oGalatiyawa 4
4
1Ozani nyya kani yoma, owoni ino rogwu woyi leke, ogogo kpo oshe lo, koni owine kojoji kpiri ni. 2Oya yabo kawase ni ba byo ni gishi ni adanu shu ni. 3Mamani, ishini awayi lekeke ni, awo oshe kawomaku ni ba kpogwu kese mani. 4Ni ishi ke gye ni, Owuso to Oyi nu oleho. Omoma konya, ni amo ipu ko Ono ni, 5shini na ngmase ni babo ko Ono ni, shini ahan wayi ko Owuso.
6Ko sayi mala wayi, Owuso toleho kpo Omaku ko Oyi nu wipu ko otu kala, ya yogwu mo <<Ada, Ada hin.>> 7Mani oni owo oshe kelo, owoyi la. Koni owoyi nu ni, Owuso ya dawojoji ni ogbo ko dayi nu ni.
Obulus Dotose kase ko Ogalatiya
8Nekye-nekye ala gyo Owuso lo, oni yala ba gbeshe dawoza ni wowuso lo ni. 9Anani ke ala gyo Owuso, kwe na mo anani Owuso gyala, ojiya nala ba yimu ko kwikye gipu kodu kese mani ni woza kiyinyinyi kweyi gboshu kojije lo ni? Ala ba yimu ko wo oshe ipu nu kwikikyeni? 10Ala ba ko ono kaweno, kpo awoya, kpa awishi, kpa awishayi! 11Ozani ala baya mani ya tumoshi! Oko ni nyya kpala kpiri ni woyeye ona? 12Nyya bala ayene ala lema byami, koni nlema byala la. Ala yotu hin bya lo. 13Ala gye mo ere ni gboni, pini gwowe ko oshu neshi kikyikyo dala la. 14Koni ere hin malama ni, ala tela hin lo, ala byun neneshi. Ala zun byo oyoleho ko Owuso ni bwi iso, byun wo Okristi Oyesu abiyinu oni. 15Ishi oni ala shotunehe! Anani oji to otunehe kala? Ami abiyun gye kamo owoni ala bi ba gege la, ala biba yikpiyi kala ngma dami! 16Anani nwwo omonyekwotu kala ikweyi ko kwokwoshi ni nka dala ni ona?
17Awani ba takirikwu ko yala otu kwu, otu wa ke shoshi lo. Ozani aba yimu ni wako ngmala shipu kaha, shini ala yotu kala dawa byoni ayotu wa dala ni. 18Oshoshi ko yotu kala dawa, owoni owa koneshi, omani wokwokwoshi ishi kpiri, wishi ni nyyo kpala ni kin lalo. 19Ayi hin moshi! Anani otu ki ya dumose byonya ni kwagye koma ni, nyya dose mamani dala gbishini aba mo Okristi ipu kala. 20Abi mun yo kpala pi yoma, oko hin bi ya pya, ikweyi koni nyya byotu ikweyi kala kotata ni!
Ohaga kpo Osera
21Na dala oka, ala ni ba yimu ko ko Ono ni. Ala gyoza ni ono kani lo? 22Ayitota mo Ibirayi mayi epa, oye bwebe koshe nu, oye bwebe konya nu. 23Oyi koshe amo byoni aba moyi ni kin la, oyi konya nu ke amo bwebe kokoyi ko Owuso la. 24Oza mani ya sayi koje: anya epa mani hagye ikweyi ko okoyi epa. Ase ni mayi nu ipu koshe ni iyenu wo Haga, anu pini wokoyi ni ashe Efu ko Osinayi ni. 25Ohaga ni we Efu ko Osinayi ni yo okpagye ka Arabiya ni, anu pini wo Ojerusele kanani la, kanu kase nu kpiri bipu ko gbeshe. 26Ojerusele ni yiso ni ke wo oshe la lo, anu pini wene kaha la. 27Koni ayitota mo:
<<Shotunehe, awo odoma, awo ni moyi lo ni!
Sheha kotunehe, awo ni gyo dose koma lo ni!
Ikweyi koni onya ni oba shobita ni ya mayi nwashika
shase ni yo kpo obunu ni.>>
28Anani ayene hin, aha wayi ko Owuso bwebe kokoyi nu, byoni Ishaku we ni. 29Ishi oni oyi ni womoma kikpiye ni ya doyi ni womoma ko Omaku ko Owuso ni egye; Kwikyikyeni olemani. 30Ake yi tota ipu ko Okpa ko Owuso mo, <<Noshe mani kpo oyinu ena, koni oyi koshe mani ya rogwu kpo oyi konya kotata mani lo.>> 31Ni olemani oni ayene hin, aha wayi konya ni wo oshe ni la lo, ake wayi konya kotata la.
Currently Selected:
oGalatiyawa 4: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA