Fulatika Maxaafa 1
1
Gibtseke Ardixxa Miicensha
1Mini hado ifi fika adhiteexxi Ya'iqoobinni welti Gibtse'a me'itemmaxxe Isira'eelito hiyyendeexxi Ya'iqoobixxe labbaxxe ooseki summi: 2Roobeel, Simooni, Leewwi, Yihuda, 3Yisakoori, Zabiloni, Biiniyaami, 4Daani, Nefitaaleemi, Gaadinna Aseeriten.#Dada. 46:8-27. 5Ya'iqoobixxi horte duuchchiinxi torbaane tommemman#1:5 Torbaanne tommeman, maxxinetixxe abbaayaba afemeeke bireke maxxafa'ninna torbaane tomme beekolexxe tika'n «Torbaane tommenna onde» hiyyendee tikende'een. Ookkone wodda Yoosseefi edise Gibtse hedheman. 6Barratixxa barra Yooseefi, dayyuwwi isikinna itti ila duuchchi rerte. 7Kaddoolenna Isira'eeliki ardi ile hore, laakkosik birasa'atenaa'n kexxeexxa Gibtseke boga'n wo'me.#Erga. Huj. 7:17.
8Gibtseke boga'ninna Yooseefi ege'nebaak haaroki moyanji moye.#Erga. Huj. 7:18. 9Isinna arda ifike'n hiyyee qici: «Kunse Isira'eeliki ardi laakkosik no'oo sa'eedhee'n; no'o irranna worbedheen. 10Laakkossi insa'nek lebabaashsha bagedi ke'e'na'a naapha no'oke'e gaminse'e no'oo lollabaashshanna konne boganaa'ni fulle me'inaashsha mala mallo» hiyye.#Erga. Huj. 7:19. 11Tennexxee insa'nee ha'urto huje hunnat hujisaaka manna insa'ne hana baalloonsine; Isira'eelik ardinna Fetoominna Raamise hiyyemeeka mi'yiinka qachchuwwa Feri'ooni'a ijaare. 12Yaane kinni miicemmeexxe qixxe'n Isira'eelik ardi laakkosik bira sa'eexxi boga ookkone'ni faca'e; tennexxe'e Gibtseki manninna Isira'eelika arda lumooshsha sodaate. 13Gibtseki manninna Isira'eelika arda mararte belo hujisa'emman. 14Dhoqqe hirbeessat, qabadisatinna fichchinxe huje duuchchinni wixxirri assina'n jabaxxa huje hujisat hedho inisa'ne'n qaraartaashsha assina'nemman; Gibtsek manni insa'nee hujisa'emmaxxe jabaxxe huje duuchcha'n haranga insa'ne'a marara'nemmabaan.
15Gibtseki moyanjinna Tsiparaanna Fuuha hiyyendaaxxa hobbaassammaxxa Ibiritottixxa melaalle hiyyee qici: 16«Ibiritottixxa melaalle ciniintotike kinji hana hobbaassinaa wodda ilemaaki labbake kadoole shiwwe; mayyaxxe kaddoole kinni hedhondinni hexxuun waalle» hiyye. 17Yaane kinni iitti hobbaassammaxxi melaalle Mageno sodaantemmaxxe'e Gibtseki moyanji insa'ne'e ajajemmashsha assinebaan; insa'nenna labbaxxa annoole hedhondinni hexxaashsha waalle. 18Gibtsik moyanjinna eettene hobbaassammaxxa melaalle ye'eexxi insa'ne, «Labbaxxi annoole hedhoti hexxaashsha mayee waaldine?» Hiyye qore.
19Iitti hobbaassammaxxi melaallenna Feri'ooni'n, «Ibiritottixxi melaalle Gibtseke bogixxe melaalleshshatebaani; insa'ne worba maleelle kaddemmaxxee hobbaassammaxxi melaalle martebaange ildaammaxxeeten» hine hissine haasone. 20Mageninna eettene hobbaassammaxxe melaalle'a eloxxa asse; ardi laakkosik birasa'a'ni me'e; haranga worbe. 21Iitti hobbassammaxxi melaalle Mageno sodaattemmaxxee'e Mageninna insa'ne mitti mittinge mini hadike asse. 22Ookkoneechchi uduma Feri'ooninna ifika arda duuchcha: «Ilindaaxxa Ibiritottixxa labbaxxa annoole duuchcha Abbaayike galaani giddo hunne; meyyaxxa annoole duuchcha kinni hedhondinni hexxo'a waalle» hiyye jabaka ajaja sa'isse.#Erga. Huj. 7:19.
Currently Selected:
Fulatika Maxaafa 1: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
