Kəla rāā Ngámbang kəla gə̄ 3

De kə́ nge nja lígə̄rī ənge rɔ̄ ngáā

1Ndɔ̄ kógə̄ḿ tə́ Piyer nin̄ kə Ja̰a̰ a aw̄n̄ kə̄ ndɔ̄yɔ̄ɔ́ kə mbang kə́ mətá kə́ loo sɔlí kem *kújə yā Kɔ́ɔ̄ɓē tə́. 2Anī de gə̄ reēn̄ kə de kə́ nge nja lígə̄rī kógə̄ḿ kə́ teēń kem kó̰o̰n tə́, əndānən̄ ta róbə́ kə́ yā kudəń kə̄ kem *kújə yā Kɔ́ɔ̄ɓē tə́ ń a ɓārə́n̄ na i kə́ to ro̰ ní tə́. A əndānən̄ tū tə́ i kə dɔ ndɔ̄ gə̄ kadə̄ gəde yá̰a̰ jī de gə̄ ń a udən̄ kə̄ kem *kújə yā Kɔ́ɔ̄ɓē tə́ ní. 3Dan ń ni-a̰a̰ Piyer nin̄ kə Ja̰a̰ a udən̄ kə̄ kújú anī gədedə́ yá̰a̰. 4Anī Piyer nin̄ kə Ja̰a̰ əndān̄ kumdə́ dɔn tə́, ba Piyer ədan na:

Á̰á̰jí laā! 5Deē ní a̰a̰də́ sew sew tɔdɔ̄ ni-əndā kemən dɔ kənge yá̰á̰ kógə̄ḿ jīdə́ tə́. 6Loo ń noō tə́ Piyer ədan na:

M-ə́nge gində̄ arjā̰a̰ aĺ ō, lɔ́r aĺ ō, banī yá̰á̰ ń m-ə́ngé ní ādə̄ m-ādī: Ḭ́ḭ dɔɔ́ ī-njə̄rā kə rī Jeju *Kərist kə́ *Najaret! 7Ni-əhɔ ta jī ko̰n ba unən dɔɔ́, anī kə̄ ta jī tə́ beē njan gə̄ ō, kúkə̄lú njan gə̄ ō ngangə̄n̄. 8Deē ní ḭḭ bal gidə kógə̄ḿ anī ra dɔɔ́, ba əla gír a njə̄rā. Ni udə sedə́ kem *kújə yā Kɔ́ɔ̄ɓē tə́, a njə̄rā ō, a tḭ́ḭ̄ bal ō, a tɔ̄ȳ Nə́ɓā ō. 9De gə̄ malang a̰a̰nən̄ loo njə̄rā tə́ ō, loo tɔ̄ȳ Nə́ɓā tə́ ō. 10Dan ń gerə̄n̄ kadə̄ i deē ń ndi ta róbə́ *kújə yā Kɔ́ɔ̄ɓē kə́ to ro̰ tə́ a gəde yá̰á̰ ní anī, ɓōlə́n̄ malang ō, ran̄ dɔ jīdə́ kógə̄ḿ kóńg ō, tām̄ yā yá̰á̰ ń rāān ní tə́.

Najə̄ ń Piyer ɔr̄ kem kújə yā Kɔ́ɔ̄ɓē tə́ ní

11Deē ní əya̰ gō Piyer nin̄ kə Ja̰a̰ alé. Anī de gə̄ ɓə̄ngān̄ naā ɓuk kə ngɔ̄dɔ̄ɔ́ ta kaw̄ kə̄ rɔ̄də́ tə́ gír dabə yā Salomo̰ kə́ rāā kə mbalá tə́. 12Dan ń Piyer a̰ā̰ beé ní a əda de gə̄ na:

*Israel gə̄, kum nəkɔ́ ń yá̰á̰ ń toō ɔrəń kumsí ngá̰ý ní na i rí? Kum ka̰a̰ ń á̰a̰ījí tītə̄ kə́ i jḭ̄ n jə-rāā deē ń toō adə̄ njə̄rā kə ta kūl̄ tɔ́gə yājí jḭḭ kɔ́ gɔ̄ɔ́, aláa kə ta kūl̄ rāā yá̰a̰ kə gō ń Nə́ɓā yājí ndigə ní na i rí? 13Nə́ɓā yā Abəraham ō Isaak ō Jakob ō ń i Nə́ɓā yā kaají gə̄ ní, ɔsə gɔn Jeju nge kəla yān ń sḭḭ̄ ə́laniī jī de gə̄ tə́ ō, ī-mbātə́niī ta kum Pilatə tə́ dan ń Pilatə gḛy kəya̰n dɔɔ́ ní ō. 14Sḭḭ̄ ī-mbātíī de kə́ *táĺ ō, kə́ súmūú ō, ba ī-dəjeī Pilatə kadə̄ əya̰ de kə́ nge tɔ̄l̄ deē tá dɔɔ́ adə̄sí. 15Ngār kə́ nge rāā kadə̄ deē ndi kə kumneé ń sḭḭ̄ ī-tɔ̄l̄niī ní, Nə́ɓā ndólə̄n dan de kə́ koy gə̄ tə́, adə̄ jḭḭ i de kə́ kum tə́ gə̄. 16I tām̄ taā ń jə-taā kem Jeju ní n rīn adə̄ deē ń á̰a̰niī ō, ī-ger̄niī ō toó tɔ́gə́ ní. I taā ń jə-taā kem Jeju ní n rāā adə̄ rɔ̄n ngan̄g á á̰a̰ī kə kumsí toō.

17Ba ngɔlaā ní ngákó̰ó̰ḿ gə̄, m̄-ger̄ kadə̄ i gō ger̄ aĺ tə́ n sḭḭ̄ gə̄gē, ngār yāsí gə̄ gə̄gē ī-rāāīneé yá̰á̰ ń toō ní. 18Nə́ɓā əda kété kə ta kūl̄ *ngé koō ta gə̄ malang na *Kərist yān na a a̰a̰ tápə̄. I yá̰á̰ ń toō n ni-rāā adə̄ reē udə gírí ní. 19I beé ní ī-tūrī háĺsí ō, ī-tūrī rɔ̄sí kə̄ rɔ̄ Nə́ɓā tə́ ō, ādə̄ ni-ɔr̄ yá̰á̰ kə́ majaĺ gə̄ ń ī-rāāī ní kɔ̄ɔ́. 20Loo ń noō tə́ Kɔ́ɔ̄ɓē a rāā kadə̄ ndɔ̄ kə́ sɔl̄ lɔm gə̄ reē ugə̄n̄ ō, a əla kə *Kərist ń ni-gə̄rān kété tām̄ yāsí tə́ á i Jeju ní yā kadə̄sí ō. 21Kə́ ngɔr ń toō tə́ ɓáa i gáŕ kadə̄ Jeju Kərist a ndi i dɔ rā̰ tə́, bátə́ kadə̄ ndɔ̄ ń yá̰a̰ malang a téləń kə́ kijə ní reē ugə̄ń tītə̄ ń Nə́ɓā ədań kété jóo kə ta kūl̄ *ngé koō ta yān kə́ *táĺ gə̄ ní. 22Tɔdɔ̄ Moijə əda kété na:

Kɔ́ɔ̄ɓē Nə́ɓā yāsí a əla kə *nge koō ta kógə̄ḿ kə́ tītə̄ḿ mā Moijə beé yā kadə̄sí.

*Nge koō ta ní i deē kógə̄ḿ kə́ dan gír deē yāsí gə̄ tə́.

Ā ōōī yá̰a̰ malang ń a ədasí ní.

23Deē ń a oō najə̄ yā *nge koō ta ngeé ń toō aĺ ní, a ɔr̄nən̄ kɔ̄ɔ́ dan gír de gə̄ yā Nə́ɓā tə́ yā tɔ̄lən. 24Ngé koō ta gə̄ ń reēn̄ gō tə́ á ḭḭ dɔ Samuel tə́ nin̄ kə ngé gə̄ ń utə̄n̄ gōn tə́ ní, nin̄ malang ədan̄ najə̄ yā ndɔ̄ gə̄ ń jə-ndiī tū tə́ toō kété ō. 25Míndə́ Nə́ɓā ń ənī kə ta kūl̄ *ngé koō ta gə̄ ní, i tām̄ yāsí sḭḭ̄ tə́ ō, *madə̄ naā ń ni-əhɔ kə kaasí gēé ní, i tām̄ yāsí sḭḭ̄ tə́ ō. Tɔdɔ̄ dan ń əhɔ madə̄ naā kə Abəraham ní ədan na:

M-ā m̄-tɔ́r̄ taḿ dɔ kojə gə̄ malang kə́ dɔ nang tə́ tə́ i kə ta kūl̄ ngán kaaí gēé. 26Adə̄ Nə́ɓā teē kə nge kəla yānneé i tām̄ yāsí sḭḭ̄ tə́ ta kəga dɔ. Ni əlan i yā kadə̄ rāā majə sesí ō, tūr̄sí kógə̄ḿ kógə̄ḿ kɔ̄ɔ́ ta yá̰a̰ rāāsí kə́ majaĺ gə̄ tə́ ō.

Currently Selected:

Kəla rāā Ngámbang kəla gə̄ 3: BS

Highlight

Copy