Teē Ngán Israel gə̄ 22

1Ré teēn̄ dɔ nge ɓogə tə́ ndɔ̄ɔ́ loo mbutə kum loo tə́ ba ənda tɔ̄l̄nən̄ anī, deē a rāā ba̰ā̰ mósən alé. 2Ba ré mbang əɓa dɔn tə́ tá ənda tɔ̄l̄nən̄ anī a rāān̄ ba̰ā̰ mósən. Nge ɓogə a əgā kə̄rā yá̰á̰ ń ɓogə ní. Ré ənge yá̰á̰ kə́ yā kəgāń kə̄rā aĺ anī, a igən̄ seneé yā kəgāń kə̄rā yá̰á̰ ń ɓogə ní. 3Ré əngen̄ dā̰ ń ɓogə ní kə kumuú jīn tə́, ká i man̄g aáā kərō aáā batə̄ aáā bə̄yā̰ aáā, a tél kə dā̰ ń ɓogə ní yā kadə̄ kɔ́ɔ̄n gogə́ ō, a adə̄ kə́ rang dɔ tə́ ō.

Yá̰a̰ yā de kə́ nujəń

4Ré de kə́rēý əya̰ dā̰ yān adə̄ əsa yá̰á̰ kə́ kem ndɔr̄ yā madə̄n tə́, aláa adə̄ əsa yá̰á̰ kə́ kem ndɔr̄ *kāgə̄ nduú yān tə́ anī, a əgā kə̄rā i kə yá̰á̰ kə́ kem ndɔr̄ yān kə́ teē kōō majə tə́, aláa i kə kan̄ nduú kə́ kem ndɔr̄ kāgə̄ nduú yān kə́ an̄ majə tə́.

5Ré de kə́rēý əla hor dɔ ku kōn̄ tə́ adə̄ hor aw̄ əhɔ dɔ do̰ō̰ kōō gémē gə̄, aláa o̰o̰ kōō gémē kə́ kem ndɔrɔ́ kə́ mbujə kɔ̄ɔ́ aláa kə́ mbujə aĺ ɓáý anī, deē ń əla hor loo tə́ ní a əgā kə̄rā yá̰á̰ ń hor o̰o̰ ní.

6Ré de kə́rēý ɓɔ̄ɔ̄ madə̄n nar aláa yá̰á̰ kə́rēý kə́ gātə̄n i ngá̰ý, tá deē aw̄ ɓogə, ba əhɔn̄ nge ɓogə ní anī, a əgā kə̄rā yá̰á̰ ní nja jōó. 7Ré əhɔn̄ nge ɓogə ní aĺ anī, deē ń ɓɔ̄ɔ̄nən̄ yá̰á̰ ní a ɓāŕ rī Nə́ɓā yā kadə̄ de gə̄ gerə̄n̄neé kadə̄ i ni n əndā jīn dɔ yá̰a̰ yā madə̄n tə́ alé ní. 8Tó̰ō̰ naā kə́ ɔjə dɔ man̄g ō, kərō ō, batə̄ ō, bə̄yā̰ ō, kūbə̄ ō, aláa yá̰a̰ malang kə́ ta tḭ̄ḭ̄ ń de gə̄ jōó a nējə̄n̄ naā dɔ tə́ á náā nəkɔ́ ɓáa əda na i yān ní, a aw̄n̄ kə najə̄ ní ta kum Nə́ɓā tə́. Deē ń Nə́ɓā a əhɔn kə sarya ní a adə̄ madə̄n yá̰á̰ ní nja jōó.

9Ré de kə́rēý ɓɔ̄ɔ̄ madə̄n kərō aláa batə̄ aláa bə̄yā̰ aláa dā̰ kə́ rang, tá dā̰ ní oy, aláa ənge do, aláa ngé ɓogə gə̄ reē əhɔ aw̄n̄neé kanjə̄ kadə̄ deē a̰a̰ anī, 10madə̄ ɓē deē ní a túbə kə rī Kɔ́ɔ̄ɓēé, na n-tetə jīn dɔ yá̰a̰ yā madə̄n tə́ alé. Kɔ́ɔ̄ dā̰ ní a ndigə túbə́ ní ō, madə̄ ɓēn ní a əgā kə̄rā aĺ ō. 11Ba ré ɓogən̄ dā̰ ní dɔ kum madə̄ ɓēn ní tə́ i ɓēé looneé anī a əgā kə̄rā dā̰ ní. 12Ré i dā̰ kə́ bembeé n əhɔ dā̰ ní anī, madə̄ ɓēn a reē kə gotə dā̰ ń yá̰a̰ əhɔ ní yā kɔjə, ɓáa a əgā kə̄rā alé.

13Ré de kə́rēý ndə̄mā dā̰ yā madə̄ ɓēn, tá dā̰ ní ənge do aláa oy gotə kɔ́ɔ̄n tə́ anī, nge ndə̄mān a əgā kə̄rā. 14Ba ré kɔ́ɔ̄ dā̰ ní i kum tə́ anī, nge ndə̄mā dā̰ ní a əgā kə̄rā alé. Ré ndə̄mā dā̰ ní i kə naraá anī, nar ń ndə̄mań ní a to kum gotə.

Ndū najə̄ kə́ dɔ háĺ kə́ dáńg dáńg gə̄ tə́

15Ré de kə́rēý gól̄ ngōmandə kə́ deē nongən aĺ ɓáý ɓīī seneé anī, kɔ́ɔ̄ a taā ngōmandə ní ō, a adə̄ bɔbə̄n ní nar ń a adə̄n̄ gír ngámandə gə̄ tə́ ní ō. 16Ré bɔbə̄ ngōmandə ní ɔgə̄n ngōnən gə̄gē anī, a adə̄n nar ń a adə̄n̄ ní.

17Ā ə́ya̰ī dəyá̰ kə́ nge rāā kəga kadə̄ ndi kə kumneé alé.

18Deē ń ɓīī kə dā̰á̰ ní, a tɔ̄l̄nən̄ kɔ̄ɔ́.

19Deē ń *tun̄ yá̰a̰ adə̄ Kɔ́ɔ̄ɓē ngóy alé ba *tun̄ yá̰a̰ adə̄ ɓesə̄ gə̄ ō ní, a tɔ̄l̄nən̄ kɔ̄ɔ́.

20Tə̄rā kə́ ngé nam̄ gə̄ ń ndin̄ sesí ní, ā ī-rāāīdə́ majaĺ aĺ ō, ā ə́saī tətōdə́ aĺ ō, tɔdɔ̄ kété sḭḭ̄ i ngé nam̄ gə̄ dɔ nang kə́ Ejiptə tə́.

21Dəyá̰ kə́ ngaa koy gə̄ ō, ngán hal gə̄ ō ní, ā ī-rāāī kumdə́ ndoō tə́ alé. 22Ré ī-rāāī kumdə́ ndoō tə́ adə̄ ɓāŕmə̄n̄ mā Kɔ́ɔ̄ɓē kadə̄ m̄-dḭḭ̄də́ anī, m-ā m-ōō ɓār̄ yādə́.

23Wōn̄g a rāām̄ dɔsí tə́ ō, m-ā m̄-rāā kadə̄ ā óyiī ta rɔ̄ɔ̄ tə́ ō, yā kadə̄ i nə̄yá̰sí gə̄ n a télən̄ dəyá̰ kə́ ngé kəlā ndoō gə̄ ō, i ngáńsí gə̄ n a aw̄n̄ hal ō ní. 24Ré ādī ngōn̄ nge ɓē madə̄sí kə́ nge ndoō nar loo tə̄nā tə́ anī, ī-lōōī rāā yá̰a̰ tītə̄ ngé kadə̄ de gə̄ yá̰a̰ kūl̄ tə́ gə̄ ō, ī-lōōī dəjen manə̄n dɔ tə́ ō. 25Ré ī-taā kūbə̄ yā madí kə́ tə̄nāīneé yá̰a̰ anī, ī-téləń ādə̄n gogə́ pá tá ādə̄ mbang udə ɓáý. 26Tɔdɔ̄ yá̰á̰ kə́ rang kə́ kadə̄ ənī dɔn tə́ gətóo, i kūbə̄ nəkɔ́ ń noō ngóy. Ré ɔ̄gə̄n anī, a ənī i rī dɔn tə́? Loo ń a ɓārə́m̄ kadə̄ m̄-dḭḭ̄n anī, m-ā m-ōō ɓār̄ yān tɔdɔ̄ mā i Nə́ɓā kə nge ka̰a̰ kum tō ndoō yā deē.

27Ā ī-tájə̄ Nə́ɓā aĺ ō, ā ī-ndɔ̄ĺ deē ń i ngār kə́ dɔ gír deē yāí gə̄ tə́ ní aĺ ō.

28Ā ɔ́r bā̰ā̰ loo reē tə́ kə kōō yāí ō, kə kan̄ *kāgə̄ nduú yāí ō, kə́ tām̄ yāḿ tə́ alé. Ā ādə̄m̄ ngōn̄ hágí kə́ dəngam. 29A ādə̄m̄ hágə man̄g yāí ō, hágə batə̄ yāí ō, hágə bə̄yā̰ yāí ō. Ā rāā ndɔ̄ sīrí gíŕ kó̰ó̰ tə́, ba ndɔ̄ kə́ nge ko̰ sɔ́sɔ́ anī ā ādə̄m̄ seneé.

30Ā ī-téliī de kə́ *táĺ gə̄ tām̄ yāḿ tə́. Ā ə́saī dā̰ kə́ yá̰a̰ əhɔ alé. Ā ādī i bísə gə̄.

Currently Selected:

Teē Ngán Israel gə̄ 22: BS

Highlight

Compare

Copy