Fulatika Maxaafa 10
10
Awwaansiinke Haagannixxa Bala
1Duuchchi woddik Goottinna Muuse'e, «Feri'ooniba mari, ani Feri'oonika godoba isike ja'laabuwwika jabeessannechchi konnee mambe beessisuwwa oddo insa'nexxe'ni assonna'aten. 2Kunninna Gibtseka manna hitta ganennexxanna oddo insa'neexxe'n beessisuwwa anka hitta assennexxa, oose ha'nooxxe'ninna ha'nooxxe oosexxe oosse'n kuldinaashshanna ani Duuchchi woddike Gootta kadennexxa egendino'aaten.»
3Muusenna Aarooni Feri'ooniba marreexxi hinee qici, «Duuchchi woddiki Gootti Ibiritotik Magen, ‹Ani edo ifi salphisa gibba'n hexxato? Anee magenoonfato'a arda anka me'o'a wocci assi. 4Ardi anki me'o'a wocci assa gibbottole, soodo awwanessiinka haagana boga atike'n iyyedagannon. 5Awwaanessuwwikinna bogi kunni leellabaa qico'ni buqaan; kaadetenaa'n ati'a heenochchi gatemmachcho atike fichcha'n hedheek haqichchuwwi gattebaang itaan. 6Atike mine'n, atike ja'laabuwwike mine'ninna atike ardike mine duuchcha'n awwaanessiink haagan wo'maan; tinni yaane atik annuwwi, atike annuwwink annuwwi, boga konne'n hedha safeexxe barranaa'n telchi qico'ni haranga uunde egennexxebaan.› »
Muusenna illee iima higeexxi Feri'oonbaa'n fule me'e.
7Feri'oonik ja'laabuwwinna isoo'o, «Kunni manji haani qico'n no'aa fonxoro kada'n hedha? Duuchchi Woddika Gootta ifika Mageno magenoonfantaashsha manna wocci ass; Gibtse baxxeexxa ta'anna egendebexxong hexxetta'a?» Hiyye.
8Tennexxee Muusenna Aaroon Feri'oonibaa dangaashsha assemme; isinna «Martine Duuchchi woddika Gootta ha'nooka Mageno magenoonfatte; yaane kinni me'a'neek ayyeera?» Hiyye.
9Muusenna «Duuchchi Woddike Gootti'a ayyaana ulfeesitaaxxa dargaggeeyye no'oxxanna labbaxxa geedhe no'ooxxa, labbaxxenna meyyaxxa oose, iittanni gedhebo no'ooka re'e no'ooxxanna lalo no'oka adhdhine me'inanon» hiyye hiisse haaso'e.
10Feri'ooninna, «Ha'no melaalle ha'ooxxeninna oose ha'nooxxenni welt me'itino'a wocci assanon; Duuchchi woddik Gooti ha'nonni welti hedhowwaali; yaane kinni ha'noo edo fuggoxxi yaane hexxaaxxa uudde. 11Waawwo'o iittateba'a! Ha'no labballi calli me'itineexxi Duuchchi woddika Gootta magenoonfatte; tennetemman ha'no qortineemmaxxi.» Ookkoneechchi uduma Muusenna Aarooni Feri'oon edii'n shorremme fulle.
12Duuchchi Woddiki Goottinna Muuse, «Awwaaneessii haagan dage konne boga'n wo'maashsha, kaadetenaa'n gateechcho duuchchanna bogake'n lateelcho duuchcha ite kutti assaashsha anga atixxa Gibtseke bogi hana diriirsi» hiyye. 13Tennexxee Muuse siqqichcho ifixxa Gibtseke bogi hana diriirse; Duuchchi woddiki Goottinna eettenne barranna hashsha duuchcha ookkone boga'n diidallo diidalleessitaashsha asse. Langaxxa barra gorsa diidallo awwaanessuwwa iyyedagge. 14Awwaanessuwwikinna Gibtseke bogi giddo duuchcha'n raa'mise fuleexxi ookkone boga duuchchcha'n konnete hiyyeemmabaa qico'ni wo'me; iitteeqicik awwaaneessi ookkoneechchi edi ga'ma leelle eg'nebaan; edi'aanna leellabaan. 15Awwaanessuwwikinna ookkone boga duuchcha'n wo'matenaa'n kexxeexxa bogi himmi hiyye; kaadetenaa'ni gateechcho buttii'n lateechcho duuchcha hiddichchuwwa duuchcha ite kutti asse; Gibtseke bogi giddo duuchcha'n haqqichchuwwake'ninna hiddichchuwwake'n mitti shafinna gateemmabaan.#Wal. 9:2-3.
16Feri'ooni Muusenna Aaroonii'i rake ye'iseexxi, «Duuchchi woddika Gootta ha'nooka Magenonna ha'noo balleeseennen. 17Ta'a yoona mittele calla balleessa anxa gattowwaali hitineexxi tennee reyotixxa bala ha'nooki Magen anenaa'ni fuggusaashsha ani'a soodatte» hiyye. 18Muusenna Feri'oon edii'n fuleexxi Duuchchi woddika Gootta soodate. 19Duuchchi woddiki Goottinna eettene diidallo jabaxxa dhidhimiinxe diidallo'n jijiire; iitti diidallonna awwaaneessuwwa gurte iyyemarte Eritiriinxe Abbaayya'n gaarsite; mitti awwaaneessinna Gibtsek bogi giddo duuchcha'n gatebaan. 20Duuchchi Woddik Gootti kinni Feri'oonka qalbe jabeesse; isinna Isira'eelika arda me'o'a wocci assebaan.
Dukkanatixxa Bala
21Ookkoneechchi uduma Duuchchi woddiki Gootti Muuse'e, «Gibtseke boga'ni dimma dukkana kaddaashsha anga atixxa iimi'a diriirsi» hiyye. 22Muusenna anga ifixxa iimi'a diriirse; Gibtseka boga duuchcha sase barra dukkana buqqe.#Far. 105:28; Wal. 16:10. 23Eettene sase barra giddo ayyinna ayyee afa yookaan mittebaa'n mitteba'a marema dande'emmabaan; kaddo malee Isira'eeliki ardi hedha'maki boonchi kinni ifakemman.
24Feri'ooninna Muuse ye'eexxi hiyyee qici, «Me'itineexxi ha'nooka Duuchchi woddika Gootta magenoonfatte; ha'nooxxi oosenna ha'nonni welti me'itowwaal; yaane kinni gedhebi, re'enna lali ha'nook kabanni gatowwaal» hiyye.
25Muusenna hiyyee qici, «Atinna Duuchchi woddike Gootta no'oke Mageni'a tolchinanokanna ciinceesinannoka tolcha no'o'a uutatton. 26Hori no'ok no'onni welt me'a hassissaani; mittikinna gatabaan; konne hore no'oki giddii'ni Duuchchi woddika Gootta no'oke Mageni'a magenoonfachchotee shiqinshanok hedhaan; kaddo malee'e ookko gennebe'no edi darre Duuchchi Woddika Gootta magenoonfattonna shiqinshaank hori hoonte kadeexxa edinsenexxi fowa dandeenabe'non» hiyye.
27Yaane kinni Duuchchi woddiki Gootti Feri'oonixxa qalbe jabeesse; isinna arda wacci assa eeyyebaan. 28Feri'ooninna Muusee «An edii'n ful! Heqqedhi langaxxa ate uudonnoqqe'e, heqqedhi! Alba anka uuddatoxxa barra rertattoxxa ege'n» hiyye.
29Muusenna «Hitetteshshanni kadduun; langaxxa alba atika uudabe'non» hiyye.
Currently Selected:
Fulatika Maxaafa 10: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
