1 oKorotiyawa 2
2
Oleho ikweyi ko Okristi ni ayi Poshi ni
1Ayene hin, ishini nwebe kala, ko tono kela ko Owuso ni ayigwa dami, nkela nyakwu nyakwu kwe sayi koza gyogye hin lalo. 2Ikweyi koni ishini nyyo kpala ni, nkyogwu otu ko nwanyi kpo ojoji, oza ni nyya nwanyi anu lo ni wo Oyesu Okristi, otata nu wo nayo poshi ni. 3Mani oni ishini nwwebe kala ni, nkwiye hin shiya, kweyi ya sode kpo oshi yoya, 4Ishini nfala oza kweyi tono dala ni, ntela ko kela ni ase ni gyo Owuso lo ya mamo aziyi shini ana kyogwu mo oleho hin wokwokwoshi, Omaku ko Owuso ke sayi mo owo kwokwoshi bwebe ko yun yoza kigbashi ni loshu. 5Shini ala ka totu so oziyi kasuse lo, ke totu so oshu ko Owuso.
Oziyi ko Owuso
6Nke tono ko ziyi dawase ni gye ipu ko omaku. Oke wo oziyi kese mani lalo kwe oshu ni ya kpogwu kese mani, awoshu oni ba kpogwu kelo. 7Oziyi ni nyya tono mani woziyi ko Owuso ni teba ni la, oke teba dasuse la, ni okwobo nu shu ikweyi kigyashi ka ome oyese. 8Ashishe ipu kawoteyi kese mani gyoziyi mani lo. Owoni abi gye la, abi ba ya Adole kigyashi kpiri ni yi poshi lo. 9Kole moji, Byoni okpa ke kani,
<<Ozani iyi oyoye kwe akpaha oyoye po wa lo ni,
oza ni ashishe ka wa lo yagbo dagye,
owoza kpiri ni Owuso gbo dawase ni yimu nu ni.>>
10Owuso ke gwanu daha bwebe ko Omaku nu. Omaku ya tikpo koza kpiri, kawoza ni teba ikweyi ko Owuso. 11Ikweyi koni, Omaku ka ni yipu ka pini gyoza kpiri ikweyi kananoho; mamani, Omaku ko Owuso fufunu pini gyojoji ikweyi ko Owuso la. 12Aha zo Omaku kese mani lalo; aha ke nyo Omaku ni bwebe ko Owuso ni la, shini ahan gyoza kpiri ni Owuso yi daha yeye ni. 13Ni ole mani, Aha ba kela ni oziyi ka asuse ka ni lalo, aha ke ba koza ni Omaku ko Owuso faha ni la, aba kokwokwoshi ko Omaku dawase ni gbo Omaku ni. 14Ase ni gbo Omaku lo oya zoshi ni wa bwebe ko Omaku ko Owuso ni lo. Ko kwokwoshi ase mani ya gyikweyi wa lo, ikweyi koni ebe nu awela yeye la, koni ase ni yipu ko Omaku pini ya gyikweyi nu la.
15Ase ni ke gbo Omaku ko Owuso, kole moji, oya gege ko kepwo neshi kojoji, ashishe ke ya gege ya kepwo nu lo. 16Byoni okpa ko Owuso kamo
<<Anoho gyotu ka Adole?
Anoho gye ko danu ela?>> aha, ke, gbotu ko Okristi.
Currently Selected:
1 oKorotiyawa 2: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA