Lucas 7
7
So' Jesús nataden so' lamaxasec so' huataxanaq let'a Roma lé'ec
(Mateo 8.5-13)
1Qaama'le so' Jesús joca'li ỹimat da' d'aqtaxáatapeguem so' siỹaxadipi, qana'chi jec, taỹa jidi' noic Capernaum. 2Qana'chi huá'ña jidi'me, qana'chi 'uo so' huataxanaq let'a 'me lé'ec di' Roma. Jeso'me 'uo so' lamaxasec ỹátaqta lauotaxat, jeso'me ỹilhuaac, ỹamtaa'le ỹileu. 3Jeso'me let'a na' huataxanaq joca'li naquiáxatapeelégue so' Jesús, qana'chi huo'oi saua' ỹama' so' lasoxonecpi na' judiopi da' nachoxodenot so' Jesús da' janac da' nataden jeso' lamaxasec. 4Qana'chi jesaa'me joca'li ỹivíded'a so' Jesús, qana'chi ỹátaqta let'ádaic da' nachoxodénaxa'j, 'enapega'salo:
—Jiñi' let'a na' huataxanaq, jiñi'me lepagaxat da' 'aulo'oguet da' 'alcochiỹa, 5qá'a jiñi'me ỹátaqta ỹauotec jen'me qad'acháqa' lé'ecpi. Jiñi'me na'chiñi ñi' damaxasoxolégue jiñi' qademáxaqui joca'li da' qon'oxoséguem.
6Qana'chi so' Jesús náicapee'to jesaa'me. Qana'chi joca'li ma'le qonadíite'uo ga' l'acháqa' jeso' net'a, qana'chi jeso'me ỹama' saua' nauotaxa'u da' 'eedápega so' Jesús, 'enapega'to':
—'Am ỹasoxola', sa 'te qomle da' sa 'ad'emaq, qá'a selá'a da' ỹátaqta sa 'aiỹet da' 'anenoxoneuó'o na' ỹ'imec. 7Naqaida jaỹim sa 'te da' d'anỹi di' ỹiuel da' 'am sepacá'a da' 'am s'iỹiná'a. Qana'chi 'ónaxaic qomle da' na'chigáta ga' 'ad'aqtac 'auan, tetoqo' jiñi'me ỹamaxasec ỹañoxot qomle da' ỹiméegue. 8Qá'a jaỹim nataq'en souet'ot da' lamaxasóxonaxac jen' net'alpi qataxa jaỹim nataq'en 'uo jen' ñisoxonaqapi 'me samaqátac. Da' 'uootaxa senapéga ñi' 'oonolec jen'me da' jec, qana'chi jec. Qataxa da' 'uootaxa senapéga ñi' 'oonolec jen'me da' janac, qana'chi janac. Na'chi 'ená'am da' 'uootaxa 'uo ga' samaxalégue ga' ỹamaxasec, qaláxasa ỹí'et.
9Qaama'le joca'li demachíỹa dójo' so' Jesús, qana'chi ỹátaqta 'uo da' ỹ'aalátapeec so'me siỹaxaua. Ỹim, qana'chi ỹilóoue so' siỹaxadipi, qana'chi 'enaaco':
—Ỹátaqchiiñi 'eesa jen'me Israel lec'oqtepi qaỹa ga' selalégue da' ỹátaqta let'ádaic da' lip'iỹáxac da' 'ená'am jeso' siỹaxaua.
10Qana'chi joca'li v'iỹílaxa'uo ga' l'acháqa' jeso'me namaxa'spi, qana'chi qoỹilalégue jeso'me namaxasec da' sóxote ỹiméegue.
Jeso' Jesús nec'alaxatéegue jeso' lec'óxot jaso' p'ai
11Joca'li ma'le ỹim dójo', qana'chi jeso' Jesús taỹa so' noic lenaxat Naín, náictapegue' so' lapaxaguenatacpi, qataxa jalcote so' náictapegue' siỹaxadipi. 12Qana'chi joca'li qonadíite'uo so' noic, qana'chi qoỹila'aguet da' ma'le qoỹidóiỹi da' qoỹisiiñi so'me ỹileu nesoqolec. Jeso'me 'oonolec lec'óxot jaso' ỹauo p'ai. Ỹátaqta jalcote jeso' siỹaxadipi 'me chiỹaqáaue di' noic da' qoỹic'atetalégue jeso'me. 13Qana'chi so' Jesús joca'li ỹilá'a jaso'me, qana'chi ỹátaqta 'uo da' lichoxodénataxanaxac, qana'chi 'enapego':
—'Ena't qomle da' 'anoỹíitac.
14Qana'chi so' Jesús nichíi'uo jeso'me, qana'chi ỹipoteuó'o jaso' lai't, qana'chi jesaa'me ỹachítrac jeso'me napa'l, qana'chi v'iiỹeta. Qana'chi so' Jesús 'enapego' so' napa'l, 'enaaco':
—'Am nesoqolec, 'am senapéga: ¡'Oñíseguem qomle!
15Qana'chi so' napa'l, na'chi ñíseguem da' ỹachimaxañi, qana'chi detaqa. Qana'chi so' Jesús ỹamaxa jaso' lat'e. 16Qana'chi joca'li qoỹauáachiỹi jedójo', qana'chi ỹima so' siỹaxadipi ỹátaqta 'uo da' loqolánaxa. Qana'chi ỹi'ỹoxoden ñi'me Dios, 'enaaco':
—'Uo so' p'asáiỹi l'aqtáxanaxanec ñi' Dios qo'mi chiỹoqotoovlo.
Nataq'en qoỹinaac da' n'aqtac:
—Ñi' Dios janac da' lecochiỹa jen'me lalémaxasetpi.
17Qana'chi ỹima'a't qoỹaỹáten da' ỹí'et so' Jesús 'ena'uaque naua' lail di' 'aléua Judea.
Jeso'me lamaxa'spi so' chiláxanataxanaxaic Juan
(Mateo 11.2-19)
18Qana'chi so' Juan naquiáxanaxac ỹima dójo', qá'a so' lapaxaguenatacpi d'aqtaxanem so'me. Qana'chi jeso'me ỹacone'ualo saua' dos jeso'me. 19Ỹim, qana'chi ỹamaxalo so' Jesús da' ỹina't da' 'uootaxa jeso'me ỹátaqta 'eesa da' na'chiso jeso' net'a 'me nec'alaxaqui 'me qoỹiuatet'aguet, 'uootaxa maliaxa qoỹiuatétaaque ga' laqáỹa. 20Qana'chi saua' lamaxa's joca'li ỹivídeta so' Jesús, qana'chi qoỹinat, qoỹinaaco':
—Ñi'me chiláxanataxanaxaic 'me lenaxat Juan qo'mi namaxalo 'am da' 'am senataq da' 'am senqátapega da' na'chi'am net'a nec'alaxaqui 'me 'am qoỹiuatétaaque, 'uootaxa maliaxa seuataqáaque ga' laqáỹa.
21Qana'chi joca'li ỹivídedeuo jesaa'me, qana'chi so' Jesús ỹátaqta jalcote so' siỹaxadipi natadéetac na' ỹodapecachi leleuaxa, nataq'en nataden jen'me 'uo na' lé'ec nataqtáqaic, nataq'en jalcote na' nauáachiiñi qa'en jen'me qanampi. 22Qana'chi so' Jesús 'enaaco':
—'Ausómii'ta qomle, qoñíỹapega ga' Juan jen'me 'ami 'auauañíichiỹi qataxa 'anaquiáxañiichiỹi. Qataxa 'au'aqtaxañiim ga'me da' nauáachiiñi na' qanampi, nataq'en jen'me ñ'ídeuo naua' lichil qaláxasa sóxote piỹíñi, qataxa jen'me nichi'ỹa na' ló'oc qaa'le qoỹiỹo da' loláxa, qataxa jen'me d'añaỹi na' laqaic qaa'le demachíỹaac, qataxa jen'me sóxote ỹileu qaláxasa nec'aléegue, qataxa jen'me choxodaqpi sóxote qoỹ'axátem da' nec'alaxa. 23Ỹátaqta mátac qomle ga' siỹaxaua 'me sa 'te da' 'uootaxa jaỹim ỹoqolguet.
24Joca'li sóxote jéque' saua' lamaxa's so' Juan, qana'chi so' Jesús ỹ'axátetac so' Juan, ỹ'axátetapeguem so' siỹaxadipi, 'enaaco':
—¿Jái'chi so'me 'auc'atenaxañíitapeguee'ga 'me huetalégue di' totelégue 'aléua? ¿Séetapega jaga' coqta 'me 'en dachólaxan jen' laỹat? 25¿Jái'chosomaxa 'auc'atenaxañíitapeguee'ga? ¿Séetapega 'ónaxaiqa jonaamaxa louo jeso'me siỹaxaua? 'Ami 'auaỹáchiñii' jen' ỹáatrañi naua' 'ónaxaiqa nouo qataxa nétaỹi da' qaỹa ga' ỹiuénaaque, jen'me huet'alo naua' l'acháqa'te na' net'alpi. 26Qana'chi ¿jái'chosomaxa 'auc'atenaxañíitapeguee'ga? ¿Séetapega l'aqtáxanaxanec ñi' Dios jeso'me? Já'a, ỹátaqta 'eesa, qataxa ỹátaqta napacalégue ga'me l'aqtáxanaxanec ñi' Dios. 27Qá'a so' Juan na'chiso so' ỹ'axa't naua' nidii's l'aqtaqa ñi' Dios joca'li 'enaaco':
Samaq qomle ga' ỹ'aqtáxanaxanec, s'auaxangue na' 'at'ague,
qaidi ỹaqátaxata't ga' 'adadic.
28'Ami s'aqtaxanema da' ỹima na' siỹaxadipi qaỹa da' 'uo ga' l'aqtáxanaxanec ñi' Dios da' napacalégue da' l'amaqchic so' Juan 'me chiláxanataxanaxaic. Qaláxasa jen'me ỹágueegue da' qaỹa ga' nesáaque da' huétaỹi da' l'onataxanaxac ñi' Dios, qana'chína na' ỹátaqta napacalégue jeso'me.
29Qana'chi ỹima na' siỹaxadipi qataxa jen'me ỹaconapeeguet jan' neseeténaqte ga' net'a Roma lé'ec 'me lachiláxanatacpi so' Juan, jen'me siỹaxadipi joca'li demachíỹa da'me dójo', qana'chi ỹátaqta sa qoỹoqolguet ñi' Dios da' ỹátaqta 'eesa. 30Qaláxasa jen'me ỹalcapíỹi na' fariseopi qataxa na' dapaxaguenataxanapeec na' naqátaxacpi 'me sa lachiláxanatac so' Juan, jen'me siỹaxadipi ỹ'otan da'me Dios sétaaque ỹ'étec jen'me. 31Qana'chi so' qadesaliaxanec Jesús 'enaaco':
—¿Jái'chogamaxa ñaloqtenaxanguet jen'me siỹaxadipi naỹi? ¿Jái'chogamaxa 'ená'am qasen? 32Séetapega 'ená'am na' ñoqolqapiolec da' ñíchiiñi, néta'ña ga' leuálaxaỹaqa', qana'chi ỹ'alqatalégue na' laỹi, 'eet'oi: “Saseedáqtapiilo naua' qadaseedel, qaláxasa sa 'auomii, qataxa s'onaqat'ape naua' lalaco ga' 'uo ga' lasouaxac, qaláxasa sa 'anoỹiñii.” 33Qá'a joca'li janac so' Juan 'me chiláxanataxanaxaic, qaláxasa sa ỹalic ga' 'ónaxaic nalic qataxa sa niỹómỹi ga' latáxa, qana'chi 'ami qoñíỹapega so'me 'uo so' lé'ec nataqtáqaic paiỹac. 34Ỹim, qataxa janac jen'me siỹaxaua lec'óxot 'me ỹalíctac jen' 'ónaxaic nalic qataxa niỹómtac, qana'chi 'ami qoñíỹapega da' qui'ỹáxaic qataxa ỹómaxaic qataxa nauotaxaua na' 'itaxalóxoicpi qataxa na' ỹaconapeeguet jan' neseeténaqte ga' net'a Roma lé'ec. 35Qaláxasa da' laỹátenaxanaxac ñi' Dios di'ỹoq qa'en jen'me ỹátenaxanaxaicpi.
So' Jesús néta'ña di' l'acháqa' so' Simón 'me ỹaleeguet jen' lenaxat fariseo
36'Uo so'me 'oonolec na' fariseopi 'enapéga so' Jesús da' liqui'ỹáxaua. Qana'chi so' Jesús jec, ỹic'áta ga' l'acháqa' jeso'me. Qana'chi joca'li ma'le ỹivíta, qana'chi ñíiñi, dasoỹalégue jeso' niqui'ỹáxala'. 37Qana'chi 'uo jaso' ỹauo queséeguetaxai 'me nétaaue so' noic. Joca'li naquiáxanapeelégue so' Jesús da' ỹic'áta so' l'acháqa' so' fariseo da' dequé'e, qana'chi jaso'me ỹic'áta, ỹachítac jaso' n'onata qa' lenaxat alabastro, huetaquio' so' codáxaqui. 38Qana'chi jaso'me noỹin, huaqatalóo'te saua' lichil so' Jesús, qana'chi ỹiỹot'ape, ỹiỹoxonque saua' láchi'. Ỹim, qataxa ỹaqaxaỹaxa't saua' lichil jeso'me, ỹidó'oc so' laỹoxot. Qana'chi nec'ouóqot'ape saua' lichil qataxa ỹicodelóo'te so' codáxaqui. 39Qana'chi joca'li ỹauáachiỹi dójo' so' fariseo 'me ỹiỹáxana da' liqui'ỹáxaua so' Jesús, qana'chi 'uo da' leenataxac 'enaaco': “Jiñi'me siỹaxaua da' ỹátaqta 'eesa da' l'aqtáxanaxanec ñi' Dios, qana'chi ỹañoxot táxa da' ỹaateton jañi'me ỹauo 'me huaselta'ualo naua' lichil da' jañi'me queséeguetaxai.” 40Qana'chi so' Jesús 'enapego' so' fariseo, 'enaaco':
—Simón, 'uo da' sétaaque 'am s'axátem.
Qana'chi jeso'me fariseo 'enaaco':
—Já'a, ỹa 'au'axat, 'am 'me 'am paxaguenataxanaxaic.
41Qana'chi so' Jesús 'enaaco':
—Huo'oi saua' dos siỹaxa'u 'uo jaso' l'áale' net'ot so' n'áalaxanaxala'. Jeso'me 'oonolec l'áale jaso' quinientos denariopi qataxa so' laqáỹa l'áale jaso' 'chi cincuenta. 42Qana'chi jesaa'me sa ỹañoxo't da' ỹiseete'n jaso'me l'áale', qana'chi jeso'me n'áalaxanaxala' ỹichoxode'n jesaa'me da' ỹapalaxat jaso'me l'áale'. Qana'chi naỹi jaỹim 'au'aqtaxañiim, ¿jái'chogamaxa jesaa'me ga' ỹátaqta ỹichoxoden jeso'me n'áalaxanaxala'?
43Qana'chi so' Simón 'enaaco':
—Séetapega da' na'chiso so' siỹaxaua 'me ỹágueegue da' qoỹichoxoden.
Qana'chi so' Jesús 'enaaco':
—Já'a, 'eesa da' 'ad'aqtac.
44Qana'chi so' Jesús ỹilapecoto' jaso' ỹauo. Ỹim, qana'chi 'enapéga jeso' Simón, 'enaaco':
—¿'Am séetapega 'aulót'a jañi'me ỹauo? Ca'li ỹímta ñinoxonóoue na' 'ad'emec, qaláxasa sa jaỹim 'auanem ga' noxop da' siỹoi' naua' ỹichil. Qaamaxa jañi'me ỹauo ỹiỹoi' naua' ỹichil, ỹiỹoxonque naua' láchi', qataxa ỹaqaxaỹaxa't, ỹidó'oc da' laỹoxot. 45Nataq'en sa jaỹim 'anec'ouoq, qaamaxa jañi'me ca'li ỹímta ñinoxoneuo, qaa'le sa 'imigui da' nec'ouo' naua' ỹichil. 46Nataq'en sa 'aucodíỹi na' ỹaqaic ga' codáxaqui, qaamaxa jañi'me ỹicodetalóo'te naua' ỹichil so' codáxaqui jama na' laita. 47Qaláxasa naỹi 'am s'axátem da' jañi'me da' let'ádaic lauo'chi náỹi da' qoỹapalaxa't naua' loico, qá'a ga' siỹaxaua da' sa 'eesa'me da' qoỹichoxoden, qana'chi 'ená'am sa 'eesa'me da' ỹaloxon da' lesóxodic.
48Ỹim, qana'chi 'enapego' jaso' ỹauo, 'enaaco':
—Jen'me 'adoicpi naỹi ỹima sóxote qoỹapalaxat.
49Qana'chi jen' neuánaxau'pi so'me 'me néta'ñi' 'uo da' leenataxac 'enaaco':
—¿Jái'cho' ñi'me siỹaxaua da' ỹivíd'a na'me janoicpi ỹañoxot da' ỹapalaxat?
50Qaláxasa jeso' Jesús 'enapéga jaso'me ỹauo, 'enaac:
—'Am naỹi 'adec'aléegue, qá'a 'uo da' 'adpé'e. 'Aue, 'oc, naỹi 'aulaquétapiiñi.
Currently Selected:
Lucas 7: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
