Mateo 13
13
Qodaloqtenaxana so' janaxanaxaic
(Marcos 4.1-9; Lucas 8.4-8)
1Qana'chi jeso' nolo' so' Jesús cá'ai so' 'emec, qana'chi taxasó'ma so' loxogue jaso' peróna lat'édai, qana'chi ñíiñi. 2Qana'chi ỹátaqta jalcote na' siỹaxadipi ỹimá'a ga' huét'a jeso'me. Qana'chi so' Jesús huenóchiinỹi jaso' nilicota, qana'chi ỹima jeso'me siỹaxadipi huet'ot na' loxogue jaso' peróna. 3Qana'chi jeso'me ỹátaqta jalcote na' dapaxaguenataxanecpi, ỹauót'ai na' daloqtenaxana, 'enaaco':
—'Uo so' siỹaxaua jec da' danaxan, ỹaañi jaso' nepeta. 4Joca'li ma'le danaxáatac, qana'chi 'uo jaso' nepeta talégue so' naq'aic. Ỹim, qana'chi janac jen' máỹo', qana'chi ỹalic. 5Jaso' laqáỹa nepeta, qaa'le talégue jeso'me 'aléua 'me ỹalcapíỹi jen' qa'. Qana'chi jaso'me peta sa huaỹáloq da' naséguem, ỹasouaxat da' sa léca jen' 'aléua. 6Qaláxasa joca'li netapelégue, qana'chi ỹavic, qá'a qaỹa ga' lepata', qana'chi daqaqa. 7Jaso'me laqáỹa nepeta, qaa'le talégue so' ỹaxatáñi, qana'chi jaso'me ỹaxat naséguem, qana'chi jaso' peta sa naséguem. 8Qaláxasa jaso' laqáỹa nepeta tatelégue jeso'me 'ónaxaic 'aléua, qana'chi ỹátaqta 'ónaxaic da' jaláỹaxac joca'li qonaqat. 'Uo jan' ỹóvi' jan' cien jan' jala, qataxa 'uo jan' ỹóvi' setenta jan' jala, qataxa 'uo jan' ỹóvi' treinta jan' jala joca'li qonaqat.
9Qana'chi so' Jesús 'enaaco':
—Da' 'ami 'auaỹáchiñii da' 'anaquiáxanaxaquii, ¡'ónaxaic da' 'anaquiáxañiichiiñi!
Da' naq'áita tadeeto' qoỹauót'ai jen' qodaloqtenaxana
(Marcos 4.10-12; Lucas 8.9-10)
10Qana'chi saua' lapaxaguenataqa nichíide'uo so' Jesús. Qana'chi ỹinat, 'enapega'to':
—¿Tá'nooqo'chi da' 'au'aqtaxanem na' siỹaxadipi, da' 'auauót'ai jen' 'adaloqtenaxanaxatpi?
11Qana'chi jeso'me 'enaaco':
—'Ami qoỹaỹátenaxanaxanque naua' sa di'ỹo't lasoxoco jeda'me l'onataxanaxac ñi' Dios 'me net'ague da' piỹem. Qaláxasa jen' siỹaxadipi sa 'te da' qoỹaỹátenaxanaxanec. 12Chan'eesa jega'me 'uo ga' huet'ot, qaa'le qonchíỹaxateegue ga' qoỹanem, qana'chi ỹátaqta qaỹa ga' ỹiuéetaaque. Jega'me qaỹa ga' huet'ot, qaa'le jega'me qonóuo', ỹivíd'a jega'me sa lecolec huet'ot qoỹacona. 13Chan'eesa da' s'aqtaxanem jen' siỹaxadipi, qaa'le sauót'ai jen' saloqtenaxanapi. Qá'a jen'me dec'atenaxáatac, qaláxasa 'ená'am da' sa nauáañi; demachítac, qaláxasa sa ỹaỹáten jega'me qoỹ'axátetac, 'ená'am da' 'uootaxa sa demachíỹa. 14Dójo' 'éeta jen'me siỹaxadipi, jeda'me ỹátaqta ỹipaquíchiỹi jocalia'cho' da' ỹ'axat jeso'me l'aqtáxanaxanec ñi' Dios, lenaxat Isaías, joca'li 'enaaco':
'Ami ỹátaqta 'amachíitac, qaláxasa sa 'auaỹáchiñii qoỹ'axat;
'ami 'anlóitaiỹi, qaláxasa qaỹa ga' 'aulói'ỹa.
15Qá'a jañi' liquidiaqte jénjo' siỹaxadipi v'iỹílaqtalégue da' ỹátaqta sa nedámchiỹi,
qataxa sa 'te da' ỹátaqta demachi,
qataxa naua' l'ai'te d'ochita'salo;
da' qaidi qaỹa ga' ỹilá'a,
qataxa qaỹa ga' demachíỹa,
qataxa qaỹa ga' ỹaỹáten jan' liquidiaqte,
qataxa sa jaỹim v'iỹílaxa da' qaidi ñataden.
16Qaláxasa 'ami ỹátaqta madet'ape, qá'a naua' 'ad'ai'chídii' nauáachidiñi, qataxa naua' 'adequetélalaacódii' demachi'ỹape. 17Ỹátaqta 'eesa dójo' 'ami s'axatema, da' jalcote joca'li so' l'aqtáxanaxanecpi ñi' Dios qataxa jeso'me 'ónaxaic da' lasoxoc siỹaxadipi da' sétaaque da' ỹauáachiỹi dójo' 'me 'ami 'auc'achiñíitac, qaláxasa sa 'te da' ỹilá'a; qataxa sétaaque da' demachíỹa jeda'me 'amachíitapega, qaláxasa jen'me siỹaxadipi sa 'te da' demachíỹa.
So' Jesús ỹ'axat da' náỹi jeso'me janaxanaxaic
(Marcos 4.13-20; Lucas 8.11-15)
18'Anaquiáxañiỹa qomle jeda'me náỹi jeso'me siỹaxaua janaxanaxaic. 19Jega'me naquiáxatapega da' n'aqtaguec jeda'me l'onataxanaxac ñi' Dios 'me net'ague da' piỹem, qaláxasa sa 'te da' ỹaỹáten, jega'me 'ená'am jaso' peta 'me talégue so' naq'aic. Ỹim, qana'chi janac so' qadó'o paiỹac, qana'chi deuootáxanec jeso'me n'aqtac 'me huétaỹi jañi' liquidiaqte. 20Jaso' peta 'me talégue jeso'me 'aléua 'me ỹalcapíỹi jen' qa', qaa'le jaso'me náỹi jen' siỹaxadipi 'me naquiáxatapega da' n'aqtac, qana'chi 'uo da' netónaxac. 21Qaláxasa ỹasouaxat da' qaỹa ga' lepata' da' n'aqtac, qana'chi sa 'te da' na'chi 'eeta't. Qá'a da' 'uo da' napiinaguec, 'uootaxa da' necanáguec ỹasouaxat da' n'aqtac, qana'chi qoséegue. 22Jaso' peta 'me talégue so' l'acháqa' jan' ỹaxat, qaa'le jaso'me náỹi jen' siỹaxadipi 'me naquiáxatapega da' n'aqtac. Qaláxasa ỹasouaxat da' ỹimelégue ỹima jen' chaqáina huetalégue jen' 'aléua qataxa da' loqopi'chi da' nesaliaxa, ỹima jen'me ỹí'et da' sa 'te da' naséguem qa'en da' n'aqtac, qataxa qaỹa ga' jaláỹaxac qa'en jen'me siỹaxadipi. 23Qaláxasa jaso' peta 'me talégue so' 'ónaxaic 'aléua, jaso'me náỹi jen' siỹaxadipi 'me naquiáxana da' n'aqtac, qaa'le ỹátaqta ỹaỹáteet'eguet, ỹátaqta 'ónaxaic da' jaláỹaxac da' qonaqat. 'Uo jan' 'ená'am jaga' peta 'me ỹóvi' jan' cien jan' jala, qataxa 'uo jan' ỹóvi' jan' sesenta, qataxa 'uo jan' ỹóvi' treinta jan' jala.
Qodaloqtenaxana jaso' ta'asot 'me nasee'mot so' trigo
24So' Jesús ỹa'uo da' laqáỹa daloqtenaxana, 'enaaco':
—Da' l'onataxanaxac ñi' Dios 'me net'ague da' piỹem, jeda'me 'ená'am ga' siỹaxaua 'me ỹátaqta nó'in jaga' nepeta 'me ỹaalégue ga' n'aléua. 25Qaláxasa joca'li ỹima da' d'ochi jeso'me siỹaxadipi, qana'chi janac jeso'me ỹip'aguéetac so' lalémaxaset jeso' nañiisec. Qana'chi ỹaañi jaso' ta'asot 'me 'ená'am so' trigo da' ỹanóoue jeso'me. Ỹim, qana'chi jec. 26Joca'li ma'le naséguem so' trigo, qataxa ma'le 'uo jan' jala, huá'a, qana'chi di'ỹoq jaso' ta'asot 'me 'ená'am jeso'me. 27Qana'chi jeso'me namaxa'spi jec da' d'aqtaxanem so' lalémaxaset jeso'me nañiisec, 'enaaco': “'Am qan'aco', da' ỹátaqta 'ónaxai jaso' 'anpeta 'me 'auaalégue jidi'me 'adanaxanqa', ¿jái'chogamaxa chiỹoxogue jaso' ta'asot 'me nacásee'megue na' trigo?” 28Qana'chi jeso'me lalémaxaset so' nanaxanqa' 'enaaco': “'Uootaxa na'chiso so' jaỹim ỹip'aguéetac jeso'me ỹí'et dójo'.” Qana'chi so' namaxa'spi denataxan, 'enaaco': “¿Sétaaque da' qo'mi ñapogaxaséguem jan'me ta'asot 'me nacásee'megue jen' trigo?” 29Qaláxasa jeso'me 'enaaco': “'Ai', péga, qomle 'anapoquiiséguem jana' ta'asot, qana'chi ỹañoxot da' cásee'megue na' trigo. 30N'óota da' 'amachíit'a da' naquétasee'ma't jenaa'me, na'chidáta qomle ỹivíta ga' lalóqo' da' qonaqat na' trigo. Qana'chi jaỹim samaxalégue qomle ga' qataxanaxaicpi da' ỹ'áuaxañi da' napoc jan' ta'asot. Ỹim, qana'chi ỹa'uo jen' laaqtapi, qaidi qoỹigóoue. Qomle ỹim, qana'chi qoỹiỹamaxat jan' jala na' trigo da' ỹacháaue ñi' ỹiquipi.”
Qodaloqtenaxana jaso' jala jan' mostaza
(Marcos 4.30-32; Lucas 13.18-19)
31So' Jesús nataq'en ỹa'uo da' laqáỹa daloqtenaxana, 'enaaco':
—Da' l'onataxanaxac ñi' Dios 'me net'ague da' piỹem, jeda'me 'ená'am jaga' jala jan' lenaxat mostaza 'me ỹacona ga' siỹaxaua da' ỹaalégue ga' n'aléua. 32'Eesa da' jaga'me ỹátaqta qaỹa 'te nesáaque, sa 'ená'am jan' laỹi peta. Qaa'le da' ỹivíta da' naséguem, qana'chi ỹátaqta sa dalaỹá'a, napacalégue ỹima jan' laỹipi nañiisepi, ỹivíd'a da' 'ená'am jan' 'epaq ỹátaqta lat'édai. Qana'chi jen' maỹo'pi ỹañoxot da' janac, qana'chi ỹa'uo jen' lepata'j, ỹanaỹilo naua' lepeel.
Qodaloqtenaxana ga' ỹaseedáxachiỹi jan' pan
(Lucas 13.20-21)
33Nataq'en ỹa'uo so' laqáỹa daloqtenaxana, 'enaaco':
—Da' l'onataxanaxac ñi' Dios 'me net'ague da' piỹem, jeda'me 'ená'am jega' ỹaseedáxachiỹi jan' pan 'me ỹacona jaga' ỹauo. Ỹim, qana'chi ỹalectenguet ga' let'ádaic lonáñiisec trigo lesochi 'me ỹóvi' veinticinco kilos, da' qaidi ỹima ỹaseedíỹi qa'en.
Da' 'éeta tadeno' ỹauót'ai jen' laloqtenaxanaxatpi so' Jesús
(Marcos 4.33-34)
34Ỹima jen'me ỹ'axátetac so' Jesús, ỹauót'ai jen' daloqtenaxáatapega da' d'aqtaxáatapeguem na' siỹaxadipi, sa 'te da' sa ỹa'uo na' daloqtenaxana da' d'aqtaxáatac. 35Naq'áita dójo', qaidi ỹipaquíchiỹi da' ỹidíñi jocalia'cho' so' l'aqtáxanaxanec ñi' Dios, 'me 'eet'oi:
S'aqtaxan, qaláxasa sauót'ai na' saloqtenaxana;
s'axat jen'me sa qoỹaỹáten da' lasoxoc, chiỹoqót'a joca'li ỹímta da' ỹí'et jen' 'aléua ñi' Dios.
So' Jesús ỹ'axat da' náỹi jaso' ta'asot 'me 'ená'am na' trigo
36Qana'chi so' Jesús nip'iỹé'ne' so' siỹaxadipi. Ỹim, qana'chi táaue so' 'emec. Huá'a, qana'chi saua' lapaxaguenataqa nichíide'uo jeso'me. Qana'chi qoỹinapego', qoỹinaaco':
—Ỹa qo'mi 'au'axatema ga' náỹi jaso' ta'asot 'me 'ená'am na' trigo 'me huetalégue so' nanaxanqa'.
37Qana'chi so' Jesús 'enaaco':
—Jeso'me siỹaxaua 'me nó'in jaso' nepeta, naqáina jen' siỹaxaua lec'óxot. 38Jeso'me nanaxanqa', qaa'le na'chína jen'me souqatalégue 'aléua. Jaso' peta 'me ỹátaqta 'ónaxai, qaa'le na'chína jen'me siỹaxadipi 'me huétaaue da' l'onataxanaxac ñi' Dios. Jaso' ta'asot 'me 'ená'am na' trigo, qaa'le na'chína jen'me 'equegue so' qadó'o paiỹac. 39So' dep'aguenataxáatac 'me ỹaañi jaso' ta'asot, qaa'le na'chiso so' qadó'o paiỹac. Da' qonaqat jan' jala so' trigo, qaa'le naqaiga ga' loiquiaqa' jen' 'aléua. Jeso'me qataxanaxaicpi, qaa'le naqáina na' namaxa'spi piỹem lé'ecpi. 40Dójo' qoỹíit'ec jaso' ta'asot da' qolapona't, qana'chi qoỹasaxánỹi ga' dóle' da' qoỹigóoue, jeda'me na'chida da' qoỹíit'ec qomle ỹivíta ga' loiquiaqa' jen' 'aléua. 41Jen' siỹaxaua lec'óxot namaq qomle na' lamaxa'spi piỹem lé'ec da' qoỹaconé'uo da' l'onataxanaxac ỹima jen'me ỹasouaxateguet ga' jaloic ga' laqáỹa, qataxa jen'me ỹí'et jen' sa nó'in. 42Ỹim, qana'chi jen'me qoỹasaxánỹi qomle jaga' lai't ga' dóle'. Huá'a, qana'chi noỹíitac qataxa ỹátaqta ỹiuoga't naua' lodaitel da' naỹaliaxa. 43Qana'chi jen'me ỹ'étetac ga' ỹiỹamaxaden ñi' Dios, jen'me 'uo da' l'edáxa 'ená'am jañi' c'atena qomle huétaaue ga' l'onataxanaxac jiñi'me let'a. 'Ami da' 'auaỹáchiñii da' 'anaquiáxanaxaquii, ¡'ónaxaic da' 'anaquiáxañiichiiñi!
Qodaloqtenaxana jaso' lai't jan' laicaua 'me qoỹoxochiñi
44Da' l'onataxanaxac ñi' Dios 'me net'ague da' piỹem, jeda'me 'ená'am jaga' lai't jan' laicaua 'me qoỹoxotóoue jen' 'aléua. 'Uo so' siỹaxaua ỹilalégue jaso' lai't jan' laicaua. Qana'chi ỹitaxa ỹoxochiñi, ỹipagaqchíichii'ña ga' l'acháqa'. Qana'chi ỹátaqta jalcote da' netónaxac, qana'chi v'iỹílaq. Ỹim, qana'chi ỹimen ỹima jeso'me loxotpi, qana'chi neuodéna so' 'aléua.
Qodaloqtenaxana so' qa', lenaxat perla, ỹátaqta sa lec'óxotolec da' laso'víỹaxac
45Da' l'onataxanaxac ñi' Dios 'me net'ague da' piỹem, nataq'en jeda'me 'ená'am ga' menaxaic 'me nimitétaaque ga' qa' lenaxat perla 'me ni'ỹoxodáxat ỹátaqta 'ónaxaic. 46Da' 'uootaxa ỹauana ga' 'oonolec 'me ỹátaqta sa lec'óxotolec da' laso'víỹaxac, qana'chi v'iỹílaq. Ỹim, qana'chi ỹimen ỹima jen' loxotpi, qana'chi neuodéna so' qa'.
Qodaloqtenaxana ga' 'uáanaxanaxat
47Nataq'en da' l'onataxanaxac ñi' Dios 'me net'ague da' piỹem, jeda'me 'ená'am ga' 'uáanaxanaxat 'me qoỹi'uaxáañi qoỹi'ỹácoxon jaga' peróna, qana'chi ỹátaqta ỹodapecachi na' loxonec níỹaqpi. 48Da' ma'le saqáchiỹi ga' 'uáanaxanaxat, qana'chi jega'me ỹ'ácoxoicpi ỹauéca'ta na' loxogue ga' noxop. Huá'a, qana'chi ñii'ñisop da' natoỹi jen' níỹaqpi. Qana'chi jen'me nó'in ỹachánỹi jaga' lai't, jen'me sa nó'in, qaa'le qoỹiguem. 49Naqaida da' 'éeta qom'chi ỹivíta ga' loiquiaqa' jen' 'aléua, da' janac jen'me namaxasec piỹem lé'ec da' qaidi ỹaconé'uo jen' 'itaxalóxoicpi, da' naqatéegue jen'me 'ónaxaic da' lasoxoc. 50Qana'chi na' 'itaxalóxoicpi ỹasaxánỹi jaga' dóle' lai't. Huá'a, qana'chi noỹíitac qataxa ỹátaqta ỹiuoga't naua' lodaitel ỹasouaxat da' naỹaliaxa.
Ga'me qoỹiỹamaxatétac dálaxaicolec qataxa jega' toisíỹac
51Qana'chi so' Jesús denataxan, 'enaaco':
—¿'Ami séetapega 'auaỹáchiñii ỹima dójo' s'axátetac?
Qana'chi jesaa'me 'enapega'to':
—Já'a, 'am qadesaliaxanec.
52Qana'chi jeso'me 'enaaco':
—Ga' dapaxaguenataxáatapeec na' laqátaxacpi so' Moisés, da' 'uootaxa maliaxa napaxaguéetapega da' l'onataxanaxac ñi' Dios 'me net'ague da' piỹem, qana'chi jega'me ỹañoxot da' ỹivíd'a da' 'ená'am ga' lalémaxaset ga' 'emec 'me ỹátaqta ỹaỹáten da' naqadiséguem jen' ỹiỹamaxatétacpi jega'me dálaxaicolec qataxa ga' toisec.
So' Jesús huét'a di' Nazaret
(Marcos 6.1-6; Lucas 4.16-30)
53So' Jesús joca'li ỹimat jen' daloqtenaxáatapegapi 'me ỹ'axátetac, qana'chi cá'ai di' huét'a, 54qana'chi ỹic'áta di' mai'chi lalémaxaset l'acháqa'. Huá'a, qana'chi dapaxaguenataxáatapegooue so' lemáxaqui na' judiopi jidi'me 'aléua. Qana'chi jen' siỹaxadipi ỹátaqta ỹ'aalátapeec, qana'chi 'enaaco':
—¿Jái'chogamaxa hua'ague ga' chiỹoxota'ague da' laỹátenaxanaxac da'me dójo' siỹaxaua? ¿Jái'chogamaxa 'éet'ec da' ỹañoxot da' ỹí'et jen'me sa qoỹauanápiỹipi? 55Qá'a jeda'me na'chida da' lec'óxot jeso'me ỹ'étac jen' 'epaq, lenaxat José. Qataxa jaso' lat'e lenaxat María. Jeda'me na'chi laqáỹa' saua' Jacobo, José, Simón qataxa so' Judas. 56Qataxa saua' laqáỹa' ỹauo' na'chi qo'mi huetaavlo. ¿Jái'chogamaxa hua'ague ga' chiỹoxota'ague ỹima dójo'?
57Chan'eesa sa 'te da' qoỹoqo'cha jeso'me. Qaláxasa so' Jesús 'enaaco':
—Ỹima na' siỹaxadipi ỹátaqta ỹauotec ga' l'aqtáxanaxanec ñi' Dios. Qaláxasa jen' mai'chi l'acháqa' lé'ecpi qataxa jen' lalémaxaset laỹi, sa ỹauotec.
58Qana'chi sa 'te da' jalcote na' ỹí'et jen' sa qoỹauanápiỹi da' 'en huáaue jeso'me siỹaxadipi, qá'a jeso'me siỹaxadipi sa ỹ'amaqten jeso'me.
Currently Selected:
Mateo 13: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
