Teē Ngán Israel gə̄ 30

Loo róō ndujə̄ yá̰á̰ kə́ kotə majə

1Gō tə́ anī a rāān̄ *loo róō ndujə̄ yá̰á̰ kə́ kotə majə kə kāgə̄ akasiya. 2Ngālən i kíĺ kógə̄ḿ ō, laan i kíĺ kógə̄ḿ ō. Ngālən gē laan gē asən̄ naā, ba ngālən kə́ kə̄ dɔɔ́ i kíl jōó. A rāān̄ gajən gə̄ ta tə́ dɔɔ́ adə̄ gajən gē rɔ̄n gē a əhɔn̄ ta naā. 3A rāān̄ gidə kə lɔ́ŕ kə́ *unjə̄ njáý njáý dɔ tə́ ō, tū gajən gə̄ tə́ ō, dām̄ kadən kə́ sɔ́ gə̄ tə́ ō. A rāān̄ bɔ̄gə̄ tan kə lɔ́rɔ́ kadə̄ gīr̄ gidə əla ta naā tə́ ō. 4A rāān̄ nə̄ngá lɔ́r gə̄ jōó yā tə́la kadən gə̄ tə́ dām̄ jōó gír bɔ̄gə̄ tan ní tə́. A tə́lan̄ sáā kāgə̄ gə̄ kum nə̄ngá gə̄ ní tə́ yā kətōń *loo róō ndujə̄ yá̰á̰ ní. 5Sáā kāgə̄ gə̄ ní a tə́gān̄ i kāgə̄ akasiya gə̄ n a rāān̄neé ní ō, a rāān̄ lɔ́r gidə tə́ ō. 6A əndān̄ *loo róō ndujə̄ yá̰a̰ i no kūbə̄ ń gāngə̄n̄neé gír loo ń a əndān̄ sandúkə ndū najə̄ tū tə́ á i loo kənge naā yājí jḭḭ seí ní tə́. 7*Aaro̰ a róō ndujə̄ yá̰a̰ dɔ tə́ i kə dɔ ndɔ̄ gə̄, kə kum mbang kə́ dəloí ń a aw̄ a kūsə́nń ta kəlā hor gə̄ kə́ kem *loo kə́ táĺ tə́ ní ō, 8kə kum mbang ń a aw̄ a əndāń hor ta jī loo tíbə́ tə́ ní ō. A róōn̄ ndujə̄ yá̰a̰ dɔ tə́ ngándáńg yā rɔȳm̄neé. 9Deē a róō ndujə̄ yá̰á̰ kə́ karī dɔ tə́ aĺ ō, *yá̰a̰ ndējə̄ kə́ yā róō horoó dɔ tə́ aĺ ō, deē a ndējə̄ kōō dɔ tə́ aĺ ō, a tə́te kasə kə́ ndējə̄ dɔ tə́ aĺ ō. 10*Aaro̰ a rāā yá̰á̰ kə́ yā kadə̄ Nə́ɓā mā̰yń rɔ̄n dɔ majaĺ gə̄ kə́ dɔ tə́ tə́ i nja kógə̄ḿ kə dɔ ɓāl̄ gə̄. A rāā mósə dā̰ kə́ tun̄ tām̄ yā majaĺ tə́ tū gajə gə̄ kə́ dɔ *loo róō ndujə̄ yá̰á̰ ní tə́ kə dɔ ɓāl̄ gə̄. A ɔrə̄n̄ kam̄ *loo róō ndujə̄ yá̰á̰ ní tām̄ yāḿ tə́, a rāānən̄ *loo kə́ táĺ ngá̰ý tə́.

Lambóó kə́ tām̄ yā loo kə́ táĺ tə́

11Kɔ́ɔ̄ɓē əda Moijə na:

12Ngán Israel gə̄ ń ā ī-tə́da kutədə́ ní, ré ā ī-ndang rīdə́ yā tə́dańdə́ anī, a adə̄mə̄n̄ yá̰á̰ kə́ yā gāngəń dɔ rɔ̄də́ kə dɔdə́ gēé, na sōgə́ yá̰á̰ kə́ tōr̄ əsō dɔsí tə́ loo tə́da kutə de gə̄ tə́. 13De kə́ dəngam gə̄ ń a tə́dan̄ kutədə́ ní a adə̄n̄ njár̄ sə́lē kə́ rāā kə gində̄ arjā̰a̰á̰ kógə̄ḿ kógə̄ḿ kə dɔdə́ gēé, i núsə nar ń a əsan̄ kem *loo kə́ táĺ tə́ ní. Nge ń noō i lambóó kə́ tām̄ yā Kɔ́ɔ̄ɓē tə́. 14De kə́ dəngam gə̄ malang ń ɓāl̄də́ ḭḭ dɔ kutə jōó tə́ ta kaw̄ kə̄ dɔɔ́ á tə́dan̄də́ ní a əgān̄ lambóo yā Kɔ́ɔ̄ɓē. 15Lambóó ń a əgān̄ Kɔ́ɔ̄ɓē yā gāngəń dɔ rɔ̄də́ ní, de kə́ nge kənge yá̰á̰ ngá̰ý a adə̄ kadə̄ a mān̄ dɔ aĺ ō, de kə́ nge ndoō a adə̄ kadə̄ a dūú gō tə́ aĺ ō. 16Ré ī-taā nar gān̄g dɔ rɔ̄ ní jī ngán *Israel gə̄ tə́ oy anī, ā ī-rāań kəla *kújə kənge naā yā kadə̄ əgań kemḿ dɔ ngán Israel gə̄ tə́ kadə̄ m̄-ngɔ̄məńdə́.

Bay kə́ yā ɓōkə́nń man̄ tə́go rɔ̄

17Kɔ́ɔ̄ɓē əda Moijə na:

18Ā ī-rāā bay gində̄ nə̄ngá kasə kə́ kə njaneé tām̄ yā man̄ tə́go rɔ̄ tə́. Ā ə̄ndān dɔ dáń *kújə kənge naā tə́ kə *loo tun̄ yá̰á̰ yā ɓōkə́ man̄ kemeé. 19*Aaro̰ nin̄ kə ngánən gēé a tə́gon̄ jīdə́ gē njadə́ gē i kə man̄ kə́ kem bay ní tə́. 20-21Ré a rāān̄ yā kudə kə̄ kem *kújə kənge naā tə́ aláa yā kaw̄ kə̄ ta *loo tun̄ yá̰á̰ tə́ yā *tun̄ yá̰a̰ dɔ tə́ kadə̄m̄ anī, a tə́gon̄ jīdə́ gē njadə́ gē kə man̄ kə́ kem bay ní tə́ na sōgə́ oyn̄. I ndū najə̄ kə́ a to ngándáńg tām̄ yādə́ tə́ ō, tām̄ yā ngáńdə́ gə̄ tə́ ō, tām̄ yā ngán kaadə́ gə̄ tə́ ō.

Yibə̄ kə́ táĺ

22Kɔ́ɔ̄ɓē əda Moijə na:

23Ī-sāā yá̰á̰ kə́ kotə majə majə gə̄, nō kāgə̄ míŕ kə́ to man̄ lāngá mí ō, yibə̄ kāgə̄ sinamon lāngá jōó kə núsə ō, yibə̄ kāgə̄ kanel lāngá jōó kə núsə ō, 24yibə̄ kāgə̄ kásə lāngá mí ō, kə gō yá̰a̰ mbɔ̄jə́ yá̰á̰ kə́ kem *loo kə́ táĺ tə́ ō, yibə̄ kan̄ *kāgə̄ olibə lāngá mehḛ́ ō. 25Nge rāā yibə̄ a guŕdə́ naā tə́ yā rāań *yibə̄ kə́ táĺ. Yibə̄ ń noō i *yibə̄ kə́ táĺ. 26Ā úr dɔ *kújə kənge naā tə́ ō, dɔ *sandúkə ndū najə̄ tə́ ō, 27dɔ tábəl tə́ ō, dɔ yá̰a̰ rāā kəla gə̄ kə́ dɔ tə́ tə́ ō, dɔ ɗəra hor tə́ ō, dɔ yá̰a̰ rāā kəla gə̄ kə́ dɔ tə́ tə́ ō, dɔ *loo róō ndujə̄ yá̰á̰ kə́ kotə majə tə́ ō, 28dɔ *loo tun̄ yá̰á̰ kə́ yā róoń dā̰ kə́ tɔ̄l̄ tə́ ō, dɔ yá̰a̰ rāā kəla gə̄ kə́ dɔ tə́ tə́ ō, ā úr dɔ bay tə́ ō, dɔ njan tə́ ō. 29Ré ɔ̄r̄ kam̄də́ oy anī, a télən̄ yá̰á̰ kə́ *táĺ ngá̰ý gə̄, adə̄ yá̰a̰ malang ń a ɔdə rɔ̄də́ ní a tél yá̰á̰ kə́ táĺ. 30Ā úr yibə̄ ní dɔ *Aaro̰ tə́ ō, dɔ ngánən gə̄ tə́ ō, yā kɔrə̄ń kam̄də́ tayā kadə̄ rāān̄neé kəla *tun̄ yá̰a̰ adə̄mə̄n̄. 31Ā ə́dá ngán *Israel gə̄ na yibə̄ ń noō i *yibə̄ kə́ táĺ. I yibə̄ kə́ a rāān̄neé i kəla yā Kɔ́ɔ̄ɓē ngóy kə dɔ ɓāl̄ gə̄. 32Deē a rāā rɔ̄n tə́ aĺ ō, deē a ndájə̄ loo rāān aĺ ō. I *yibə̄ kə́ táĺ adə̄ ī-ɓōlíī gidə, tɔdɔ̄ i yá̰á̰ kə́ yā ɓōĺ gidə. 33Ré de kə́rēý rāā yibə̄ kə́ to tītə̄ nge ń noō rāā rɔ̄ de kə́ karī tə́ anī, a ɔrə̄n̄ kɔ́ɔ̄ dan ngán Israel gə̄ tə́ kɔ̄ɔ́.

Loo rāā ndujə̄ yá̰á̰ kə́ kotə majə

34Kɔ́ɔ̄ɓē əda Moijə na:

Ī-sāā yá̰á̰ kə́ kotə majə gə̄: Setorakəsə ō, ambər ō, galbanum ō, kajaja kə́ *unjə̄ njáý njáý ō. Ī-sāā ādə̄ asə naā. 35Nge tɔ́sə̄ dɔ ndujə̄ yá̰á̰ kə́ kotə majə gə̄ naā tə́ a guŕdə́ naā tə́ ō, a rāā katə̄ tū tə́ ō. Ni ń noō i yá̰á̰ kə́ kotə majə kə́ *unjə̄ njáý njáý ō, kə́ yā ɓōĺ gidə ō. 36Ā úń núsən yā rúndə̄, rāā ndujə̄n kəndā no bar mbal̄ ndū najə̄ gə̄ tə́ kem *kújə kənge naā tə́, loo ń j-a j-ənge naā seí tū tə́ ní tə́. Ni ń noō i yá̰á̰ kə́ *táĺ ngá̰ý tām̄ yāsí tə́. 37Deē a ndájə̄ loo rāān yā rāań ndujə̄ yá̰á̰ kə́ kotə majə kə́ tām̄ yā kəla kə́ karī tə́ alé. Ā ī-rāā niī i yá̰á̰ kə́ kɔr̄ kam̄ tayā tə́ tām̄ yā Kɔ́ɔ̄ɓē tə́. 38Ré de kə́rēý rāā ndujə̄ yá̰á̰ kə́ kotə majə kə́ to tītə̄n yā kotə sēēn anī, a ɔrə̄n̄ kɔ́ɔ̄ dan ngán *Israel gə̄ tə́ kɔ̄ɔ́.

Currently Selected:

Teē Ngán Israel gə̄ 30: BS

Highlight

Compare

Copy