qana'chi sa ỹa'uo ga' l'oxonaxanaxala'. Chan'eesa da' ỹivíta da' náadiseguem so' ñáchi, qana'chi janac na' noxop ỹátaqta sa lec'óxotolec na' lepáxa da' ỹi'uaxánapecot jeso'me 'emec, qana'chi dacaiñi, qana'chi ỹátaqta doláchiiñi.
Currently Selected:
Lucas 6: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
