Teē Ngán Israel gə̄ 26

Kújə ndi Kɔ́ɔ̄ɓē

1Ā ī-rāā kújə ndiḿ kə ta kūbə̄ kutə kógə̄ḿ kə́ əjōn̄ kə kəlā *lḛ́ḛ́ kə́ ngan̄g gēé. A tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́ yā rāań *de kə́ dɔ rā̰ tə́ kə́ ngé ngɔ̄m̄ loo gə̄ tū kūbə̄ gə̄ ní tə́. 2Ngāl̄ ta kūbə̄ kógə̄ḿ i kíl kutə jōó gidə i sɔ́sɔ́ ō, laan i kíĺ sɔ́ ō. Ngāl̄də́ ō, laadə́ ō, a asən̄ naā malang. 3A urə̄n̄ kə́ mí gə̄ ta naā tə́ pá tá a tél a urə̄n̄ kə́ mí gə̄ ta naā tə́ ɓáý to̰. 4Kə́ mí gə̄ ń urə̄n̄ ta naā tə́ ta kəga dɔ ní, a udə̄n̄ kəlā kə́ ndul gusə gusə gə̄ kum naā tə́ yā tə́la ta nge ń urə̄n̄ ta madə̄ gə̄ tə́ gō gogə́ ní ō, kə́ mí gə̄ ń urə̄n̄ ta naā tə́ gō gogə́ ní, a udə̄n̄ kəlā kə́ ndul gusə gusə gə̄ kum naā tə́ yā tə́la ta nge kə́ kété tə́ ō. 5Adə̄ kəlā kə́ ndul gusə gusə kə́ kudə̄ kum naā tə́ gə̄ ní i kutə mí ta kūbə̄ kə́ kété tə́ ō, i kutə mí ta nge kə́ ko̰ jōó tə́ ō. Kəlā gə̄ ní tadə́ a sɔɔ̄ naā jōó jōó. 6A rāān̄ nə̄ngá lɔ́r gə̄ kutə mí yā tə́la kum kəlā gə̄ ní tə́, yā kəhɔń kūbə̄ gə̄ ní ta naā tə́ kadə̄ a tél i tandā kə́ kógə̄ḿ beē.

7Gō tə́ anī a əjōn̄ kūbə̄ bḭḭ̄ bə̄yā̰ yā rāā tandā kə́ nge ko̰ jōó tə́ yā kutə̄ń dɔ kújə ndiḿ. A əjōn̄ kūbə̄ gə̄ ní i kutə gidə i kógə̄ḿ. 8Ngāl̄də́ i kíl kutə mətá ō, laadə́ i kíĺ sɔ́ ō. Ngāl̄də́ ō, laadə́ ō, a asən̄ naā malang. 9A urə̄n̄ kə́ mí gə̄ ta naā tə́ pá tá a urə̄n̄ kə́ mehḛ́ gə̄ ta naā tə́ ɓáý. A tetən̄ ta nge kə́ nge ko̰ mehḛ́ dɔ madə̄ gə̄ tə́ dām̄ kə́ ta róbə́ kújə́ tə́. 10Kə́ mí gə̄ ń urə̄n̄ ta naā tə́ kété ní a tə́lan̄ kəlā kə́ kudə̄ kum naā tə́ gə̄ kutə mí ta tə́. A tə́lan̄ i ta nge kə́ nge ko̰ mí ń urə̄n̄ ta madə̄ gə̄ tə́ gō gogə́ ní. Kə́ mehḛ́ gə̄ ń urə̄n̄də́ ta naā tə́ gō gogə́ ní, a tə́lan̄ kəlā kə́ kudə̄ kum naā tə́ gə̄ kutə mí ta tə́ ō. 11A rāān̄ nə̄ngá gə̄ kutə mí kə gində̄ nə̄ngá kasaá yā tə́la kum kəlā kə́ kudə̄ kum naā tə́ gə̄ ní tə́ yā kəhɔń kūbə̄ gə̄ ní ta naā tə́ kadə̄ télən̄ tandā kə́ kógə̄ḿ beē. 12Ngāl̄ kūbə̄ bḭḭ̄ bə̄yā̰ ní a mān̄ dɔ kújə ndiḿ, adə̄ tan a əsō kə̄ gidə tə́ ndágá kíl jōó ō, 13laan a mān̄ dɔ kújə ndiḿ adə̄ tan gə̄ a tə́sōn̄ dām̄ kadən kógə̄ḿ tə́ kíĺ kógə̄ḿ ō, dām̄ kadən kə́rēý tə́ kíĺ kógə̄ḿ ō, yā kutə̄ń dɔ. 14A utə̄n̄ gidə kūbə̄ bḭḭ̄ bə̄yā̰ ní i kə ndāŕ batə̄ kə́ kərē ō, a ənīn̄ ngə̄rā kə́ ngan̄g dɔ ndāŕ batə̄ ní tə́ ō.

15A sāān̄ kāgə̄ akasiya kə́ laa gə̄ yā túdə̄ kə nja kə́ dɔɔ́ yā kəhɔń kújə ndiḿ kə̄ dɔɔ́. 16-17Kāgə̄ gə̄ ní a ton̄ i tītə̄ naā malang: Ngāl̄də́ i kíl kutə kógə̄ḿ ō, laadə́ i kíl kógə̄ḿ kə núsə ō, a rāān̄ mɔtədə́ gə̄ kadə naā tə́ jōó jōó tadə́ gə̄ tə́ ō. 18A rāān̄də́ kutə jōó tām̄ yā kadə kújə ndiḿ kə́ dām̄ mbɔ́r ɓē kə́ geleé tə́ ō, 19a rāān̄ bir̄ njadə́ gə̄ kutə sɔ́ kə gində̄ arjā̰a̰á̰ yā tə́la tū tə́ ō. Kāgə̄ kógə̄ḿ i kə bir̄ njan gēé jōó tām̄ yā mɔtən kə́ jōó gə̄ tə́#26.19 K. 19: A rāān̄ bəlo tū bir̄ njadə́ gə̄ ní tə́ yā tə́la mɔtə kāgə̄ gə̄ ní tū tə́.. 20A sāān̄ kāgə̄ akasiya gə̄ ní kutə jōó tām̄ yā kadə kújə ndiḿ kə́ dām̄ mbɔ́r ɓē kə́ ko̰ó̰ tə́ ō, 21a rāān̄ bir̄ njadə́ gə̄ kutə sɔ́ kə gində̄ arjā̰a̰á̰ ō. Bir̄ njadə́ gə̄ ní i jōó jōó kə dɔdə́ gēé. 22A sāān̄ kāgə̄ gə̄ mehḛ́ tām̄ yā gə́lé kújə ndiḿ kə́ dām̄ kə́ no ɓē tə́ ō, 23a tél a sāān̄ kə́ rang gə̄ jōó tām̄ yā kílən gə̄ tə́ ō. 24Kə́ jōó gə̄ ní, njadə́ kə́ nang tə́ i kə́ teē, ba tadə́ kə́ dɔɔ́ i kə́ do̰ō̰ kə nə̄ngá. Kāgə̄ kə́ kíĺ tə́ kə́ jōó gə̄ ní a ton̄ i tītə̄ ń noō. 25Adə̄ kāgə̄ kə́ gə́lé kújə ndiḿ tə́ gə̄ malang i sɔ́sɔ́, kə bir̄ njadə́ gə̄ kutə gidə i mehḛ́ kə́ rāā kə gində̄ arjā̰a̰á̰. Bir̄ njadə́ gə̄ i jōó jōó kə dɔdə́ gēé.

26Gō tə́ anī a njárə̄n̄ kāgə̄ akasiya gə̄ yā rāā bagétə́ tə́, bagétə́ mí tām̄ yā kāgə̄ gə̄ kə́ kadə kújə ndiḿ tə́ kə́ dām̄ kə́ kógə̄ḿ tə́ ō, 27bagétə́ mí tām̄ yā kāgə̄ gə̄ kə́ kadə kújə ndiḿ tə́ kə́ dām̄ kə́rēý tə́ ō, bagétə́ mí tām̄ yā kāgə̄ gə̄ kə́ gə́lé kújə ndiḿ tə́ dām̄ kə́ no ɓē tə́ ō. 28Bagétə́ kə́ danaá ń a ḭḭ dām̄ kógə̄ḿ tə́ yā kugə̄ dām̄ kə́rēý tə́ ní a do̰ō̰n̄ i ɓōdə̄ kāgə̄ gə̄ ní tə́. 29A rāān̄ lɔ́r gidə kāgə̄ gə̄ ní tə́ ō, nə̄ngá gə̄ kə́ tū tə́ kə́ yā kadə̄ tə́lan̄ bagétə gə̄ tū tə́ ní a rāān̄ i kə lɔ́rɔ́ ō, bagétə gə̄ ní a rāān̄ lɔ́r gidədə́ tə́ ō. 30A rāān̄ kújə ndiḿ kadə̄ to tītə̄ nge ń m-ɔ́jiī dɔ mbalá laā ní.

31Gō tə́ anī a əjōn̄ kūbə̄ kə́ yā gāngəń gír loo kə kəlā *lḛ́ḛ́ kə́ ngan̄g gēé. A tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́, yā rāań *de kə́ dɔ rā̰ tə́ kə́ ngé ngɔ̄m̄ loo gə̄ tū kūbə̄ gə̄ ní tə́. 32A do̰ō̰n̄ kūbə̄ ní tū kāgə̄ gə̄ kə́ kem kújə ndiḿ tə́ i kə máyá̰ lɔ́r gēé. Kāgə̄ gə̄ ní i sɔ́ ō, bir̄ njadə́ gə̄ kə́ rāā kə gində̄ arjā̰a̰á̰ i sɔ́ ō. Kāgə̄ gə̄ ní i kāgə̄ akasiya gə̄ kə́ rāān̄ lɔ́r gidə tə́. 33A do̰ō̰n̄ kūbə̄ ní i gír nə̄ngá gə̄ tə́. A əndān̄ sandúkə́ ń ndū najə̄ gə̄ yā Nə́ɓā ton̄ kemeé ní i kem loo ń gāngə̄n̄ gír kə kūbə̄ ngeé ń noō ní tə́. Adə̄ kūbə̄ ní a gān̄g gír *loo kə́ táĺ naā tə́ kə *loo kə́ táĺ ngá̰ý. 34Gō tə́ anī a əndān̄ yá̰a̰ ta sandúkə́ ta sandúkə́ ń ndū najə̄ gə̄ yā Nə́ɓā i kemeé ní tə́, kem *loo kə́ táĺ ngá̰ý tə́. 35A əndān̄ tábəl i kem *loo kə́ táĺ tə́ dām̄ mbɔ́r ɓē kə́ ko̰ó̰ tə́ ō, ɗəra hor i kem *loo kə́ táĺ tə́ dām̄ mbɔ́r ɓē kə́ geleé tə́ ō, kadə̄ tadə́ sɔɔ̄ naā.

36Gō tə́ anī a əjōn̄ kūbə̄ kə́ rang tām̄ yā ta róbə́ kújə tandā tə́ kə kəlā *bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō, kə kəlā *lḛ́ḛ́ kə́ ngan̄g gēé danaá ō. 37A tə́gān̄ kāgə̄ akasiya gə̄ mí tām̄ yā kūbə̄ ní tə́. A rāān̄ lɔ́r gidə kāgə̄ gə̄ ní tə́ ō, a rāān̄ máyá̰ gə̄ kə́ yā do̰ō̰ń kūbə̄ ní tū kāgə̄ gə̄ ní tə́ i kə lɔ́rɔ́ ō, a rāān̄ bir̄ nja kāgə̄ gə̄ ní i kə gində̄ nə̄ngá kasə kə́ nō horoó ō.

Currently Selected:

Teē Ngán Israel gə̄ 26: BS

Highlight

Compare

Copy