oRoma 13
13
Geyagye da Wayikoko ko Oyesu.
1Ananoho na geyagye dawoteyi ni ba kpogwu kase ni, koni igabo kpiri woyoya ko Owuso la, kweyi awase ni boka ni, Owuso pini shuwa la. 2Ni, olemani oni, ase ni tanu ko zela kayikoko ko Oyesu oya tanu koza ni Owuso shu ni pi yoma, mani oni, awase ni ya mani ba byepwo wikweyi wa pi yoma. 3Koni awase ni ba yo neshi ba yoshi kayikoko ko Oyesu lo, sawase niba yobibi ni ke ba yoshi. Oya yimu ko kabo kposhi kase ni wigabo kokpagye ni? Yoza ni shoshi ni, kweyi aba koneshi wo. 4Koni owoyole ko Owuso ni yoko ko yuwo neshi. Owoni oyobibi, oya yoshi nu, ikweyi koni ogboshu ko gbogo agye. Owoyole ko Owuso, niya byanya ko Owuso wa dase ni ba yozalabi ni. 5Mani oni, owotiri ko geyagye dayikoko ko Oyesu, owotiri ko gbogo agye lalo, oke wa ko shawo oneshi kpo olabi. 6Oza ni ya ni ala ba zegba ni oma, koni awigabo wayole ko Owuso la, ko yoko wa gyogye. 7Sananoho ore koza ni okpawo ni: sore kegba kiyo kpiyo wo, kweyi mananoho gyiyi.
Oko ko Ya Diyikala
8Ka shore kojije bita ikweyi wo lo, na wore ko yimu kiyikala fufunu. Ase ya yimu ko oyinanu oya geyagye dono pi yoma. 9Ono pi yoma, <<Ana ka beba lo,>> kpo ono shishini ni yaba ni, woye kponu kpo omani la: <<Yimu koyene wo byoni oya yimu kiyo ni.>> 10Owoni ogbimu kase, oya yuwofo lo, oke ya yuwo bibi lo, ko yimu ke wo geyagye dono la.
11Owotiri koyo mani, Wogyogye konabani. Ishi yawa koni aya shiyi ola wa, koni ongmawa yo pye shishi ni, agbo otata ni. 12Otu shishini gbayayi ko kweyi; ebe ya nya wa. Ni, olemani ana yoko kebe dibu tokoka shini ana shoshiye kebe yoyu. 13Ahan byiyikaha neshi, byawase ni boyoyu keno ni, wo owu yoya kpinyi gwogwa lalo, wa keba boba lalo kpa ari tututu, wa kotu byobya kpo anya lalo. 14Mani oni, ziyo koko ka Adole Oyesu Okristi, ka yela kawoza ni wimu kikpiye ni lo na gbuwa, kweyi anaka gbimu koza kese yeye mani lo.
Currently Selected:
oRoma 13: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA
