Teē Ngán Israel gə̄ 23

Haĺ kə́ súmūú kə́ yā rāā kə de gə̄ malang

1Ā ə̄nī gotə najə̄ kə́ rɔ̄kum aĺ kə̄ loo gə̄ tə́ aĺ ō, ā ə́da najə̄ kə́ rɔ̄kum aĺ loo sarya tə́ yā kənīń najə̄ gír nge rāā majaĺ tə́ aĺ ō. 2Ā ún gō de kə́ ngá̰ý gə̄ yā rāań majaĺ alé. Loo ń ā ɔ̄r̄ najə̄ dɔ yá̰á̰ kə́ ḭ̄ i kum tə́ tə́ loo sarya tə́ anī, ā ī-tetə rɔ̄í gō de kə́ ngá̰ý gə̄ tə́ yā kɔrə̄ń najə̄ kə́ rɔ̄kum aĺ alé. 3Ā ī-rāā kə de kə́ nge rɔ̄ tō ndoó loo sarya tə́ kadə̄ teēń kum tə́ alé. 4Ré ī-teē dɔ man̄g tə́ aláa i dɔ kərō yā madə̄ ba̰ā̰í kə́ ta tḭ̄ḭ̄ tə́ anī, ə́hɔ ī-reēń ādə̄n. 5Ré á̰a̰ kərō yān əsō kə yá̰á̰ gidən tə́ anī, ī-lōō tīl̄ ba āw̄ únən seneé kə̄ dɔɔ́. 6Ā ī-nujə najə̄ yā nge rɔ̄ tō ndoō yāí loo sarya tə́ alé. 7Ā ī-nēl̄ mbīí yā koōń najə̄ kə́ sor̄ gə̄ alé. Ā ī-gān̄g sarya yo dɔ de kə́ najə̄ gətóo dɔn tə́ tə́ aĺ ō, dɔ de kə́ súmūú tə́ aĺ ō, tɔdɔ̄ deē ń najə̄ əhɔn ní, mā m-ā m̄-rāān de kə́ kanjə̄ najə̄ dɔn tə́ tə́ alé. 8Ā ī-taā kadə̄ karī yā deē alé, tɔdɔ̄ i yá̰á̰ kə́ a tɔ̄ɔ̄ kum de kə́ nge ka̰a̰ loo ō, a nujə najə̄ yā de kə́ súmūú ō.

9Ā ī-rāā kum tə̄rā kə́ nge nam̄ ndoō tə́ alé. Yá̰á̰ kə́ tōr̄ ń a rāā de kə́ nge nam̄ ní sḭḭ̄ kɔ́ gə̄ ī-gerī mbak, tɔdɔ̄ kété sḭḭ̄ i ngé nam̄ gə̄ dɔ nang kə́ Ejiptə tə́ ō.

Ɓāl̄ kɔr̄ koō ō, ndɔ̄ kɔr̄ koō ō

10Ā ī-dubə̄ yá̰a̰ dɔ nang yāí tə́ ɓāl̄ mehḛ́ ō, ā ī-sāā kōō kə́ tū tə́ ō, 11ba ɓāl̄ kə́ nge ko̰ sīrí anī, ā ə́ya̰ dɔ nang yāí kadə̄ taā koō. Ngé rɔ̄ tō ndoō gə̄ kə́ dan gír deē yāí gə̄ tə́ a əngen̄ yá̰a̰ tū tə́ yā kəsa ō, gotən ń a na̰y ní dā̰ kə́ bembeé gə̄ a əsan̄ ō. Ā ī-rāā tītə̄ ń noō kə ndɔr̄ *kāgə̄ nduú yāí ō, kə ndɔr̄ *kāgə̄ olibə yāí ō.

12Ā ī-rāā kəla yāí ndɔ̄ mehḛ́, ba kə ndɔ̄ kə́ nge ko̰ sīrí anī ā ī-rāā kəla alé, kadə̄ man̄g yāí nin̄ kə kərō yāí taān̄neé koō ō, kadə̄ ngōn̄ nge kəla yāí nin̄ kə tə̄rā kə́ nge namāá ɔrə̄n̄neé koō ō.

13Ā ə̄ndāī kumsí gíŕ yá̰a̰ gə̄ ń m-ɔ́jə́sí kadə̄ ī-rāāī tə́ ní malang. Ā ī-ɓāríī ɓesə̄ gə̄ ń i nə́ɓā kə́ rang gə̄ ní kadə̄ dḭḭ̄n̄sí aĺ ō, ādī deē oō rīdə́ tasí tə́ aĺ ō.

Nāā gə̄ kə́ kadə̄ ngán Israel gə̄ rāān̄

(Á̰a̰ī Teē 34.18-26; Ndū 16.1-17)

14Ā ī-rāāī nāā nja mətá kə dɔ ɓāl̄ gēé yā rɔȳm̄neé. 15Ā ī-rāāī nāā mápá kə́ rāā kanjə̄ *kaa mápa. Ā ə́saī mápá kə́ rāā kanjə̄ kaa mápa ndɔ̄ sīrí tītə̄ ń m-ə́dańsí ní kem nāā *Abib tə́, tɔdɔ̄ ī-teēī kem ɓē kə́ Ejiptə tə́ kɔ̄ɔ́ i kem nāā ń noō tə́. Deē a reē kə̄ *loo kə́ táĺ yāḿ tə́ jīn karī alé. 16Gō tə́ anī ā ī-rāāī *nāā sāā kōō ń i nāā kəja kōō yāsí kə́ ta kəga dɔ ō, i nāā yá̰a̰ gə̄ ń ī-dubī kem ndɔrɔ́ ní ō. Ré ɓāl̄ ndɔ̄ adə̄ ī-kánī nja kōō yāsí kə́ ndɔrɔ́ gə̄ malang kɔ̄ɔ́ anī, ī-rāāī nāā kán̄ nja kōō. 17De kə́ dəngam kə́ gír yāsí tə́ gə̄ malang a reēn̄ yā ra ta kumḿ mā Kɔ́ɔ̄ɓē Nə́ɓā yāsí tə́ nja mətá kə dɔ ɓāl̄ gə̄. 18Ā ī-reēī kə mápá kə́ rāā kə *kaa mápá dɔ dā̰ kə́ yā tun̄ kadə̄m̄ tə́ alé. Ā ī-ngɔ̄mī yibə̄ dā̰ kə́ tun̄ loo tíbí kadə̄ loo tīī dɔ tə́ alé. 19Ā ī-reēī kə yá̰á̰ kə́ kijə kə́ ndɔr̄ yāsí gə̄ tə́ kem *kújə yā Kɔ́ɔ̄ɓē Nə́ɓā yāsí tə́. Ā ī-ndīrī ngōn̄ bə̄yā̰ kə mba kó̰o̰neé alé.

Nə́ɓā ənī ndūn ō, adə̄ kɔjə̄ ō

20M-ā m-ə́la *deē yāḿ kə́ dɔ rā̰ tə́ kadə̄ njə̄rā kété nosí tə́ ō, kadə̄ ngɔ̄m̄sí dɔ róbə́ tə́ ō. A ɔr nosí yā kaw̄ sesí kem ɓē ń m-ə̄ndā dɔ danaá tām̄ yāsí tə́ ní. 21Ī-raī dɔ rɔ̄sí tə́ tām̄ yān tə́, ōōī tan ba ī-lōōī mbātə́ najə̄ tan tə́, na a tə́gā tan gír dum̄ naā yāsí gə̄ tə́ alé, tɔdɔ̄ a rāā yá̰a̰ i kə rīḿ. 22Ré ōōī tan adə̄ ī-rāāī yá̰a̰ gə̄ ń m-ə́dásí ní anī, m-ā m̄-tél nge ba̰ā̰ madə̄ ba̰ā̰sí gə̄ ō, nge rɔ̄ɔ̄ ngé rɔ̄ɔ̄sí gə̄ ō. 23Ré *deē yāḿ kə́ dɔ rā̰ tə́ ɔr nosí aw̄ sesí ɓē yā *Amor gə̄ tə́ ō, Het gə̄ tə́ ō, Periji gə̄ tə́ ō, Kanaan gə̄ tə́ ō, Hibi gə̄ tə́ ō, Yebus gə̄ tə́ ō, adə̄ m̄-nujədə́ malang kɔ̄ɔ́ anī, 24ā ɔ́siī nosí nang tə́ no ɓesə̄ yādə́ gə̄ tə́ aĺ ō, ā ī-rāāī yá̰a̰ tītə̄ ń a rāān̄neé loodə́ ní aĺ ō, banī ā ī-tétī ɓesə̄ yādə́ gə̄ kɔ̄ɔ́ ō, ā ī-tɔ̄ɔ̄ī mbal̄ yādə́ kə́ túdə̄ kə nja kə́ dɔɔ́ gə̄ kɔ̄ɔ́ ō. 25Ba ré i mā Kɔ́ɔ̄ɓē Nə́ɓā yāsí ngóy n ā ī-ndɔ̄ȳmī anī, m-ā m̄-rāā majə sesí ō, m-ā m-ādə̄sí yá̰a̰ kəsa ō, man̄ ka̰ȳ ō, m-ā m̄-tə̄ɓā mo̰y kɔ̄ɔ́ dɔsí tə́ ō. 26Dəyá̰ kə́ a ɔr̄ ngōn̄ aláa dəyá̰ kə́ kujə a gətóo dɔ nang yāsí tə́ ō, m-ā m-ādə̄ ā ī-ndiī kə kumsí dan i ngá̰ý ō. 27Yá̰á̰ ń m-ā m̄-rāā ní n toó: Ré gír de gə̄ oōn̄ kadə̄ na ā ī-reēī noó anī, ɓōĺ a rāādə́ ngá̰ý ō, nápar de gə̄ malang ń ā ūgī kem ɓē yādə́ tə́ ní a a̰ȳn̄ naā nosí tə́ ō, madə̄ ba̰ā̰sí gə̄ malang a tūrə̄n̄ gándə́də́ yā kadə̄sí ba ka̰ȳ naā kɔ̄ɔ́ ō. 28M-ā m-ə́la kə gəmbā gēé kété nosí tə́ kadə̄ tə̄ɓān̄ Hibi gə̄ kə Kanaan gə̄ kə Het gə̄ kɔ̄ɔ́ pá tá kadə̄ ā ūgī ɓáý. 29Ɓá tā ba m-ā m̄-tə̄ɓā gír nápar de gə̄ ń noō malang kɔ̄ɔ́ nosí tə́ i kem ɓāl̄ kə́ kógə̄ḿ beē tə́ alé. Ré m̄-rāā tītə̄ ń noō anī, ɓē a tél ndəbā ɓē adə̄ dā̰ kə́ do̰ gə̄ a ojən̄ naā ngá̰ý kemeé, ɓáa a majə tām̄ yāsí tə́ alé. 30M-ā m̄-tə̄ɓādə́ nosí tə́ kɔ̄ɔ́ i jəke jəke yā kadə̄ ójiīneé naā ngá̰ý ī-taāīneé ɓē. 31Dɔ nang yāsí a əla gír i bā tə̄ɓā gə̄ tə́ yā kugə̄ń bā bo yā Pilistin gə̄ tə́ ō, a ḭḭ dəla loo ń mbal̄ *Sinai ra tū tə́ ní tə́ yā kugə̄ń bā Opəratə tə́ ō.

Dan ń m-ā m-ə́la de kə́ kem ɓēé gə̄ kem jīsí tə́ adə̄ ā ī-tə̄ɓāīdə́ kɔ̄ɔ́ nosí tə́ anī, 32ā ə́hɔī *madə̄ naā sedə́ aĺ ō, ā ə́hɔī madə̄ naā kə ɓesə̄ yādə́ gēé aĺ ō. 33Ā ə́ya̰īdə́ kadə̄ ndin̄ dɔ nang yāsí tə́ alé, na sōgə́ rāān̄sí adə̄ ī-mānī dɔ ndū najə̄ yāḿ. Tɔdɔ̄ ré ī-ndɔ̄yī ɓesə̄ yādə́ gə̄ anī, ā ə̄sōī kum gūmbə̄ rāā ɓesə̄ tə́.

Currently Selected:

Teē Ngán Israel gə̄ 23: BS

Highlight

Compare

Copy