Teē Ngán Israel gə̄ 10

Yá̰á̰ kə́ tōr̄ kə́ nge ko̰ sɔ́sɔ́: Yḭm̄ gə̄

1Kɔ́ɔ̄ɓē əda Moijə na kə aw̄ kə ənge *Parao̰, tɔdɔ̄ na i ni Kɔ́ɔ̄ɓē n n-rāā adə̄ *Parao̰ nin̄ kə ngé kəla yān gēé rāān dɔ ngan̄g ní, i yā kadə̄ n-rāań yá̰á̰ kə́ yáā gə̄ ń noō malang dɔ dáńdə́ tə́ ō, 2kadə̄ ə̄niń ngání gə̄ ō, ngán kaaí gə̄ ō, gotə yá̰á̰ ń n-rāā kə de kə́ Ejiptə gə̄ kem ɓē yādə́ tə́ ní ō. Loo ń noō tə́ na ā ī-gerī kadə̄ ni i Kɔ́ɔ̄ɓē. 3Moijə nin̄ kə *Aaro̰ aw̄ əngen̄ *Parao̰ ədanən̄ na Kɔ́ɔ̄ɓē Nə́ɓā yā Hebəro gə̄ əda na ké i ndɔ̄ kə́ rá tə́ n ké dɔn a tetəń ní wa. Kə əya̰ gír deē yān gə̄ kadə̄ aw̄ rāān̄ kəla adə̄nən̄. 4Ré na rāā dɔ ngan̄g kə̄ non tə́ ba mbātə́ kəya̰ gír deē yān gə̄ kadə̄ aw̄n̄ anī, bírí n-a n-əla kə yḭm̄ gēé dɔ nang yān tə́. 5Na a taān̄ loo dɔ nang yān tə́ kadə̄ deē a a̰a̰ loo kə́ karī alé. Na gotə kōō kə́ sḛ́ý beē ń kɔ̄sə̄ tɔ̄l̄ aĺ ní, na a əsan̄ kɔ̄ɔ́ malang, na a əya̰n̄ yá̰á̰ kógə̄ḿ kadə̄ na̰y dɔ kāgə̄ kə́ bembeé gə̄ tə́ alé. 6Na a taān̄ kem kújə yān ō, kem kújə yā ngé kəla yān gə̄ ō, yā de kə́ kem ɓē kə́ Ejiptə tə́ gə̄ malang ō. I yá̰á̰ kə́ tōr̄ kə́ kaadə́ gə̄ ō, bɔbə̄də́ gə̄ ō, nin̄ kɔ́ gə̄ ō, na a̰a̰n̄ nja kógə̄ḿ aĺ ɓáý. Loo ń noō tə́ Moijə əya̰ *Parao̰ ba teē aw̄.

7Ngé kəla yā *Parao̰ gə̄ ədanən̄ na ké deē ń noō a rāā kadə̄ yá̰á̰ kə́ tōr̄ gə̄ a rāān̄də́ beé ké i ta kaw̄ rə́ngáý tə́ wa. Kə əya̰ dəngam kə́ Israel tə́ gə̄ kadə̄ aw̄ rāān̄ kəla adə̄n̄ Kɔ́ɔ̄ɓē Nə́ɓā yādə́, na ɓē kə́ Ejiptə a gətóo na i mbéé ní ké ger̄ aĺ ɓáý wa. 8Anī ɓārə́n̄ gō Moijə nin̄ kə *Aaro̰ adə̄ tél reēn̄ əngen̄ *Parao̰. Parao̰ ədadə́ na kə aw̄ rāān̄ kəla adə̄n̄ Kɔ́ɔ̄ɓē Nə́ɓā yādə́. Ba ké i náā gə̄ n i ngé kaw̄ gə̄ ní wa. 9Moijə əda na n-a n-aw̄n̄ na i malang: Ngán gə̄ ō, de kə́ tɔgə gə̄ ō, dəngam gə̄ ō, dəyá̰ gə̄ ō, batə̄ gə̄ ō, bə̄yā̰ gə̄ ō, man̄g gə̄ ō, tɔdɔ̄ n-a n-aw̄n̄ na i kə rāā nāā yā Kɔ́ɔ̄ɓē Nə́ɓā yādə́ tə́. 10*Parao̰ ədadə́ na ré n-əya̰də́ adə̄ aw̄n̄ kə ngáńdə́ gēé anī, kadə̄ Kɔ́ɔ̄ɓē kə i naā tə́ sedə́, gír̄ kə́ majaĺ kə́ kemdə́ tə́ to na i kə̄ dɔ ndágá, 11yá̰á̰ ń na dəjen̄ noó de kə́ yā ndigə gōdə́ tə́ na gətóo. Banī kə nin̄ dəngam gə̄ kə aw̄ kə rāān̄ kəla kə adə̄n̄ Kɔ́ɔ̄ɓē, tɔdɔ̄ yá̰á̰ ń na sāān̄ ní n noó. Loo ń noō tə́ tə̄ɓān̄də́ kɔ̄ɔ́ ɓē *Parao̰.

12Kɔ́ɔ̄ɓē əda Moijə na kə əla jīn kə̄ dɔ ɓē kə́ Ejiptə tə́ kə ɓārə́nń yḭm̄ gə̄ kə̄ dɔ tə́ kadə̄ reē əsan̄ mu kə́ kem ɓēé ō, yá̰á̰ ń kɔ̄sə̄ tɔ̄l̄ aĺ ɓáý ní ō malang. 13Moijə əla kāgə̄ yān kum kə̄ dɔ ɓē kə́ Ejiptə tə́, anī Kɔ́ɔ̄ɓē rāā adə̄ néĺ kə́ dūn̄ ɓē tə́ əla dɔ ɓē kə́ Ejiptə tə́ ndɔ̄ ń noō tə́ kadaá bátə́ loo tíbə ō, ndɔ̄ɔ́ bátə́ loo tīī ō. Dan ń loo tīī anī néĺ ní reē i kə yḭm̄ gēé. 14Yḭm̄ gə̄ tə̄ndān̄ naā tḭ̄ḭ̄n̄ kə̄ loo gə̄ tə́ malang dɔ nang kə́ Ejiptə tə́. Deē asə tə́dádə́ alé, tɔdɔ̄ nin̄ i ngá̰ý. Deē a̰a̰ yḭm̄ gə̄ kə́ asən̄ naā beé kété aĺ ō, gō yḭm̄ gə̄ ń noō tə́ ní deē a a̰a̰ kə́ rang gə̄ kə́ asən̄ naā beé aĺ ō. 15Yḭm̄ gə̄ ní taān̄ loo dɔ nang tə́ malang adə̄ dɔ nang tél ndul mikəri. Nin̄-əsan̄ mu gə̄ ō, kan̄ kāgə̄ gə̄ ō ń kɔ̄sə̄ nujəń aĺ ní, adə̄ dɔ nang kə́ Ejiptə malang ndágə doy ō, kāgə̄ kógə̄ḿ kə́ mbīn na̰y dɔ tə́ gətóo ō.

16*Parao̰ əla gō Moijə nin̄ kə *Aaro̰ tə́ adə̄ reēn̄ láẃ, ədadə́ na n-rāā majaĺ kə Kɔ́ɔ̄ɓē Nə́ɓā yādə́ ō, sedə́ ō, 17kə mā̰ȳn̄ rɔ̄də́ dɔ yá̰á̰ kə́ majaĺ ń n-rāā tə́ ní nja kógə̄ḿ to̰, ba kə ndɔ̄ȳn̄ Kɔ́ɔ̄ɓē Nə́ɓā yādə́ kadə̄ kə tə̄ɓā yá̰á̰ kə́ to yo ń noō dɔn tə́ kɔ̄ɔ́. 18Moijə əya̰ *Parao̰ ba teē láẃ aw̄ ndɔ̄ȳ Kɔ́ɔ̄ɓē. 19Anī Kɔ́ɔ̄ɓē tūr̄ nél adə̄ ḭḭ no ɓē tə́, əla kum kə̄ dūn̄ ɓē tə́ kə ngangá ngá̰ý, adə̄ ɔy yḭm̄ gə̄ aw̄ ɓōkə́də́ kum bā tə̄ɓā gə̄ tə́ kɔ̄ɔ́. Adə̄ yḭm̄ kógə̄ḿ gə̄gē gətóo dɔ nang kə́ Ejiptə tə́ kə taá malang. 20Banī Kɔ́ɔ̄ɓē rāā adə̄ *Parao̰ rāā dɔ ngan̄g kə non tə́, əya̰ ngán *Israel gə̄ adə̄ aw̄n̄ alé.

Yá̰á̰ kə́ tōr̄ kə́ nge ko̰ ndōhó: Loo kə́ risə til nding

21Kɔ́ɔ̄ɓē əda Moijə na kə əla jīn kə̄ dɔɔ́ kadə̄ loo kə risə til dɔ nang kə́ Ejiptə tə́, til kə́ yā kadə̄ deē a mám̄ i loo tá a njə̄rań. 22Moijə əla jīn kə̄ dɔɔ́, anī loo risə til nding dɔ nang kə́ Ejiptə tə́ ndɔ̄ mətá. 23Kem ndɔ̄ gə̄ ń noō tə́ ní de kə́ Ejiptə gə̄ asən̄ ka̰a̰ naā alé, adə̄ deē aw̄ loo alé. Banī loo ń ngán *Israel gə̄ ndin̄ tū tə́ ní tá loo kə́ tū tə́ unjə̄.

24*Parao̰ ɓāŕ Moijə ədan na kə aw̄ kə rāān̄ kəla kə adə̄n̄ Kɔ́ɔ̄ɓē, kə əya̰n̄ batə̄ yādə́ gə̄ kə bə̄yā̰ yādə́ gə̄ kə man̄g yādə́ gə̄, ba kə aw̄n̄ kə ngáńdə́ gēé. 25Moijə ədan na dā̰ gə̄ kə́ kadə̄ n-tɔ̄l̄ n-tunə̄n̄ ō, ngé gə̄ ń kadə̄ n-róōn̄ horoó n-adə̄n̄ Kɔ́ɔ̄ɓē Nə́ɓā yādə́ ō ní ké i ni n a adə̄də́ ní wa. 26Yá̰a̰ kul̄ yādə́ gə̄ na a aw̄n̄ sedə́, dā̰ kógə̄ḿ na a na̰y gogə́ alé. Tɔdɔ̄ n-a n-əhɔn̄ yá̰á̰ kə́ yā tun̄ na i dan dā̰ gə̄ ń noō tə́. Na n-gerə̄n̄ yá̰á̰ ń kadə̄ n-tun̄ n-adə̄n̄ Kɔ́ɔ̄ɓē ní deē dɔdə́ laā alé, ré n-ugə̄n̄ na i nú pá tá. 27Banī Kɔ́ɔ̄ɓē rāā adə̄ *Parao̰ rāā dɔ ngan̄g, mbātə́ kəya̰də́ kadə̄ aw̄n̄. 28*Parao̰ əda Moijə na kə teē kɔ̄ɔ́. Ré na tél reē gogə́ tan tə́ bang a na a oy. 29Moijə əda na majə, n-a n-reē gogə́ to̰ alé.

Currently Selected:

Teē Ngán Israel gə̄ 10: BS

Highlight

Compare

Copy