Teē Ngán Israel gə̄ 21

Ndū najə̄ kə́ tām̄ yā ɓəlo Hebəro gə̄ tə́

1Ndū najə̄ gə̄ ń kadə̄ ɔ́jə́ ngán *Israel gə̄ ní n toó: 2Ré ī-mangiī ɓəlo hebəro anī, a rāā kəla ɓəlo ɓāl̄ mehḛ́. Ɓāl̄ kə́ nge ko̰ sīrí anī, a teē ɓəloó kɔ̄ɔ́ kanjə̄ kəgā yá̰á̰ kógə̄ḿ. 3Ré aw̄ ɓəloó i kə kérneé anī, a teē i kə kérneé ō. Ba ré aw̄ i kə dəyá̰ anī, a teēn̄ i jī naā tə́ kə nə̄yá̰neé. 4Ré i kɔ́ɔ̄n n taā dəyá̰ adə̄n, adə̄ dəyá̰ ní ojə ngáń kə́ dəngam gə̄ aláa kə́ dəyá̰ gə̄ seneé anī, dəyá̰ gə̄gē ngán gə̄ gə̄gē a ndin̄ gotoó tām̄ yā kɔ́ɔ̄ ɓəlo ní tə́, i ɓəlo kə kérneé ngóy n a teē yā kaw̄ ní. 5Ba ré ɓəlo ní əda na n-gḛy kɔ́ɔ̄n ō, nə̄yá̰n ō, ngánən gə̄ ō, adə̄ na n-ndigə teē ɓəloó aĺ anī, 6kɔ́ɔ̄n a aw̄ seneé ta róbə́ kújə́ tə́ ta kum Nə́ɓā tə́, yā kəndā mbīn tū kāgə̄ ta róbə́ kújə́ tə́ yā mbutə kə nēmé. Loo ń noō tə́ ni a tél ɓəlo yā kɔ́ɔ̄n i kə́ kə́ njɔ́ḿ gə̄ tə́ gə̄ tə́.

7Ré de kə́rēý igə kə ngōnən kə́ dəyá̰ kə́ ɓəlo tə́ anī, ngōn̄ ní a teē ɓəloó i tītə̄ ń dəngam gə̄ a teēn̄neé ɓəloó ní alé. 8Ré kɔ́ɔ̄n mangən əlan dan nə̄yá̰n gə̄ tə́ kadə̄ tél nə̄yá̰n, tá tél nelə̄n seneé to̰ aĺ anī, ni a əya̰ bɔbə̄ ngōn̄ kə́ dəyá̰ ní kadə̄ gān̄g dɔn, tɔdɔ̄ ni-aw̄ kə tɔ́gə kigə seneé jī tə̄rā gə̄ tə́ alé, aĺ ɓáa rāā i majaĺ kə́ ngá̰ý seneé. 9Ré mangən i yā kadə̄n kə ngōnən kə́ dəngameé anī, i yá̰á̰ ń a rāān̄ kə ngáń kə́ dəyá̰ gēé ní n a rāā seneé ní ō. 10Ré taā dəyá̰ kə́ rang anī, a kēgə̄ ta yá̰a̰ yā nge kə́ kété alé, a kēgə̄ yá̰a̰ kəsa yān aĺ ō, ta kūbə̄ yān aĺ ō, a asən ɓīī seneé aĺ ō. 11Ré adə̄n yá̰á̰ kə́ gír mətá gə̄ ń noō aĺ anī, ngōn̄ kə́ dəyá̰ ní a asə teē kaw̄ loo yān kanjə̄ kəgā nar.

Yá̰á̰ kə́ majaĺ gə̄ kə́ deē rāā anī dəngáyn i yo

12Deē ń ənda deē tɔ̄l̄ ní, a tɔ̄lə̄n̄ kɔ́ɔ̄ ō. 13Ba ré deē ń tɔ̄l̄ deē ní núm̄ tɔ̄lən kemən tə́ kété alé, ba i Nə́ɓā n əla nge yo ní jīn tə́ anī, m-ā m-ɔ́jə́sí loo ń kadə̄ a̰ȳ aw̄ tū tə́ ní. 14Ba ré deē núm̄ madə̄n kemən tə́ tá tɔ̄lən kə kum kedēé anī, ká ré a̰ȳ nam̄ i *loo tun̄ yá̰a̰ yāḿ gə̄gē anī, ā ɔ̄rīin̄ kə̄ gogə́ yā tɔ̄lən.

15Deē ń ənda bɔbə̄n aláa kó̰o̰n ní, a tɔ̄l̄nən̄ kɔ̄ɔ́.

16Deē ń ɓogə deē ndul ní, a tɔ̄l̄nən̄ kɔ̄ɔ́, ká igə seneé kɔ̄ɔ́ aáā, ká əngenən̄ ɓēé looneé ɓáý gə̄gē anī, a tɔ̄l̄nən̄ kɔ̄ɔ́.

17Deē ń tájə̄ bɔbə̄n aláa kó̰o̰n ní, a tɔ̄l̄nən̄ kɔ̄ɔ́.

Ndéy gə̄ kə do gə̄

18Tītə̄ ń toō de gə̄ ra a kɔ̄lə̄n̄ naā á deē kógə̄ḿ ɓir̄ jīn əndań madə̄n, aláa ənīn kə mbalá, tá ré madə̄n ní oy alé ba rɔ̄n tōrə̄n adə̄ to tə̄rá mo̰yo̰ó̰, 19tá ḭḭ tɔ́sə̄ kāgə̄ teēń ndágá anī, deē a rāā yá̰a̰ kə nge kəndaneé alé, ɓá tā ba nge kəndan a əgān ndɔ̄ gə̄ ń ni toń mo̰y nang tə́ ní ō, a əgā kə̄rā dáwá gə̄ ń rāānən̄neé mo̰y á rɔ̄n ngangə̄ń ní ō.

20Ré de kə́rēý ənda ɓəlo yān kə́ dəngam aláa kə́ dəyá̰ kə kāgāá adə̄ oy anī, a rāān̄ ba̰ā̰n. 21Ba ré ɓəlo ní oy alé, adə̄ rāā ndɔ̄ kógə̄ḿ aláa ndɔ̄ jōó anī, deē a rāā ba̰ā̰n alé, tɔdɔ̄ ni i yá̰a̰ yā kɔ́ɔ̄n.

22Ré de kə́ dəngam gə̄ ra a rɔ̄ɔ̄n̄ naā tá mbəren̄ dəyá̰ kə́ kə kemeé adə̄ ɔr̄ ngōn̄ kə́ ndɔ̄n asə alé, ba yá̰á̰ kə́ to kum kaȳ aĺ teē dɔ dəyá̰ ní tə́ aĺ anī, deē ń najə̄ i dɔn tə́ ní a əgā lamáń ń ngaa dəyá̰ gān̄g loo sarya tə́ ní. 23Ba ré yá̰á̰ kə́ to kum kaȳ aĺ teē dɔ dəyá̰ ní tə́ anī, a rāān̄ yá̰á̰ kə́ majaĺ kə kɔ́ɔ̄ ní ō. Ré tɔ̄l̄ i deē a, a tɔ̄l̄nən̄ ō, 24tɔ̄ɔ̄ i kum deē a, a tɔ̄ɔ̄n̄ kumən ō, ɔr̄ i ngān̄g deē a, a ɔrə̄n̄ ngāngən ō, tetə i jī deē a, a tetən̄ jīn ō, tetə i nja deē a, a tetən̄ njan ō, 25ɔsə i deē kə horoó a, a ɔsənən̄ kə horoó ō, adə̄ i deē do a, a adə̄nən̄ do ō, ənda i deē a, a əndanən̄ ō.

26Ré de kə́rēý ənda kum ɓəlo yān kə́ dəngam aláa kə́ dəyá̰ adə̄ tɔ̄ɔ̄ anī, a əya̰ ɓəlo ní dɔɔ́ kum gotə kumən ní. 27Ré tetə i ngāngən anī, a əya̰n dɔɔ́ kum gotə ngāngən ní ō. 28Ré man̄g kə́ bəra ɔsə de kə́ dəngam aláa kə́ dəyá̰ adə̄ kɔ́ɔ̄ oy anī, a tə́nīn̄ man̄g ní kə mbalá yā tə́nī tɔ̄lən ō, deē a əsa dā̰n aĺ ō. Ba najə̄ a gətóo dɔ kɔ́ɔ̄n tə́. 29Ba ré man̄g ní i man̄g kə́ a tɔ́sə̄ de gə̄ kété sḛ́ý sḛ́ý, adə̄ de gə̄ ədan̄ kɔ́ɔ̄n tá kɔ́ɔ̄n ɔdə ngɔ̄mən alé adə̄ ɔsə deē tɔ̄l̄ anī, a tə́nīn̄ man̄g ní kə mbalá yā tɔ̄lən ō, a tɔ̄lə̄n̄ kɔ́ɔ̄n kɔ̄ɔ́ ō. 30Ré ndigən̄ kadə̄ kɔ́ɔ̄ man̄g ní gān̄g dɔ rɔ̄n anī, kutə nar ń a gāngə̄n̄ dɔn tə́ ní a adə̄ malang. 31Ré man̄g ní ɔsə i ngōn̄ kə́ dəngam aláa i ngōn̄ kə́ dəyá̰ n tɔ̄l̄ ní anī, i yá̰á̰ ń ndū najə̄ kə́ kógə̄ḿ beē ń toō ɔjə ní n a rāān̄ seneé ní. 32Ré man̄g ní ɔsə i ɓəlo kə́ dəngam aláa i kə́ dəyá̰ n tɔ̄l̄ anī, kɔ́ɔ̄ man̄g ní a adə̄ kɔ́ɔ̄ ɓəlo ń oy ní njár̄ sə́lē kə́ rāā kə gində̄ arjā̰a̰á̰ kutə mətá ō, a tə́nīn̄ man̄g ní kə mbalá yā tɔ̄lən ō.

33Ré de kə́rēý əya̰ ta bəlo man̄ wōyōó, aláa ndēr̄ bəlo man̄ ba utə̄ ta alé adə̄ man̄g aláa kərō əsō kemeé anī, 34kɔ́ɔ̄ a əgā kə̄rā dā̰ ń oy ní. A adə̄ kɔ́ɔ̄ dā̰ ní nar, ba nīń dā̰ ní i tām̄ yān tə́.

35Ré man̄g yā de kə́rēý ɔsə man̄g yā madə̄n tɔ̄l̄ anī, a igən̄ kə nge ń ra kə kumneé ní yā kēgə̄ naā nar gírən ō, a kēgə̄n̄ naā dā̰ nge ń oy ní ō. 36Ba ré man̄g ní i man̄g kə́ rɔ̄ɔ̄ kété sḛ́ý sḛ́ý adə̄ de gə̄ gerə̄n̄ tá kɔ́ɔ̄n ɔdə ngɔ̄mən aĺ anī, kɔ́ɔ̄n a adə̄ man̄g kə́ kə kumuú kógə̄ḿ kum gotə nge ń oy ní ō, nīń nge ń oy ní i tām̄ yān tə́ ō.

Dā̰ kə́ ɓogə

37Ré de kə́rēý ɓogə man̄g aláa batə̄ aláa bə̄yā̰, tɔ̄l̄ aláa igəń anī, kɔ́ɔ̄ a adə̄ man̄g mí kum gotə man̄g ní ō, batə̄ sɔ́ kum gotə batə̄ ní ō, bə̄yā̰ sɔ́ kum gotə bə̄yā̰ ní ō.

Currently Selected:

Teē Ngán Israel gə̄ 21: BS

Highlight

Compare

Copy