oRoma 14
14
Ka Kwase Ashini Epwo lo
1kyogwu kpawase ni otuse wa loshu lo ni, wa koni aya kepwo ikweyi kela ni ashoko ni lalo. 2Otuse kashe kyogwu danu ko hoza kpiri, ashe ke, otuse nu loshu lo, oya ho epwu kin la 3Ase ni ya hoza kpiri ni naka tase ni yaha lo ni nye lo, ase ni ke ya hoza kpiri lo naka kwase ni yahoza kpiri ni epwo lo, ikweyi koni Owuso kyogwu kpanu. 4Owanoho ko kepwo ikweyi koshe kashe? Adole nu pini gboshu ko yo hagye kwo ona gbo la. Oke ya hagye, Ikweyi koni Adole agege koyo hagye.
5Ashe oye meno oye wosere sheno oye hoha; Ashe oye meno nye woye kponu. Ananoho na kyogwu ipu kotu nu. 6Ase ni meno oye shoshi, yamani ko da Adole abokpa. Ase ni hebe, naha da Adole, koni oshotunehe do Owuso ni, mamani, ase ni tanu yamani da Adole kweyi shotunehe do Owuso. 7Koni ashishe ka yabo kiyinu lalo, aha ke gekwu diyika fufu ka la lo. 8Owoni agbo layi, agbo layi do Adole; kwe owoni agekwu, agekwu do Adole ni olemani, owoni agekwu kwe agbo olayi, awa ka Adole la.
9Ikweyi kela mani, Okristi gekwu kweyi ki gbo layi shini na wa Adole kawase ni gekwu kpawo gbo olayi. 10Ala ke, Ojiya ni ala ba kwayene kala epwo? Kwe ala ni ba hojoji ni, ojiya ni ala ba mawo gboso shishini wojije lo? Kpiri kaha ba wa hagye obutu ko Owuso shini ona kwahepwo. 11Ikweyi ko ni okpa ko Owuso kamo,
<<Adole kamo, byoni nyyiyi kwokwoshi ni;
kpiri kokinafu ba kwagye obutu hin;
kpiri kigbenu ba kamo nwwo Owuso.>>
12Mani oni ananoho ya koza ni oya ni do Owuso.
Kaya Ashe Nagbo Lo
13Mani oni, ala ka kwiyikala epwo lo. Abishi koni ala takirikwu shini ala ka wikyikpo ko shikawu kwe oza ni ya yase shishini kwikye itikpi ni lo. 14Byase oye ni yo dudu kya Adole Oyesu ni, Omanu gye kwokwoshi mo, ona oyoye wosere abi yimu lo. Owoni ashe zoje winyi, ebe nu owinyi. 15Owoni oyotu kashe bya ikweyi koza ni oha ni, oke ya shiya nu imu kelo. Ka yoyeneho ni Okristi gekwu ikweyi nu ni yishi ikweyi koza ni oha nilo. 16Ka shibita anako bibi ikweyi koza ni oze wo neshi nilo. 17Koni obula ko Owuso, wako roza kpinyi gwogwa lalo, oke wo gyogye, oyagye neshi, kpotu nehe ipu ko omaku sere. 18Kpiri kase ni gboso Okristi owe mani, Owuso ya shotunehe kpa nu kweyi ase ba kyogwu kpa nu.
19Ni olemani, ahan takirikwu koyoza ni ya byoyagye neshi wani kpo otabo ko diyika oshu. 20Ahan ka yoko ko Owuso yishi ela kozarore lo. Kpiri kozarore shoshi ko rore, oke shoshi ko hoza ni ya wowe kigbo kashe ni lo. 21Oya shoshi oka hebe lo kwe gwinyi lo kwe ko yoje ni ya yo oyene wo agboni.
22Mani oni, kpiri koza ni oyotuso nawo obepa wo kpo Owuso. Otunehe wa kase ni ya yiyinu ishi lo ikweyi koza ni okyogwu kpanu ni! 23Ase ni ke kyogwu lo, oyishi owoni ohoza, koni ozahoha nu wa kotuse lalo; kpo kpiri koza ni bwo otuse lalo wozalabi.
Currently Selected:
oRoma 14: ALA
Highlight
Copy
Compare
Share
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA
