Teē Ngán Israel gə̄ 9

Yá̰á̰ kə́ tōr̄ kə́ nge ko̰ mí: Mo̰y ngāl̄bɔ̄gīí kə́ əsō dɔ yá̰a̰ kul̄ gə̄ tə́

1Kɔ́ɔ̄ɓē əda Moijə na kə əda *Parao̰ na najə̄ ń Kɔ́ɔ̄ɓē Nə́ɓā yā Hebəro gə̄ əda ní n toó: Kə əya̰ gír deē yān gə̄ kadə̄ aw̄ rāān̄ kəla adə̄nən̄. 2Ré mbātə́ ba əhɔdə́ gotoó kə̄ non tə́ anī, 3Kɔ́ɔ̄ɓē na a rāā yá̰a̰ kul̄ yān gə̄ ń aw̄n̄ ko̰ó̰ bembeé ní gōtə́ alé. Mo̰y ngāl̄bɔ̄gīí kə́ ngan̄g ngá̰ý na a əsō dɔ sə́nda yān gə̄ tə́ ō, dɔ kərō yān gə̄ tə́ ō, dɔ jámbal yān gə̄ tə́ ō, dɔ man̄g yān gə̄ tə́ ō, dɔ batə̄ yān gə̄ tə́ ō, dɔ bə̄yā̰ yān gə̄ tə́ ō. 4Kɔ́ɔ̄ɓē na a ɔr̄ kam̄ yá̰a̰ kul̄ yā ngán *Israel gə̄ ō, yá̰a̰ kul̄ yā de kə́ Ejiptə gə̄ ō naā tə́. Dan yá̰a̰ kul̄ yā ngán *Israel gə̄ tə́ ní kógə̄ḿ kə́ yā koy na a gətóo. 5Kɔ́ɔ̄ɓē ɔjə ndɔ̄ ń a rāā yā rāań yá̰á̰ ní ní, əda na n-a n-rāā yá̰á̰ ní kem ɓē kə́ Ejiptə tə́ na i bírí. 6Adə̄ teē kə ndɔ̄ kə́ noō anī Kɔ́ɔ̄ɓē rāā yá̰á̰ ní. Yá̰a̰ kul̄ yā de kə́ Ejiptə gə̄ oyn̄ malang, ba yá̰a̰ kul̄ yā ngán Israel gə̄ tá kógə̄ḿ kə́ koy gətóo. 7*Parao̰ əla de gə̄ adə̄ aw̄ əndān̄ ma̰ȳ anī, dan yá̰a̰ kul̄ yā ngán Israel gə̄ tə́ ní, kógə̄ḿ kə́ koy gətóo. Banī *Parao̰ rāā dɔ ngan̄g kə̄ non tə́ ɓáý, əya̰ ngán Israel gə̄ adə̄ aw̄n̄ alé.

Yá̰á̰ kə́ tōr̄ kə́ nge ko̰ mehḛ́: Ngaw

8Kɔ́ɔ̄ɓē əda Moijə nin̄ kə *Aaro̰ na kə ɔrə̄n̄ sa kə́ gār̄ kújə́ tə́ kadə̄ asə rosə kem jī deē jōó, kadə̄ Moijə ɓōkə́ kum kə̄ dɔɔ́ ta kum *Parao̰ tə́. 9Sa ní na a tél yā kur̄ pul pul kə̄ dɔ ɓē kə́ Ejiptə tə́ malang, adə̄ na a rāā de gə̄ ō, dā̰ gə̄ ō kə ngawaá. Ngaw ń a əɓadə́ ní na a tél do səya̰. 10Moijə nin̄ kə Aaro̰ ɔrə̄n̄ sa kə́ gār̄ kújə́ tə́ ba aw̄ əngen̄ *Parao̰. Moijə ɓōkə́ sa ní kum kə̄ dɔɔ́, adə̄ rāā de gə̄ ō, dā̰ gə̄ ō kə ngaw kə́ tél do səya̰á̰. 11Ngé kəga kə́ Ejiptə gə̄ asən̄ ra no Moijə tə́ alé tām̄ ngaw kə́ əɓadə́ tə́, tɔdɔ̄ ngaw əɓadə́ nin̄ kɔ́ gə̄ ō, de kə́ Ejiptə gə̄ ō malang. 12Banī Kɔ́ɔ̄ɓē rāā adə̄ *Parao̰ rāā dɔ ngan̄g, adə̄ tītə̄ ń Kɔ́ɔ̄ɓē ədań Moijə ní, *Parao̰ oō najə̄ yā Moijə nin̄ kə Aaro̰ alé.

Yá̰á̰ kə́ tōr̄ kə́ nge ko̰ sīrí: Kɔ̄sə̄

13Kɔ́ɔ̄ɓē əda Moijə na kə teē dəloí ɓatə, kə aw̄ kə ənge *Parao̰, kə ədan na Kɔ́ɔ̄ɓē Nə́ɓā yā Hebəro gə̄ əda na kə əya̰ gír deē yān gə̄ kadə̄ aw̄ rāān̄ kəla yān kə adə̄nən̄. 14Ń toō na n-a n-rāā kadə̄ yá̰á̰ kə́ tōr̄ yān gə̄ malang a rāānən̄ nəkɔ́ *Parao̰ ō, ngé kəla yān gə̄ ō, gír deē yān gə̄ ō, kadə̄ gerə̄ń na de kə́ tītə̄n ni Kɔ́ɔ̄ɓē na gətóo dɔ nang tə́ laā. 15Nə́ngētə́ n-əla jīn n-əndasí na i kə mo̰y ngāl̄bɔ̄gīí anī, īkɔ́ *Parao̰ gə̄gē, gír deē yāí gə̄ gə̄gē na ā ī-gətóoī dɔ nang tə́ laā kɔ̄ɔ́. 16Banī n-əya̰ī ādə̄ ī-ndi kə kumií i yā kadə̄ n-ɔjiīń tɔ́gən ō, kadə̄ rīn ɓārəń dɔ nang tə́ laā malang ō. 17Ba ī-rāā dɔ ngan̄g kə̄ noí tə́ ɔ̄gəń gír deē yān gə̄ kadə̄ aw̄n̄ ní, 18bírí kə kum mbang ń noō, n-a na n-rāā kadə̄ man̄ edə kə kɔ̄sɔ̄ɔ́, kɔ̄sə̄ ní na a tə́sō na i kə tɔ́gɔ́ ngá̰ý, tá kɔ̄sə̄ kə́ tə́sō kə tɔ́gɔ́ tītə̄ ń noō, deē na a̰a̰ kem ɓē kə́ Ejiptə tə́ laā ndɔ̄ kógə̄ḿ aĺ ɓáý. 19Ní kə ə́la ngɔr ń toō tə́ kadə̄ kánə̄n̄ nja yá̰a̰ kul̄ yāí gə̄ kə yá̰a̰ yāí gə̄ ń na̰yn̄ bembeé ní malang, na deē aláa dā̰ ń a na̰y bembeé ní, kɔ̄sə̄ na a tə́nī yā tə́nī tɔ̄l̄ kɔ̄ɔ́. 20Dan ngé kəla yā *Parao̰ gə̄ tə́ ní, ngé gə̄ ń ɓōlə́n̄ najə̄ yā Kɔ́ɔ̄ɓē ní adə̄n̄ ngé kəla yādə́ gə̄ ō, yá̰a̰ kul̄ yādə́ gə̄ ō, aw̄n̄ kújú. 21Ba ngé gə̄ ń najə̄ yā Kɔ́ɔ̄ɓē usədə́ aĺ ní, əya̰n̄ ngé kəla yādə́ gə̄gē yá̰a̰ kul̄ yādə́ gə̄gē bembeé.

22Kɔ́ɔ̄ɓē əda Moijə na kə əla jīn kə̄ dɔɔ́ kadə̄ kɔ̄sə̄ tə́sō dɔ nang kə́ Ejiptə tə́ malang. Kadə̄ tə́sō dɔ de gə̄ tə́ ō, dɔ dā̰ gə̄ tə́ ō, dɔ kōō gə̄ kə́ ndɔrɔ́ tə́ ō. 23Moijə əla kāgə̄ yān kə̄ dɔɔ́, anī Kɔ́ɔ̄ɓē rāā adə̄ man̄ ndang ō, kɔ̄sə̄ tə́sō ō. Məyā̰ man̄ teē əhɔ nang, ɓáa Kɔ́ɔ̄ɓē rāā adə̄ kɔ̄sə̄ tə́sō dɔ nang kə́ Ejiptə tə́. 24Loo ń əndān̄ ɓē kə́ Ejiptə jóó á teēń dan ń noō tə́ ní deē a̰a̰ kɔ̄sə̄ ō, məyā̰ man̄ kə́ to ɓōĺ tītə̄ ń noō ō aĺ ɓáý. 25Kɔ̄sə̄ tə́nī de gə̄ ō, dā̰ gə̄ ō, kə́ dɔ nang kə́ Ejiptə tə́ malang ń na̰yn̄ bembeé ní. Kɔ̄sə̄ nujə kōō kə́ ndɔrɔ́ gə̄ ō, tétə̄ kāgə̄ gə̄ ō. 26I dɔ nang kə́ Gosen ń ngán *Israel gə̄ ndin̄ tū tə́ ní ngóy n kɔ̄sə̄ tə́sō tū tə́ aĺ ní. 27*Parao̰ ɓāŕ Moijə nin̄ kə *Aaro̰ ədadə́ na:

Kə́ ɓōó ń toō i mā n m̄-rāā majaĺ ní. Kɔ́ɔ̄ɓē i de kə́ súmūú, adə̄ najə̄ i dɔḿ mā tə́ ō, dɔ gír deē yāḿ gə̄ tə́ ō. 28Ī-ndɔ̄yī Kɔ́ɔ̄ɓē tām̄ yāḿ tə́ ādə̄ man̄ ndang to̰ aĺ ō, kɔ̄sə̄ tə́sō to̰ aĺ ō, ɓáa m-ā m-ə́yá̰sí kadə̄ āwī ba m-ā m-ɔ̄gə̄sí kaw̄ to̰ alé.

29Moijə tél ədan na:

Dan ń m-ā m̄-teē gidə ɓē tə́ anī, m-ā m-ɔ́y jīḿ kə̄ dɔɔ́ yā ndɔ̄yń Kɔ́ɔ̄ɓē. Man̄ a ndang to̰ aĺ ō, kɔ̄sə̄ a tə́sō to̰ aĺ ō, kadə̄ ī-gerə̄ń na dɔ nang i yā Kɔ́ɔ̄ɓē. 30Banī m̄-ger̄ majə kadə̄ ḭ̄ ō, ngé kəla yāí gə̄ ō, ī-ɓōlíī ndíĺ Kɔ́ɔ̄ɓē Nə́ɓā aĺ ɓáý.

31Kɔ̄sə̄ ń tə́sō ní nujə mu *lḛ́ḛ ō, kōō ɔ́rjə ō, tɔdɔ̄ ɔ́rjə ojə kɔ̄ɔ́ ō, *lḛ́ḛ́ hútə̄ kɔ̄ɔ́ ō. 32Ba i gémē ō, kōō epotər ō n kɔ̄sə̄ nujəń aĺ ní, tɔdɔ̄ nin̄ a ojən̄ kum i gō gogə́.

33Moijə teē gō *Parao̰ tə́ kɔ̄ɔ́ ba aw̄ gidə ɓē tə́. Aw̄ ɔy jīn kə̄ dɔɔ́ ndɔ̄yń Kɔ́ɔ̄ɓē. Anī kɔ̄sə̄ tə́sō to̰ aĺ ō, man̄ ndán̄g to̰ aĺ ō, edə to̰ aĺ ō. 34Dan ń *Parao̰ a̰a̰ kadə̄ kɔ̄sə̄ tə́sō to̰ aĺ ō, man̄ ndán̄g to̰ aĺ ō, edə to̰ aĺ ō anī, rāā majaĺ nəkɔ́ ń ni-rāā kété ní ɓáý. Ni gə̄gē, ngé kəla yān gə̄ gə̄gē, tél rāān̄ dɔ ngan̄g gogə́ ɓáý. 35Tītə̄ ń Kɔ́ɔ̄ɓē adə̄ Moijə ədań ní *Parao̰ rāā dɔ ngan̄g kə̄ non tə́, əya̰ ngán *Israel gə̄ adə̄ aw̄n̄ alé.

Currently Selected:

Teē Ngán Israel gə̄ 9: BS

Highlight

Compare

Copy