Teē Ngán Israel gə̄ 16

Mána ō, kerwḛy gə̄ ō

1Ngán Israel gə̄ ḭḭn̄ Elim malang. Kə ndɔ̄ kə́ nge ko̰ kutə gidə i mí yā nāā kə́ nge ko̰ jōó gō teēdə́ Ejiptə tə́ anī, ugə̄n̄ kem dəla loo kə́ Sin tə́, dɔ dán Elim kə mbal̄ *Sinai tə́. 2Nin̄-tāmə̄n̄ kə Moijə ō, *Aaro̰ ō, kem dəla loo ngeé ń noō tə́, 3ədan̄ na ké i tām̄ rí tə́ áké Kɔ́ɔ̄ɓē nəkɔ́ tɔ̄l̄də́ kə jīneé dɔ nang kə́ Ejiptə tə́, dan ń n-ndin̄neé ta jóo dā̰ gə̄ tə́ ō, n-əsan̄neé yá̰a̰ adə̄ asə kemdə́ ō ní aĺ wa. Nin̄ na reēn̄ sedə́ kem dəla loo ń toō tə́ na i yā kəya̰də́ tū tə́ kadə̄ ɓō kə tɔ̄l̄də́ malang.

4Kɔ́ɔ̄ɓē əda Moijə na n-a n-rāā kadə̄ yá̰a̰ kəsa ḭḭ dɔ rā̰ tə́ edə tītə̄ man̄ beé dɔdə́ tə́. De gə̄ na a teēn̄ yā kaw̄ kɔy, ba na a ɔyn̄ i kə́ kum ta kəsa ndɔ̄ kógə̄ḿ ngóy kə dɔ ndɔ̄ gə̄. Na n-a n-nāādə́ i tītə̄ ń noō yā ka̰a̰ń ké a rāān̄ yá̰á̰ ń ndū najə̄ yān əda ní aké a rāān̄ aĺ wa. 5Kə ndɔ̄ kə́ nge ko̰ mehḛ́, ré na a rāān̄ loo yá̰a̰ kəsa ń ɔyn̄ ní yā kəsa anī, na a rāān̄ na i kə́ kum ta ndɔ̄ jōó, adə̄ na a tɔȳ nge ń a rāān̄ kə dɔ ndɔ̄ gə̄ ní.

6Moijə nin̄ kə *Aaro̰ ədan̄ ngán *Israel gə̄ malang na ɓōólaā loo tíbí anī na a gerə̄n̄ kadə̄ i Kɔ́ɔ̄ɓē n teē sedə́ kem ɓē kə́ Ejiptə tə́ kɔ̄ɔ́ ní. 7Bírí dəloí anī na a a̰a̰n̄ *kɔsə gɔn yā Kɔ́ɔ̄ɓē, tɔdɔ̄ ni na oō tām̄ ń na tāmə̄n̄ seneé ní. Ké nin̄ n-asən̄ i rí deē dɔdə́ yā kadə̄ tāmə̄n̄ sedə́ nin̄ ní wa. 8Kum najə̄ ń Moijə sāā kəda ní na a a̰a̰n̄ kɔsə gɔn yā Kɔ́ɔ̄ɓē na i dan ń a adə̄də́ dā̰ loo tíbí kadə̄ əsan̄ ō, a adə̄də́ yá̰a̰ kəsa bírí dəloí kadə̄ asə tadə́ ō ní, tɔdɔ̄ Kɔ́ɔ̄ɓē na oō tām̄ ń na tāmə̄n̄ seneé ní. Ké nin̄ ké n-asən̄ i rí deē dɔdə́ wa. Na tāmə̄n̄ na i sedə́ nin̄ ní alé, ba na tāmə̄n̄ na i kə Kɔ́ɔ̄ɓēé.

9Moijə əda *Aaro̰ na kə əda ngán *Israel gə̄ malang kadə̄ reē kə ran̄ no Kɔ́ɔ̄ɓē tə́, tɔdɔ̄ na oō tām̄ ń na tāmə̄n̄ seneé ní. 10Dan ń Aaro̰ a ɔr̄ najə̄ kə ngán Israel gēé ní, nin̄-tūrə̄n̄ kumdə́ i kə̄ dəla loo tə́. Loo ń noō tə́ *kɔsə gɔn yā Kɔ́ɔ̄ɓē teē tū kil̄ man̄ tə́.

11Kɔ́ɔ̄ɓē əda Moijə na, 12n-oō tām̄ ń ngán Israel gə̄ na tāmə̄n̄ seneé ní. Ní kə ədadə́ na loo tíbí ɓōólaā na a əsan̄ dā̰ ō, bírí dəloí na a əsan̄ yá̰a̰ kadə̄ asədə́ ō. Loo ń noō tə́ na a gerə̄n̄ kadə̄ ni na i Kɔ́ɔ̄ɓē Nə́ɓā yādə́. 13Ndɔ̄ nəkɔ́ ń noō tə́ loo tíbí anī, kerwḛy gə̄ reē əhɔn̄ loo loo ń ngán *Israel gə̄ ndin̄ tū tə́ ní tə́. Nin̄-taān̄ loo malang. Ba teē dəloí anī tal əhɔ kə gō gidə loo malang ń ngán Israel gə̄ ndin̄ tū tə́ ní. 14Dan ń tal ur̄ anī, kum yá̰a̰ gə̄ kə́ ton̄ tītə̄ ngán kɔ̄sə̄ kə́ kídə̄ gə̄ beé na̰yn̄ gotoó nang tə́. 15Ngán Israel gə̄ a̰a̰n̄ yá̰á̰ ní banī gerə̄n̄ yá̰á̰ ní alé, adə̄ dəjen̄ naā dɔ dáńdə́ tə́ na ké yá̰á̰ ń noō ké i rí wa. Anī Moijə ədadə́ na: I yá̰á̰ ń Kɔ́ɔ̄ɓē adə̄sí kadə̄ ə́saī ní. 16Ba yá̰á̰ ń Kɔ́ɔ̄ɓē əda dɔ tə́ ní n toó, əda na kə ɔ́yiī kem kórō kógə̄ḿ kógə̄ḿ kə dɔ de gə̄ kə́ kem ndogə̄ yāsí gə̄ tə́ kadə̄ asə tadə́ malang. 17Ngán Israel gə̄ rāān̄ tītə̄ ń noō. Kə́rēý gə̄ ɔyn̄ ngá̰ý ō, kə́rēý gə̄ ɔyn̄ ngá̰ý aĺ ō. 18Ba dan ń mbɔ̄jə́n̄ kə kórōó anī, ngé gə̄ ń ɔyn̄ ngá̰ý ní yādə́ tɔȳ dɔ aĺ ō, ngé gə̄ ń ɔyn̄ sḛ́ý beē ní yādə́ dūú gō tə́ aĺ ō. Náā nəkɔ́ ɓáa yān asə tan.

Ndū najə̄ kə́ dáńg dáńg gə̄ kə́ dɔ mána tə́

19Moijə əda ngán *Israel gə̄ na, kadə̄ deē kógə̄ḿ kə ngɔ̄m̄ yá̰a̰ kəsa ń noō kadə̄ loo tīī dɔ tə́ alé. 20Banī de kə́rēý gə̄ oōn̄ ta Moijə alé, ngɔ̄mə̄n̄ bátə́ adə̄ loo tīī dɔ tə́. Teē dəloí anī əsō kəde adə̄ otə ndum rḭḭ. Adə̄ wōn̄g rāā Moijə sedə́. 21Ngán Israel gə̄ ɔyn̄ yá̰a̰ kəsa ní dəloí kə dɔ ndɔ̄ gə̄. Nin̄-ɔyn̄ i kɔy kə́ kadə̄ asə tadə́ kum ta ndɔ̄ kógə̄ḿ. Ba dan ń mbang əsō nang tə́ anī, gotən ń na̰y ní yḛḛ̄ kɔ̄ɔ́.

22Kə ndɔ̄ kə́ nge ko̰ mehḛ́ anī, ɔyn̄ kum ta kəsa ndɔ̄ jōó. De kógə̄ḿ ənge i kem kórō jōó jōó. Ngé kun dɔ ngán *Israel gə̄ malang aw̄ ədan̄ Moijə. 23Anī Moijə ədadə́ na i yá̰á̰ ń Kɔ́ɔ̄ɓē ɔjə ní n noó. Tɔdɔ̄ bírí i ndɔ̄ *sabat, i ndɔ̄ kɔr̄ koō kə́ kɔr̄ kam̄ tayā tām̄ yā Kɔ́ɔ̄ɓē tə́. Kə ndīrə̄n̄ yá̰á̰ ń majə kadə̄ ndīrə̄n̄ ní ō, kə nēgə́n̄ yá̰á̰ ń majə kadə̄ nēgə́n̄ ní ō. Ba gotən ń na̰y ní kə əndān̄ kadə̄ loo tīī dɔ tə́. 24Ngán Israel gə̄ əndān̄ adə̄ ndi loo tīī dɔ tə́ tītə̄ ń Moijə ədań ní, banī otə ndum aĺ ō, əsō kəde aĺ ō. 25Anī Moijə ədadə́ na kə əsan̄ yá̰á̰ ní ɓōólaā, tɔdɔ̄ ndɔ̄ kə́ ɓōólaā i ndɔ̄ *sabat yā Kɔ́ɔ̄ɓē. Ré na aw̄n̄ sāá gidə ɓē tə́ anī na a əngen̄ alé. 26Tɔdɔ̄ yá̰á̰ kəsa ní na a ɔyn̄ na i kem ndɔ̄ mehḛ́, ba ndɔ̄ kə́ nge ko̰ sīrí anī na a əngen̄ alé, tɔdɔ̄ ndɔ̄ kə́ nge ko̰ sīrí na i ndɔ̄ *sabat.

27Ɓá tā ba kə ndɔ̄ kə́ nge ko̰ sīrí anī ngán *Israel kə́rēý gə̄ teē aw̄n̄ gidə ɓēé sāá, banī əngen̄ alé. 28Kɔ́ɔ̄ɓē əda Moijə na yá̰a̰ gə̄ ń n-əndā dɔdə́ tə́ kadə̄ rāān̄ ō, yá̰a̰ gə̄ ń ndū najə̄ yān gə̄ ədan̄ kadə̄ rāān̄ ō ní ké a mbātə́n̄ rāā i ta kaw̄ rə́ngáý tə́ wa. 29Na yá̰á̰ ń majə kadə̄ gerə̄n̄ ní n toó, na n-adə̄də́ ndɔ̄ *sabat i yā kadə̄ kə ɔrə̄n̄neé koō, na i tām̄ najə̄ ń noō tə́ n na n-adə̄ńdə́ yá̰a̰ kəsa kum ta ndɔ̄ jōó kə ndɔ̄ kə́ nge ko̰ mehḛ́ ní. Kə ndɔ̄ kə́ nge ko̰ sīrí anī, kə ndin̄ gotə kógə̄ḿ, kadə̄ deē teē ndágá alé. 30Adə̄ ngán *Israel gə̄ ɔrə̄n̄ koō kə ndɔ̄ kə́ nge ko̰ sīrí.

31Ngán Israel gə̄ əndān̄ rī yá̰a̰ kəsa ní na i *mána. Yá̰á̰ ní to i tītə̄ kum kór beé ba ndaa ō, nel̄ tītə̄ makəla kə́ rāā kə yibə̄ tejeé ō.

32Moijə əda ngán *Israel gə̄ na Kɔ́ɔ̄ɓē əda na kə yā kɔy *mána kem kórō kógə̄ḿ yā ɓōkə́ kem yá̰á̰ yā ngɔ̄m̄ tām̄ yā ngáńdə́ gə̄ tə́ ō, ngán kaadə́ gə̄ tə́ ō, yā kadə̄ nin̄ a̰a̰n̄neé yá̰a̰ kəsa ń Kɔ́ɔ̄ɓē ngɔ̄məńdə́ kem dəla loo tə́ dan ń teēń sedə́ kem ɓē kə́ Ejiptə tə́ kɔ̄ɔ́ ní. 33Gō tə́ anī Moijə əda *Aaro̰ na kə ɔy mána kem kórō kógə̄ḿ, kə ɓōkə́ kem ngōn̄ jóo ngɔ̄m̄ yá̰á̰ kə́rēý tə́, kə əndā ta kum Kɔ́ɔ̄ɓē tə́ tām̄ yā ngáńdə́ gə̄ tə́ ō, ngán kaadə́ gə̄ tə́ ō. 34Tītə̄ ń Kɔ́ɔ̄ɓē ədań Moijə ní, Aaro̰ əndā jóó ní no bar mbal̄ ń ndangən̄ ndū najə̄ gidə tə́ ní, yā ngɔ̄məń *mána ní.

35Ngán Israel gə̄ əsan̄ *mána ɓāl̄ kutə sɔ́. Əsan̄ bátə́ ugə̄n̄neé dɔ nang kə́ de gə̄ ndin̄ tū tə́ tə́. I mána n əsan̄ bátə́ ugə̄n̄neé dɔ nang kə́ Kanaan tə́ ní.

36*Mána kem kórō kutə gidə i mí a rosə səmbē bo kógə̄ḿ.

Currently Selected:

Teē Ngán Israel gə̄ 16: BS

Highlight

Compare

Copy