Teē Ngán Israel gə̄ 25

Nə́ɓā ɔjə loo rāā kújə ndin

(25-31)

Yá̰á̰ kə́ kadə̄ ngán Israel gə̄ ɔsən̄ dɔ naā tə́

1Kɔ́ɔ̄ɓē əda Moijə na: 2Ə́dá ngán *Israel gə̄ ādə̄ tɔ́sə̄n̄ dɔ yá̰a̰ naā tə́ adə̄mə̄n̄. De gə̄ malang ń a adə̄n̄ kə kemdə́ kə́ majaá ní ā ī-taā jīdə́ tə́. 3Yá̰a̰ gə̄ ń kadə̄ a adə̄n̄ ní n toó: Lɔ́r ō, gində̄ arjā̰a̰ ō, gində̄ nə̄ngá kasə ō, 4*bḭḭ̄ batə̄ kə́ kəla kum man̄ yá̰á̰ kə́ ndul gusə gusə tə́ ō, kə́ kərē bḭḭ tə́ ō, kə́ kərē pírírí tə́ ō, *lḛ́ḛ ō, bḭḭ̄ bə̄yā̰ ō, 5ndāŕ batə̄ kə́ kəla kum man̄ yá̰á̰ kə́ kərē tə́ ō, ngə̄rā kə́ ngan̄g ō, kāgə̄ akasiya ō, 6yibə̄ hor ō, yá̰á̰ kə́ kotə majə gə̄ kə́ yā rāań *yibə̄ kə́ táĺ ō, kə́ yā róō horoó ō, 7mbal̄ *beril ō, *mbal̄ kə́ gātə̄də́ i ngá̰ý kə́ rang gə̄ kə́ yā tə́la tū epod#25.7 Epod: Á̰a̰ī Teē 28.6-14. tə́ ō, tū pekətoral#25.7 Pekətoral: Á̰a̰ī Teē 28.15-30. tə́ ō. 8Ngán Israel gə̄ a rāān̄ *loo kə́ táĺ tām̄ yāḿ tə́ kadə̄ m̄-ndiń dɔ dáńdə́ tə́. 9Ā ī-rāāī kújə ndiḿ ō, ngáń gájə́ yá̰a̰ rāā kəla kə́ kemeé gə̄ ō, kadə̄ a ton̄ i tītə̄ ngé gə̄ ń m-ā m-ɔ́jiī ní.

Sandúkə ndū najə̄ gə̄

10A rāān̄ sandúkə kə kāgə̄ akasiya, kə́ ngālən i kíl jōó kə núsə ō, laan i kíĺ kógə̄ḿ kə núsə ō, ngālən kə́ kə̄ dɔɔ́ i kíĺ kógə̄ḿ kə núsə ō. 11A rāān̄ lɔ́ŕ kə́ *unjə̄ njáý njáý kemeé ō, gidə tə́ ō, a rāān̄ bɔ̄gə̄ tan kə lɔ́rɔ́ kadə̄ gīr̄ gidə əla ta naā tə́ ō. 12A rāān̄ nə̄ngá lɔ́r gə̄ sɔ́ yā tə́lá kíl sandúkə́ kə́ sɔ́ gə̄ ní tə́ njan gə̄ tə́: Jōó dām̄ kógə̄ḿ tə́ ō, jōó dām̄ kə́rēý tə́ ō. 13A tə́gān̄ sáa kāgə̄ akasiya gə̄ jōó yā rāā lɔ́r gidə tə́, 14yā tə́la tū nə̄ngá gə̄ kə́ kadə sandúkə́ ní tə́ yā kətōń. 15Ré tə́lan̄ tū tə́ oy anī, deē a ɔr̄ to̰ alé. 16Ā ī-ɓōkə́ bar mbal̄ kə́ ndang ndū najə̄ gidə tə́ gə̄ ń m-ā m-ādī ní kem sandúkə́ ní tə́.

17A rāān̄ yá̰a̰ kutə̄ ta sandúkə́ ní i kə lɔ́ŕ kə́ *unjə̄ njáý njáý. Ngālən i kíl jōó kə núsə ō, laan i kíĺ kógə̄ḿ kə núsə ō. 18A rāān̄ *de kə́ dɔ rā̰ tə́ kə́ ngé ngɔ̄m̄ loo gə̄ jōó kə lɔ́ŕ kə́ kənda kə mōó dɔ yá̰a̰ ta sandúkə́ ní tə́. A rāān̄də́ i bɔ̄gə̄ tan gə̄ tə́ dām̄ jōó, 19kógə̄ḿ dām̄ tan kə́rēý tə́ ō, kógə̄ḿ dām̄ tan nge kə́ noō tə́ ō. A rāān̄də́ i kə lɔ́ŕ kə́ kógə̄ḿ beē ń rāān̄neé yá̰a̰ ta sandúkə ní, adə̄ rāān̄də́ i tū yá̰a̰ ta sandúkə́ tə́. 20A tūrə̄n̄ kumdə́ kə̄ rɔ̄ naā tə́ yā kadə̄ a̰a̰n̄ loo kum kə̄ dɔ ta sandúkə́ ń jā̰n̄ bɔ̄gə̄də́ utə̄n̄neé dɔ ní tə́. 21Ā ə̄ndā yá̰a̰ ta sandúkə́ ní ta sandúkə́ tə́ ō, ā ī-ɓōkə́ bar mbal̄ kə́ ndang ndū najə̄ gidə tə́ gə̄ ń m-ā m-ādī ní kemeé ō. 22M-ā m-ə́ngeī i loo ń noō tə́. M-ā m̄-ndi i dɔ ta sandúkə́ tə́ dɔɔ́, dɔ dán de kə́ jōó gə̄ kə́ dɔ rā̰ tə́ kə́ ngé ngɔ̄m̄ loo gə̄ ń ndin̄ dɔ ta sandúkə́ tə́ ní, yā kədaīneé najə̄ gə̄ malang ń kadə̄ ə́dá ngán *Israel gə̄ ní.

Tábəl kəndā mápá kə́ ndējə̄

23A rāān̄ tábəl kógə̄ḿ kə kāgə̄ akasiya kadə̄ ngālən i kíl jōó ō, laan i kíĺ kógə̄ḿ ō, ngālən kə́ kə̄ dɔɔ́ i kíĺ kógə̄ḿ kə núsə ō. 24A rāān̄ gidə i kə lɔ́ŕ kə́ *unjə̄ njáý njáý ō, bɔ̄gə̄ tan gə̄ i kə lɔ́rɔ́ kadə̄ gīr̄ gidə əla ta naā tə́ ō. 25A əndān̄ kāgə̄ kə́ laan asə kə da jī deé bɔ̄gə̄ tan kə́ sɔ́ gə̄ tə́ ō, a tə́ndān̄ yá̰á̰ súūn gə̄ kə́ rāā kə lɔ́rɔ́ dɔ tə́ kadə̄ gīr̄ gidə əla ta naā tə́ ō. 26A rāān̄ nə̄ngá lɔ́r gə̄ sɔ́ yā tə́lá kílən gə̄ tə́, kadə njan kə́ sɔ́ gə̄ tə́ ngɔr. 27Nə̄ngá gə̄ ní a ran̄ i kadə kāgə̄ kə́ laan asə kə da jī deé ní tə́ ngɔr, kadə̄ a tə́lan̄ sáa kāgə̄ gə̄ tū tə́ yā kətōń tábəl ní. 28A tə́gān̄ sáa kāgə̄ akasiya gə̄ jōó yā kətōń tábəl ní, a rāān̄ gidə kə lɔ́rɔ́. 29A rāān̄ ngáń gájə́ yá̰a̰ rāā kəla gə̄ kə́ dɔ tábəl ní tə́: Səmbē kə́ laa gə̄, kə bay gə̄, kə kópə gə̄, kə bay gíŕ ɗénjéńg gə̄, kə́ yā tə́teń kasə *nduú kə́ ndējə̄ gə̄. A rāān̄ yá̰a̰ gə̄ ń noō malang i kə lɔ́ŕ kə́ *unjə̄ njáý njáý. 30A tə́ndān̄ mápa gə̄ ń ndējə̄mə̄n̄ ní i dɔ tábəl ní tə́ kadə̄ ton̄ ta kumḿ tə́ ngándáńg.

Ɗəra hor kə́ ta jīn gə̄ tɔ̄ɔ̄ sīrí

31Gō tə́ anī a rāān̄ ɗəra hor kə lɔ́ŕ kə́ *unjə̄ njáý njáý kə́ kənda kə mōó. A rāān̄ nja ɗəra hor ní ō, ta jīn gə̄ ō, bay gə̄ kə́ gíŕ hútə̄n gə̄ tə́ ō, kəron kə́ tə́nī gə̄ ō, hútə̄n gə̄ ō, i tū gində̄ lɔ́ŕ kə́ kógə̄ḿ beē tə́. 32Ta jīn gə̄ a tɔ̄ɔ̄n̄ mehḛ́ tū kāgən kə́ danaá tə́, mətá dām̄ kógə̄ḿ tə́ ō, mətá dām̄ kə́rēý tə́ ō. 33Ta jīn kə́ mehḛ́ gə̄ ní, bay kə́ tū tə́ gə̄ i mətá mətá kə dɔdə́ gēé. Bay gə̄ ní a ton̄ i tītə̄ kan̄ kāgə̄ amand gə̄. Gíŕdə́ a tə́nī kəro, ba tadə́ a hútə̄. 34Kāgən kə́ danaá nəkɔ́ tá, kadə̄ bay kə́ tū tə́ gə̄ i sɔ́. Gír bay gə̄ ní a tə́nī kəro ō, tadə́ a hútə̄ ō. 35Gír loo gə̄ ń ta jī ɗəra hor gə̄ ní a tɔ̄ɔ̄n̄ tū tə́ dām̄ jōó jōó ní a tə́nī kəro malang. 36Kəron gə̄, kə ta jīn gə̄, kə gotə rɔ̄n gə̄ malang ní, a rāān̄ i tū gində̄ lɔ́ŕ kə́ kógə̄ḿ beē tə́. Ādə̄ lɔ́ŕ ní i lɔ́ŕ kə́ *unjə̄ njáý njáý kə́ kənda kə mōó. 37A rāān̄ bay hor gə̄ sīrí yā tə́ndā ta ɗəra hor ní tə́. Ré əndān̄ hor ta bay hor gə̄ ní tə́ anī, i dām̄ loo kə́ no bay hor gə̄ ní tə́ ń a unjə̄ ní. 38A rāān̄ yá̰a̰ kūsə́ ta kəlā hor gə̄ ō, yá̰a̰ kɔy bū hor gə̄ ō, kə́ tām̄ yā ɗəra hor ní tə́ i kə lɔ́ŕ kə́ *unjə̄ njáý njáý. 39A rāān̄ ɗəra hor ní ō, yá̰a̰ rāā kəla kə́ dɔ tə́ gə̄ ō, i kə lɔ́ŕ kə́ kɔȳn i kəlōo kutə mətá. 40Ḭ̄ Moijə, ā ə̄ndā kumií gírí kadə̄ rāān̄ yá̰á̰ ní kadə̄ to tītə̄ nge ń m-ɔ́jiī dɔ mbalá laā ní.

Currently Selected:

Teē Ngán Israel gə̄ 25: BS

Highlight

Compare

Copy