Teē Ngán Israel gə̄ 20

Ndū najə̄ kə́ kutə kógə̄ḿ gə̄

(Á̰a̰ī Ndū 5.6-21)

1Najə̄ ń Nə́ɓā əda ngán *Israel gə̄ ní n toó#20.1 K. 1: Á̰a̰ī Ndū 3.6-21.:

2Ɓē kə́ Ejiptə ń ḭ̄ i ɓəlo tū tə́ ní, i mā Kɔ́ɔ̄ɓē Nə́ɓā yāí ń m̄-teē seí kɔ̄ɔ́ kemeé ní.

3Ā ī-ndɔ̄ȳ nə́ɓā kə́ rang alé, i mā ngóy n ā ī-ndɔ̄ȳm̄ ní.

4Ā údə ɓesə̄ kə́ to tītə̄ yá̰á̰ kə́rēý kə́ dɔ rā̰ tə́ aĺ ō, kə́ dɔ nang tə́ aĺ ō, kə́ kum man̄ tə́ gíŕ nángāá aĺ ō. 5Ā ɔ́sə noí nang tə́ nodə́ tə́ aĺ ō, ā ī-rāā kəla ādə̄də́ aĺ ō. Tɔdɔ̄ mā i Kɔ́ɔ̄ɓē Nə́ɓā yāí ō, mā i Nə́ɓā kə́ nge rāā jang ō#20.5 Nge rāā jang: Israel gə̄ rāān̄ rɔ̄də́ i dəyá̰ tə́ tām̄ yā Kɔ́ɔ̄ɓē tə́, adə̄ ré nin̄-ndɔ̄ȳn̄ ɓesə̄ gə̄ ń i nə́ɓā kə́ rang gə̄ ní anī, Nə́ɓā a rāā jang tām̄ yādə́ tə́.. Ré de kə́rēý mbātə́ najə̄ taḿ tə́ anī, m-ā m-ādə̄ yá̰á̰ kə́ tōr̄ a reē dɔ kɔ́ɔ̄ tə́ ō, dɔ ngánən gə̄ tə́ ō, dɔ ngán kaan gə̄ tə́ ō, dɔ ngán kaa gugūn gə̄ tə́ ō, dɔ ngán kaa dɔgən gə̄ tə́ ō. 6Banī de gə̄ ń tármə̄n̄ ō, rāān̄ yá̰a̰ gə̄ ń m-ə́dádə́ kadə̄ rāān̄ ō ní, m-ā m̄-rāā kem majə sedə́ ō, kə dūbə̄ gír kojə yādə́ gə̄ malang ń a reēn̄ ɓáý ní ō.

7Ā ī-ɓāŕ rīḿ kanjə̄ kumən alé, tɔdɔ̄ deē ń a ɓāŕ rīḿ kanjə̄ kumən ní, mā Kɔ́ɔ̄ɓē Nə́ɓā yāí m-ā m-ə́ya̰n karī alé.

8Ādə̄ dɔí ndígə̄nal dɔ ngɔ̄m̄ ndɔ̄ *sabat tə́ tām̄ yāḿ tə́ alé. 9Ā ī-rāā kəla yāí gə̄ malang ndɔ̄ mehḛ́, 10ba ndɔ̄ kə́ nge ko̰ sīrí i ndɔ̄ *sabat tām̄ yā Kɔ́ɔ̄ɓē Nə́ɓā yāí tə́. Ndɔ̄ ń noō tə́ ḭ̄ ō, ngání gə̄ ō, ngé kəla yāí kə́ dəngam gə̄ ō, kə́ dəyá̰ gə̄ ō, yá̰a̰ kul̄ yāí gə̄ ō, tə̄rā kə́ nge nam̄ ń ndi ɓēé looí ní ō, ā ī-rāāī kəla alé. 11Tɔdɔ̄ dɔ rā̰ ō, dɔ nang ō, bā bo ō, yá̰a̰ malang kə́ tū tə́ gə̄ ō ní, m̄-rāādə́ i kem ndɔ̄ mehḛ́, ba m-ɔ̄r̄ koō i kə ndɔ̄ kə́ nge ko̰ sīrí. I tām̄ najə̄ ń noō tə́ n mā Kɔ́ɔ̄ɓē m-ə́dań najə̄ kə́ majə dɔ ndɔ̄ *sabat tə́ ō, m̄-ndigəń kadə̄ ɔr̄nən̄ tayā tām̄ yāḿ tə́ ō ní.

12Ī-rɔȳ bɔbí nin̄ kə kó̰ó̰í, kadə̄ ī-ndiń kə kumií ta kaw̄ jóo dɔ nang ń Kɔ́ɔ̄ɓē Nə́ɓā yāí adī tə́ ní.

13Ā ī-tɔ̄l̄ deē alé.

14Ā ī-sāāī naā loo kaya tə́ alé.

15Ā ī-ɓogə alé.

16Ā ī-sor̄ dɔ madí tə́ alé.

17Ā ī-ndə̄ngā yá̰a̰ yā madí, adə̄ i kújə yān aĺ ō, nə̄yá̰n al̄ ō, nge kəla yān kə́ dəngam al̄ ō, nge kəla yān kə́ dəyá̰ al̄ ō, man̄g yān aĺ ō, kərō yān aĺ ō#20.17 K. 17: Á̰a̰ī Rom 13.8.

18Ngán Israel gə̄ malang oōn̄ kōō man̄ ń ndang ní ō, oōn̄ kōō tōw̄ ní ō, a̰a̰n̄ man̄ ń tel̄ ní ō, a̰a̰n̄ sa hor ń əɓa dɔ mbal̄ tə́ ní ō. Anī ɓōĺ rāādə́ adə̄ ndewn̄ yakə yakə ō, ran̄ sa̰y ō. 19Nin̄-ədan̄ Moijə na kə nəkɔ́ kə ɔr̄ najə̄ sedə́ anī n-a n-oōn̄, ba kadə̄ Nə́ɓā kə ɔr̄ najə̄ sedə́ to̰ alé na sōgə́ n-oyn̄. 20Moijə tél ədadə́ na kə lōōn̄ ɓōĺ, tɔdɔ̄ Nə́ɓā reē na i nāādə́ tə́ yā kadə̄ ɓōlə́n̄ ndílən ɓáa kə rāān̄ majaĺ alé. 21Ngán Israel gə̄ ran̄ sa̰y, ba Moijə tá ndɔ́tə̄ kə̄ kadə kil̄ man̄ kə́ ndul kíndíńg ń Nə́ɓā i tū tə́ ní tə́.

Ndū najə̄ kə́ dɔ loo tun̄ yá̰á̰ tə́

22Kɔ́ɔ̄ɓē əda Moijə na: Yá̰á̰ ń kadə̄ ə́da ngán Israel gə̄ ní n toó:

Sḭḭ̄ kɔ́ gə̄ á̰a̰ī kadə̄ m̄-ndi i dɔ rā̰ tə́ n m-ɔ̄rəń najə̄ sesí ní. 23Ā ī-rāāmī i nə́ɓā kə́ rāā kə gində̄ arjā̰a̰á̰ tə́ aĺ ō, nə́ɓā kə́ rāā kə́ lɔ́rɔ́ tə́ aĺ ō. Ā ī-rāāī nə́ɓā gə̄ ń noō tām̄ yāsí tə́ alé. 24Ā ī-rāāī *loo tun̄ yá̰a̰ kə nángāá yā kadə̄m̄. A ī-ndējə̄mī *yá̰a̰ tun̄ kə́ róō horoó gə̄ ō, *yá̰a̰ tun̄ gə̄ kə́ tām̄ yā kem kógə̄ḿ tə́ ō, i dɔ *loo tun̄ yá̰á̰ ní tə́. I batə̄ yāsí gə̄ ō, bə̄yā̰ yāsí gə̄ ō, man̄g yāsí gə̄ ō n ā ī-tɔ̄lī yā tun̄ dɔ tə́ kadə̄m̄ ní. Loo gə̄ ń m-ā m̄-rāā kadə̄ əga kemsí dɔḿ tə́ tū tə́ ní, m-ā m-āw̄ rɔ̄sí tə́ yā rāā majə sesí tū tə́. 25Ré ā ī-rāāī *loo tun̄ yá̰a̰ kə ngán mbal̄ gēé yā kadə̄m̄ anī, ī-lōōī rāā kə ngán mbal̄ kə́ tɔ́sə̄ kadə gēé, tɔdɔ̄ ré ī-tɔ́sī kadə kə gindīí anī, a majə tām̄ yā kəla kə́ táĺ tə́ to̰ alé. 26Ā ī-rāāī *loo tun̄ yá̰a̰ yāḿ i kanjə̄ loon kə́ yā kalə̄ń kə̄ dɔɔ́ gə̄, na sōgə́ deē ra nang tə́ anī a̰a̰ gír nge kal̄ kə̄ dɔɔ́.

Currently Selected:

Teē Ngán Israel gə̄ 20: BS

Highlight

Compare

Copy