Kəla rāā Ngámbang kəla gə̄ 4

Aw̄n̄ kə Piyer ō Ja̰a̰ ō no Ngé Sarya gə̄ tə́

1Piyer nin̄ kə Ja̰a̰ ra a ɔrə̄n̄ najə̄ kə ngán *Israel gēé kə̄ tadə́ tə́ ɓáý anī, *ngé tun̄ yá̰a̰ gə̄ ō, ngol ngé ngɔ̄m̄ *kújə yā Kɔ́ɔ̄ɓē ō, *Sadusiyḛ gə̄ ō, reē ugə̄n̄. 2Kɔjə ń ngámbang kəla kə́ jōó gə̄ ń toō ra a ɔjən̄ de gə̄ yá̰a̰ ō, ra a ədan̄ de gə̄ na Jeju ń oy ní na ndól̄ kɔ̄ɔ́ ō ní tōr̄də́ ngá̰ý. Tām̄ ré nin̄-ədan̄ beé anī kumən na de gə̄ ń oyn̄ ní na a ndólə̄n̄ rɔ̄kum. 3Nin̄-əhɔ ɓōkə́n̄də́ dəngáyá adə̄ ton̄ noó bátə́ loo tīī, tɔdɔ̄ loo tíbə kɔ̄ɔ́. 4Dan de gə̄ ń oōn̄ najə̄ kɔr̄ Piyer tə́ ní, ngá̰ý gə̄ taān̄ kem najə̄ ní. De gə̄ ń taān̄ kem ní kutədə́ asə dūbú mí ń noō.

5Teē kə ndɔ̄ kə́ noō anī ngār gə̄ ō, *kum kɔɔ̄ gə̄ ō, ngé ndóō de gə̄ ndū najə̄ gə̄ ō yā *Jipə gə̄, kánə̄n̄ naā *Jerusalem. 6Ngol *ngé tun̄ yá̰a̰ gə̄ ń rīn na i An ní ō, Kaipə ō, Ja̰a̰ ō, Alekjandər ō, de gə̄ malang kə́ gír kojə yā ngol *ngé tun̄ yá̰a̰ gə̄ tə́ ō, nin̄ i noó malang. 7Adə̄ reēn̄ kə Piyer ō Ja̰a̰ ō nodə́ tə́. Nin̄-dəjen̄də́ na ké rāān̄ yá̰á̰ ní i kə tɔ́gə yā náāá, aké i kə rī náāá wa. 8Loo ń noō tə́ Piyer ń *Ndíĺ kə́ Táĺ rosə kemən ní ədadə́ na:

9Ngār gə̄ yā ngán *Israel gə̄ ō, *kum kɔɔ̄ gə̄ ō, ɓōólaā dəjen̄jí najə̄ kə tɔ́gɔ́ tām̄ majə kə́ jə-rāā kə de kə́ nge nja nujuú tə́, kadə̄ kə j-ɔjə gíŕ yá̰á̰ ń rāā yá̰á̰ á nja deē ní ndájəń ní. 10I beé ní majə kadə̄ sḭḭ̄ malang ī-gerī ō, majə kadə̄ ngán Israel gə̄ malang gerə̄n̄ ō, kadə̄ Jeju *Kərist kə́ *Najaret ń ə́ndaniī kə máyá̰ tū kāgə̄ kə́ dēsə́ tə́ ní, ni ń oy tá Nə́ɓā ndólə̄n dan de kə́ koy gə̄ tə́ ní, i kə ta kūl̄ rīneé n nja de kə́ nge lígə̄rī ń ra nosí tə́ toō ndájəń ní. 11Jeju i deē ń ndangən̄ najə̄ ń toō dɔn tə́ kem makətūbūú ní, ndangən̄ na:

Mbal̄ ń sḭḭ̄ ngé kəndā kújə gə̄ ī-mbātíī kɔ̄ɔ́ ní,

tél mbal̄ kə́ majə kə́ ngəra kújə́ tə́.

12Loo kə́ rang kə́ kadə̄ deē ənge kajə tū tə́ gətóo, deē a ajə i kə ta kūlən ni ngóy. Tɔdɔ̄ rī kə́ rang kə́ adə̄n̄ de gə̄ dɔ nang tə́ laā kadə̄ j-ajiī kə ta kūlənneé ní gətóo.

13Dan ń ngé sarya gə̄ a̰a̰n̄ kadə̄ Piyer nin̄ kə Ja̰a̰ ənīn̄ kemdə́ ɔrə̄n̄neé najə̄ kanjə̄ ɓōĺ ō, nin̄-gerə̄n̄ kadə̄ i de kə́ hɔlyɔ karī gə̄ ō, i de kə́ ger̄ yá̰a̰ aĺ gə̄ ō anī, ɔr̄ kumdə́ ngá̰ý. Gerə̄n̄ kadə̄ i de gə̄ kə́ njə̄rān̄ kə Jejuú kété. 14A̰a̰n̄ de kə́ nge nja nujə ń njan ndájə̄ ní ra kadədə́ tə́ kə njan kə́ dɔɔ́ anī, gerə̄n̄ najə̄ kə́ yā tél kədadə́ alé. 15Loo ń noō tə́ ədan̄ kadə̄ teēn̄ kə Piyer ō Ja̰a̰ ō kɔ̄ɔ́ loo sarya tə́, ba nin̄ kɔ́ gə̄ tá tél a nējə̄n̄ naā najə̄ dɔ dáńdə́ tə́. 16Ədan̄ naā na:

J-a jə-rāāī i ba̰ý kə de gə̄ ń toō? De kə́ *Jerusalem gə̄ malang gerə̄n̄ kadə̄ nin̄-rāān̄ yá̰á̰ kə́ yáā kə́ bo, adə̄ nge ń noō i yá̰á̰ kə́ jḭḭ̄ j-a j-asiī nējə̄ aĺ ɓáa n toó. 17Banī yā kadə̄ najə̄ ní aw̄ń kə̄ kété dan ngán *Israel gə̄ tə́ aĺ ɓáa, adə̄ j-a̰yī ndíĺdə́ j-ɔgīneédə́ kɔr̄ najə̄ kə deē kógə̄ḿ kə rī Jeju.

18Tā anī tél ɓārə́n̄də́ gogə́ ɔgə̄n̄də́ kɔr̄ najə̄ kə rī Jeju ō, ɔgə̄n̄də́ ndóō de gə̄ yá̰a̰ kə rī Jeju ō. 19Banī Piyer nin̄ kə Ja̰a̰ ədan̄də́ na: Sḭḭ̄ kɔ́ gə̄ ī-gāngī sarya ń toō: I koō tasí sḭḭ̄ n i yá̰á̰ kə́ gōtə́ ta kum Nə́ɓā tə́ aké i koō ta Nə́ɓā ḿ? 20Jḭḭ tā anī yá̰á̰ ń j-a̰ā̰ ō, j-oō ō ní, j-asə kɔgə̄ rɔ̄jí kəda alé.

21Ngé sarya gə̄ tél a̰ȳn̄ ndíĺdə́ ɓáý to̰ tá əya̰n̄də́ dɔɔ́. Nin̄-a̰a̰n̄ najə̄ kə́ kadə̄ əgan̄ rɔ̄də́ gidə tə́ ba gāngə̄n̄neé sarya dɔdə́ tə́ alé. Tɔdɔ̄ de gə̄ malang a ɔsən̄ i gɔn Nə́ɓā najə̄ yā yá̰á̰ ń rāā yá̰á̰ ní tə́. 22Deē ngeé ń toō ń njan ndájə̄ kanjə̄ kadə̄ deē ger̄ loon ní, ɓālə̄n mān̄ kutə sɔ́.

Ngé taā kem gə̄ ndɔ̄ȳn̄ Nə́ɓā

23Dan ń ngé sarya gə̄ əya̰n̄ Piyer nin̄ kə Ja̰a̰ dɔɔ́ anī, nin̄-tél aw̄n̄ rɔ̄ madə̄də́ gə̄ tə́, ba ɔjən̄də́ gotə najə̄ gə̄ malang ń ngol gə̄ kə́ dɔ *ngé tun̄ yá̰a̰ gə̄ tə́ ō, *kum kɔɔ̄ gə̄ ō, ədan̄də́ ní. 24Dan ń nin̄-oōn̄ najə̄ gə̄ ní anī, nin̄ malang ndɔ̄ȳn̄ Nə́ɓā kə kem kə́ kógə̄ḿ beé ədan̄ na:

Kɔ́ɔ̄jí, i ḭ̄ n ī-rāā dɔ rā̰ ō dɔ nang ō, bā bo ō, kə yá̰a̰ gə̄ malang kə́ tū tə́ ní. 25I ḭ̄ n ə̄ndā najə̄ ń toō ta kaají Dabid nge kəla yāí tə́ ní. Ni-əda kə ta kūl̄ *Ndíĺ kə́ Táĺ na:

Nápar de gə̄ a rāān̄ wōn̄g ngá̰ý beē i tām̄ rí tə́?

Kum gír̄ ń gír ɓē gə̄ a gírə̄n̄ dɔ yá̰á̰ kə́ ndāńg karī gə̄ tə́ yā rāā ní na i rí?

26Mban̄g kə́ dɔ nang tə́ gə̄ ḭḭn̄ kə rɔ̄ɔ́ ō,

ngar̄ gə̄ ɓoon̄ naā dɔ Kɔ́ɔ̄ɓē tə́ ō, dɔ *Kərist yān tə́ ō.

27Najə̄ ní i rɔ̄kum, tɔdɔ̄ Herod ō, Po̰sə Pilatə ō, nápar de kə́ rang gə̄ ō, *Israel gə̄ ō, ɓoon̄ naā kem ɓē ń toō tə́ dɔ Jeju nge kəla yāí kə́ *táĺ tə́, ni ń *úr yibə̄ ngār dɔn tə́ ní. 28Nin̄-rāān̄ yá̰a̰ malang ń īkɔ́ ɔ́jə loon kété kə gō tɔ́gə yāí ō, kə gō kem ndigə yāí ō ní. 29Ba ngɔlaā ní Kɔ́ɔ̄ɓē, á̰a̰ ka̰ȳ ń a̰ȳn̄ ndíĺjí ní, ba ī-rāā ādə̄ ngé kəla yāí gə̄ ənīn̄ kemdə́ ədan̄neé najə̄ yāí kanjə̄ ɓōĺ. 30Ī-rāā ādə̄ rɔ̄ ngé mo̰y gə̄ ngáā ō, yá̰á̰ kə́ to kɔr kum gə̄ ō, kə́ yáā gə̄ ō, rāān̄ yá̰a̰ kə ta kūl̄ rī Jeju nge kəla yāí kə́ *táĺ ɔ́jəń tɔ́gí kə̄ ndágá.

31Dan ń nin̄-ndɔ̄ȳn̄ oy anī, loo ń kánə̄n̄ naā tū tə́ ní ndebə. *Ndíĺ kə́ Táĺ rosə kemdə́ malang ō, nin̄-ənīn̄ kemdə́ ɔjən̄neé najə̄ yā Nə́ɓā kanjə̄ ɓōĺ ō.

Ngé taā kem gə̄ kēgə̄n̄ naā yá̰a̰ kənge yādə́ gə̄

32Kósə de gə̄ ń taān̄ kem ní kemdə́ i gō naā tə́ ō, gír̄ yādə́ i gō naā tə́ ō, de kə́ rāā yá̰a̰ halan yá̰a̰ kənge yān nəkɔ́ tə́ kə kérneé ní gətóo ō. Yá̰a̰ malang i yá̰a̰ yādə́ mbak. 33Ngámbang kəla gə̄ ɔrə̄n̄ najə̄ loo de kə́ kum yá̰á̰ tə́ gə̄ tə́ dɔ koy tá ndól̄ yā Kɔ́ɔ̄ɓē Jeju tə́ i kə tɔ́gə́ kə́ ngá̰ý ō, nin̄ malang ní Nə́ɓā rāā majə sedə́ ngá̰ý ō. 34Adə̄ de kə́ ndoō rāān gətóo dandə́ tə́. Tɔdɔ̄ ngé gə̄ ń aw̄n̄ kə loo yādə́ gə̄, aláa kə kújə gə̄ ní, igən̄neé 35ba reēn̄ kə narneé ɓōkə́n̄ no ngámbang kəla gə̄ tə́, adə̄ nə̄ɓōn̄ de gə̄ kógə̄ḿ kógə̄ḿ kə gō ndoōdə́ gēé.

36Jəjep ń ngámbang kəla gə̄ əndān̄ rī tɔ̄yn na i Barnabas ń, kumən na i nge sɔl̄ kem deē ní, i de kə́ gír kaa yā Lebi tə́. Ojənən̄ i dor̄ kə́ Sipər tə́. Ni-aw̄ kə loo ndɔr̄ kógə̄ḿ. 37Ni igəń kɔ̄ɔ́ ba reē kə narneé ɓōkə́ no ngámbang kəla gə̄ tə́.

Currently Selected:

Kəla rāā Ngámbang kəla gə̄ 4: BS

Highlight

Copy