Teē Ngán Israel gə̄ 15

Pā yā Moijə nin̄ kə ngán Israel gēé

1Loo ń noō tə́ Moijə nin̄ kə ngán *Israel gēé ənīn̄ pā ɔsən̄neé gɔn Kɔ́ɔ̄ɓē, ədan̄ na:

m̄-gḛy kənī pā yā kɔsəń gɔn Kɔ́ɔ̄ɓē, tɔdɔ̄ ni-tetə rɔ̄ɔ̄ kə́ bo.

Ni-tə́nā sə́nda gə̄ kə ngé kal̄də́ gēé kum bā bo tə́.

2Tɔ́gə́ḿ kə́ ngá̰ý i Kɔ́ɔ̄ɓē, ni dḭḭ̄m̄.

Ni i Nə́ɓā yāḿ, m-ā m̄-tɔ̄ȳn.

Ni i Nə́ɓā yā bɔbə́ḿ, m-ā m-ɔ́jə kə̄ ndágá kadə̄ ni i de kə́ bo.

3Kɔ́ɔ̄ɓē i go̰ rɔ̄ɔ̄, rīn əhɔ dɔn majə ngá̰ý, a ɓāŕnən̄ na i Kɔ́ɔ̄ɓē.

4Ni-tə́nā púsə rɔ̄ɔ̄ gə̄ kə deē yā *Parao̰ gēé kum bā bo tə́.

Ngol ngé rɔ̄ɔ̄ kə́ Ejiptə gə̄ a̰ȳn̄ man̄ oyn̄ kum bā tə̄ɓā gə̄ tə́.

5Nin̄-risə aw̄ ndin̄ gír maná tītə̄ mbal̄ gə̄ adə̄ man̄ tíbə dɔdə́.

6Kɔ́ɔ̄ɓē, tɔ́gə jī ko̰í i ngá̰ý,

I tɔ́gə jīí ngeé ń toō n a tə̄ndā madə̄ ba̰ā̰í gə̄ a tḭ̄ḭ̄də́ kɔ̄ɔ́ ní.

7Ḭ̄ i de kə́ bo ngá̰ý. Ī-tə́ndā madə̄ ba̰ā̰í gə̄ ī-tə́nādə́.

Ré wōn̄g rāāī anī, kemií təngāī dɔdə́ tə́,

adə̄ ī-róōdə́ tītə̄ hor kə́ a o̰o̰ mu beé.

8Koō kə́ teē kóní tə́ rāā adə̄ man̄ udə dūbə̄n dɔ naā tə́,

rāā adə̄ bəngál man̄ gə̄ ḭḭ ran̄ kə njadə́ dɔɔ́ tītə̄ ndogə̄ mbal̄ beé,

rāā adə̄ katə man̄ bā bo kə́ ɓūlūú ń a nūgə́ ní dəba ra gotə kógə̄ḿ.

9Madə̄ ba̰ā̰jí gə̄ ədan̄ na n-a n-ngɔ̄də̄n̄jí yā kəhɔjí,

na n-a n-kēgə̄n̄ naā yá̰a̰ kənge yājí gə̄,

na n-a n-ɔyn̄ kadə̄ mān̄ dɔ ɓōn kə́ kemdə́ tə́,

na n-a n-ró̰ȳn̄ kaskar yādə́ gə̄ kem hɔ̄pə̄n tə́,

na n-a n-tetən̄ jīdə́ dɔjí tə́.

10Banī ḭ̄ Kɔ́ɔ̄ɓē ə́lá nél yāí anī bā bo ɔr tan dɔdə́ tə́.

Nin̄-risə aw̄ ndin̄ gír man̄ kə́ to ɓōĺ ngá̰ý tə́ tītə̄ gində̄ pəlɔm#15.10 Gində̄ pəlɔm: I gində̄ kə́ ɔȳ ngá̰ý ō, ɓálən i kə́ ndul ō. beé.

11Kɔ́ɔ̄ɓē, i nə́ɓā kə́ rá n to tītīí ní?

I náā n hálən i kə́ táĺ ngá̰ý tītə̄ yāí ō,

to ɓōĺ tītīí ō, asə kadə̄ ɓōkə́nən̄ tɔ̄ȳ tītīí ō,

asə rāā yá̰á̰ kə́ to ɓōĺ gə̄ tītə̄ yāí ō ní?

12Ḭ̄ ə́la jī ko̰í nja kógə̄ḿ ngóy anī,

dɔ nang teē tan túrəń ngé ngɔ̄də̄ gōjí gə̄.

13Ḭ̄ ī-gān̄g dɔ gír deē yāí gə̄. Ḭ̄ ɔ́r nodə́ kə tárá ō, kə tɔ́gɔ́ ō, āwń sedə́

kum kə̄ dɔ nang kə́ *táĺ ń ə̄ndā tām̄ yādə́ tə́ ní.

14Gír de gə̄ ń nin̄ i madə̄ ɓēdə́ gə̄ ní oōn̄ anī ndewn̄.

Kə̄ngā sāā gān̄g Pilistin gə̄ ō,

15ngār kə́ Edom gə̄ ndin̄ i kə sōlōó kekəre ō,

ɓōĺ rāā ngār kə́ dɔ nang kə́ Moab tə́ gə̄ ngá̰ý ō,

tɔ́gə Kanaan gə̄ ur̄ wak kɔ̄ɔ́ ō.

16Ndíĺdə́ a̰ȳ malang.

Kɔ́ɔ̄ɓē, dan ń gír deē yāí gə̄ ń ī-gān̄g dɔdə́ ní a mānə̄n̄

anī, ɓōĺ asə madə̄ ɓēdə́ gə̄ nák adə̄ ədan̄ najə̄ alé,

tɔdɔ̄ a̰a̰n̄ tɔ́gí ń ī-rɔ̄ɔń dɔ deē yāí gə̄ tə́ ní.

17Kə́ ngɔr ń toō tə́ ní Kɔ́ɔ̄ɓē, ā āw̄ sedə́ i kə̄ dɔ mbal̄ yāí#15.17 Mbal̄ yāí: Mbal̄ ń Kɔ́ɔ̄ɓē a əndā gír deē yān gə̄ dɔ tə́ ní ra i dɔ nang kə́ Kanaan tə́, i mbal̄ Siyo̰. Ni a gə̄rā loo kə́ táĺ i dɔ mbal̄ ń noō tə́ ō, a ndi dan gír deē yān gə̄ tə́ i loo ń noō tə́ ō. tə́

yā kaw̄ kəndādə́ tū tə́.

I loo ń ə̄ndā dɔ danaá yā kadə̄ ī-ndi tū tə́,

yā kadə̄ īkɔ́ ī-rāā *loo kə́ táĺ yāí tū tə́ ní.

18Kɔ́ɔ̄ɓē ḭ̄ ā ó̰o̰ ɓē ngándáńg.

19Dan ń sə́nda gə̄ kə púsə rɔ̄ɔ̄ gə̄ kə ngé kal̄ sə́nda yā *Parao̰ gə̄ udən̄ kem kār̄ bā bo tə́ ní, Kɔ́ɔ̄ɓē rāā adə̄ man̄ tél reē ɔr tan dɔdə́ tə́. Banī ngán *Israel gə̄ tá gāngə̄n̄ bā bo kanjə̄ kadə̄ man̄ ɔdə njadə́. 20Tā anī Miriam kə́ *nge koō ta yā Nə́ɓā ń i ngōkó̰o̰ *Aaro̰ kə́ dəyá̰ ní, un kɔdə kə̄ jīn tə́. Dəyá̰ gə̄ teēn̄ gōn tə́ malang kə ndāmāá kə gō ndū kɔdɔɔ́. 21Miriam un dɔ pā ń toō adə̄də́:

Ə̄nīī pā ɔ́siīneé gɔn Kɔ́ɔ̄ɓē, tɔdɔ̄ ni-tetə rɔ̄ɔ̄ kə́ bo ngá̰ý.

Ni-ɓōkə́ sə́nda gə̄ kə ngé kal̄də́ gēé kum bā bo tə́.

Ngán Israel gə̄ njə̄rān̄ kem dəla loo tə́

(15-18)

Man̄ kə́ Mara

22Ngán Israel gə̄ ń Moijə ɔr nodə́ ní, ḭḭn̄ bā tə̄ɓā gə̄ tə́ aw̄n̄ kum kə̄ dəla loo kə́ Sur tə́. Nin̄-njə̄rān̄ ndɔ̄ mətá kem dəla loo tə́ kanjə̄ kənge man̄. 23Dan ń ugə̄n̄ Mara anī asən̄ ka̰ȳ man̄ kə́ Mara alé, tɔdɔ̄ atə̄ kárárá (i tām̄ najə̄ ń noō tə́ n əndān̄neé rīn na i Mara ní, kumən na i yá̰á̰ kə́ atə̄ kárárá). 24Ngán Israel gə̄ tāmə̄n̄ kə Moijə ədan̄ na ké n-a n-a̰ȳn̄ i rí wa. 25Moijə nōō kə̄ dɔ Kɔ́ɔ̄ɓē tə́ anī Kɔ́ɔ̄ɓē ɔjən kāgə̄ kə́rēý. Ni-ənī kāgə̄ ní kum man̄ tə́ anī, man̄ tél sɔl̄ to ka̰ȳ. Kɔ́ɔ̄ɓē adə̄ ngán *Israel gə̄ ndū najə̄ gə̄ ō, ɔjədə́ yá̰a̰ kāgə̄ ɓē gə̄ ō, i loo ń noō tə́. Nāādə́ i loo ń noō tə́ ō. 26Ni-ədadə́ na ré oōn̄ tan ni Kɔ́ɔ̄ɓē Nə́ɓā yādə́ rɔ̄kum, adə̄ rāān̄ yá̰á̰ ń n-a̰a̰ kadə̄ i yá̰á̰ kə́ gōtə́ ní ō, əndān̄ mbīdə́ oōn̄neé yá̰a̰ gə̄ ń ndang kadə̄ yā rāā ní ō, rāān̄ yá̰a̰ malang ń ndū najə̄ yān gə̄ ədan̄ ní ō anī, mo̰y kə́ dáńg dáńg gə̄ ń n-adə̄ rāā de kə́ Ejiptə gə̄ ní na a rāādə́ nin̄ alé, tɔdɔ̄ ni na i Kɔ́ɔ̄ɓē nge kajədə́ dɔ mo̰y tə́.

27Gō tə́ anī ngán Israel gə̄ ugə̄n̄ Elim. Ta kəɓa man̄ kə́ tū tə́ gə̄ i kutə gidə i jōó ō, kāgə̄ túmbur kə́ tū tə́ gə̄ i kutə sīrí ō. Nin̄-ndin̄ loo ń noō tə́ kadə man̄ tə́.

Currently Selected:

Teē Ngán Israel gə̄ 15: BS

Highlight

Compare

Copy