Teē Ngán Israel gə̄ 28

Kūbə̄ gə̄ yā ngé tun̄ yá̰a̰ gə̄

1Ī-ɓāŕ ngōkó̰ó̰í *Aaro̰ nin̄ kə ngánən gēé, Nadab ō, Abihu ō, Eleajar ō, Itamar ō, ādə̄ reēn̄ rɔ̄í tə́. Ɔ̄r̄ kam̄də́ tayā dan ngán *Israel gə̄ tə́ ādə̄ rāān̄ kəla *tun̄ yá̰a̰ yāḿ. 2Kɔdə̄ gə̄ a əjōn̄ kūbə̄ ngol kə́ yā ɓōĺ gidə gə̄ tām̄ yā Aaro̰ tə́. 3Ā ɔ̄r̄ najə̄ kə kɔdə̄ gə̄ malang ń m-ə́lá ndíl kum kedə̄ kemdə́ tə́ ní ādə̄ urə̄n̄ kūbə̄ gə̄ kə́ yā kadə̄ Aaro̰ əla rɔ̄n tə́ ndɔ̄ ń a ɔrə̄n̄neé kamə̄n tayā tə́ ní ō, ndɔ̄ gə̄ ń a rāań kəla *tun̄ yá̰a̰ kadə̄m̄ tə́ ní ō. 4Kūbə̄ gə̄ ń a urə̄n̄ ní i pekətoral ō, epod#28.4 Pekətoral ō, epod ō: Á̰a̰ī Teē 28.6-30 ō, kūbə̄ ngāl̄ ō, kūbə̄ kə́ rang kə́ gīndə̄ gō madə̄ tə́ kə́ rāān̄ yá̰á̰ súūn gə̄ tū tə́ ō, kūbə̄ kənda dɔ ō, kəlā kūbə̄ kə́ yā do̰ō̰ń ɓōdə̄ ō. Ngōkó̰ó̰í Aaro̰ nin̄ kə ngánən gēé a əlan̄ rɔ̄də́ tə́ yā rāań kəla *tun̄ yá̰a̰ kadə̄m̄. 5Kɔdə̄ gə̄ a əjōn̄ kūbə̄ gə̄ ní i kə kəlā *bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō, kə kəlā *lḛ́ḛ́ kə́ kídə̄ dululuú ō, kə lɔ́rɔ́ ō.

Epod

6Kɔdə̄ gə̄ a əjōn̄ epod kə kəlā *lḛ́ḛ́ kə́ ngan̄g gēé. A tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ gə̄ ní tə́. A rāān̄ yá̰á̰ súūn gə̄ tū tə́ kə lɔ́rɔ́. 7A urə̄n̄ kəlā dɔ bɔ̄gə̄ tū epod tə́ dām̄ jōó yā kadə̄ deē əlań rɔ̄n tə́. 8Kəlā ń kadə̄ deē əla epod rɔ̄n tə́ oy anī do̰ō̰ dɔ tə́ ɓōdə̄n tə́ ní, a əjōn̄ i kə yá̰a̰ gə̄ ń əjōn̄neé kūbə̄ epod ní: Adə̄ i lɔ́r ō, kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, kəlā *lḛ́ḛ́ kə́ ngan̄g ō. 9Gō tə́ anī a ɔyn̄ mbal̄ beril#28.9 Mbal̄ beril: Á̰a̰ī Mbal̄ gə̄ kə́ gātādə́ i ngá̰ý tū «Kum Najə̄ kə́ Ngón̄g Ngón̄g gə̄» tə́ gə̄ jōó yā ndang rī ngán Jakob gə̄ dɔ tə́. 10A ndangən̄ rī ngán Jakob gə̄ mehḛ́ dɔ mbal̄ kə́ ta kəga dɔ tə́, gō tə́ anī a ndangən̄ rī ngé kə́ rang gə̄ mehḛ́ dɔ mbal̄ kə́ nge ko̰ jōó tə́, kə gō ɓāl̄ kojədə́ gēé. 11I kɔdə̄ kə́ nge tɔ́sə̄ mbal̄ gə̄ n a ndang rī ngán *Israel gə̄ ní gidə mbal̄ gə̄ ní tə́, tītə̄ ń deē a ndangəń rīn tū *tambō̰o̰ yān tə́ ní. A tə́la mbal̄ gə̄ ní kem kār̄ lɔ́r gə̄ ń rāān̄ kə rī tə́ládə́ kemeé ní tə́. 12A tə́ndān̄ mbal̄ gə̄ ní dɔ kəlā gə̄ ń urə̄n̄ dām̄ jōó dɔ bɔ̄gə̄ epod tə́ ní. Mbal̄ gə̄ ní rāān̄ rɔ̄də́ i yá̰a̰ gə̄ kə́ kadə̄ əgań kem Kɔ́ɔ̄ɓē dɔ ngán Israel gə̄ tə́. Adə̄ rī ngán Israel gə̄ a to dɔ bɔ̄gə̄ *Aaro̰ tə́ ta kum Kɔ́ɔ̄ɓē tə́, dɔ ta kūbə̄ kə́ jōó gə̄ ń urə̄n̄ dɔ bɔ̄gə̄ epod tə́ ní. 13A rāān̄ kār̄ mbal̄ gə̄ kə́ jōó gə̄ ní i kə lɔ́rɔ́. 14A tə́lan̄ kəlā séń kə́ dūú yerere gə̄ jōó, kə́ rāā kə lɔ́rɔ́ tadə́ gə̄ tə́. A səren̄ kəlā sén gə̄ ní tītə̄ loo səre kəlā kə́ karī.

Pekətoral

15Gō tə́ anī kɔdə̄ gə̄ a əjōn̄ pekətoral gān̄g sarya yā Nə́ɓā kə kəlā *lḛ́ḛ́ kə́ ngan̄g gēé. A tə́lan̄ kəlā *bḭḭ̄ batə̄ kə́ ndul gusə gusə ō, kə́ kərē bḭḭ ō, kə́ kərē pírírí ō, dan kəlā *lḛ́ḛ́ kə́ ngan̄g gə̄ ní tə́. A rāān̄ yá̰á̰ súūn gə̄ tū tə́ kə lɔ́rɔ́ tītə̄ yā epod. 16Pekətoral ní i ta kūbə̄ kə́ udə̄n̄ naā tə́ adə̄ téĺ pósə́ kə́ ngālən gē laan gē asən̄ naā. Ngālən asə da jī deē mətá ō, laan asə da jī deē mətá ō. 17A tə́lan̄ *mbal̄ gə̄ kə́ gātə̄də́ i ngá̰ý gə̄ tū tə́ kə ta naá gír loo sɔ́. Gírən kə́ ta kəga dɔ i mbal̄ sarduan ō, *topajə ō, *emerodə ō. 18Gírən kə́ nge ko̰ jōó i mbal̄ esəkarbukəl ō, lajulitə ō, *jaspə ō. 19Gírən kə́ nge ko̰ mətá i mbal̄ *kalsedəwan ō, *kornalin ō, ametist ō. 20Gírən kə́ nge ko̰ sɔ́ i mbal̄ *kərijolitə ō, *beril ō, onikəs ō. A tə́lan̄ ngán mbal̄ gə̄ ní kógə̄ḿ kógə̄ḿ i kem kār̄də́ gə̄ kə́ rāā kə lɔ́rɔ́ tə́. 21A ndangən̄ rī ngán *Israel kə́ kutə gidə i jōó gə̄ gidə ngán mbal̄ gə̄ ní tə́ kógə̄ḿ kógə̄ḿ, tītə̄ ń deē a ndangəń rīn tū *tambō̰o̰ yān tə́ ní. Ngán mbal̄ kə́ kutə gidə i jōó gə̄ ní a ɔsən̄ i kum gotə gír ɓē kə́ kutə gidə i jōó gə̄ yā ngán Israel gə̄.

22A rāān̄ ngáń sén gə̄ jōó kə́ səren̄ tītə̄ loo səre kəlā kə́ karī, tām̄ yā pekətoral tə́ kə lɔ́ŕ kə́ *unjə̄ njáý njáý. 23A rāān̄ nə̄ngá lɔ́r gə̄ jōó yā tə́lá kíl pekətoral gə̄ tə́ ta tə́ dɔɔ́. 24A tə́lan̄ ta kəlā sén gə̄ kə́ dām̄ kógə̄ḿ tə́ ta nə̄ngá gə̄ ń tə́lan̄ kíl pekətoral gə̄ tə́ ní ō, 25a tə́lan̄ tan gə̄ kə́ dām̄ kə́rēý tə́ tū kār̄ mbal̄ gə̄ kə́ dɔ bɔ̄gə̄ tə́ ń rāān̄ kə lɔ́rɔ́ ní tə́ ō, adə̄ pekətoral ní a to i no tə́ kété. 26A rāān̄ nə̄ngá lɔ́ŕ kə́ rang gə̄ jōó yā tə́lá kíl pekətoral gə̄ kə́ gírí nang tə́ tə́. A tə́lan̄ i no kem pekətoral ń tūr̄ə̄n̄ kum kə̄ rɔ̄ epod tə́ ní. 27A rāān̄ nə̄ngá lɔ́ŕ kə́ rang gə̄ jōó ɓáý to̰ yā tə́lá gír kəlā gə̄ kə́ dɔ bɔ̄gə̄ epod tə́ dām̄ kə́ kété no tə́ tə́, loo ń urə̄n̄ kəlā gə̄ ní tū tə́ ní tə́. Nə̄ngá gə̄ ní a ndin̄ i dɔ kəlā epod ń a do̰ō̰n̄neé ɓōdə̄də́ ní tə́. 28Nə̄ngá gə̄ kə́ tū pekətoral tə́ ō, kə́ tū epod tə́ ō ní, a əhɔn̄də́ naā tə́ i kə kəlā kə́ ndul gusə gusuú yā kadə̄ pekətoral toń dɔ kəlā ń əhɔn̄neé dɔ epod ní tə́ gotə kógə̄ḿ kanjə̄ wél̄ kə̄ loo gə̄ tə́ dɔ epod tə́. 29Adə̄ ré *Aaro̰ a udə kem *loo kə́ táĺ tə́ anī, rī ngán *Israel gə̄ a to dɔ nganjən tə́ tū pekətoral gān̄g sarya yā Nə́ɓā tə́. Rī ngán Israel gə̄ ní rāān̄ rɔ̄də́ i yá̰a̰ kəga kem dɔ ngán Israel gə̄ tə́ kə́ a to ngándáńg ta kumḿ mā tə́. 30Ā ī-ɓōkə́ urim ō, tumim ō#28.30 Urim ō, tumim ō i wə̄lā kə́ yā túgə̄ yā gerə̄ń yá̰á̰ ń kem Nə́ɓā ndigə ní., kem pekətoral gān̄g sarya yā Nə́ɓā tə́ kadə̄ ré Aaro̰ a aw̄ kə̄ ta kum Kɔ́ɔ̄ɓē tə́ anī, ton̄ dɔ nganjən tə́, adə̄ Aaro̰ a ətō sarya yā ngán Israel gə̄ dɔ nganjən tə́ ta kum Kɔ́ɔ̄ɓē tə́ ngándáńg.

Kūbə̄ kə́ rang gə̄ yā ngé tun̄ yá̰a̰ gə̄

31A əjōn̄ kūbə̄ ngāl̄ ń Aaro̰ a əla epod dɔ tə́ ní i kə kəlā *bḭḭ̄ batə̄ kə́ ndul gusə gusuú malang. 32A rāān̄ míndən kə́ yā kadə̄ deē əlań dɔn i danaá bang. Nge kəjō kūbə̄ a əndā kūbə̄ ta míndən ní tə́ kadə̄ nder̄ na sōgə́ rə̄yā̰. 33A rāān̄ kan̄ kāgə̄ gərenadə gə̄ kə kəlā *bḭḭ̄ batə̄ kə́ ndul gusə gusuú ō, kə́ kərē bḭḭ́ ō, kə́ kərē pírírí ō, yā tə́la ta nja kūbə̄ ngāl̄ ní tə́ kadə̄ gīr̄ gidə əla ta naā tə́. A tə́lan̄ ngán ɓɔ kə́ rāān̄ kə lɔ́rɔ́ gə̄ mbo̰ō̰ kan̄ kāgə̄ gərenadə gə̄ ní tə́. 34A əlan̄ kan̄ kāgə̄ gərenadə kógə̄ḿ ō, ngōn̄ ɓɔ kógə̄ḿ ō, kan̄ kāgə̄ gərenadə kógə̄ḿ ō, ngōn̄ ɓɔ kógə̄ḿ ō, ta nja kūbə̄ ngāl̄ ní tə́ kadə̄ gīr̄ gidə. 35*Aaro̰ a əla kūbə̄ ngāl̄ ní rɔ̄n tə́ yā rāań kəla *tun̄ yá̰a̰. Ré a udə i kə̄ kem *loo kə́ táĺ tə́ ta kum Kɔ́ɔ̄ɓē tə́ anī, ngán ɓɔ gə̄ ní a ɓārə̄n̄ kadə̄ deē a oō kōōdə́ ō, ré a teē i mbée anī, a ɓārə̄n̄ kadə̄ deē a oō kōōdə́ ō. Tītə̄ ń noō ɓáa, Aaro̰ a oy alé.

36Gō tə́ anī a rāān̄ yá̰á̰ súū rɔ̄ kə́ to tītə̄ hútə̄ kāgə̄ kə lɔ́ŕ kə́ *unjə̄ njáý njáý. A ndangən̄ najə̄ ń na i: Kə́ kɔr̄ kam̄ tām̄ yā Kɔ́ɔ̄ɓē tə́ ní dɔ tə́, tītə̄ loo ndang rī deē tū *tambō̰o̰ tə́ beē. 37A əndān̄ yá̰á̰ súū rɔ̄ ní i kə kəlā kə́ ndul gusə gusuú tū kūbə̄ kənda dɔ tə́ kété no tə́. 38Aaro̰ a do̰ō̰ yá̰á̰ súū rɔ̄ ní nɔtə non tə́ ngándáńg yā kaw̄ń ta kumḿ mā Kɔ́ɔ̄ɓē tə́. M-ā m̄-ndigə *yá̰a̰ ndējə̄ gə̄ ń ngán *Israel gə̄ a reēn̄neé kadə̄m̄ tə́ ní i kə ta kūl̄ yá̰á̰ súū rɔ̄ ń noō. Ká ré ngán Israel gə̄ rāān̄ yá̰á̰ kə́ gōtə́ aĺ gə̄ loo reē tə́ kə yá̰a̰ gə̄ ń ɔrə̄n̄ kam̄ tām̄ yāḿ tə́ ní gə̄gē anī, mā Kɔ́ɔ̄ɓē m-ā m̄-ndigə.

39Gō tə́ anī a əjōn̄ kūbə̄ ngāl̄ kə *lḛ́ḛ́ ō, kūbə̄ kənda dɔ kə *lḛ́ḛ́ ō, kəlā do̰ō̰ ɓōdə̄ kə́ rāān̄ yá̰á̰ súūn gə̄ tū tə́ ō, tām̄ yā Aaro̰ tə́. 40A əjōn̄ kūbə̄ ngāl̄ gə̄ ō, kəlā gə̄ ō, jākā gə̄ ō, tām̄ yā ngán *Aaro̰ gə̄ tə́ ō. I yá̰a̰ gə̄ kə́ ɔsən̄ kum gotə yá̰á̰ kə́ to kɔsə gɔn ō, loo kə́ bo ō. 41Ā ī-tə́la kūbə̄ gə̄ ń noō rɔ̄ ngōkó̰ó̰í Aaro̰ tə́ ō, rɔ̄ ngánən gə̄ tə́ ō. Ā úr yibə̄ dɔdə́ tə́ ō, ā ə̄ndādə́ dɔ kəla tun̄ yá̰á̰ tə́ ō. Ā ɔ̄r̄ kam̄də́ tayā i tītə̄ ń noō kadə̄ rāān̄neé kəla *tun̄ yá̰a̰ yāḿ. 42A əjōn̄ kūbə̄ *lḛ́ḛ gə̄ kadə̄ əlan̄ gíŕdə́ tə́ yā kadə̄ gíŕdə́ i karī alé. 43Aaro̰ nin̄ kə ngánən gēé a əlan̄ gíŕdə́ tə́ yā kudəń kem *kújə kənge naā tə́, aĺ ɓáa yā kaw̄ń kə̄ *loo tun̄ yá̰á̰ tə́ yā rāań kəla *tun̄ yá̰a̰ kem *loo kə́ táĺ tə́. Tītə̄ ń noō ɓáa a reēn̄ kə majaĺ dɔdə́ tə́ aĺ ō, a oyn̄ aĺ ō. Nge ń noō i ndū najə̄ kə́ a to ngándáńg tām̄ yā Aaro̰ tə́ ō, tām̄ yā ngánən gə̄ tə́ ō, ngán kaan gə̄ tə́ ō.

Currently Selected:

Teē Ngán Israel gə̄ 28: BS

Highlight

Compare

Copy