Romanos 14
14
'Ená'te 'oquetapeelégue ga' 'ad'amaqténataxanaxaua
1Ga' siỹaxaua da' 'uootaxa qaỹa 'te l'añaxac da' lip'iỹáxac, qaláxasa jega'me 'auacoñiiỹet, qaláxasa 'ená'te 'ancotáitapiỹi jega'me sa qaỹátaq. 2'Chi saloqtenaxana da' 'uootaxa 'uo ga' 'éetapega da' ỹañoxot da' ỹalic na' ỹodapecachi nalic, qaláxasa 'uo ga' laqáỹa 'me qaỹa 'te l'añaxac da' lip'iỹáxac, qana'chi nedot'a't jen'me nalic 'me chiỹaqaỹi na' nañiisec. 3Chan'eesa jega'me 'éetapega ỹañoxot da' ỹalic na' ỹodapecachi nalic, n'óota da' 'ená'te ỹ'otan jega'me 'uo da' ỹivitá'a da' ỹalic jen'me ỹodapecachi nalic. Qataxa jega'me 'uo ga' ỹivita'aguet da' ỹalic jen' ỹodapecachi nalic, n'óota da' 'ená'te ỹic'onguet jega'me ỹañoxot da' ỹalic jen' ỹodapecachi nalic. Qá'a ñi'me Dios ỹaconguet jega'me siỹaxaua. 4Qá'a ¿jái'chi 'am da' 'uootaxa 'oquetapeelégue ga'me lamaxasec ga' siỹaxaua laqáỹa? Qá'a da' 'uootaxa ỹiỹamqáchiiñi ga' ỹ'étetac, 'uootaxa sa ỹiỹamaxañi, qaláxasa mai'chi ỹoiquíitac jega'me ladípa. Qaláxasa jega'me ỹátaqta ỹiỹamqáchiiñi qomle, qá'a so' qadesaliaxanec ỹátaqta 'uañaxaic da' ỹiỹamqáchiiñi qa'en jega'me.
5Qataxa da' laqáỹa saloqtenaxana 'eet'oi: 'Uo na' ỹagaqtéetac ga' 'oonolec nolo' da' 'éetapega sa 'ená'am ga' nolo' laqáỹa. Qataxa 'uo na' 'éetapega da' 'ena'a'salo naua' noloqo'te. Ñi' 'oonolec mai'chi ỹátaqta 'eesa qa'en da' leenataxac. 6Jega'me ỹagaqten ga' 'oonolec nolo', jega'me ỹí'et, qaláxasa ỹi'ỹoxoden so' qadesaliaxanec. Qataxa jega'me sa ỹí'et, qaláxasa nataq'en jega'me ỹi'ỹoxoden jeso'me qadesaliaxanec, temaqaidi da' sa ỹí'et. Qataxa jega'me ỹañoxot da' ỹalic jen' ỹodapecachi nalic, jega'me dequé'e, qaláxasa na'chiso so' qadesaliaxanec ỹi'ỹoxoden, qá'a jega'me ỹaatapecot da' netónaxac ñi'me Dios. Qataxa jega'me ỹivita'aguet da' 'uo ga' ỹalic naua' nali'j, jega'me ỹí'et dójo', qaidi ỹi'ỹoxoden so' qadesaliaxanec, qataxa jega'me nataq'en ỹaatapecot da' netónaxac ñi'me Dios.
7Qá'a sa 'te da' 'uo ga' 'oonolec da' qo'mi da' mai'chi lalémaxaset da' l'óiỹaxac, qataxa qaỹa 'te ga' 'chi mai'chi lalémaxaset da' leleuaxa. 8Qá'a da' 'uootaxa ñic'alaqátaiỹi, qaláxasa da' qad'óiỹaxac náỹi da' liỹ'oxodic so' qadesaliaxanec. Qataxa da' 'uootaxa qadeleu, qaláxasa da' qadeleuaxa náỹi da' liỹ'oxodic so' qadesaliaxanec. Chan'eesa da' 'uootaxa maliaxa ñic'alaqátaiỹi, 'uootaxa qadeleu, qaláxasa na'chi 'ená'am qo'mi lalémaxase'te jeso'me. 9Qá'a so' Cristo ỹileu qataxa ỹitaxa v'iỹílaxalégue da' nec'aléegue, qaidi jeso'me naqaiso so' lasoxola' jen'me napa'lpi qataxa jen'me maliaxa nec'alétaiỹi.
10Qalqaiga 'am ¿tóoqo'chi 'oquetapeelégue ga' 'ad'amaqténataxanaxaua? qataxa ¿tóoqo'chi da' 'au'otáatac? Qá'a ỹima qomle da' qo'mi sasoxouó'o so' Cristo, da' qaidi jeso'me qo'mi nimi't. 11Qá'a naua' nidii's l'aqtaqa ñi' qadasoxola' 'eet'oi:
Ỹátaqta 'eesa da' jaỹim ñic'alétaiỹi,
chan'eesa ỹátaqta 'eesa da' ỹima qomle na' siỹaxadipi jaỹim ỹisocoto naua' liliictel,
qataxa ỹima qomle jen'me detaxaỹá'a da' ỹátaqta jaỹim let'a.
12Chan'eesa ñi' 'oonolec qomle da' qo'mi mai'chi nichoxotela't qomle dasoỹot ñi'me Dios.
'Ená'te 'aua'uo ga' lasouaxaset ga' 'ad'amaqténataxanaxaua
13Chan'eesa 'ena't qomle da' ga' 'oonolec da' qo'mi da' quetapeelégue ga' l'amaqténataxanaxaua. Na'chidáta da' 'ami 'anpogoxóiñiỹapegue' da' sega'me sa huáñi 'aviñii ga' 'ad'amaqténataxanaxauai, 'uootaxa da' 'ená'te 'uo 'aviñii ga' lasouaxaset. 14Qá'a jaỹim saỹáten da' qaỹa ga' 'chi nachisee'mot da' huogáxadaic. Dójo' séetapega ỹátaqta 'eesa, qá'a s'amaqtéetac so' qadesaliaxanec Jesús. Qaláxasa da' 'uo ga' 'oonolec da' 'ami 'éetapecogamaxa da' qoỹisiquiaxaná'a ga' nalic, jega'me 'me mai'chi p'aỹo'ot da' sa qoỹisetaxat. 15Chan'eesa ga' nalic 'me 'aualíctac, da' 'uootaxa ỹañoxot da' ỹi'quemaqtet da' leenataxac ga' 'ad'amaqténataxanaxaua, qana'chi sa 'ouétaaue da' 'adesóxodic. Sa 'te qomle da' 'uo ga' 'auaqtaqtet jen'me ỹileualégue joca'li so' Cristo, ỹasouaxat da' 'am sétaaque da' 'aualic jen'me ỹodapecachi nalic. 16'Ena't qomle da' 'auauóỹaaque ga' ledáqa' da' 'uo ga' sa nó'in n'aqtaguec jega'me 'ami 'oñíitapega da' ỹiỹamqáchiiñi. 17Qá'a da' l'onataxanaxac ñi'me Dios da' ỹilo'ogue ỹimata'a'téna, jeda'me sa 'te náỹi da' ỹ'oqóchiỹi niqui'ỹáxac qataxa da' ỹómaxac, na'chidáta da' ỹoqovíta n'óiỹaxac, qataxa da' n'emáxac, qataxa da' namaic 'me chiỹoqo'ot so' Espíritu Santo. 18Ga' siỹaxaua da' 'eet'oi dójo' da' d'onataxanot so' Cristo, jega'me ỹátaqta ỹiỹamaxadéeta ñi'me Dios qataxa ỹima jen' siỹaxadipi.
19Chan'eesa maliaxa qolqat'ot qomle da' ñimitaqáaque jega'me ỹí'et da' nelagaxadic, qaidi ñi' 'oonolec da' qo'mi lecochiỹa ga' laqáỹa da' d'añi qa'en da' lip'iỹáxac. 20'Ena't qomle da' 'anoláxachiñi da' l'onataxanaxac ñi' Dios ỹasouaxat 'aviñii jega'me 'chi nalic. Qá'a 'eesa da' ỹima jen'me nalicpi ỹátaqta ỹoqovíta. Qaláxasa sa ỹiỹamaxañi da' jega'me nalic chiỹaqaỹi da' 'uo qa'en ga' lasouaxaset ga' naqáỹa. 21Chan'eesa 'ónaxaic da' sa qoỹalic na' lapat qataxa da' qoniỹómỹi jen' latáxa, qataxa ỹima nataq'en jen'me ỹañoxot da' huáñi ga' 'ad'amaqténataxanaxaua, 'uootaxa da' ỹa'uo ga' lasouaxaset, 'uootaxa qaỹa qa'en ga' l'añaxac da' lip'iỹáxac. 22Ỹátaqta 'aniỹamaxatet'eguet qomle da' 'ad'amaqténataxanaxac 'me 'am huet'ot, ỹátaqta 'adalemqat'ot ñi'me Dios. Qá'a ¡ỹátaqta mátac qomle ga' siỹaxaua qomle ỹim da' 'uo ga' ỹátaqta ỹiỹamaxadéeta, qana'chi sa v'iỹílaxaguet da' sega'me n'áxat 'en da' laviliỹáxac! 23Qá'a jega'me 'chi nachit'aguet da' ỹalic ga' nalic, jega'me ỹañoxot da' mai'chi nasouaxatela't, qá'a sa ỹátaqta ỹiỹamaxaden da' ỹalic. Ỹima jen'me qoỹí'et, da' sa nateneguet da' n'amaqténataxanaxac, qana'chi ỹí'et ga' nasouaxaset.
Currently Selected:
Romanos 14: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
Romanos 14
14
'Ená'te 'oquetapeelégue ga' 'ad'amaqténataxanaxaua
1Ga' siỹaxaua da' 'uootaxa qaỹa 'te l'añaxac da' lip'iỹáxac, qaláxasa jega'me 'auacoñiiỹet, qaláxasa 'ená'te 'ancotáitapiỹi jega'me sa qaỹátaq. 2'Chi saloqtenaxana da' 'uootaxa 'uo ga' 'éetapega da' ỹañoxot da' ỹalic na' ỹodapecachi nalic, qaláxasa 'uo ga' laqáỹa 'me qaỹa 'te l'añaxac da' lip'iỹáxac, qana'chi nedot'a't jen'me nalic 'me chiỹaqaỹi na' nañiisec. 3Chan'eesa jega'me 'éetapega ỹañoxot da' ỹalic na' ỹodapecachi nalic, n'óota da' 'ená'te ỹ'otan jega'me 'uo da' ỹivitá'a da' ỹalic jen'me ỹodapecachi nalic. Qataxa jega'me 'uo ga' ỹivita'aguet da' ỹalic jen' ỹodapecachi nalic, n'óota da' 'ená'te ỹic'onguet jega'me ỹañoxot da' ỹalic jen' ỹodapecachi nalic. Qá'a ñi'me Dios ỹaconguet jega'me siỹaxaua. 4Qá'a ¿jái'chi 'am da' 'uootaxa 'oquetapeelégue ga'me lamaxasec ga' siỹaxaua laqáỹa? Qá'a da' 'uootaxa ỹiỹamqáchiiñi ga' ỹ'étetac, 'uootaxa sa ỹiỹamaxañi, qaláxasa mai'chi ỹoiquíitac jega'me ladípa. Qaláxasa jega'me ỹátaqta ỹiỹamqáchiiñi qomle, qá'a so' qadesaliaxanec ỹátaqta 'uañaxaic da' ỹiỹamqáchiiñi qa'en jega'me.
5Qataxa da' laqáỹa saloqtenaxana 'eet'oi: 'Uo na' ỹagaqtéetac ga' 'oonolec nolo' da' 'éetapega sa 'ená'am ga' nolo' laqáỹa. Qataxa 'uo na' 'éetapega da' 'ena'a'salo naua' noloqo'te. Ñi' 'oonolec mai'chi ỹátaqta 'eesa qa'en da' leenataxac. 6Jega'me ỹagaqten ga' 'oonolec nolo', jega'me ỹí'et, qaláxasa ỹi'ỹoxoden so' qadesaliaxanec. Qataxa jega'me sa ỹí'et, qaláxasa nataq'en jega'me ỹi'ỹoxoden jeso'me qadesaliaxanec, temaqaidi da' sa ỹí'et. Qataxa jega'me ỹañoxot da' ỹalic jen' ỹodapecachi nalic, jega'me dequé'e, qaláxasa na'chiso so' qadesaliaxanec ỹi'ỹoxoden, qá'a jega'me ỹaatapecot da' netónaxac ñi'me Dios. Qataxa jega'me ỹivita'aguet da' 'uo ga' ỹalic naua' nali'j, jega'me ỹí'et dójo', qaidi ỹi'ỹoxoden so' qadesaliaxanec, qataxa jega'me nataq'en ỹaatapecot da' netónaxac ñi'me Dios.
7Qá'a sa 'te da' 'uo ga' 'oonolec da' qo'mi da' mai'chi lalémaxaset da' l'óiỹaxac, qataxa qaỹa 'te ga' 'chi mai'chi lalémaxaset da' leleuaxa. 8Qá'a da' 'uootaxa ñic'alaqátaiỹi, qaláxasa da' qad'óiỹaxac náỹi da' liỹ'oxodic so' qadesaliaxanec. Qataxa da' 'uootaxa qadeleu, qaláxasa da' qadeleuaxa náỹi da' liỹ'oxodic so' qadesaliaxanec. Chan'eesa da' 'uootaxa maliaxa ñic'alaqátaiỹi, 'uootaxa qadeleu, qaláxasa na'chi 'ená'am qo'mi lalémaxase'te jeso'me. 9Qá'a so' Cristo ỹileu qataxa ỹitaxa v'iỹílaxalégue da' nec'aléegue, qaidi jeso'me naqaiso so' lasoxola' jen'me napa'lpi qataxa jen'me maliaxa nec'alétaiỹi.
10Qalqaiga 'am ¿tóoqo'chi 'oquetapeelégue ga' 'ad'amaqténataxanaxaua? qataxa ¿tóoqo'chi da' 'au'otáatac? Qá'a ỹima qomle da' qo'mi sasoxouó'o so' Cristo, da' qaidi jeso'me qo'mi nimi't. 11Qá'a naua' nidii's l'aqtaqa ñi' qadasoxola' 'eet'oi:
Ỹátaqta 'eesa da' jaỹim ñic'alétaiỹi,
chan'eesa ỹátaqta 'eesa da' ỹima qomle na' siỹaxadipi jaỹim ỹisocoto naua' liliictel,
qataxa ỹima qomle jen'me detaxaỹá'a da' ỹátaqta jaỹim let'a.
12Chan'eesa ñi' 'oonolec qomle da' qo'mi mai'chi nichoxotela't qomle dasoỹot ñi'me Dios.
'Ená'te 'aua'uo ga' lasouaxaset ga' 'ad'amaqténataxanaxaua
13Chan'eesa 'ena't qomle da' ga' 'oonolec da' qo'mi da' quetapeelégue ga' l'amaqténataxanaxaua. Na'chidáta da' 'ami 'anpogoxóiñiỹapegue' da' sega'me sa huáñi 'aviñii ga' 'ad'amaqténataxanaxauai, 'uootaxa da' 'ená'te 'uo 'aviñii ga' lasouaxaset. 14Qá'a jaỹim saỹáten da' qaỹa ga' 'chi nachisee'mot da' huogáxadaic. Dójo' séetapega ỹátaqta 'eesa, qá'a s'amaqtéetac so' qadesaliaxanec Jesús. Qaláxasa da' 'uo ga' 'oonolec da' 'ami 'éetapecogamaxa da' qoỹisiquiaxaná'a ga' nalic, jega'me 'me mai'chi p'aỹo'ot da' sa qoỹisetaxat. 15Chan'eesa ga' nalic 'me 'aualíctac, da' 'uootaxa ỹañoxot da' ỹi'quemaqtet da' leenataxac ga' 'ad'amaqténataxanaxaua, qana'chi sa 'ouétaaue da' 'adesóxodic. Sa 'te qomle da' 'uo ga' 'auaqtaqtet jen'me ỹileualégue joca'li so' Cristo, ỹasouaxat da' 'am sétaaque da' 'aualic jen'me ỹodapecachi nalic. 16'Ena't qomle da' 'auauóỹaaque ga' ledáqa' da' 'uo ga' sa nó'in n'aqtaguec jega'me 'ami 'oñíitapega da' ỹiỹamqáchiiñi. 17Qá'a da' l'onataxanaxac ñi'me Dios da' ỹilo'ogue ỹimata'a'téna, jeda'me sa 'te náỹi da' ỹ'oqóchiỹi niqui'ỹáxac qataxa da' ỹómaxac, na'chidáta da' ỹoqovíta n'óiỹaxac, qataxa da' n'emáxac, qataxa da' namaic 'me chiỹoqo'ot so' Espíritu Santo. 18Ga' siỹaxaua da' 'eet'oi dójo' da' d'onataxanot so' Cristo, jega'me ỹátaqta ỹiỹamaxadéeta ñi'me Dios qataxa ỹima jen' siỹaxadipi.
19Chan'eesa maliaxa qolqat'ot qomle da' ñimitaqáaque jega'me ỹí'et da' nelagaxadic, qaidi ñi' 'oonolec da' qo'mi lecochiỹa ga' laqáỹa da' d'añi qa'en da' lip'iỹáxac. 20'Ena't qomle da' 'anoláxachiñi da' l'onataxanaxac ñi' Dios ỹasouaxat 'aviñii jega'me 'chi nalic. Qá'a 'eesa da' ỹima jen'me nalicpi ỹátaqta ỹoqovíta. Qaláxasa sa ỹiỹamaxañi da' jega'me nalic chiỹaqaỹi da' 'uo qa'en ga' lasouaxaset ga' naqáỹa. 21Chan'eesa 'ónaxaic da' sa qoỹalic na' lapat qataxa da' qoniỹómỹi jen' latáxa, qataxa ỹima nataq'en jen'me ỹañoxot da' huáñi ga' 'ad'amaqténataxanaxaua, 'uootaxa da' ỹa'uo ga' lasouaxaset, 'uootaxa qaỹa qa'en ga' l'añaxac da' lip'iỹáxac. 22Ỹátaqta 'aniỹamaxatet'eguet qomle da' 'ad'amaqténataxanaxac 'me 'am huet'ot, ỹátaqta 'adalemqat'ot ñi'me Dios. Qá'a ¡ỹátaqta mátac qomle ga' siỹaxaua qomle ỹim da' 'uo ga' ỹátaqta ỹiỹamaxadéeta, qana'chi sa v'iỹílaxaguet da' sega'me n'áxat 'en da' laviliỹáxac! 23Qá'a jega'me 'chi nachit'aguet da' ỹalic ga' nalic, jega'me ỹañoxot da' mai'chi nasouaxatela't, qá'a sa ỹátaqta ỹiỹamaxaden da' ỹalic. Ỹima jen'me qoỹí'et, da' sa nateneguet da' n'amaqténataxanaxac, qana'chi ỹí'et ga' nasouaxaset.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.