Teē Ngán Israel gə̄ 27

Loo tun̄ yá̰a̰

1Gō tə́ anī a rāān̄ *loo tun̄ yá̰a̰ kə kāgə̄ akasiya. Ngālən i kíĺ mí ō, laan i kíĺ mí ō, ngālən gē laan gē asən̄ naā, ba ngālən kə́ kə̄ dɔɔ́ tá i kíl mətá. 2A rāān̄ gajən gə̄ ta kílən kə́ sɔ́ gə̄ tə́, adə̄ gajən gē kāgə̄ rɔ̄n gē i yá̰á̰ kə́ kógə̄ḿ beē. A rāān̄ gidə kə gində̄ nə̄ngá kasaá. 3A rāān̄ ngáń gájə́ yá̰a̰ rāā kəla gə̄ kə́ dɔ *loo tun̄ yá̰á̰ tə́ i kə gində̄ nə̄ngá kasaá malang: Yá̰a̰ kɔy kúl dā̰ gə̄gē, pél gə̄gē, səmbē gə̄gē, yá̰á̰ tɔ́sə̄ dā̰ dɔ hor tə́ gə̄gē, ganán gə̄gē. 4A rāān̄ yengəre kə gində̄ nə̄ngá kasaá, a tə́lan̄ nə̄ngá gə̄ sɔ́ kə́ rāā kə gində̄ nə̄ngá kasaá kílən kə́ sɔ́ gə̄ tə́ ō. 5A əlan̄ yengəre ní gír *loo tun̄ yá̰á̰ tə́ kadə̄ a reē ugə̄ kə̄ ɓōdə̄ gə̄ tə́ loo ń kāgə̄ kə́ ta teē kə̄ ndágá i tū tə́ ní tə́. 6A tə́gān̄ sáa kāgə̄ akasiya gə̄ jōó tām̄ yā *loo tun̄ yá̰á̰ tə́, a rāān̄ gində̄ nə̄ngá kasə gidə tə́. 7A tə́lan̄ sáa kāgə̄ gə̄ ní kum nə̄ngá gə̄ ń ran̄ kadə *loo tun̄ yá̰á̰ tə́ dām̄ jōó ní tə́ yā kətōń. 8A rāān̄ *loo tun̄ yá̰á̰ ní i kə kāgə̄ kə́ laa gēé adə̄ kemən a to. A rāān̄ kadə̄ a to i tītə̄ nge ń m-ɔ́jiī dɔ mbalá ní.

Ndogə̄ kūbə̄ gə̄ kə́ yā gāngəń gíŕ ndágə loo

9Ndágə loo a to gidə kújə ndiḿ tə́. A gāngə̄n̄ gíŕ ndágə loo ní kə ndogə̄ kūbūú. A əjōn̄ kūbə̄ gə̄ ní i kə kəlā *lḛ́ḛ́ kə́ ngangá. Ndogə̄ kūbə̄ ń a gāngə̄n̄neé gíŕ ndágə loo dām̄ mbɔ́r ɓē kə́ geleé tə́ ní, ngālən i kíĺ ɓú kógə̄ḿ. 10Ādə̄ kāgə̄ ndogə̄ i kutə jōó. A rāān̄ bir̄ njadə́ gə̄ i kə gində̄ nə̄ngá kasaá. A rāān̄ nə̄ngá kəhɔ kūbə̄ gə̄ ō, kəlā gində̄ kə́ tū tə́ gə̄ ō, i kə gində̄ arjā̰a̰á̰. 11Ndogə̄ kūbə̄ ń a gāngə̄n̄neé gíŕ ndágə loo kə́ dām̄ mbɔ́r ɓē kə́ ko̰ó̰ tə́ ní ngālən i tītə̄ ń noō ō, a əhɔnən̄ tū kāgə̄ ndogə̄ gə̄ tə́ i tītə̄ ń noō ō. 12Laa ndágə loo kə́ gīr̄ gidə *kújə yā Kɔ́ɔ̄ɓē ní kə́ dām̄ kə́ no ɓē tə́ a un i ndogə̄ kə́ ngālən i kíl kutə mí. Kāgə̄ ndogə̄ kə́ tū tə́ gə̄ i kutə kógə̄ḿ ō, bir̄ njadə́ gə̄ i kutə kógə̄ḿ ō. 13Laa ndágə loo kə́ gīr̄ gidə *kújə yā Kɔ́ɔ̄ɓē ní kə́ dām̄ kə́ gír ɓē tə́ i kíl kutə mí. Ta róbə́ kə́ yā kudəń kem *loo kə́ táĺ tə́ i dām̄ ń noō tə́. 14-15Ré deē ra ta róbə́ tə́ anī, ndogə̄ gə̄ ń gāngə̄n̄neé gíŕ ndágə loo á ran̄ dɔ jī jōó ní, ngāl̄də́ gə̄ i kíl kutə gidə i mí ō, kāgə̄ ndogə̄ kə́ tū tə́ gə̄ i mətá mətá ō, bir̄ njadə́ gə̄ i mətá mətá ō. 16A do̰ō̰n̄ kūbə̄ kə́ ngālən i kíl kutə jōó ta róbə ndogə̄ tə́. Kɔdə̄ gə̄ a əjōn̄ kūbə̄ ní i kə kəlā *lḛ́ḛ́ kə́ ngangá ō, i kə kəlā *bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō. Kāgə̄ ndogə̄ gə̄ kə́ ta róbə́ tə́ i sɔ́ ō, bir̄ njadə́ gə̄ i sɔ́ ō. 17Kāgə̄ ndogə̄ gə̄ ń a túdə̄n̄ yā gāngəń gír nja ndágə loo ní, a tṵ́ṵ̄n̄ kəlā gində̄ arjā̰a̰ gə̄ tū tə́ malang. A rāān̄ nə̄ngá kə́ tū tə́ gə̄ i kə gində̄ arjā̰a̰á̰ ō, bir̄ nja kāgə̄ ndogə̄ gə̄ ní i kə gində̄ nə̄ngá kasaá ō. 18Adə̄ ngāl̄ ta ndágə loo kə́ gīr̄ gidə kújə ndiḿ ní i kíĺ ɓú kógə̄ḿ ō, laan i kíl kutə mí ō, kūbə̄ *lḛ́ḛ́ kə́ tū ngālən kə́ kə̄ dɔɔ́ tə́ i kíĺ mí ō. A rāān̄ bir̄ nja kāgə̄ ndogə̄ kə́ tū tə́ gə̄ i kə gində̄ nə̄ngá kasaá. 19Ngáń gájə́ yá̰a̰ rāā kəla gə̄ kə́ kújə ndiḿ tə́ malang ní a rāān̄də́ i kə gində̄ nə̄ngá kasaá. Bēl̄ gə̄ kə́ yā do̰ō̰ kəlā kújə ndiḿ tū tə́ gə̄ ō, kə́ yā do̰ō̰ kəlā kāgə̄ ndogə̄ tū tə́ gə̄ ō ní, a rāān̄də́ i kə gində̄ nə̄ngá kasaá.

Yibə̄ kə́ tām̄ yā ɗəra hor tə́

20Ā ə́dá ngán *Israel gə̄ kadə̄ adə̄nī yibə̄ olibə#27.20 Olibə: I kan̄ kāgə̄ kə́ a rāān̄ yibə̄ tə́. kə́ kásə̄ kə́ *unjə̄ njáý njáý tām̄ yā ɗəra hor tə́ kadə̄ əndān̄neé hor kə dɔ ndɔ̄ gə̄. 21*Aaro̰ nin̄ kə ngánən gēé a əndān̄ ɗəra hor i kem *kújə kənge naā tə́ no kūbə̄ ń gāngə̄n̄neé gír loo ń ndū najə̄ gə̄ kə́ ndang gidə bar mbal̄ tə́ a ton̄ tū tə́ ní. Hor gə̄ ń a tə́ndān̄ ta ɗəra hor tə́ ní, a unjə̄n̄ noḿ tə́ ndɔ̄ɔ́ bátə́ kadə̄ loo tīī dɔ tə́. Nge ń noō i ndū najə̄ kə́ a to ngándáńg tām̄ yā ngán *Israel gə̄ tə́.

Currently Selected:

Teē Ngán Israel gə̄ 27: BS

Highlight

Compare

Copy