Teē Ngán Israel gə̄ 29

Loo kəndā ngé tun̄ yá̰a̰ gə̄ kem kəla tun̄ yá̰á̰ tə́

1Loo kəndā ń ā ə̄ndā *Aaro̰ nin̄ kə ngánən gēé kem kəla *tun̄ yá̰a̰ yāḿ tə́ ní n toó: Ā ə́hɔ man̄g kə́ bəra kógə̄ḿ ō, bal batə̄ gə̄ jōó ō, kə́ loodə́ kógə̄ḿ nujə alé. 2Gō tə́ anī ā ún mápá kə́ karī kə́ rāā kanjə̄ *kaa mápa ō, mápá kə́ ló̰ȳ kə yibīí kə́ rāā kanjə̄ kaa mápa ō, makəla kə́ kanjə̄ *kaa mápa ba rāā yibə̄ dɔ tə́ ō. Ā ī-rāā i kə ndujə̄ gémēé. 3Ā ī-ɓōkə́də́ kem keé yā kaw̄ń kem *loo kə́ táĺ tə́ naā tə́ kə man̄g kə́ bəra ní ō, bal batə̄ kə́ jōó gə̄ ní ō.

4Ā āw̄ kə Aaro̰ nin̄ kə ngánən gēé ta *kújə kənge naā tə́ yā ndogə̄də́ man̄. 5Gō tə́ anī ā ī-tə́la kūbə̄ gə̄ yā Aaro̰ rɔ̄n tə́. I kūbə̄ *lḛ́ḛ́ kə́ ngāl̄ ō, kūbə̄ ngāl̄ ń kadə̄ epod i dɔ tə́ ní ō, epod ō, pekətoral ō. Ā ī-do̰ō̰ ɓōdə̄n kə kəlā dɔ epod ō. 6Ā ə́nda dɔn kə kūbə̄ kənda dɔɔ́ ō, ā ə́lá yá̰á̰ súū rɔ̄ ń ɔjə kadə̄ *Aaro̰ i de kə́ ɔrə̄n̄ kamə̄n tayā ní tū kūbə̄ kənda dɔ ní tə́ ō. 7Ún *yibə̄ kə́ táĺ úr dɔn tə́ ɔ̄rəń kamə̄n tayā. 8Gō tə́ anī ā ə́dá ngán Aaro̰ gə̄ kadə̄ ndɔ́tə̄n̄ kə̄ rɔ̄í tə́ ngɔr. Ā ī-tə́la kūbə̄ *lḛ́ḛ́ kə́ ngāl̄ yādə́ gə̄ rɔ̄də́ tə́ ō, 9ā ī-do̰ō̰ ɓōdə̄də́ kə kəlā yādə́ gēé ō, ā ī-tə́la jākā yādə́ gə̄ dɔdə́ tə́ ō. Əla gír kum mbang ń noō tə́ ní *Aaro̰ nin̄ kə ngánən gēé a ndin̄ kem kəla tun̄ yá̰á̰ tə́ i ngándáńg.

Loo kəndā ń ā ə̄ndādə́ kem kəla tun̄ yá̰á̰ tə́ ní n toó: 10A reēn̄ kə man̄g kə́ bəra ní ta *kújə kənge naā tə́. Aaro̰ nin̄ kə ngánən gēé a əndān̄ jīdə́ dɔn tə́. 11Ā ə́já míndə man̄g kə́ bəra ní ta kum Kɔ́ɔ̄ɓē tə́, ta *kújə kənge naā tə́. 12Ā ī-taā mósən yā kɔdə kə ta ngōn̄ jīí yā rāā ta gajə gə̄ kə́ dɔ *loo tun̄ yá̰á̰ tə́. Gotən ń a na̰y ní, ā ī-ɓōkə́ nja *loo tun̄ yá̰á̰ tə́. 13Ā ɔ̄r̄ yibə̄n kə́ dɔ tiīn gə̄ tə́ malang ō, wurən ō, mənjon kə́ jōó gə̄ naā tə́ kə yibə̄də́ kə́ gidədə́ tə́ ō, yā róō dɔ *loo tun̄ yá̰á̰ tə́. 14Nge ń noō i *yá̰a̰ tun̄ kə́ yā kadə̄ Nə́ɓā mā̰yń rɔ̄n dɔ majaĺ yā *ngé tun̄ yá̰a̰ gə̄ tə́. Gotən ń a na̰y ní, dā̰n ō, ngə̄rān ō, tiīn gə̄ ō ní, ā ī-róō horoó gidə ɓēé. 15Gō tə́ anī a reēn̄ kə bal batə̄ kə́ ta kəga dɔɔ́. *Aaro̰ nin̄ kə ngánən gēé a əndān̄ jīdə́ dɔn tə́. 16Ā ə́já míndə bal batə̄ ní, ā ī-taā mósən yā rāā dɔ *loo tun̄ yá̰á̰ tə́ kadə̄ gīr̄ gidə. 17Ā ī-gór̄yō dā̰n gə̄, ā ī-tə́go tiīn gə̄ kə njan gə̄ yā ɓōkə́ dɔ dā̰n gə̄ ní tə́ kə dɔn gēé. 18Ā ī-róō horoó malang dɔ*lo tun̄ yá̰á̰ tə́. Nge ń noō i *yá̰a̰ tun̄ kə́ róō horoó tām̄ yā Kɔ́ɔ̄ɓē tə́ kə́ sēēn nelə̄n.

19Gō tə́ anī a reēn̄ kə bal batə̄ kə́ nge ko̰ jōó. *Aaro̰ nin̄ kə ngánən gēé a əndān̄ jīdə́ dɔn tə́. 20Ā ə́já míndə bal batə̄ ní, ā ī-taā mósən yā rāā ta mbī Aaro̰ nin̄ kə ngánən gēé tə́, ta mbīdə́ kə́ ko̰ó̰ tə́. Ā ī-rāā ta bo jīdə́ kə́ ko̰ó̰ tə́ ō, ta bo njadə́ kə́ ko̰ó̰ tə́ ō. Gotə mósə́ ń a na̰y ní ā ī-rāā dɔ*lo tun̄ yá̰á̰ tə́ kadə̄ gīr̄ gidə. 21Ā ɔ́də́ mósə́ kə́ dɔ *loo tun̄ yá̰á̰ tə́ ō, *yibə̄ kə́ táĺ ō, yā sə̄kā dɔ Aaro̰ tə́ ō, dɔ kūbə̄ yān gə̄ tə́ ō. Ā ī-sə̄kā dɔ ngánən gə̄ tə́ ō, dɔ kūbə̄ yādə́ gə̄ tə́ ō. Əla gír kum mbang ń noō tə́ ní, Aaro̰ nin̄ kə ngánən gēé a télən̄ de kə́ táĺ gə̄ ō, kūbə̄ yādə́ gə̄ a télən̄ kūbə̄ kə́ *táĺ gə̄ ō. 22Ā ɔ́y loo bal batə̄ ní kə́ to yibə̄ gə̄: Kə̄lán ō, yibə̄n kə́ gidə tiīn gə̄ tə́ ō, wurən ō, mənjon kə́ jōó gə̄ naā tə́ kə yibə̄də́ kə́ gidədə́ tə́ ō, ā úń ɓúrən kə́ ko̰ó̰ ō, tɔdɔ̄ i bal batə̄ kə́ yā kəndāń deē kem kəla tun̄ yá̰á̰ tə́. 23Gō tə́ anī ā úń mápá kə́ gōr̄ kógə̄ḿ ō, mápá kə́ rāā kə yibīí kógə̄ḿ ō, makəla kógə̄ḿ ō, kem keē mápá kə́ rāā kanjə̄ *kaa mápa ń ndi no Kɔ́ɔ̄ɓē tə́ ní. 24Ā ī-ɓōkə́də́ kem jī *Aaro̰ nin̄ kə ngánən gēé tə́ malang. Ā ɔ́jə́də́ kadə̄ ndējə̄n̄ Kɔ́ɔ̄ɓē kə gō looneé#29.24 Ndējə̄n̄ Kɔ́ɔ̄ɓē kə gō looneé: Loo ndējə̄ yá̰á̰ ní n toó: Nge tun̄ yá̰a̰ a əla kum kə̄ kété (kumən na adə̄ i Nə́ɓā), gō tə́ anī téləń kum kə̄ rɔ̄n tə́ (kumən na Nə́ɓā tél adə̄n).. 25Gō tə́ anī ā ī-tél yā taā jīdə́ tə́ yā róō horoó dɔ *loo tun̄ yá̰á̰ tə́ naā tə́ kə dā̰ kə́ yā róō horoó kadə̄m̄. Nge ń noō i yá̰á̰ kə́ tun̄ kadə̄ Kɔ́ɔ̄ɓē kə́ sēēn nelə̄n. 26Īkɔ́ ā ún nganjə bal batə̄ kə́ nge ko̰ jōó ní, ā ī-ndējə̄ Kɔ́ɔ̄ɓē kə gō looneé. Ré gír gān̄g anī, nganjən ní i tām̄ yāí tə́. 27Ā ə́da de gə̄ na nganjə bal batə̄ ní ō, ɓúrən ō ń ndējə̄n̄ Kɔ́ɔ̄ɓē kə gō looneé ní na i loon kə́ *táĺ gə̄. 28I tām̄ najə̄ ń noō tə́ n ngán *Israel gə̄ a ɔrə̄n̄neé loo gə̄ ń noō tū dā̰ gə̄ ń a tɔ̄lə̄n̄ yā tun̄ kadə̄ Kɔ́ɔ̄ɓē tə́ tām̄ yā kem kógə̄ḿ tə́ ní. Nin̄ a ɔrə̄n̄ yā kadə̄ *Aaro̰ ō, ngánən gə̄ ō, ngán kaan gə̄ ō ngándáńg.

29Ré Aaro̰ oy anī, kūbə̄ yān kə́ yā ɓōĺ gidə gə̄ i tām̄ yā ngánən gə̄ tə́ ō, ngán kaan gə̄ tə́ ō. A əlan̄ rɔ̄də́ tə́ ndɔ̄ ń a urən̄neé yibə̄ dɔdə́ tə́ ō, a əndān̄neédə́ kem kəla tun̄ yá̰á̰ tə́ ō ní. 30*Nge tun̄ yá̰á̰ ń a un gotə Aaro̰ ní a ndiń rɔ̄n tə́ bátə́ ndɔ̄ sīrí. Nge tun̄ yá̰á̰ ní i ngōnən ń a udə kem *kújə kənge naā tə́, yā rāā kəla *tun̄ yá̰a̰ kem *loo kə́ táĺ tə́ ní.

31A ndīrə̄n̄ dā̰ bal batə̄ kə́ nge ko̰ jōó ń əndān̄neé *ngé tun̄ yá̰a̰ gə̄ kem kəla tun̄ yá̰á̰ tə́ ní i kem loo kógə̄ḿ kə́ *táĺ tə́. 32Aaro̰ nin̄ kə ngánən gēé a əsan̄ i ta *kújə kənge naā tə́ kə gotə mápá ń a na̰y kem keé ní. 33I nin̄ kɔ́ gə̄ ngóy n a əsan̄ yá̰á̰ ń rāān̄neé yá̰á̰ kə́ yā kadə̄ Nə́ɓā mā̰yń rɔ̄n dɔdə́ tə́ ndɔ̄ kəndādə́ kem kəla tun̄ yá̰á̰ tə́ ní ō, yá̰á̰ ń ɔrə̄n̄neé kam̄də́ tayā ní ō. De kə́ karī a əsa alé tɔdɔ̄ i yá̰á̰ kə́ yā ɓōĺ gidə. 34Dā̰ aláa mápá ń əndān̄neé deē kem kəla tun̄ yá̰á̰ tə́ ní, ré gotən na̰y adə̄ loo tīī dɔ tə́ anī, a róōn̄ i mbée horoó kɔ̄ɔ́. Deē a əsa to̰ alé, tɔdɔ̄ i yá̰á̰ kə́ yā ɓōĺ gidə. 35Yá̰a̰ gə̄ ń ā ī-rāā kə *Aaro̰ nin̄ kə ngánən gēé malang ní, ā ī-rāā i tītə̄ ń m-ɔ́jiīneé noō. Ā ə̄ndādə́ kem kəla tun̄ yá̰á̰ tə́ i ndɔ̄ sīrí. 36Ā ī-tɔ̄l̄ man̄g kə́ bəra kə dɔ ndɔ̄ gə̄ tām̄ yā majaĺ tə́, yā rāań yá̰á̰ kə́ yā kadə̄ Nə́ɓā mā̰yń rɔ̄n dɔ majaĺ tə́. Ā ī-ndējə̄ Nə́ɓā *yá̰a̰ tun̄ kə́ tām̄ yā majaĺ tə́ dɔ *loo tun̄ yá̰á̰ tə́ ō, ā ī-rāā yá̰á̰ kə́ yā kadə̄ Nə́ɓā mā̰yń rɔ̄n dɔ majaĺ tə́ dɔ tə́ ō, ā *úr yibə̄ dɔ *loo tun̄ yá̰á̰ tə́ yā kɔrə̄ń kamə̄n tayā ō. 37Ā ī-rāā yá̰á̰ kə́ yā kadə̄ Nə́ɓā mā̰yń rɔ̄n dɔ majaĺ kə́ dɔ *loo tun̄ yá̰á̰ tə́ ndɔ̄ sīrí yā kɔrə̄ń kamə̄n tayā. Gō tə́ anī *loo tun̄ yá̰a̰ a tél *loo kə́ táĺ ngá̰ý, adə̄ yá̰a̰ malang ń ɔdə rɔ̄ ní a tél yá̰á̰ kə́ táĺ.

Yá̰a̰ tun̄ kə́ róō horoó kadə̄ Kɔ́ɔ̄ɓē kə dɔ ndɔ̄ gə̄

38A tɔ̄lə̄n̄ ngán batə̄ kə́ ɓāl̄ kógə̄ḿ gə̄ jōó jōó kə dɔ ndɔ̄ gə̄ yā kadə̄m̄ dɔ *loo tun̄ yá̰á̰ tə́ ngándáńg. 39A tɔ̄lə̄n̄ ngōn̄ batə̄ kə́ ta kəga dɔ dəloí ō, kə́ nge ko̰ jōó ta loo tíbə́ tə́ ō. 40A əndān̄ ndujə̄ kem lāngá mətá dɔ ngōn̄ batə̄ kə́ ta kəga dɔ ní tə́. A ló̰ȳn̄ kə yibə̄ olibə#29.40 Olibə: Á̰a̰ī Teē 27.20 kə́ *unjə̄ njáý njáý kə́ rosə lāngá kógə̄ḿ kə núsə. A əndān̄ kasə kan̄ *kāgə̄ nduú kə́ rosə lāngá kógə̄ḿ kə núsə dɔ tə́ ō. 41A tə́ndān̄ yá̰a̰ gə̄ ń noō dɔ ngōn̄ batə̄ kə́ nge ko̰ jōó tə́ ō. I *yá̰a̰ ndējə̄ kə́ sēēn nelə̄m̄ mā Kɔ́ɔ̄ɓē. 42I dā̰ kə́ yā tɔ̄l̄ róō horoó kadə̄ Nə́ɓā ta *kújə kənge naā tə́ ngándáńg n noó. Tɔdɔ̄ j-a j-əngeī naā i loo ń noō tə́ ō, m-ā m-ɔ̄r̄ najə̄ seí i loo ń noō tə́ ō. 43J-a j-ənge naā kə ngán *Israel gēé i loo ń noō tə́. Loo ní a tél loo kə́ kɔr̄ kam̄ tayā kə ta kūl̄ yá̰á̰ kə́ to *kɔsə gɔn ń m̄-rāā tū tə́ ní. 44Mə̄kɔ́ m-ā m-ɔ̄r̄ kam̄ *kújə kənge naā ō, kam̄ *loo tun̄ yá̰a̰ ō, tītə̄ ń m-ā m-ɔ̄rəń kam̄ *Aaro̰ nin̄ kə ngánən gēé kadə̄ rāān̄ kəla *tun̄ yá̰a̰ adə̄mə̄n̄ ní. 45M-ā m̄-ndi dan ngán Israel gə̄ tə́ ō, mā i Nə́ɓā yādə́ ō. 46Loo ń noō tə́ a gerə̄n̄ kadə̄ i mā n i Kɔ́ɔ̄ɓē Nə́ɓā yādə́ ń teē sedə́ kem ɓē kə́ Ejiptə tə́ kɔ̄ɔ́ yā ndi dɔ dáńdə́ tə́ ní. Mā i Kɔ́ɔ̄ɓē Nə́ɓā yādə́.

Currently Selected:

Teē Ngán Israel gə̄ 29: BS

Highlight

Compare

Copy