Teē Ngán Israel gə̄ 24

Nə́ɓā əhɔ madə̄ naā kə ngán Israel gēé

1Kɔ́ɔ̄ɓē əda Moijə na kə al̄ dɔɔ́ kə̄ rɔ̄n tə́ dɔ mbalá, kadə̄ *Aaro̰ ō, Nadab ō, Abihu ō, nin̄ kə *kum kɔɔ̄ kə́ kutə sīrí gə̄ yā ngán *Israel gə̄, kə alə̄n̄ seneé ō. Kə ran̄ sa̰y kə ɔsən̄neé nodə́ nang tə́ non tə́. 2Gō tə́ anī kə nəkɔ́ Moijə kə reē kə kérneé, kə ndɔ́tə̄ kə̄ rɔ̄n tə́ ngɔr, ba kadə̄ madə̄n gə̄ kə reēn̄ rɔ̄n tə́ ngɔr aĺ ō, kadə̄ ngán *Israel gə̄ alə̄n̄ dɔ mbalá seneé aĺ ō. 3Moijə tél aw̄ əda ngán Israel gə̄ najə̄ gə̄ ń Kɔ́ɔ̄ɓē ɔr̄ seneé ní malang ō, yá̰a̰ gə̄ ń ədan kadə̄ rāān̄ ní malang ō. Anī ngán Israel gə̄ ədan̄ naā tə́ malang na yá̰a̰ gə̄ ń Kɔ́ɔ̄ɓē əda ní na n-a n-rāān̄ malang. 4Moijə ndang najə̄ gə̄ ń Kɔ́ɔ̄ɓē ədan ní malang. Teē kə ndɔ̄ kə́ noō anī Moijə ḭḭ dɔɔ́ kə gír looí ɓatə, rāā *loo tun̄ yá̰a̰ nja mbal̄ tə́ ō, túdə̄ ngán mbal̄ gə̄ kutə gidə i jōó kə nja kə́ dɔɔ́ tām̄ yā gír ɓē kə́ kutə gidə i jōó yā ngán Israel gə̄ tə́ ō. 5Gō tə́ anī ɔr̄ balsáa kə́ Israel gə̄ tə́ adə̄ ndējə̄n̄ Kɔ́ɔ̄ɓē *yá̰a̰ tun̄ kə́ róō horoó ō, *yá̰a̰ tun̄ kə́ tām̄ yā kem kógə̄ḿ tə́ ō. 6Moijə ɓōkə́ núsə́ mósə dā̰ gə̄ ní kem bay gə̄ tə́ ba tə́te gotə dɔ *loo tun̄ yá̰á̰ tə́. 7Gō tə́ anī un makətūbə̄ *madə̄ naā tə́da adə̄ ngán *Israel gə̄ oōn̄. Anī ngán Israel gə̄ ədan̄ na yá̰a̰ gə̄ ń Kɔ́ɔ̄ɓē ədadə́ malang ní, na n-a n-əndān̄ kumdə́ gírí yā rāā. 8Tā anī Moijə un mósə, sə̄kā dɔ ngán Israel gə̄ tə́ ba ədadə́ na kə a̰a̰n̄ mósə *madə̄ naā ń Kɔ́ɔ̄ɓē əhɔ sedə́ dɔ najə̄ gə̄ ń ɔr̄ sedə́ malang tə́ ní.

9Gō tə́ anī Moijə al̄ dɔ mbalá kə *Aaro̰ ō, Nadab ō, Abihu ō, *kum kɔɔ̄ kə́ kutə sīrí gə̄ yā ngán Israel gə̄ ō. 10Nin̄-a̰a̰n̄ Nə́ɓā yā Israel. Yá̰á̰ kə́rēý kə́ to tītə̄ mbal̄ sapir#24.10 Sapir: Á̰a̰ī tū «Kum Najə̄ kə́ Ngón̄g Ngón̄g gə̄» tə́. kə́ kɔsə̄ kə ta naá i gír njan tə́. Yá̰á̰ ní *unjə̄ njáý njáý, ɓálən to tītə̄ ɓál dɔ rā̰ kə́ a̰a̰ rá ráńg beē. 11Nə́ɓā rāā majaĺ kə ngār gə̄ yā ngán *Israel gə̄ ń noō alé. Nin̄-a̰a̰nən̄ ō, gō tə́ anī əsan̄ yá̰a̰ ō, a̰ȳn̄ ō.

Moijə əngen̄ naā kə Nə́ɓāá dɔ mbalá

12Kɔ́ɔ̄ɓē əda Moijə na kə al̄ kə̄ rɔ̄n tə́ dɔ mbalá dɔɔ́, kə ndi nang tə́ noō kadə̄ n-adə̄n bar mbal̄ gə̄ ń na n-ndang ndū najə̄ gə̄ ō, gō míndə gə̄ ō gidə tə́ yā ndóō ngán *Israel gə̄ ní.

13-14Moijə əda *kum kɔɔ̄ gə̄ yā ngán Israel gə̄ na kə ngóōn̄də́ loo ń noō tə́ kadə̄ n-tél kə n-reē kə n-əngen̄də́. *Aaro̰ ō, Hur ō, na a ndin̄ sedə́ kə̄ naā tə́. Adə̄ ré najə̄ kə to ɓáa, kə aw̄n̄neé rɔ̄də́ tə́. Moijə ɔtə al̄ dɔ mbalá nin̄ kə Jojue nge kɔsə kílən. 15Moijə a al̄ kə̄ dɔɔ́ anī, kil̄ man̄ utə̄ dɔ mbal̄ kɔ̄ɔ́. 16*Kɔsə gɔn yā Kɔ́ɔ̄ɓē taā dɔ mbal̄ *Sinai ō, kil̄ man̄ utə̄ dɔ ndɔ̄ mehḛ́ ō. Kə ndɔ̄ kə́ nge ko̰ sīrí anī, Kɔ́ɔ̄ɓē ɓāŕ Moijə dan kil̄ man̄ tə́. 17Yá̰á̰ kə́ to *kɔsə gɔn yā Kɔ́ɔ̄ɓē teē ta kum ngán *Israel gə̄ tə́ tītə̄ hor kə́ a o̰o̰ loo jam mbal̄ tə́ dɔɔ́ beē. 18Moijə udə dan kil̄ man̄ ní tə́, a al̄ kə̄ dɔ mbalá. Ni-ndi dɔ mbal̄ tə́ noō ndɔ̄ kutə sɔ́ ō, kadə kutə sɔ́ ō.

Currently Selected:

Teē Ngán Israel gə̄ 24: BS

Highlight

Compare

Copy