oGalatiyawa 3
3
Ono Kwe Otuse
1Awikyo ko Ogalatiya! Anoho yalotu gbo? Iyiyi kala kyaa asayi ko Oyesu Okristi ni ayo poshi ni. 2Na daloka koje oye kpokponu: ala pyo Omaku ko Owuso ikweyi koni ala ba ko Ono ni la, kwe ala pye bwebe ko pwoshu neshi kweyi kyogwu kpanu? 3Oji yala wikyo mani! Ala kwotu kpo Omaku ko Owuso; anani ala ba yimu ko ngmeyi kpikpiye? 4Ala mowe kotata mani yeye kin la? Oke wo yeye lalo! 5Ala ba ma mo Owuso dala Omaku nu kweyi ki yawoza kigbashi ipu kala koni ala ba ko Ono ni la, kwe koni ala pwoshu neshi kweyi kyogwu kpanu ni?
6Ala rela ki Ibirayi; byoni Okpa ka ni, <<Okyogwu kpo Owuso, kweyi bwebe ko kyogwu nu Owuso zo waseneshi.>> 7Nyya yimu shala gye mawase ni kyogwu ni pini wayi ki Ibirayi kokwokwoshi la. 8Okpa kamo Owuso ya yawase ni wase ko Oyahuda lo ni ba wase neshi ebe nu bwebe kotuse wa. Mani oni Okpa tono ko Oshu Neshi mani di Ibirayi mo: <<Owuso ya dasuse kpiri aboneshi bwebe wo.>> 9Ibirayi kyogwu kweyi opya aboneshi; mani oni kpiri kase ni kyogwu aba pya aboneshi mamani. 10Kpiri kase ni ba totuso Ono ko kanu akwobonu yuwokwunu. Koni Okpa kamo, <<Kpiri kase ni geyagye dojoji ni yipu ko Ono ni ishi kpiri lo Owuso yokwunu!>> 11Ni olemani oni oyo kyaa mashishe ya gege ya wase neshi ebe ko Owuso bwebe ko Ono lo, ikweyi koni Okpa kamo, <<Ase neshi ya gbolayi bwebe kotuse la.>> 12Ono ke gbabo kpotuse lo; abishi koni, byoni Okpa ka ni, <<Kpiri kase ni yoza kpiri no Ono ya yimu ni oya yiyi.>> 13Okristi ke ngmaha shokwunu yoya no Ono biwa ni bwebe ko wase ni ayokwunu ni abishi kaha: Okpa kamo, <<Kpiri kase ni ayo poshi owase ni ayokwunu ni la.>> 14Okristi ya mani shini ana da awase ni wase ko Oyahuda lo ni aboneshi no Owuso shokoyi di Ibirayi ni bwebe ko Okristi Oyesu, shini ahan nyo Omaku ko Owuso ni oshokoyi ni bwebe kotuse.
Ono Kpo Okoyi
15Ayene hin, nyya shaloje ni ya gbodagye kurutu ni: ishini ase epa kyogwu ikweyi koza kweyi tabo okoyi, ashishe ya yi kyigbo lo ake ba foje manu lo. 16Anani, Owuso shokoyi di Ibirayi kpoyi kipwoma nu. Okpa kamo odi Ibirayi kpa ayi kipwoma nu la lo, obi lemani obi ya wase nwashika, oke kamo oyi ki ipwoma nu la, ase oye kpokponu, ni wo Okristi ni. 17Ozani nyya yimu shini ala gye ni Owuso shokoyi di Ibirayi kweyi kyogwu ko yo na gbodagye. Ono mani, nayi kwagye itikpi kishayi ogbogbo ene saweta ni, ya gege ya yokoyi ko Owuso kyigbo lo, oke ya yokoyi ko Owuso bya lo. 18Owoni eshi ko Owuso bi ya bwebe ko Ono la, obi ya bwebe kokoyi nu kelo. Oke bwebe kokoyi pini Owuso zeshi oni di Ibirayi la. 19Owoni olemani, oko ko Ono woji? Abyono wa manu shini an gyoza ni wo ozalabi ni la, shana yoko kpanu gbishini Oyi kipwoma ki Ibirayi oni na wa, anu na shokoyi danu ni. Ono mani ke bwabo ka ayoleho ko Owuso la, kpase ni ya gobepa kase epa ni. 20Ino gobepa ke ya gege ya gobepa kase oye kpokponu lo; Owuso ke woye la.
Oko ko Ono
21Omani ya ka daha mo Ono wo omonyekwotu ko okoyi ko Owuso la? Aayi, olemani lalo! Owoni adasuse ono ni ya dase olayi ni, ananoho bi ya wase neshi ebe ko Owuso bwebe ko geyagye do Ono. 22Okpa kamo ese kpiri bo oruduru ko ozalabi; mani oni eshi na shokoyi bwebe kotuse ipu ko Oyesu Okristi ni, wa kawase ni kyogwu kpo Oyesu ni.
23Ome ishi kotuse na wa, ono yaha yi gbo byase ni ayuwa shetu ni gbishini aba sayi kotuse ni yawa ni. 24Mani oni aha babo ko Ono gbishini Okristi wa, shini ana yaha wase neshi ebe ko Owuso bwebe kotuse. 25Nabani nishi kotuse kwobonu wa ni, aha babo ko Ono kelo.
26Kpiri kala wayi ko Owuso dudu kpo Okristi Oyesu, bwebe kotuse. 27Ayala obatisma dudu kpo Okristi, anani ala abiyikala shoshiye ko olayi ko Okristi. 28Ni olemani oni kase ko Oyahuda kase ni wase ko Oyahuda lo ni, koshe kase ni yabo kiyinu, kanya kango; kpiri kala woye kponu ipu kema kpo Okristi Oyesu. 29Owoni owa ko Okristi, owo oyi kipwoma ki Ibirayi oma, kweyi owino rogwu koza ni Owuso shokoyi ni.
Currently Selected:
oGalatiyawa 3: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA