Fulatika Maxaafa 25
25
Taabotinke Galdumi'a Shiqqaaxxa Uwwa
(Fula. 35:4-9)
1Duuchchi Woddik Gootti Muuse hiyyee qic, 2«Isira'eelik ardi ani'a uwwa iyyedagaashsha kuli; ani'a uwwo'a qalbe ke'eeke manji duuchchinaa'n uwwa ani'a aadhi. 3Insa'nenaa'n aaxxattoxxi uwwaari konnechinni butti'a hexxeexxen: worqe, birreti sibljo, sageettot sibljo, 4iimatixxa bifaxxa, baddeessitte, dhiille kirre, eloxxa layino, re'etixxa orda re'etixxe ordaxxa seemma, 5diimoxxe halloka gedhechchiinka goga; asiqoxaka goga#25:5 Asiqoxa, qawwufati asiqoxa hiyyemeek biinchi wodi'i giddike biinchan waaccotika haqichcho 6xassiinxa ejersiinxa zayite; hariirtetixxe zayite'anna fishshaake foolinka hixaana kaddaaxxa qurunfuuduwwa; 7efuudete'ninna qomatixxe kiise'n uggemaak meregid fiixa kinonna wele fiixa kino.
8«Insa'nexxe oddo'n hedhonna'a ani'a hedhanoxxa bakka ijaarowwaal. 9Ani ate'n kulanno qicinni Taabotinka galdumanna isi giddo hedheeka miya duuchcha giisse.
Kakotika Taabota
(Fula. 37:1-9)
10«Qeerrinne lame ciqilenna gamisa, godoba mitte ciqilenna gamisa hojja mitte ciqilenna gamisa kade'eka waaccotike haqichchika taabota giissinowwaal. 11Iso giddonna gadho ca'itte worqenni buqi; isi hana, dowwe isixxe duuchchin darreke kasa'n worqetixxa kifafe giiss; 12Shoole worqetika fannichchuwwa isi'a giissitettexxi lame mitte darre'n lame kinni wele darre'ni'n shoolnxe lekkuwwan welt abidis. 13Waaccotike haqichchixxa murguwwanna giissitettexxi worqetinna buqi. 14Taabotinxe duka'a kaddo'a eettene murguwwanna Taabotinke kasa kasa'n hedheeke fannichchuwwi giddo e'yish. 15Iitti murguwwa ookko Taabotinke fannichchuwwi giddo hexxo malee fula hasissabaan. 16Ookkoneechchi uduma Ani ate'ni uwwannexxa dhuga kula taaboti giddo uggitatton.
17«Qeerrine lame ciqilenna gamisa, godobakanna mitte ciqilenna gamisa kadeeka worqetika cubbo biratika tuphanjo giissi.#Ibr. 9:5. 18Ookkone cubbo biratike tuphanjike kasa kasa'ni hexxaaxxa lame kirubeele, tumenedeexxe woqenni giiss. 19Mitte kiruube mitte kasi hana langaxxa kiruube wele darreke kasi hana uggitettexxi lamiinge kasa'n lamiinxa kiruube cubbo biratike tuphanjinni mitteba abidis. 20Tinni kiruubeeluwwanna keela iimi'a baniyyot cubbo biratika tuphanjo ifike keeluwwinni gollitowwaal; mitti mittinke kallachcha'n hedhiyyotinna lamiing alba ifi ifika cubbo biratike tuphanjiba'a wirri hitowwaal. 21Ookkone cubbo biratika tuphanjo taaboti hana uggi; ani ate'n uwwannoxxa eettene Dhuga kulanna taabot giddo uggi 22Ookkone Dhugaa kulatike taabot hana hexxeexxe lamiinxe kiruubeelixxe oddo'n, cubbo biratike tuphanji hana, ookko ani atinni afemennexxi Isira'eelitotee kadaaka anka ajajuwwa ate'n uwwannon.
Uwwendeexxe Kebboka Beera
(Fula. 37:10-16)
23«Qeerine lame ciqile, godoba mitte ciqile hojja mitte ciqilenna gamisa kadeeka waaccotika beera giiss. 24Isoonna ca'itte worqenni buqqettexxi qarqara isike'ni worqetixxa kifafe giiss. 25Isike qarqar hananna godoba mitte taakko ba'lataaka irga giiss; konne irgike qarqar hananna worqetixxa kifafe giiss.#Lew. 24:5-8. 26Konne beeri'a shoole worqetika fanichchuwwa giissitettexxi, isixxi lekkuwwa iimiken mitte genci assendammaba'inni konne fannichchuwwa welt abidis. 27Beera dukati woddixxi murguwwa giddo sikkendammak fannichchuwwi kifefeti maxxaneeke kaduun. 28Beera dukatee kaddaashsha waaccotixxa murguwwa giissitettexxi worqet buqi. 29Ha'watika tolcha cossaatee kadaaka konne beeri'a worqetixxa feerte qore, mooqquwwa iitanni isika worqetika maqorqooruwwanna isixxa hubbuqqite qoruwwa giiss. 30Duuchchin wodda ani edo hexxaashsha uwwendeexxa so'iinxa kebbo beeri hana uggi.
Xasiinka Offolsanjo
(Fula. 37:17-24)
31«Ca'itte worqeka xassinka ofo'lisanjo giissitettxxi isixxa lekkanna isexxa zange tumendeexxe ca'itte worqexxa giiss; iseka daraaro labbaaxxa buuduwwa, iseka luuphisuwwanna iseka pha'a hiyyeeka daraaruwwa zangete'n abidisse giiss. 32Xassinke ofo'lisanjinke kasa kasa'ninna jaane damuwwa giiss, sase mitte darre'n wele sasenna mitte darre'n giiss. 33Mitte dame'n kichchuwwa daraaronna sase lewizetika daraaro labbaaxxa buuduwwa, langaxxe dame'n kichchuwwa daraaronna sase lawuzetika daraaruwwa labbaaxxa buuduwwa, iittanni ookkone xassinke ofo'lisanjixxe wele jaane damuwwa'n tenneenni assi. 34Ookkone xassinke ofo'lisanjo'n daraaruwwa luuphphisakanna kichcho affeexxi, lewizetika daraaruwwa labbaaxxi shoole buuduwwa hexxowwaal. 35Ookkone xassinke ofo'lisanjo'n hexxe jaane damuwwa'a, mitte dhanko damuwwa hunda mitti luuphphisi, langaxxe dhankoxxe damuwwa hunda langak luuphphiisi, sakkaxxe dhankoxxe damuwwa hundanna sakkak luuphphis hedhowwaal. 36Iikki luuphphisuwwanna iitti damuwwa duuchcha ookkone xassinke ofo'lisanjo'n abidisendeexxe kaddeexxi ca'itte worqexxe kaddowwaal.
37«Xassinke ofo'liisanji'anna torbaane xasuwwa giissitettexxi isi edi darre hexxeexxe bakka'a ifo'a konne xassuwwa iso'ni uggi. 38Isi'anna worqetixxa qarabuwwanna worqetika ba'ichchuwwa giiss. 39Xassinka ofo'lisanjonna isika miya duuchcha giissate 35 kiilo giraama worqe la'oonfate. 40Duuchchinn geechcho ani koobati hana ate'ni leellishensha hujatee ifi xexxe'ati.#Erga. Huj. 7:44; Ibr. 8:5.
Currently Selected:
Fulatika Maxaafa 25: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
