Dadatika Maxaafa 50
50
1Yooseefinna anniinke renshi hana wabbi hiyyeexxi isoo sunqedha'n oodhe. 2Ookkoneechchi uduma Yooseefi anna isike Isira'eelik rensha foole ganabaashsha ci'leeyyete kadeek isik erganjuwwi qorsa itti issaashsha ajaje. 3Ci'leeyyetinna rensha qorsik bassatee#50:3 Rensha bassaGibisteke mannixe aada'ni renshi aja ganebaangi turaashsha assateeten shoole tomme barra adhdhite. Gibtsek manninna torbaane tomme barra duuchcha isi'a oodhe.
4Oodhishshatixxi yanna saxxeechchi uduma Yooseefi Feri'oonika akeekisanjuwwa hiyyee qici: «Ha'nonaa'n elle alfaannole, moyanjoke'n ani'a 5‹Anni anki reyo shiqee wodda Kenaanike boga'n ifi'a qixxesedheke hirreessa'n iso'o moogonna'a anee kakachchiise'en; tennexxee okko mare anna anka mooge higoo? Hiyye laqe'een› hitine iso'n kulle.»#47:29-31.
6Feri'ooninna tenne laqeexxi, «Kakattettashshanni marte anna atika moogi» hiyye.
7Yooseefinna anna ifika moogo'a me'e; Feri'oonik ja'laabuwwi duuchchi moyati minik baallooma lumokik manni, iittanni Gibtseke bogik lumoke baalloomik manni Yooseefixxa duuka me'e. 8Iittanni Yooseefik mini haduwwi, dayyuwwi isikinna weli anni isikik mini haduwwi duuchchi Yooseefinni welti me'e. Geesemi gateemmakiir insa'neexxe shiixxaramma oose, insa'neeke gedhebo, re'enna insa'neke lalo callamman. 9Iittanni fadhadiinxa gaarruwanna fadhado gulufeemak manni isinni welti me'e; isinni welti me'eek mannik haagan lumo qico birasa'ekemman.
10Insa'nenna Yordaanoosi wido Axaadi hiyyendaaxxe aldumeba gennee wodda humbaashshine hiiqqinse oo'ne; Yooseefinna ookko torbaane barra annakee gadde. 11Ookko hedheek Kenaanik manni Axaadixxe aldume'n oo'neexxa oodhishsha uudeexxi, «Tinni Gibtsek manni'a laalafachchotixxe oodhishshan» hiyye. Tennexxee Yordaanoosi wido hedheeke boonchika summa Abeeli Mitsirayiim#50:11: Abeeli Mitsirayiim: Iitta hiyya Ibrititotike laagadinni Gibtseke mannixe oodhishsha hiyyaten hiyyeme.
12Ya'iqoobixxi labbaxxi oosenna insa'neek anni insa'nee ajajemmashsha assite. 13Rensha isika Kenaanike boga'n iyyemarreexxi Maamiree'n boroti darre'n hedheeke Maakifeela hiyyendaaxxe bakka'ni hexxeexxe wolo'o'ni iso'o moonge; wolo'o tinninna Abirihaami Hiititichcho Eefirooninaa'n hireeke fichchi giddo hexxeexxen.#Erga. Huj. 7:16. 14Yooseefinna anna ifika moogechchi uduma dayyuwwa ifkenninna isinni isike annike mooggi'a isinni welti me'emmake manni duuchchinni welti Gibtse'a ille iima hige.
Yooseefi Dayyuwwa Ifike'n Halo Fula'nebaaxxa Kokeesse
15Yooseefiki dayyuwwi anni insa'neek reyee uduma weli'aanni weli, «Balleessinennexxe balleessanaa'n kexxeexxa Yooseefi godoba uggudheexxi halo no'o'n fulo'a maa kandanno?» Hine. 16Tennexxee insa'nee Yooseefibaa erga hineexxi erginee qici, «Anni atik reyeebaa edidarre hiyye ajajemma qici, 17Yoosefi'n hitinaa qici, ‹Dayyuwwi atiki ate'ni hujeexxa cubbonna balleesseexxa balleessa insa'ne'a gattowwaali hiyyi hiyyedheen› hitine iso'ni kulle. Ta'anna no'oo atike annike Mageniinke erganjuwwixxa cubbo no'aa gattowwaal hiyyi.» Erga insa'neexxi iso'n geltee wodda oodhe.
18Ookkoneechchi uduma dayyuwwi isik dage'e isi edo butta wabbi hiyyeexxi, «No'o atike garban» hiyye.
19Yooseefi kinni insa'ne'n hiyyee qici, «Mee sodaatte! Sodaattinoqqe'e; ani Magenokebaan; 20ha'no anee miidhatee'e heddinee assitineemman; Mageni kinni telcho uudina'nee qicishsha heddi mannixxa hedho anjironna'a eloxxee asse. 21Ta'atenna kaddoole mee sodaatte; ha'no'aanna ha'nooxxe oose'a hasissaaxxa duuchcha ha'no'a assannon» hiyya'n kokeesseexxi eloke haaso'inni insa'nee haassosse.
Yooseefixxa Reyo
22Yooseefi ifike annike mini haduwwinni welti Gibtse ture; dhibbanna tomme wogga offo'le. 23Efireemixxe oosexxa oose sase ila qico uude; Minaaseka belto Makiirixxi oosenna ifixxishsha assedhe.
24Ookkoneechchi uduma Yooseefi dayyuwwa ifike'n «Yoona reyannoxxi yanna shiqqe'een; Mageni kinni gargaarsa ifikenni ha'noo uudeexxi konne boginaa'n ha'noo fulchaan; Abirihaami'a, Yisaaqi'aannaa Ya'iqoobi'a uwwo'a kakoti addachchiisemmake boga'n ha'noo aassaan» hiyye. 25Yoosefinna Isira'eelika manna, «Magen gargaarsa ifikenni ha'noo uudan; ookkone wodda miqe anxa konne boganaa'n aaxxine fulle» hiyya'n insa'nee kakachchiise.#Fula. 13:19; Iya. 24:32; Ibr. 11:32. 26Yooseefinna ilemeexxe dhibbanna tomme wogga'ni lummedhe; rennishshi isikinna foole ganabaashsha ookkone bogixxe aadashsha qorsik bassineechchi uduma Gibtse boga'n saaxxine giddo uggine.
Currently Selected:
Dadatika Maxaafa 50: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
