Teē Ngán Israel gə̄ 13

Ndū najə̄ kə́ rang gə̄ kə́ dɔ nāā Pákə tə́

1Kɔ́ɔ̄ɓē ɔr̄ najə̄ kə Moijə, ədan na 2kə ɔr̄ kam̄ hágə́ ngán *Israel gə̄ malang ō, hágə́ yá̰a̰ kul̄ yādə́ gə̄ ō, kə adə̄n. Tɔdɔ̄ hágə de kə́ dəngam ō, hágə dā̰ kə́ dəngam ō ní, na i yá̰a̰ yān.

3Moijə əda ngán *Israel gə̄ na:

Ādə̄ əga kemsí dɔ ndɔ̄ ń Kɔ́ɔ̄ɓē ɔrə̄ńsí ɓəloó kɔ̄ɔ́ dɔ nang kə́ Ejiptə tə́ ní, tɔdɔ̄ ni teē sesí i kə tɔ́gə jīneé. Deē a əsa mápá kə́ rāā kə *kaa mápá alé. 4A ī-teēī ɓōólaā i kem nāā *Abib tə́. 5Loo ń Kɔ́ɔ̄ɓē aw̄ sesí adə̄ ūgī dɔ nang yā Kanaan gə̄ tə́ ō, Het gə̄ tə́ ō, *Amor gə̄ tə́ ō, Hibi gə̄ tə́ ō, Yebus gə̄ tə́ ō anī, ā ī-rāāī nāā yā kadə̄ əgań kemsí dɔ yá̰á̰ ń rāā yá̰a̰ kem nāā ń toō tə́ ní kə dɔ ɓāl̄ gə̄. Dɔ nang ní i dɔ nang ń ni-ənī míndən dɔ tə́ adə̄ kaasí gə̄ yā kadə̄sí ní. I dɔ nang kə́ mba ō, yibə̄ tejə ō i ngá̰ý tū tə́. 6Ā ə́saī mápá kə́ rāā kanjə̄ *kaa mápa ndɔ̄ sīrí. Kə ndɔ̄ kə́ nge ko̰ sīrí anī ā ī-rāāī nāā yā Kɔ́ɔ̄ɓē. 7Kem ndɔ̄ gə̄ ń noō tə́ ní ā ə́saī mápá kə́ rāā kə *kaa mápá alé. Dɔ nang yāsí tə́ malang ní, deē a ənge mápá kə́ rāā kə kaa mápá aĺ ō, deē a ənge kaa mápa aĺ ō. 8Dan ń ā ī-rāāī nāā ń noō ní, ā ɔ́jiī ngáńsí gə̄ kum, ā ə́daīdə́ na Kɔ́ɔ̄ɓē na rāā sesí dan ń ī-teēīneé kem ɓē kə́ Ejiptə tə́ kɔ̄ɔ́ ní na i tām̄ yā yá̰á̰ ń noō tə́. 9Nāā ngeé ń noō ń ā ī-rāāī ní rāā rɔ̄n i yá̰á̰ kə́ yā kadə̄ əgań kemsí dɔ najə̄ tə́, rāā rɔ̄n i tə́ré yá̰á̰ kə́ ə̄ndāī jīsí tə́, aláa nɔtə nosí tə́. A ter̄ kemsí dɔ ndū najə̄ yā Kɔ́ɔ̄ɓē kə́ i gáŕ kadə̄ ɔ́jiī tə́, tɔdɔ̄ i ni n teē sesí kem ɓē kə́ Ejiptə tə́ kɔ̄ɔ́ kə ta kūl̄ tɔ́gən kə́ dum̄ ta yá̰a̰ malang ní. 10Ā ī-rāāī yá̰á̰ kə́ ndang kadə̄ yā rāā ń noō i kə dɔ ɓāl̄ gə̄ loo ń ndɔ̄n a asə ní.

11Kɔ́ɔ̄ɓē a aw̄ sesí kadə̄ ūgī dɔ nang yā Kanaan gə̄ tə́ ō, a adə̄sí dɔ nang ní tītə̄ ń ənīń ndūn adə̄ kaasí gə̄ ō, adə̄sí sḭḭ̄ kɔ́ gə̄ ō ní. Loo ń noō tə́ 12ā ādīin̄ hágə́sí gə̄ malang ō, hágə́ yá̰a̰ kul̄ yāsí gə̄ malang ō. Ngáń hágə́#13.12 Ngán hágə: Kété ní a ndējə̄n̄ Nə́ɓā hágə dā̰ gə̄ i beé, a tɔ̄l̄ ba a tunə̄n̄ i mbée n a adə̄nən̄ ní. Dan ń Nə́ɓā ndigə kadə̄ de gə̄ tɔ̄lə̄n̄ ngáń hágə́də́ gə̄ adə̄nən̄ aĺ ní, ni ədadə́ kadə̄ gāngə̄n̄ dɔ hágə́də́ gə̄ ní (Tə́da 18.15-17). kə́ dəngam gə̄ i yá̰a̰ yā Kɔ́ɔ̄ɓē. 13Ba ré i hágə kərō anī, ā ī-mbélī gír kə ngōn̄ batāá aláa kə ngōn̄ bə̄yā̰á̰, aĺ ɓáa ī-tə̄ndāī gōn ī-tɔ̄līin̄ kɔ̄ɔ́. Ba ngáń hágə́sí kə́ dəngam gə̄ tá ā ī-gāngī dɔdə́. 14Ré ndɔ̄n tə́ ngáńsí gə̄ a dəjen̄sí na ké ā ī-rāāī yá̰á̰ ń toō i tām̄ yā rí tə́ wa anī, ī-téĺ ə́daīdə́ na ɓē kə́ Ejiptə ń sḭḭ̄ i ɓəlo gə̄ kemeé ní Kɔ́ɔ̄ɓē na teē sesí kɔ̄ɔ́ kemeé i kə ta kūl̄ tɔ́gən kə́ dum̄ ta yá̰a̰ malang. 15Tɔdɔ̄ dan ń *Parao̰ mbātə́ kəya̰sí kadə̄ āwī ní, Kɔ́ɔ̄ɓē na rāā adə̄ ngáń hágə gə̄ kə́ Ejiptə tə́, hágə deē gə̄gē hágə dā̰ gə̄gē na oyn̄ malang. Adə̄ na i tām̄ najə̄ ń noō tə́ n ā ī-ndējīneé Kɔ́ɔ̄ɓē hágə́ yá̰a̰ kul̄ yāsí gə̄ malang, ba hágə́sí kə́ dəngam gə̄ malang tá na ā ī-gāngī dɔdə́ ní. 16Yá̰a̰ ndējə̄ gə̄ ń noō rāān̄ rɔ̄də́ i tə́ré yá̰á̰ kə́ ə̄ndāī jīsí tə́ aláa nɔtə nosí tə́. A rāān̄ kadə̄ əga kemsí dɔ teē ń Kɔ́ɔ̄ɓē teē sejí kem ɓē kə́ Ejiptə tə́ kɔ̄ɔ́ kə ta kūl̄ tɔ́gən kə́ dum̄ ta yá̰a̰ malang ní.

Nə́ɓā ɔjə gír deē yān gə̄ tá róbə

17Dan ń *Parao̰ əya̰ ngán *Israel gə̄ adə̄ aw̄n̄ ní, i róbə́ kə́ teē dɔ nang yā Pilistin gə̄ tə́ n i róbə́ kə́ gān̄g dɔɔ́ láẃ ní, banī Nə́ɓā adə̄ unən̄ nge ń noō alé, tɔdɔ̄ ni ger̄ kadə̄ ré a a̰a̰n̄ rɔ̄ɔ̄ anī, ɓōĺ a rāādə́ adə̄ a télən̄ dɔ tə́ ta kaw̄ kə̄ gogə́ Ejiptə tə́. 18Nə́ɓā tūr̄ ta ngán *Israel gə̄ adə̄ unən̄ róbə́ kə́ mángá ń teē bā tə̄ɓā gə̄ tə́ ní. Ngán Israel gə̄ njə̄rān̄ i kə gō naá majə n teēn̄neé kem ɓē kə́ Ejiptə tə́ kɔ̄ɔ́ ní. 19Moijə ɔy kə̄ngā Jəjep aw̄ń, tɔdɔ̄ Jəjep ra kə ngákó̰o̰n gēé adə̄ túbə adə̄nən̄. Ni-ədadə́ na Nə́ɓā na a dḭḭ̄də́. Loo ń dḭḭ̄də́ anī, kə ɔyn̄ kə̄ngān loo ń noō tə́ kɔ̄ɔ́, kə aw̄n̄neé.

20Ngán Israel gə̄ ḭḭn̄ Sukot aw̄ ndin̄ Etam kadə dəla loo tə́. 21Kɔ́ɔ̄ɓē nəkɔ́ i kété nodə́ tə́: Kadaá anī ni i dan kil̄ man̄ kə́ ra kə ngālāá ɓururu kə́ a ɔjədə́ ta róbə́ tə́ ō, ndɔ̄ɔ́ anī ni i tū hor kə́ ra kə ngālāá ɓururu kə́ kadə̄ a̰a̰n̄neé loo tə́ ō, adə̄ nin̄-asən̄ njə̄rā kadaá ō, ndɔ̄ɔ́ ō. 22Kadaá anī kil̄ man̄ kə́ ngāl̄ ɓururu ń i no ngán *Israel gə̄ tə́ ní əya̰də́ loo aĺ ō, ndɔ̄ɔ́ anī hor kə́ ngāl̄ ɓururu ń i nodə́ tə́ ní əya̰də́ loo aĺ ō.

Currently Selected:

Teē Ngán Israel gə̄ 13: BS

Highlight

Compare

Copy