1 oKorotiyawa 1
1
13 Ela mani bwebe hin Obulus, ni ayogwu wo oyikoko ko Okristi Oyesu bwebe kimu ko Owuso ni, kpo oyene kaha ko Osostenes.
2Go oda ko Owuso ni yo Okorenti ni, gebe kawase kpiri ni ayuwogwu ko wase sere ko Owuso ni, ni wa kakanu dudu kpo Okristi Oyesu ni, kpa ananoho ebebenya ni ba geyagye da Adole kaha Oyesu Okristi ni, Adole wa kpaha dudu:
3Owuso Ada ka kpa Adole Oyesu Okristi na dala oneshi kpo omene.
Otunehe ipu ko Okristi
4Nyya shotunehe do Owuso hin ishi kpiri dala ikweyi koneshi nu ni odala ipu ko Okristi Oyesu ni. 5Ikweyi koni ipu ko dudu kpo Okristi odala odu ipu koza kpiri, kela koka kala kpiri kpo ozagyogye kala kpiri. 6Oleho ko Okristi hagye loshu ipu kotu kala 7shini ala ka tela ko zaboneshi oyoye lo, byoni ala ba gbeyi ko bose ka Adole Oyesu Okristi ni. 8Oya dala oshu gokweyi, shini ala ka gbepo lo Eno ka Adole Oyesu Okristi. 9Owuso shu koni ankpotuso, Owuso ni yalogwu wipu kogeyagye kpo Oyi nu Oyesu Okristi Adole ka ni.
Akyikpo Ipu ko Oda ko Owuso
10Bwebe koshu ka Adole ka Oyesu Okristi nyya bala kpiri, ayene hin, shini ala kyogwu kpoza ni ala ka, shini ala ka kikpo lo. Shini ala bipu kema dudu, kpo otu oye kponu kpo ogbogbo oye kponu. 11Ikweyi koni, ase ashishini bwipwoma ko Okloyi ka dami okwokwoshi mo, apwo gbogbo yipu kala nwashika, ayene hin. 12Ozani ngbo ni yoma: Anano kala ba koje gogo gogo. Ashe kamo, <<Nyya gboso Obulus; ashishini mo, nyya gboso Apolos; ashishini mo, nyya gboso Okefas; ashishini mo, nyya gboso Okristi.>>
13Ayo Okristi yi kikpo la? Obulus pini ayo poshi ikweyi kala la? Ayala obatisima kpiye ko Obulus la? 14Nshotunehe do Owuso ni nyya sheshiye kala Obatisima lo, Okrispus kpo Ogayos fufuwa pini nyyuwa la. 15Mani oni Ashishe ya kamo, ayala obatisima ko wino gbosun lo. 16Ko okwokwoshi, nyyi ipwoma ki Istifana; itikpi ko mani, ngye kwe nki yashe obatisima kelo. 17Okristi tumoleho ko yose Obatisima lalo. Otumoleho ko tono koshu neshi la, ke wako tono koziyi kasuse lalo, shini ikwu ko Okristi oshi naka woyeye lo.
Okristi wo Oshu kpo Oziyi ko Owuso
18Ikweyi ni oshu kikwu ko Okristi oshi na woyeye dase ni gebi owe; ebe kaha ni angmaha oke woshu ko Owuso. 19Okpa ko Owuso kamo,
<<Nyya yoziyi ka awinoziyi ya yishi;
kweyi nyya yogyogye kawinogyoza atonu okoka.>>
20Mani oni, oji gbodagye kpa awinoziyi? Kwe oji gbodagye kpino gyokpa ko Owuso? Kwe oji gbodagye kpase ni ogyase kpiri? Owuso sayi mo oziyi kese mani wo yeye la!
21Mani oni Owuso bwebe koziyi nu yo lono dase ko gyo bwebe ko ziyi wa. Abishi koni ke Owuso ngmawase ni kyogwu ni bwebe koshu ki ikyo ni aba tono nu ni, Owuso gbo otu nu ko ngmase ni kyogwu. 22Ase ko Yahuda ba yimu mo ana sayi koza ki igbashi ko gyokwokwoshi kweyi ase ni ke wo Oyahuda lo ni ba tikpo ko ziyi. 23Ebe kaha ke, aba tono ko Okristi mo ayo poshi, oleho ni wepo labi ebe ka Ase ko Yahuda oki wikyo ebe kase ni wase ko Yahuda lo ni; 24ebe kawase ni Owuso ke yuwogwu ni, ka Ase ko Yahuda ka Ase no wase ko Yahuda lo ni, Okristi woshu ko Owuso kpo oziyi ko Owuso. 25Ikweyi koni ikyo ko Owuso ziyi sho oziyi ka asuse, kweyi oza ni le byikpiye shosha ko Owuso loshu shoshu kasuse.
26Ayene hin, ala rela koza ni ala we, ishini Owuso yala ogwu ni. Bwebe ko moma kasuse nwashika kala ziyi lo gbayi kala gboshu kyi nwashika kala agyipwoma kala lo. 27Owuso ke shawoza ni ase mamo oshoshi lo ese mani ikweyi koni ona ta awinoziyi iweyi, Owuso ikeyi koni asha awoza ni loshu lo ni ese mani shini ona ta awinoshu iweyi. 28Owuso sha awoza ni ese muwa gyiyi lo ni, awoza ni amuwa wojije lo kpiri-kpiri ni, kweyi yoko kpawa shini awoza ni ese muwa woza ni naka wojije lo, 29shini ashishe naka gwabotu obutu ko Owuso lo. 30Owuso ke yala bipu ko dudu ko kristi Oyesu la, kweyi Owuso yo Okristi shini ona woziyi ka. Bwebe nu aha gbo neshi kpo Owuso; aha wase neshi ko Owuso kpo ngmongma kaha shozalabi.
31Mani oni, byoni okpa ko Owuso ka ni, <<Owoni oya yimu ko gwabotu, gwabotu ipu koza ni Adole ya.>>
Currently Selected:
1 oKorotiyawa 1: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA