Mateo 14

Da' nalaataguec so' chiláxanataxanaxaic lenaxat Juan

(Marcos 6.14-29; Lucas 9.7-9)

1Qana'chi jesaua' noloqo'te jeso'me Herodes 'me ỹilotalégue di' Galilea, jeso'me ỹaỹáten da' n'aqtaguec so' Jesús. 2Qana'chi 'enapego' jen' huétaaue lecochaxau'pi, 'enaaco':

—Jeso'me siỹaxaua naqaiso so' Juan 'me chiláxanataxanaxaic da' qonec'alaxadiséguem. Chan'eesa 'uo da' l'añaxac da' ỹí'et jen'me sa qoỹauanápiỹi.

3Qá'a jeso'me Herodes damaxasoxolégue joca'li da' qoỹaconé'uo so' Juan, da' qoỹicoñida't naua' loua', qana'chi qoỹauée'uo jaso' cointáxanaxaqui. Damaxasoxolégue, qá'a ỹasouaxat jaso' loua Herodías 'me loua joca'li so' laqaỹasa lenaxat Felipe. 4Qá'a so' Juan 'enapego' jocalia'cho' so' Herodes, 'enaaco':

—Sa nó'in da' 'au'oneguet jañi'me.

5Qana'chi jeso' Herodes sétaaque ỹalaat so' Juan. Qaláxasa 'uo da' loqolánaxa na' siỹaxadipi, qá'a na' siỹaxadipi 'éetapega so' Juan ỹátaqta 'eesa da' l'aqtáxanaxanec ñi' Dios. 6Qaláxasa joca'li ỹivíta so' lalóqo' da' de'quelégue so' lañoxoqui so' Herodes, qana'chi jaso' lec'oqte jaso' Herodías dasotétac, qana'chi ỹima jeso' liqui'ỹáxau'pi ỹic'atéetac. Qana'chi so' Herodes ỹátaqta noqopita da' lasotaxac jaso'me. 7Qana'chi ỹanem jaso'me da' l'aqtac 'me 'enaac da' ỹátaqta ỹipaquíchiỹi da' ỹanem gamachaqaiga ỹiỹáxanaaque jaso'me. 8Qana'chi jaso'me ỹ'áuaxañi da' ỹinat jaso' lat'e. Qana'chi joca'li ỹim da' qodemachítapega, qana'chi 'enapego' so' Herodes, 'enaaco':

—Jaỹim 'auanem qomle ga' coqui, 'auachánỹi ga' laqaic ñi' Juan 'me chiláxanataxanaxaic.

9Qana'chi jeso' net'a Herodes ỹátaqta daquico. Qalaq'o sóxote ỹan so' l'aqtac 'me 'enaac da' ỹipaquíchiỹi qataxa ỹasouaxat so' liqui'ỹáxau'pi 'me demachíchiỹi joca'li jeso'me, qana'chi damaxasoxolégue da' qoỹanem jaso'me so' ỹiỹáxane'uo. 10Ỹim, qana'chi damaxasoxolégue da' qoỹicháxaỹi na' laqaic so' Juan, huáaue qoỹin jaso' cointáxanaxaqui. 11Qana'chi qondó'uo so' laqaic, qoỹachítanỹi so' coqui. Qana'chi qoỹanem jaso' q'añole. Qana'chi jaso'me ỹanem jaso' lat'e.

12Qana'chi jana'j saua' nesoxonaqa so' Juan, qana'chi qoỹidóiỹi so' ló'oquiaxac, qana'chi qoỹisiiñi. Joca'li ỹim, qana'chi jéque' da' d'aqtaxaatem so' Jesús.

So' Jesús ỹiqui'ỹáxan so' cinco mil siỹaxadipi

(Marcos 6.30-44; Lucas 9.10-17; Juan 6.1-14)

13Joca'li ỹaỹáten dójo' so' Jesús, qana'chi cá'ai so' huét'a, nesamaxatela't, qana'chi huenóchiinỹi jaso' nilicota da' tai'ta da' lasego, tái'ỹa ga' qaỹái'ỹa 'aléua. Qaláxasa so' siỹaxadipi joca'li 'uo da' lipí'ic, qana'chi chiỹoqóte'ualo naua' noiqa da' qo'equegue jeso'me, qodictegue so' qaqat'egue. 14Qana'chi joca'li huenótee'guesop jaso' nilicota so' Jesús da' lasego, qana'chi 'chi ỹiláaue so' siỹaxadipi ỹátaqta jalcote, qana'chi ỹátaqta sa lec'óxotolec da' lichoxodénataxanaxac so' siỹaxadipi. Huá'a, qana'chi nataden na' leuaxaicpi 'me qondótapee'uo. 15Joca'li ma'le jávit, qana'chi saua' lapaxaguenataqa so' Jesús jana'j da' qoỹinapéga jeso'me, qoỹinaaco':

—Ma'le jávit, qataxa qaỹa ga' ná'ña jénjo' 'aléua. N'óota da' 'auenapéga na' siỹaxadipi, da' qaidi jec, ỹic'atalo naua' neta'ñalo na' siỹaxadipi da' neuodénaaque ga' jaloq.

16Qana'chi so' Jesús 'enaaco':

—Jen'me siỹaxadipi sa ỹiuen da' jec. 'Ami 'me 'auañimii qomle ga' jaloq.

17Qana'chi jesaa'me 'enapega'to':

—Qaỹa jega'me laqáỹa qonoq, na'chidiauá'te' diaua' cincole paa'ñi qataxa saua' doosolqa níỹa'.

18Qana'chi so' Jesús 'enaaco':

—Ỹa 'andoidi't jegaa'me.

19Qana'chi 'enapego' so' siỹaxadipi da' ñíiñi, nalégue na' 'auaqapi 'me dadála. Ỹim, qana'chi ỹaconalo saua' cincole paa'ñi qataxa saua' doosolqa níỹa'. Qana'chi ỹilo'ot na' piỹem, qana'chi ỹanem da' netónaxac ñi' qan'étoqo't. Ỹim, qana'chi necolaxachidíñi saua' paa'ñi, qana'chi ỹanema saua' lapaxaguenataqa. Qana'chi jesaa'me ỹaadóoue na' siỹaxadipi. 20Qana'chi ỹima jeso'me dequé'e qataxa ỹátaqta nodáxaicpi. Joca'li ỹim, qana'chi qoỹimichiilo saua' doce nachóxonaxaqui' jeso'me n'iỹóxotpi, qana'chi ỹátaqta saqachiilo. 21Jeso'me de'quétacpi joca'li ỹóvi' na' cinco mil siỹaxadipi. Qaláxasa sa qonaloqten jen' ỹauodipi qataxa jen' ñoqolqapiolec.

So' Jesús quetalégue so' noxop

(Marcos 6.45-52; Juan 6.16-21)

22Qana'chi so' Jesús 'enapegalo saua' lapaxaguenataqa da' huenóchidinỹi jaso' nilicota qaidi 'uáutra'ta di' lasego. Jeso'me qapiỹáñi da' nip'iỹíitapegue' so' siỹaxadipi. 23Joca'li ỹim da' lip'iỹénataxanaxac, qana'chi so' Jesús ỹic'ádisee'mec so' comadelégue 'aléua, da' qaidi nesamaxatela't da' netamen. Joca'li sóxote pí'ỹaq, qana'chi so' Jesús maliaxa huétasee'ma jidi' 'aléua. 24Jaso' nilicota maliaxa huétanỹi so' laiñi jaso' peróna lat'édai. Qana'chi na' lepáxa na' noxop ỹátaqta ỹi'uaxánapecot jaso' nilicota, qá'a so' laỹat ỹátaqta dasot'eguet jeso'me. 25Joca'li ma'le sa qaỹa'aguet so' ỹ'oxoñi, qana'chi so' Jesús ỹic'at'ague jeso'me lapaxaguenatacpi, petalégue na' noxop. 26Qana'chi jeso'me lapaxaguenatacpi joca'li ỹila'aguet jeso'me da' petalégue na' noxop, qana'chi ỹátaqta 'uo da' loqolánaqa', qana'chi ỹ'alaqaỹilo, 'enapega'to':

—¡'Auloiỹet na' nepaqal!

27Qana'chi so' Jesús 'enapegalo' jesaa'me, 'enaaco':

—¡'An'añaxachii qomle, sa 'au'óiỹi, na'chaỹim!

28Qana'chi so' Pedro detaqa, 'enaaco':

—'Am qadesaliaxanec, qomle ỹátaqta 'eesa da' na'chi'am, n'óota qomle da' jaỹim 'auaséet'em da' sapelégue na' noxop, qaidi 'am seca'aguet.

29Qana'chi so' Jesús 'enaaco':

—Já'a, 'aỹala.

Qana'chi so' Pedro huenóteegue, chiỹaqánỹi jaso' licota, qana'chi pelégue na' noxop da' ca'aguet so' Jesús. 30Qaláxasa joca'li nomguet da' l'añaxac so' laỹat, qana'chi ỹátaqta 'uo da' loqolánaxa. Qana'chi jeso'me damolíñi, qana'chi ỹ'alaq, 'enaaco':

—¡'Am ỹisaliaxanec, jaỹim 'anec'alaxatéegue!

31Qana'chi so' Jesús ỹaconguet so' louaq. Qana'chi 'enapego', 'enaaco':

—¡Ỹátaqta cat'oñooc da' 'adip'iỹáxac! ¿Tá'nooqo'chi da' 'am qolguétaxanaxaic?

32Qana'chi jesaa'me joca'li ma'le huenóchidinỹi jaso' nilicota, qana'chi v'iiỹet so' laỹat. 33Qana'chi jesaa'me nétranỹi jaso' nilicota, jesaa'me ỹisocoto naua' liliictel so' Jesús, qana'chi 'enaaco':

—Ỹátaqta 'eesa da' na'chi'am 'me 'am lec'óxot ñi' qan'étoqo't.

So' Jesús nataden na' leuaxaicpi di' Genesaret

(Marcos 6.53-56)

34Joca'li ma'le qoỹ'axasoxota jaso' peróna, qana'chi qoỹivíta di' 'aléua 'me huáaue di' Genesaret. 35Qana'chi na' siỹaxadipi 'me l'acháqa' jeso'me 'aléua joca'li ỹaateton so' Jesús, qana'chi qod'aqtaxanem ỹima jen' netalégue jeso' 'aléua, qana'chi qondó'uo ỹima na' leuaxaicpi ga' huét'a. 36Qana'chi qonachoxodéetapecot da' temaqaidi da' 'chi qoỹipoteuó'o na' lai so' lapoto. Qana'chi ỹima jeso'me ỹipoteuó'o so' lai so' lapoto, qana'chi ỹiméegue.

Currently Selected:

Mateo 14: PLGNT93

Highlight

Copy