Teē Ngán Israel gə̄ 14

Parao̰ ngɔ̄də̄ gō Ngán Israel gə̄

1Kɔ́ɔ̄ɓē ɔr̄ najə̄ kə Moijə, əda na:

2Ə́dá ngán *Israel gə̄ ādə̄ tél reē ndin̄ Pi Hahirot, dɔ dán Migədol tə́ kə bā boó. Ā ī-ndiī i loo ń noō tə́, kadə bā bo tə́, sɔɔ̄ no Baal Sepon. 3Loo ń noō tə́ *Parao̰ a əda na ī-ndɔmī na i mbée kem dəla loo tə́. 4M-ā m̄-rāān kadə̄ a dum̄ naā, adə̄ a ngɔ̄də̄ gōsí. Ba m-ā m̄-tetən rɔ̄ɔ̄ kə deē yān gēé malang kadə̄ m-ɔ́səń gɔn rɔ̄ḿ. Loo ń noō tə́ de kə́ Ejiptə gə̄ a gerə̄n̄ kadə̄ mā i Kɔ́ɔ̄ɓē.

Ngán Israel gə̄ rāān̄ yá̰á̰ ń Kɔ́ɔ̄ɓē ɔjədə́ ní.

5Dan ń ədan̄ mban̄g kə́ Ejiptə na ngán Israel gə̄ na aw̄n̄ kɔ̄ɔ́ anī, *Parao̰ nin̄ kə ngé kəla yān gēé tél tūrə̄n̄ gír̄ kə́ kemdə́ tə́ kə́ dɔ ngán Israel gə̄ tə́ kɔ̄ɔ́. Nin̄-ndə̄ngān̄ rɔ̄də́ ədan̄ na ké n-rāān̄ ké i rí kə́ beé wa. Ké n-əhɔn̄ ngán Israel gə̄ gotoó adə̄ rāān̄ kəla adə̄n̄də́ aĺ ba ké n-əya̰n̄də́ ādə̄ aw̄n̄ ké i tām̄ rí tə́ wa. 6*Parao̰ adə̄ sə́nda yān gə̄ unən̄ púsə rɔ̄ɔ̄ yān ō, ɔy gír deē yān gə̄ gōn tə́ adə̄ aw̄n̄ seneé ō. 7Ni-ɔy púsə rɔ̄ɔ̄ gə̄ kə́ Ejiptə tə́ malang aw̄ń. Kə́ majə ngá̰ý gə̄ i ɓú mehḛ́ kə de gēé dɔ tə́ malang. 8Kɔ́ɔ̄ɓē rāā adə̄ *Parao̰ mban̄g kə́ Ejiptə rāā dɔ ngan̄g ba ngɔ̄də̄ gō ngán *Israel gə̄ ń teēn̄ kem ɓē kə́ Ejiptə tə́ kɔ̄ɔ́ tītə̄ kə́ nin̄ i kɔ́ɔ̄ rɔ̄də́ gə̄ ní. 9De kə́ Ejiptə gə̄ kə sə́nda yādə́ gēé, kə púsə rɔ̄ɔ̄ yādə́ gēé ngɔ̄də̄n̄ gō ngán Israel gə̄ aw̄ əngen̄də́ kadə bā bo tə́, loo ń ndin̄ tū tə́ ní. I loo ń ra sɔɔ̄n̄ ta naā kə Baal Sepon kadə Pi Hahirot tə́ ngɔr ní.

10Dan ń ngán Israel gə̄ a̰a̰n̄ kadə̄ de kə́ Ejiptə gə̄ a ngɔ̄də̄n̄ gōdə́ ō, kadə̄ *Parao̰ a ugə̄ ngɔr ō anī, ɓōĺ rāādə́ ngá̰ý adə̄ tə́gān̄ kɔŕ ɓāŕnəń Kɔ́ɔ̄ɓē. 11Nin̄-ədan̄ Moijə na:

Bāá ɓádə gə̄ kə́ kem ɓē kə́ Ejiptə tə́ i ngá̰ý aĺ á ī-reē sejí laā kadə̄ j-oy kem dəla loo tə́ a? Ī-teē sejí kem ɓē kə́ Ejiptə tə́ kɔ̄ɔ́ i tām̄ rí tə́? 12I najə̄ kə́ j-ədaī dɔ nang kə́ Ejiptə tə́ aĺ a? J-əda na kə ə́yá̰jí kadə̄ jə-rāā kəla j-adə̄ de kə́ Ejiptə gə̄. Tɔdɔ̄ rāājí kəla kadə̄ de kə́ Ejiptə gə̄ i só tə́ ngá̰ý tɔȳ kadə̄ j-oy kem dəla loo tə́.

13Moijə tél ədadə́ na kə lōōn̄ ɓōĺ, ba kə əhɔn̄ kemdə́ ngan̄g na a a̰a̰n̄ loo kajə ń Kɔ́ɔ̄ɓē na a ajədə́ ní ɓōólaā. De kə́ Ejiptə gə̄ ń na a̰a̰n̄də́ ɓōólaā toó na a a̰a̰n̄də́ gogə́ to̰ alé i kə́ bátə́ gə̄ tə́. 14I Kɔ́ɔ̄ɓē n na a rɔ̄ɔ̄ kum gotədə́ ní, ba kə ran̄ jəke.

Nə́ɓā rāā róbə kum bā bo tə́

15Kɔ́ɔ̄ɓē əda Moijə na ké nōō kə̄ dɔn tə́ i tām̄ rí tə́ wa. Kə əda ngán *Israel gə̄ kadə̄ əsōn̄ róbó. 16Kə un kāgə̄-jī yān, kə əla kum kə̄ dɔ bā bo tə́, kə gāngəń bā bo naā tə́ jōó kadə̄ ngán Israel gə̄ mānə̄n̄ danaá. 17Na n-a n-rāā kadə̄ de kə́ Ejiptə gə̄ rāān̄ dɔ ngan̄g adə̄ na a udən̄ gōdə́ tə́ kum bā tə́. Loo ń noō tə́ na n-a n-tetə *Parao̰ rɔ̄ɔ̄ kə deē yān gēé malang, púsə rɔ̄ɔ̄ yān gē, ngé kal̄ sə́nda yān gē, yā kɔsəń gɔnən nəkɔ́ Kɔ́ɔ̄ɓē. 18Ré n-ɔsə gɔnən nəkɔ́ tītə̄ ń noō anī, de kə́ Ejiptə gə̄ na a gerə̄n̄ kadə̄ ni i Kɔ́ɔ̄ɓē.

19*De kə́ dɔ rā̰ tə́ yā Nə́ɓā ō, kil̄ man̄ ō ń a njə̄rān̄ kété no Ngán Israel gə̄ tə́ ní tél aw̄ ran̄ gogə́ gōdə́ tə́. 20Kil̄ man̄ ní ra dɔ dáń ngán *Israel gə̄ kə de kə́ Ejiptə gēé tə́. Kil̄ man̄ ní risə til dām̄ kə́rēý tə́ ba ndɔ̄ɔ́ anī dāmə̄n yā ngán Israel gə̄ unjə̄. Adə̄ ndɔ̄ɔ́ bátə́ kadə̄ loo tīiń ní, de kə́ Ejiptə gə̄ asən̄ kaw̄ rɔ̄ ngán Israel gə̄ tə́ aĺ ō, ngán Israel gə̄ asən̄ kaw̄ rɔ̄ de kə́ Ejiptə gə̄ tə́ aĺ ō.

21Moijə əla jīn kə̄ dɔ bā bo tə́. Anī Kɔ́ɔ̄ɓē teē dan man̄ kə̄ gogə́ kə néĺ kə́ dūn̄ ɓē tə́ kə́ əla kə ngangá ngá̰ý ndɔ̄ɔ́ bátə́ loo tīī, adə̄ man̄ kēgə̄ naā tə́ jōó, adə̄ loo kə́ danaá tutə. 22Adə̄ ngán *Israel gə̄ mānə̄n̄ dan bā bo tə́ kanjə̄ kadə̄ man̄ ɔdə njadə́. Man̄ ḭḭ ra dɔ jīdə́ jōó tītə̄ ndogə̄ mbal̄ beé. 23De kə́ Ejiptə gə̄ ngɔ̄də̄n̄ gōdə́. Sə́nda yā *Parao̰ gə̄ malang, naā tə́ kə púsə rɔ̄ɔ̄ yān gə̄, kə ngé kal̄ sə́nda yān gə̄, udən̄ gōdə́ tə́ kem kār̄ bā bo tə́. 24Ta gír loo tə́ anī Kɔ́ɔ̄ɓē ń ra kum hor kə́ ra kə ngālāá ɓururu tə́ ō, dan kil̄ man̄ tə́ ō, a a̰a̰ń de kə́ Ejiptə gə̄ ní, tə̄ndā tḭ̄ḭ̄də́ kɔ̄ɔ́. 25Ni-do̰ō̰ nja púsə rɔ̄ɔ̄ yādə́ gə̄ gotə kógə̄ḿ, adə̄ loo kɔrdə́ tōr̄. Loo ń noō tə́ de kə́ Ejiptə gə̄ ədan̄ na kə n-a̰ȳn̄ naā no ngán *Israel gə̄ tə́ kə n-aw̄n̄ sa̰y kɔ̄ɔ́, tɔdɔ̄ na i Kɔ́ɔ̄ɓē n a rɔ̄ɔ̄də́ adə̄ ngán Israel gə̄ toó.

26Kɔ́ɔ̄ɓē əda Moijə na kə əla jīn kə̄ dɔ bā bo tə́ kadə̄ man̄ ɔr tan dɔ púsə rɔ̄ɔ̄ gə̄ tə́ ō, dɔ de kə́ Ejiptə gə̄ kə́ ngé kal̄ sə́nda gə̄ tə́ ō. 27Moijə əla jīn kum kə̄ dɔ bā bo tə́. Dan ń loo a rāā yā tīī anī, bā bo tél aw̄ kem kārə̄n tə́ gogə́ gotən tə́. De kə́ Ejiptə gə̄ ń a a̰ȳn̄ naā ní əngen̄ man̄ nodə́ tə́ banī Kɔ́ɔ̄ɓē mbəredə́ kə̄ kum tə́. 28Púsə rɔ̄ɔ̄ gə̄ kə ngé kal̄ sə́nda yā *Parao̰ gə̄ ń udən̄ gō ngán *Israel gə̄ tə́ kum bā bo tə́ ní man̄ tíbə dɔdə́ malang. De kógə̄ḿ kə́ teē gətóo. 29Banī ngán Israel gə̄ teēn̄ bā bo kə̄ gidə kə́rēý tə́ kanjə̄ kadə̄ man̄ ɔdə njadə́. Tɔdɔ̄ man̄ ḭḭ ra tītə̄ ndogə̄ mbal̄ beé dɔ jīdə́ kə́ ko̰ó̰ tə́ ō, kə́ geleé tə́ ō.

30Ndɔ̄ ń noō tə́ Kɔ́ɔ̄ɓē gān̄g dɔ ngán Israel gə̄ jī de kə́ Ejiptə gə̄ tə́, adə̄ ngán Israel gə̄ a̰a̰n̄ nīń de kə́ Ejiptə gə̄ ta gógə́ tə́. 31Ngán Israel gə̄ a̰a̰n̄ tɔ́gə Kɔ́ɔ̄ɓē loo rɔ̄ɔ̄ tə́ kə de kə́ Ejiptə gēé adə̄ ɓōĺnən̄. Nin̄-ənīn̄ kemdə́ adə̄nən̄ ō, ənīn̄ kemdə́ adə̄n̄ Moijə nge kəla yān ō.

Currently Selected:

Teē Ngán Israel gə̄ 14: BS

Highlight

Compare

Copy